1 Samuel 13 - AHYERƐLƐ KRONGRON

Filistifoɛ fa koɛ toa Yisrael bieku

¹ Sɔɔlo lili hene ne, né wali kɔbo afoɛ [aburasa], na olili Yisrael so hene afoɛ nyɔ.

² Sɔɔlo neaneane Yisrael maen ne anu yele mmienzua apee nza. Bɛ nu apee nyɔ ne Sɔɔlo hɔle Mikimase ne Betel mmokaa aseɛ so, yeɛ apee ko koso ne Yonatan bɛhɔle Gibea bɔ ɔwɔ Benyamin. Na koɛhonɛfoɛ ngaa ne de, ɔmaa besa bɛhɔle b’awuro.

³ Filistifoɛ bɛ koɛhonɛfoɛ atenaleɛ bɔ ɔwɔ Geba ne, Yonatan lili so ngonim, na Filistifoɛ tele sɔ dwirɛ ne. Sɔɔlo maa behuli awɛen wɔ aseɛ ne aso amukoraa besele kyɛ, “Hebrifoɛ ee, ɛ́mɔtie oo!”

⁴ Yisrael amukoraa tele kyɛ Sɔɔlo ali Filistifoɛ bɛ koɛhonɛfoɛ atenaleɛ ne aso ngonim. Besa bɛtele kyɛ Filistifoɛ afɛ Yisrael so yaa paa, yiti Yisrael koɛhonɛfoɛ nemɔ bɛɛbokale Sɔɔlo so wɔ Gilgal.

⁵ Filistifoɛ boaboale bɛ nwo kyɛ bɛkwaafa koɛ bɛtoa Yisrael. Bɛfale teaseɛnam apee aburasa, pɔngɔhanɛfoɛ apee nzia, ɔne koɛhonɛfoɛ bɔ bɛ somaa te kyɛ mboanoa anweaa ɔ. Bɛɛkyekyele asikyeleɛ wɔ Mikimase, wɔ Bete Awen eyia afiteleɛ.

⁶ Yisraelfoɛ nwuni kyɛ koɛ ne anu ayɛ se ama bɛ, (ofikyɛ né Filistifoɛ ama koɛhonɛfoɛ nemɔ ali amia). Na bɛɛfeafeale nyɔboɛ bɔ wasi sua nu, ngumaa nu, nyɔbotaen nu, asieleɛ ne abura mɔ nu.

⁷ Hebrifoɛ biemɔ pɛle asue Yɔɔdan bɛhɔle Gade ne Gileade aseɛ so. Né Sɔɔlo tɛ wɔ Gilgal, na mmenia ne amukoraa bɛfale ahunundetelɛ belili ye si.

Sɔɔlo di ye ti piri bɔ afɔleɛ

⁸ Kyɛbɔ Samuel hyɛle Sɔɔlo ne, Sɔɔlo nwondɛle ɛlɛsoo, nakoso Samuel amma Gilgal, na koɛhonɛfoɛ nemɔ hyɛle ye bo kyɛ bɛyakyi Sɔɔlo nu bɛkɔ.

⁹ Yiti Sɔɔlo sele kyɛ, “Ɛ́mɔfa naen yeralɛ afɔleɛ ne ɔne asomdwee afɔleɛ ne bɛbrɛ me.” Na ɔbɔle naen yeralɛ afɔleɛ ne.

¹⁰ Ɔbɔle naen yeralɛ afɔleɛ ne yiele pɛ, berɛ ne ala, Samuel nyunu ɛhe. Na Sɔɔlo hɔle kyɛ ɔkwaayia ye yɛ ye akwaaba.

¹¹ Yeɛ Samuel bisale ye kyɛ, “Nzikyɛ nikye yeɛ ayɔ ye?” Na Sɔɔlo buale kyɛ, “Nwuni kyɛ mmenia ne bɛ́yakyi me nu bɛ́kɔ. Wɔ koso mmerɛ bɔ ɛhyɛ tole berɛ ne, amma, yeɛ afei Filistifoɛ koso baboa bɛ noa wɔ Mikimase.

