1 Samuel 2 - AHYERƐLƐ KRONGRON

Hana ye Nyameɛ ayɛ

¹ Afei Hana bɔle mbaeɛ kyɛ, “Me wora akyekye wɔ AWURADE nu; AWURADE nu yeɛ m’anwoserɛ wɔ ɔ. Mesere me pɔfoɛ mɔ, me nye gye, ofikyɛ ali ngonim ama me.

² Ebiala nne berɛ bɔ ɔte krongron kyɛ AWURADE ɔ, amba, ebiala nne berɛ bɔ ɔte kyɛ wɔ ɔ; Nyɔbotaen biala nne berɛ bɔ ɔte kyɛ yɛ Nyameɛ ɔ.

³ Nnɛma ɛmɔka nduhoɛ dwirɛ mbiri mbiri ko, nnɛmɔma anwomasoɛ dwirɛ fi ɛmɔ noa nu ba; ofikyɛ AWURADE te Nyameɛ bɔ onwu nikyee biala ɔ, na ye yeɛ obua ebiala yɔleɛ nwo ndɛen ɔ.

⁴ Wama anwoserɛfoɛ agyaen mɔ nu abubu, nakoso bɛ bɔ bɛyɛ mmerɛ ne de, ɔmaa benya anwoserɛ.

⁵ Bɛ bɔ né bɛ ko ayi ne, afei de bekoli paa koraka né banya aleɛ bali, nakoso bɛ bɔ né ɛhɔen apɛ bɛ ne, afei de aleɛ abu bɛ so. Mmotaen braa wawo nzoo, nakoso braa bɔ ye mma pee ne, afei de waha ye ngome.

⁶ AWURADE yeɛ oku, ná osa ma ngoa ɔ; ye yeɛ ɔmaa bɛkɔ ɛborɔ, ná osa maa bedwɔso befi dɔ bɛba ɔ.

⁷ AWURADE yeɛ ɔma ebie di hiaa, ná osa ma ebie nya ye nwo ɔ; ye yeɛ ɔbrɛ sona ase, ná osa pagya sona ɔ.

⁸ Ɔma ehianiɛ so fi asefuo nu, na ɔma sona bɔ ɔyɛ anwumvo ɔ so fi fofoɛ so, maa ɔtena atitirefoɛ nu, na ɔmaa onya animnyam bia tena so. Ofikyɛ aseɛ nyinasoɛ nemɔ, AWURADE deɛ ɔ, na nyinasoɛ nemɔ so yeɛ wafa ewiase wasie ɔ.

⁹ Ɔbɔ ye anwoteefoɛ nwo waen wɔ atee biala so, nakoso amumuyɛɛfoɛ de, bewuwu aworabɔlɛ wue; ofikyɛ nna anwoserɛ yeɛ sona fa di ngonim ɔ.

¹⁰ Okoyie AWURADE pɔfoɛ mɔ pasapasa, Anwuro Anwuro Nyameɛ kɔbɔ nu kurudududu kofi nyameɛso kogua bɛ so, AWURADE kobua aseɛ so amukoraa ndɛen, ɔkɔma ye hene ne anwoserɛ, na ɔkɔma bɔ wapopa ye ngoo ne konya tumi.”

¹¹ Afei Ɛlkana hɔle ye kuro Rama, nakoso akwadaa ne de, ɔhale ɔsɔfo Eli berɛ yɔle AWURADE adwuma.

Eli mma mmienzua nemɔ

¹² Eli mma nemɔ, né bɛte busuefoɛ mmenia. Né bɛmva AWURADE bɛnyɛ huu;

¹³ asɔfo asɛdeɛ bɔ bɛyɔ bɛma maen ne koso, né bɛtoto ye ase. Sɛ ebie ba bɔ afɔleɛ, ná naen ne gyi see so a, ɔyɛ a somvoɛ bɔ ɔso ɔsɔfo ne, ɔfa ateɛ anoa tworɔntworɔn bie tira ba,

¹⁴ na ɔfa wura turonzemaa anaa dadesɛn anaa bua anaa kukue ne anu. Na naen biala bɔ ateɛ anoa tworɔntworɔn ne kɔye kɔwa ne, ɔsɔfo ne fa. Sɔ yeɛ né bɛfa bɛyɔ Yisraelfoɛ amukoraa bɔ bɛba Silo ɔ.

