1 Samuel 20 - AHYERƐLƐ KRONGRON

Yonatan boka Dawide maa ɔnwati

¹ Dawide nwatili fili Nayote bɔ ɔwɔ Rama, na ɔhɔle Yonatan berɛ oobisale ye kyɛ, “Mayɔ nzu? Nzikyɛ mvomsoɛ yeɛ mayɔ ɔ? Nzikyɛ bɔne yeɛ mayɔ matia wɔ baba bɔ yiti ɔpena me ku me ye?”

² Na Yonatan buale ye kyɛ, “Nyameɛ pa gua! Ongohu wɔ. Tie, me baba nyɔ nikye fee, kyɛ piri oo, kyɛ kãa oo, bɔ ɔmmɔ me amaneɛ ɔ. Ɔkɔyɛ sɛɛ bɔ me baba kɔfa sɔ dwirɛ he kɔfea me ɔ? Menne menni!”

³ Na Dawide koso buale kyɛ, “Wɔ baba se ye pefee kyɛ ekuro me dwirɛ, yiti wayɛ ye adwene kyɛ, ‘Mengɔma Yonatan ngɔte ye nwo bie, anyɔ a ɔkɔyɛ ye yea.’ Nakoso nahorɛ nu, kyɛ AWURADE te ase ye, ná wɔ kra koso te ase ye, ewue li me mvanvando.”

⁴ Na Yonatan sele Dawide kyɛ, “Bɔ ekuro kyɛ meyɔ mema wɔ biala, ngɔyɔ.”

⁵ Yeɛ Dawide buale Yonatan kyɛ, “Ɛhema yeɛ ɛsraen kofi maa yɛkɔto poen ɔ. Na sɛ Nana to poen kyɛ odidi a, ɔnzɛ kyɛ meye me nwo mefi nu. Nakoso ma me ate ma ngɔmvea eburo toonn ma odwu ye ɛlɛsa ne aso nɔsoa.

⁶ Sɛ wɔ baba bisa me boso a, ka kyɛ, ‘Dawide srɛle me ate serɛserɛ kyɛ ɔ́bɔ hwii kɔ ye kuro Betlehem, ofikyɛ ye abusua ne amukoraa bɛ́bɔ afoɛnoa afɔleɛ wɔ berɛ.’

⁷ Sɛ ode to nu a, ye de w’akoaa ti ngoa; nakoso sɛ ɔfɛ yaa a, ye de nwu ye kyɛ adwene tɛɛ awa ye ti anu.

⁸ Nwu w’akoaa anwumvoin, ofikyɛ ama w’akoaa ne wɔ bayɛ apam wɔ AWURADE dumaa nu. Sɛ medi fɔ a, ye de wɔ bɔbɔ ku me. Nzu ati yeɛ ɔsɛ kyɛ ɛfa me kɔma wɔ baba ɔ?”

⁹ Na Yonatan buale kyɛ, “Sɔ dwirɛ ne ngɔto wɔ le! Sɛ mese kyɛ me baba abɔ wɔ nwo porɛ kyɛ okohu wɔ a, aso ahaa mengɔhã mengohyire wɔ?”

¹⁰ Yeɛ Dawide bisale Yonatan kyɛ, “Sɛ wɔ baba bua wɔ ɛyaa so a, nwa yeɛ ɔkɔha kohyire me ɔ?”

¹¹ Na Yonatan buale Dawide kyɛ, “Bra ma yɛhɔ eburo dɔ.” Yiti bɛ munyɔ bɛhɔle eburo dɔ.

¹² Afei Yonatan sele Dawide kyɛ, “AWURADE Yisrael Nyameɛ te danzeniɛ, kyɛ ɛhema anaa ɛhema si bekye sɔa ala, sɛ menwu me baba adwene, ná wɔ nwo adwene paa wɔ ye ti anu a, aso mengɔsoma ma bɛngɔɔye wɔ asotire anaa?

¹³ Nakoso sɛ me baba anya adwene kyɛ okoli wɔ awue, ná sɛ manna ye ali mangyire wɔ ma angɔ asomdwee nu a, ye de AWURADE otua me Yonatan so kerɛ piri paa. Mesrɛ kyɛ AWURADE ogyina wɔ si, kyɛbɔ ogyi me baba si ne.

