1 Samuel 12 - AHYERƐLƐ KRONGRON

Samuel ne maen ne di ngraa

¹ Afei Samuel sele Yisrael amukoraa kyɛ, “Matie edwirɛ bɔ ɛmɔaha bahyire me ne amukoraa, na masi ɛmɔ hene mama ɛmɔ.

² Ɛ́mɔtie, afei de, ɛhene ne yeɛ ɔla ɛmɔ noa ɔ. Me de, mayɛ aworowaa bɔ mafu gyein ɔ, nakoso me mma mmienzua nemɔ de, bɛboka ɛmɔ so. Mali ɛmɔ nyunu toonn fite me ngwadaa nu maa waadwu ɛnɛ kyẽa ye.

³ Ngyi ɛmɔ nyunu wa. Ɛ́mɔli me nwo adanzeɛ wɔ AWURADE nyunu, ɔne ye sona bɔ wapopa ye ngoo ne nyunu. Nwa nandwie yeɛ male ɔ? Nwa afunum yeɛ male ɔ? Anaakyɛ nwa yeɛ mali ye ndurum ɔ? Nwa yeɛ mahyɛ ye so ɔ? Nwa yeɛ male fea-ase-ma mafi ye berɛ, bɔ ɔnate so mabu me nye magua ndɛen turoloo so ɔ? Ɛ́mɔhã, na ngɔfa bie ngosi ye gya nu ngɔma ɛmɔ.”

⁴ Na bebuale kyɛ, “Ellili yɛ ndurum, ɛhhyɛle yɛ so, yeɛ ellele ebiala nikye fee.”

⁵ Yeɛ osele bɛ kyɛ, “Ɛnɛ kyẽa ye, AWURADE te ɛmɔ danzeniɛ, yeɛ ye sona bɔ wapopa ye ngoo ne koso ɔte ɛmɔ danzeniɛ, kyɛ ɛmɔ nikye fee oollili me berɛ.” Na bebuale kyɛ, “Ɔte danzeniɛ.”

⁶ Na Samuel sele mmenia ne kyɛ, “AWURADE bɔ ɔneaneane nu yele Mose ne Aarɔn, ná ɔfale ɛmɔ nana mɔ fili Misraim aseɛ so wale ne, ɔte danzeniɛ.

⁷ Yiti ɛmɔɔgyina wa, maa mmɔ ɛmɔ kwaadu wɔ AWURADE nyunu, wɔ paayɛlɛ mukoraa bɔ AWURADE ayɔ ama ɛmɔ ɔne ɛmɔ nana mɔ ne anwo.

⁸ Mmerɛ bɔ Yakob hɔle Misraim ne, [Misraimfoɛ hyɛle bɛ so] ɛmɔ nana mɔ sũ frɛle AWURADE, na AWURADE somane Mose ne Aarɔn maa bɛɛyele ɛmɔ nana mɔ befili Misraim, na ɔmaa bɛɛtenane wa.

⁹ Nakoso bɛmane bɛ wora fili AWURADE bɛ Nyameɛ; yiti ɔfale bɛ wurale Hasɔ safohene Sisera sa, Filistifoɛ sa, ɔne Moabo hene sa, na sɔ mmenia nemɔ ne bɛ hone koɛ.

¹⁰ Afei besu bɛfrɛle AWURADE kyɛ, “Yayɔ bɔne, ofikyɛ yayakyi AWURADE si lilɛ yaaso Baal mɔ ne Astarote mɔ. Nakoso, de yɛ fi yɛ pɔfoɛ mɔ sa nu, na yɛkɔso wɔ.’

¹¹ Na AWURADE somane Yerubaal, Bedan, Yɛfeta ne Samuel; na ɛmɔ pɔfoɛ mɔ bɔ bapɛ ɛmɔ nwo bayia ne, ɔpepɛ lele ɛmɔ fili bɛ sa nu maa ɛmɔtenane asomdwee nu.

¹² Ɔwɔ nu kyɛ AWURADE ɛmɔ Nyameɛ yeɛ ɔte ɛmɔ hene ɔ, nakoso mmerɛ bɔ ɛmɔnwuni kyɛ Amonfoɛ hene Nahase ɔbaafa koɛ toa ɛmɔ ne, ɛmɔsele me kyɛ, ‘Daabi, ɔsɛ kyɛ yɛnya ɛhene maa odi yɛ so.’