¹⁵ Asa koso, anzana bɛkɔyera naen loe nen, ɔyɛ a somvoɛ bɔ ɔso ɔsɔfo ne bakã kyire sona bɔ ɔ́bɔ afɔleɛ ne kyɛ, “Ɔsɔfo ngole wɔ naen bɔ ato ne, naen monɛ yeɛ okole ɔ; yiti ma me naen monɛ ne bie ma ngɔma ye ma ɔtoto.”

¹⁶ Na sɛ sona ne bua ye kyɛ, “Maa bɛyera ɛloe ne koraka né afa bɔ ekuro ɔ” a, ye koso obua kyɛ, “Daabi, fa ma me kekesaala ye. Anyɔ sɔ a, ngɔfa ye anyeborolɛ so!”

¹⁷ Yiti mmerandeɛ nemɔ bɔne yɛle piri wɔ AWURADE nyunu, ofikyɛ bamva anidie bamma AWURADE afɔleɛ nemɔ.

Samuel wɔ Silo

¹⁸ Né Samuel de, ɔte akwadaa bɔ ɔso AWURADE ɔ. Né owura ɔsɔfo somvoɛ ataadeɛ bɔ ɔte nwera ɔ.

¹⁹ Né ɔyɛ a, ye maame nwo ngwalaa ataadeɛ bie ma ye afoɛ biala. Sɛ ɔne ohu bɛkwaabɔ afoɛnoa afoɛnoa afɔleɛ ne wɔ Silo a, yeɛ né ɔfa kɔma ye ɔ.

²⁰ Na ɔyɛ a Eli yira Ɛlkana ne ɔye kyɛ, “Mesrɛ kyɛ AWURADE ɔfa braa he aso ma enya mmaa bɔ bekosi bɔ wafa wahyɛ AWURADE ne gya nu ɔ.” Na ɛhe asi ne, besa bɛkɔ bɛ kuro.

²¹ AWURADE lole Hana, ɔnwonzɛle, na osa wole mmienzua nza ne mmrasua nyɔ. Na akwadaa Samuel nyini wɔ AWURADE solɛ adwuma ne anu.

Eli bɔ ye mma nemɔ kɔkɔ

²² Afei né Eli ayɛ panyi paa. Na ɔtele nikyee biala bɔ ye mma nemɔ bɛfa bɛyɔ Yisrael amukoraa ne. Osa tele kyɛ bɛ ne mmrasua bɔ bɛso wɔ ɛtena sua atenaleɛ nu anoa nu berɛ ne bɛda.

²³ Na osele ye mma nemɔ kyɛ, “Nzu ati yeɛ ɛmɔbɔ sɔ bra ye? Ɛmɔ brabɔne bɔ ɛmɔbɔ ne, mete mefi mmenia ne amukoraa berɛ.

²⁴ Daabi, me mma, ɛ́mɔyakyi! Edwirɛ bɔ AWURADE mmenia bɛkeka maa mete ne, ɔtte mayee.

²⁵ Sɛ ebie yɔ bɔne tia obiɛngo a, ebie kɔpa kyerɛ kɔma ye wɔ Nyameɛ nyunu, nakoso sɛ ebie yɔ bɔne tia Nyameɛ a, nwa yeɛ ɔkɔpa kyerɛ kɔma ye ɔ?” Nakoso bandie bɛ se dwirɛ, ofikyɛ né AWURADE ayɛ kyɛ okohu bɛ.

²⁶ Abɛɛmaa Samuel hɔle so nyini, na ɔsɔle AWURADE ne kuro sona nye.