¹⁴ Sɛ nde ngoa nu a, fa me abiɛngoɛ nahorɛ nu kyɛbɔ ɔsɔ AWURADE nye ɔ. Yeɛ sɛ mewu koso a,

¹⁵ wɔ nahorɛ abiɛngoɛfalɛ ne, nnɛyakyi ye falɛ wɔ m’abusua nu. Na sɛ AWURADE ma Dawide pɔfoɛ mɔ bɛ boso nua fi aseɛ ye aso po a, m’abusua de, nnɛyakyi ye abiɛngoɛfalɛ le.”

¹⁶ Na Yonatan ne Dawide awuro ama yɛle apam kyɛ, “AWURADE tɔ Dawide pɔfoɛ mɔ so wereɛ!”

¹⁷ Yonatan mane Dawide tale ndaen bieku kyɛ okuro ye dwirɛ; ofikyɛ né Yonatan kuro Dawide dwirɛ kyɛ ye bɔbɔ ye nwo.

¹⁸ Na Yonatan sele ye kyɛ, “Ɛhema yeɛ ɛsraen kofi maa yɛkɔto poen ɔ, na ebiala konwu ye kyɛ ɛnne berɛ bie, ofikyɛ wɔ bia ne kɔla berɛ mbaen.

¹⁹ Na ye ɛlɛsa ne aso, kɔ dedeede kɔfea nekaa bɔ ɛɛfeale daa ne, ná fea Esel nyɔboɛ ne asi.

²⁰ Ngɔto agyaen nza ngɔwa ye nwo berɛ, kyɛ ebiaa méto méwɔ nikyee bie ne.

²¹ Na ngɔsoma me somvoɛ abɛɛmaa ne kyɛ, ‘Kɔ, kɔpena agyaen nemɔ!’ Sɛ mekã mekyire abɛɛmaa ne kyɛ, ‘Nea, agyaen nemɔ wɔ wɔ bue faen, sesa bra’ a, ye de fite bra. Kyɛ AWURADE te ase ye, ɔte asomdwee ma wɔ, na wɔ ti ngeka.

²² Nakoso sɛ mekã mekyire abɛɛmaa ne kyɛ, ‘Nea, agyaen nemɔ wɔ wɔ nyunu moa dɔ’ a, ye de nwati kɔ, ofikyɛ okyire kyɛ AWURADE yeɛ wama wɔ ate kyɛ ɛhɔ ɔ.

²³ Na apam bɔ me ne wɔ yayɛ ne de, AWURADE te yɛ munyɔ y’afia danzeniɛ afebɔɔ.”

²⁴ Yiti Dawide ɔɔfeale eburo dɔ. Na ɛsraen ne fili ne, Nana Sɔɔlo tenane ase wɔ poentolɛ bo kyɛ odidi.

²⁵ Nana Sɔɔlo tenane ye bia so mane ye si hɔle terɛ ne anwo dɔ, kyɛbɔ ɔyɔ ye daa ne. Yonatan gyinane berɛ, na Abenɛ tenane Sɔɔlo nwo berɛ; nakoso né Dawide bia ne la berɛ mbaen.

²⁶ Sɔɔlo anga hwee sɔ kyẽa ne, ofikyɛ osusuli kyɛ, “Nikyee bie asi ye ate, ye nwo agua fiɛ, amba ye nwo agua fiɛ.”

²⁷ Nakoso ɛsraen ne fili ne, ye kyẽa bɔ ɔtɔ so nyɔ ne aso, né Dawide bia ne la berɛ mbaen. Na Sɔɔlo bisale ɔwa Yonatan kyɛ, “Yese awa ne, anoma ne ɛnɛ, nzu ati yeɛ wamma poentolɛ ye abo bie ye?”

²⁸ Yeɛ Yonatan buale Sɔɔlo kyɛ, “Dawide srɛle me ate serɛserɛ kyɛ ɔ́bɔ hwii kɔ Betlehem.