¹³ Afei, ɛ́mɔnea, ɛhene bɔ ɛmɔaneanea nu baye ye, bɔ ɛmɔsrɛle ne, ye ɛhe. Ɛ́mɔtie, AWURADE asi ɛmɔ hene wama ɛmɔ.

¹⁴ Sɛ ɛmɔkosuro AWURADE, ɛmɔkɔso ye, ɛmɔkotie ye dwirɛ, ná mmom ɛmɔandwi bamva AWURADE mmeraa dwirɛ so, ná ɛmɔ ne ɛhene bɔ odi ɛmɔ so ne bedi AWURADE ɛmɔ Nyameɛ si a, ye de okoyie ɛmɔ yé.

¹⁵ Nakoso sɛ ɛmɔandie AWURADE dwirɛ, ná sɛ ɛmɔtwi bɛfa AWURADE mmeraa dwirɛ so de a, ye de AWURADE tumi kotua ɛmɔ so kerɛ, kyɛbɔ otuale ɛmɔ nana mɔ so kerɛ ne.

¹⁶ Yiti ɛmɔɔgyina wa bɛnea sɔ anwanwadeɛ he bɔ AWURADE baayɔ ma ɛmɔ nye nwu ye ɔ.

¹⁷ Aso nna atokoɔtelɛ mmerɛ ɛhe? Ngɔsrɛ AWURADE maa ɔkɔma agralaa kɔtete, ná wasa wama esue atɔ. Na ɛmɔkonwu ye, ná ɛmɔale bato nu kyɛ ɛmɔayɔ amumuyɛɛ piri wɔ AWURADE nyunu, kyɛ ɛmɔabisa maa wasi hene wama ɛmɔ ɔ.”

¹⁸ Yiti Samuel srɛle AWURADE, na AWURADE mane agralaa tetele, yeɛ ɔmane esue koso tɔle sɔ kyẽa ne ala. Na maen ne amukoraati surole AWURADE ne Samuel paa.

¹⁹ Na maen ne mukoraa sele Samuel kyɛ, “Srɛ AWURADE wɔ Nyameɛ ma wɔ ngoaa ná yanwuwu, ofikyɛ ɛhene bɔ yabisa yale nwo amumuyɛɛ ne, yafa yafoa yɛ bɔne amukoraa so.”

²⁰ Na Samuel sele maen ne kyɛ, “Nnɛma ɛmɔsuro. Ɛmɔayɔ amumuyɛɛ he amukoraa de, nakoso nnɛma ɛmɔyakyi AWURADE si lilɛ, na mmom odi kyɛ ɛmɔfa ɛmɔ ahone amukoraa bɛso AWURADE.

²¹ Yeɛ nningyein mbaen mbaen bɔ mvasoɛ nne so, anaa bɛngora benne ngoa ne, nnɛma ɛmɔdi makyebu bekodi bɛ si, ofikyɛ bɛte mbaen.

²² Na ɔnate AWURADE dumaa piri ne ati, ɔngɔye ye sa ngofi ye mmenia bo, ofikyɛ ɔyɛle AWURADE fɛ kyɛ ɔkɔfa ɛmɔ kɔyɛ ye mmenia ɔ.

²³ Yeɛ me koso, ɔngɔwa ye sɔ le, kyɛ ngɔyakyi ɛmɔ nwo mbaeɛbɔlɛ maa ɔnate so ngɔyɔ bɔne ngotia AWURADE ɔ. Atee bɔ ɔte paa ná ɔtengyɛ ne yeɛ ngohyirehyire ɛmɔ ɔ.

²⁴ Ɛ́mɔnea nningyein mbiri mbiri bɔ wayɔ wama ɛmɔ ɔ. Esurolɛ mmom yeɛ ɔsɛ kyɛ ɛmɔsuro AWURADE, ná ɛmɔfa ɛmɔ ahone amukoraa bɛso ye nahorɛ nu ɔ.

²⁵ Nakoso sɛ ɛmɔtoa so bɛyɔ bɔne a, ye de, ɛmɔ ne ɛmɔ hene ne, ɛmɔ boso konua.”