Eli abusua nwo ngɔmhyɛlɛ

²⁷ Nyameɛ sona bie wale Eli berɛ oosele ye kyɛ, “AWURADE nwa nyoo, ‘Mmerɛ bɔ né wɔ nana mɔ bɛte ngoaa bewura Faro bo wɔ Misraim ne, aso manye me nwo ali mangyire wɔ nana mɔ?

²⁸ Nneaneane nu nyele ye mvili Yisrael mmusua kure amukoraa nu kyɛ ɔɔyɛ ɔsɔfo ma me, kyɛ ɔhɔ m’afɔleɛ bokyea nwo, ɔ́yera ɛyɛɛ, ná ówura ɔsɔfo ataadeɛ ógyina me nyunu. Na see so afɔleɛ mukoraa bɔ Yisraelfoɛ bɛbɔ bɛma me ne, mva nwurale wɔ nana abusua ne sa.

²⁹ M’afɔleɛ ne m’afɔleɛ nningyein bɔ mahyɛ kyɛ bɛbɔ ye wɔ m’atenaleɛ ne anu ne, nzu ati yeɛ ɛmɔbu ye animtia ɔ. Nzu ati yeɛ ebu wɔ mma mɔ tra me ɔ, bɔ ɛmɔfẽ me maen Yisrael b’afɔleɛ ne anu paa bedi bɛdɔ ɔ?’

³⁰ Yiti AWURADE Yisrael Nyameɛ nwa nyoo, ‘Nhyɛle bɔ kyɛ w’abusua ne wɔ nana abusua bekoli sɔfo bɛkɔso me daa.’ Nakoso kekesaala ye de, AWURADE nwa: ‘Mengɔma sɔ dwirɛ ne ngɔyɛ adwuma! Ofikyɛ bɛ bɔ bedi me ni ne, me koso ngoli bɛ ni, yeɛ bɛ bɔ betiatia me nyunu ne, me koso mengɔfa bɛ ngɔyɛ huu.

³¹ Tie, mmerɛ bie ɔ́ba bɔ ngole wɔ sa nu tumi, ɔne wɔ nana abusua sa nu tumi, na ɔnate so w’awuro ama nu kobu gyeingyein bɔ ebiala ngonyi ngɔyɛ aworowaa ɔ.

³² Ekonwu kyɛbɔ Nyameɛ kɔmaa okoyie Yisrael yé ne amukoraa, na ɔkɔyɛ wɔ anyeboro; na w’awuro ama nu kobu gyeingyein bɔ ebiala ngonyi ngɔyɛ aworowaa ɔ.

³³ Nakoso wɔ bosoniɛ ko nya ye ti didi nu po, na memaa ɔyɔ m’afɔleɛ bokyea nwo adwuma po a, okosũ alaa kɔma ye wora kɔbɔ. Na w’awuro ama mukoraa kɔtotɔ ngrandɛ noa.

³⁴ Na bɔ ɔkɔto wɔ mma nyɔ Hofini ne Finehase ne de, ɔkɔyɛ sɛngyerɛnneɛ kɔma wɔ: bɛ munyɔ bekowu ɛlɛho.

³⁵ Me de, ngɔtete ɔsɔfo nahorɛniɛ ko ngɔma me bɔbɔ me nwo, na ye yeɛ okoli m’ahone nu dwirɛ ne me nhyehyɛleɛ so ɔ. Ngɔma ye bosofoɛ koli sɔfo kɔhyɛ, na okoli sɔfo afebɔɔ kɔso sona bɔ mapopa ye ngoo ne.

³⁶ Na wɔ bosoniɛ biala bɔ ɔkɔha ne, ɔkɔhɔ ɔsɔfo ne berɛ kɔɔkoto kɔsrɛ ye sikaa ne aleɛ, na ɔkɔha kyɛ, Mesrɛ wɔ ala, fa ɔsɔfo adwuma ne ko maa nyɔ, ná nya aleɛ kãa nni.’ ”