1 Samuel 19 - AHYERƐLƐ KRONGRON

Yonatan ka bie ma Dawide

¹ Sɔɔlo ha hyirele ɔwa Yonatan ne ye somvoɛ amukoraati kyɛ benya Dawide a behũ ye. Nakoso né Sɔɔlo awa Yonatan kuro Dawide dwirɛ.

² Na Yonatan tiale Dawide gya so kyɛ, “Me baba Sɔɔlo pena wɔ ku wɔ, yiti nea wɔ nwo yé ɛhema ngyerɛmɔ. Pena nekaa bie kɔfea konn.

³ Ngoogyina me baba anwo berɛ wɔ eburo dɔ, nekaa bɔ ɛkɔɔfea ne, na ngɔhã edwirɛ bɔ ɔfa wɔ nwo ngohyire me baba. Na sɛ mete edwirɛ ne anwo bie a, ngɔma wɔ so kɔte.”

⁴ Yonatan hane Dawide nwo dwirɛ paa hyirele ye baba Sɔɔlo kyɛ, “Nana, ɔnzɛ kyɛ ɛfa edwirɛ tɛɛ biala edi wɔ somvoɛ Dawide, ofikyɛ ɔyyɔle bɔne biala ottiale wɔ, yeɛ bɔ wayɔ amukoraa koso wayɔ wafa waso wɔ.

⁵ Ofikyɛ ɔfale ye ngoa tole serewa oohuni Filistiniɛ ne, na AWURADE lili ngonim pirikua mane Yisrael amukoraati. Enwuni ye, na ɔyɛle wɔ fɛ. Na nzu ati yeɛ ɛpena kyɛ eku Dawide mbaen, maa ɔnate so ɛkã sona bɔ odi be mogya gua ɔ?”

⁶ Sɔɔlo lele bɔ Yonatan hane ne tole nu, na ɔtale ndaen kyɛ, “Kyɛ AWURADE te ase ye, mengɔma ebiala ngohũ Dawide.”

⁷ Nziɛ ye, Yonatan frɛle Dawide, na ɔhane edwirɛ ne amukoraa hyirele ye. Afei Yonatan fale Dawide hɔle Sɔɔlo berɛ, na ɔtenane Sɔɔlo berɛ sole ye kyɛ daa ne ala.

⁸ Koɛ sili bieku, na Dawide ne Filistifoɛ bɛɛhone. Ohuhuni bɛ paa maa ɔnate so bɛnwati befili ye nyunu.

⁹ Afei AWURADE somane sunzum tɛɛ bie maa ɔte pene Sɔɔlo so, wɔ mmerɛ bɔ né ɔte ye awuro berɛ otira ye pealɛɛ ɔ. Né Dawide koso ɔ́bɔ sangoo sɔ mmerɛ ne.

¹⁰ Na Sɔɔlo tole ye pealɛɛ ne kyɛ ɔ́fa wɔ Dawide maa ɔka terɛ ne anwo, nakoso Dawide hwene ye nwo, na pealɛɛ ne wɔle terɛ ne anu. Dawide nyane ye ti didili nu, na ɔnwatili kɔngɔen ne.

Mikal boka ma Dawide nwati

¹¹ Sɔɔlo tuli mmenia maa bɛhɔle Dawide awuro kyɛ bɛɛtɛ ye behũ ye ngyerɛmɔ. Nakoso Dawide tiale Mikal gya so kyɛ, “Sɛ annwati kɔngɔen ye a, ɛhema ngyerɛmɔ bekohu wɔ.”

¹² Yiti Mikal dwurale Dawide fale mboma nu, na ɔnwatili nyane ye ti didili nu.

¹³ Mikal fale abaduaba dedale ye wɔ mba ne aso, ɔfale abɔngye nwiaa tole abaduaba ne ti dɔ yɛle sumu, na ɔfale ɛtena gurɔle ye nwo.

¹⁴ Sɔɔlo somane mmenia kyɛ bɛɛhye Dawide, nakoso Mikal hane kyɛ, “Ɔnde apɔ.”

¹⁵ Yeɛ Sɔɔlo sa somane ɛbɔfoɛ nemɔ kyɛ bɛ bɔbɔ bɛɛfa bɛ nye benwu Dawide. Na osele bɛ kyɛ, “Ɛmɔɔhye ye wɔ bɛen ne aso bɛbrɛ me ma ngu ye!”

¹⁶ Na ɛbɔfoɛ nemɔ dwuli berɛ nen, benwuni abaduaba bɔ bafa abɔngye nwiaa bayɛ sumu bato ye ti dɔ ne kyɛ ɔla mba ne aso.

¹⁷ Na Sɔɔlo bisale Mikal kyɛ, “Nzu ati yeɛ alakalaka me sɔa ye, bɔ ama me pɔfoɛ anwati ahɔ, maa wanya ye ti wadidi nu ye?” Yeɛ Mikal buale Sɔɔlo kyɛ, “Ɔha hyirele me kyɛ, ‘Yakyi me ma ngɔ; anyɔ sɔ a, ngohũ wɔ.’ ”

Dawide nwati kɔ Samuel berɛ

¹⁸ Dawide nwatili nyane ye ti didili nu, na ɔhɔle Samuel berɛ wɔ Rama. Ɔhane edwirɛ bɔ Sɔɔlo afa ali ye amukoraa hyirele Samuel. Na ɔne Samuel betu bɛɛtenane Nayote.

¹⁹ Na bɛbɔle Sɔɔlo amaneɛ kyɛ, “Dawide wɔ Nayote bɔ ɔwɔ Rama.”

²⁰ Yiti Sɔɔlo somane mmenia kyɛ bɛɛhye Dawide bɛbra. Mmerɛ bɔ Sɔɔlo bɔfoɛ nemɔ nwuni ngɔmhyɛlɛfoɛ kure ne kyɛ begu so bɛhyɛ ngɔm, bɔ né Samuel gyi berɛ ɔ́nea bɛ so ne, Nyameɛ sunzum wale ɛbɔfoɛ nemɔ so mane bɛ koso bɛhyɛle ngɔm.

²¹ Na mmerɛ bɔ ebie ɔɔbɔle Sɔɔlo amaneɛ nen, ɔsomane mmenia foforɛ, na bɛ koso bɛhyɛle ngɔm. Sɔɔlo somane mmenia bieku, ye pɛen nza so, na bɛ koso bɛhyɛle ngɔm sɔ ala.

²² Afei ye bɔbɔ osili nu kyɛ ɔkɔ Rama. Oodwuli abura piri bɔ ɔwɔ Seku ne anwo, na obisale kyɛ, “Nisua yeɛ Samuel ne Dawide bɛwɔ ɔ?” Na bebuale ye kyɛ, “Bɛwɔ Nayote bɔ ɔwɔ Rama.”

²³ Osili nu bɔ ɔkɔ Nayote bɔ ɔwɔ Rama nen, ye koso Nyameɛ sunzum wale ye so. Na ɔkɔ ne, ɔhyɛle ngɔm toonn oodwuli Nayote bɔ ɔwɔ Rama.

²⁴ Ye koso opuropurole ye ndaadeɛ, na ɔhyɛle ngɔm wɔ Samuel nyunu berɛ. Na ɔfale ye nwo tole so lale berɛ sɔ kyẽa ne, eyia ne kɔngɔen amukoraa. Yiti ɔɔyɛle edwirɛ bie bɔ ɔla berɛ kyɛ, “Sɔɔlo koso boka ngɔmhyɛlɛfoɛ nemɔ so hɔ ɔ?”