²⁹ Ɔnwa: ‘Mesrɛ wɔ ala, ma me ate ma ngɔ, ofikyɛ m’abusua kwaabɔ afɔleɛ wɔ kuro berɛ, na nniɛma ahyɛ me kyɛ mmra berɛ bie. Yiti mesrɛ wɔ ala, ma me ate ma ngonwu nniɛma nemɔ.’ Nana, ɛhe ati yeɛ wamma wɔ poentolɛ ye abo bie ɔ.”

³⁰ Afei Sɔɔlo ahone huli Yonatan so, na osele ye kyɛ, “Wɔ, brasua sanzaniɛ sɛkyefoɛ awa! Ɛnwa nzɛ menze kyɛ afa wɔ nwo abɔ Yese awa ne, bɔ ɔnate so égua wɔ ne eni nyunu ase ɔ?

³¹ Na mmerɛ bɔ Yese awa ne ɔtɛte ase ye de, wɔ anaa w’ahennie ngogyina. Maa bɛɛfa ye bɛbrɛ me kekesaala ye, ofikyɛ ɔfata kyɛ beku ye ɔ.”

³² Na Yonatan bisale ye baba kyɛ, “Nzu ati yeɛ ɔsɛ kyɛ beku ye ɔ? Nzikyɛ yeɛ wayɔ ɔ?”

³³ Na Sɔɔlo tole ye pealɛɛ ne kyɛ ɔfa ku Yonatan, na ɛhe mane Yonatan nwuni ye kyɛ ye baba asua Dawide so kyɛ okohu ye.

³⁴ Yonatan fɛle yaa hahii dwɔso fili poentolɛ ne abo. Yiti ɛsraen fili ne, ye kyẽa bɔ ɔtɔ so nyɔ ne, wanni hwee; ofikyɛ olili Dawide nwo aworabɔlɛ, yeɛ afei koso né ye baba agua ye nyunu ase.

³⁵ Aleɛ hyene ngyerɛmɔ ne, Yonatan hɔle eburo dɔ, nekaa bɔ ɔne Dawide beli besiele kyɛ ɔɔfea ne, na ɔfale somvoɛ abɛɛmaa bie bokale ye nwo so.

³⁶ Osele abɛɛmaa ne kyɛ, “Tu amirika kɔpena agyaen bɔ mebaatoto megua dɔ ne.” Abɛɛmaa ne tuli amirika bɔ ɔkɔ nen, ɔtole agyaen nemɔ maa bɛtrale ye beeguale ye nyunu moa dɔ.

³⁷ Na abɛɛmaa ne dwuli nekaa bɔ Yonatan agyaen nemɔ beeguale nen, Yonatan tole abɛɛmaa ne huuu kyɛ, “Nea! Aso nna wɔ nyunu moa dɔ yeɛ agyaen nemɔ wɔ ɔ?”

³⁸ Yonatan tole abɛɛmaa ne huuu bieku kyɛ, “Ka wɔ nwo, ma wɔ nwo yɛ nyera, nnɛgyina berɛ!” Yiti Yonatan abɛɛmaa ne sesale agyaen nemɔ, na osa wale ye mene nwo berɛ.

³⁹ Nakoso né abɛɛmaa ne nze bɔ ɔ́kɔ so ɔ. Yonatan ne Dawide ngome yeɛ né bɛse bɔ ɔ́kɔ so ɔ.

⁴⁰ Yonatan fale ye akodeɛ ne mane abɛɛmaa ne, na osele ye kyɛ, “Fa kɔ awuro.”

⁴¹ Abɛɛmaa ne fili berɛ hɔle pɛ yeɛ Dawide fili nyɔbotaen ne asi fitele ɔ. Ɔtole ye nwo yele aseɛnwo berɛ fale ye nyunu butuli berɛ, na ɔbɔle ye ti ase pɛen nza. Bɛtotɔle bɛ nwo nu, besuni, na Dawide aworabɔlɛ deɛ bole so.

⁴² Afei Yonatan sele Dawide kyɛ, “Kɔ asomdwee nu, ɔnate kyɛ yɛ munyɔ yata ndaen wɔ AWURADE dumaa nu, kyɛ, ‘AWURADE di yɛ munyɔ y’afia adanzeɛ, yeɛ odi me bosofoɛ ne wɔ bosofoɛ koso adanzeɛ daa.’ ” Yeɛ Dawide sili nu hɔle, na Yonatan de, osa hɔle awuro.