¹² Yiti nzusuli kyɛ, ‘Afei de, Filistifoɛ kɔɔfa koɛ kɔtoa me wɔ Gilgal, yeɛ AWURADE berɛ mmokalɛ koso nnya nnzrɛle.’ Yiti ɔmaa nnili me bɔbɔ me ti piri mmɔle naen yeralɛ afɔleɛ ne.”

¹³ Na Samuel sele ye kyɛ, “Ali ngwaseasɛm! Anni AWURADE wɔ Nyameɛ mmeraa bɔ ɔhyɛ mane wɔ ne aso. W’ahennie ne, ahaa AWURADE kɔma ye bo kotimu wɔ Yisrael daa,

¹⁴ nakoso kekesaala ye de, w’ahennie ne ngogyina. AWURADE apena sona bɔ ɔla ye ahone nwo ɔ, na AWURADE afa ye ali ye maen so hene, ofikyɛ anni edwirɛ bɔ AWURADE hyɛle wɔ ne aso.”

¹⁵ Na Samuel fili Gilgal sili nu hɔle. Afei koɛhonɛfoɛ bɔ baha berɛ ne, belili Sɔɔlo si bɛɛbokale bɛ mmango nemɔ aso. Na befili Gilgal bɛhɔle Gibea bɔ ɔwɔ Benyamin. Sɔɔlo hale koɛhonɛfoɛ bɔ baha ye nwo berɛ ne, na né bɛ somaa te mmienzua kɔyɛ ɛyaa nzia.

¹⁶ Sɔɔlo ne ɔwa Yonatan ne koɛhonɛfoɛ bɔ baha bɛ nwo berɛ ne, bɛtenane Geba bɔ ɔwɔ Benyamin, yeɛ Filistifoɛ koso kyekyele asikyeleɛ wɔ Mikimase.

¹⁷ Mmenia bɔ bɛbɔ apaa kure nza fili Filistifoɛ asikyeleɛ ne anu dɔ wale: kure ko fale ye nye hyirele Ofra hɔle Soale aseɛ so;

¹⁸ kure bɔ ɔtɔ so nyɔ ne fale ye nye hyirele Bete Horon, yeɛ kure bɔ ɔtɔ so nza ne koso, ɔfale ye nye hyirele ɛwɛen bɔ ɔla Seboyim bɔnza ne anwuro dɔ ne, bɔ opingye ɛserɛ ne.

¹⁹ Sɔ mmerɛ ne, né buralɛ dwumvoɛ biala nne Yisrael aseɛ so nekaa biala, ofikyɛ Filistifoɛ hane kyɛ, “Yɛmbena kyɛ Hebrifoɛ bɛbɔ ngrandɛ anaa pealɛɛ ɔ.”

²⁰ Yiti né ɔyɛ a, Yisraelfoɛ amukoraa bɛkɔ Filistifoɛ mɔ dɔ maa besi bɛ kona, esonyi, akumaa ne dadeɛ koateɛ bɛma bɛ.

²¹ Né sɛ besi kona ne esonyi biala a, bede ɛdwetɛ sekel nza nu ngyɛmuɛ nyɔ; yeɛ sɛ besi akumaa ne buralɛ bɔ bɛfa bɛka ngaka koso a, bede ɛdwetɛ sekel nza nu ngyɛmuɛ ko.

²² Yiti kyẽa bɔ koɛ ne sili ne, ɛlɔen bɔ né bɛwɔ Sɔɔlo ne Yonatan nwo berɛ ne, né bɛ nu biala nne berɛ bɔ ole ngrandɛ anaa pealɛɛ ɔ; sana Sɔɔlo ne Yonatan angome yeɛ né bele bie ɔ.

²³ Na Filistifoɛ koɛhonɛfoɛ kure ko fale Mikimase atee ne aso bɛɛtɛle dɔ.