1 Samuel 11 - AHYERƐLƐ KRONGRON

Sɔɔlo di Amonfoɛ so ngonim

¹ Amonniɛ Nahase fo wale ootuale Yabese Gileade. Na Yabese Gileadefoɛ amukoraa sele Nahase kyɛ, “Ɛne yɛ yɛ apam, na yɛkɔso wɔ.”

² Nakoso Amonniɛ Nahase buale bɛ kyɛ, “Sɛ ngɔpene so kyɛ me ne ɛmɔ kɔyɛ apam a, sana metu ebiala nye famaa ne, maa ɔyɛ animguaseɛ ka Yisrael amukoraati.”

³ Na Yabese mbanyi sele ye kyɛ, “Ma yɛ ɛlɛsoo maa yɛtu ɛbɔfoɛ ma behyini Yisrael amukoraati, na sɛ yannya defoɛ biala a, yɛkɔɔfa yɛ nwo yɛkowura wɔ sa.”

⁴ Ɛbɔfoɛ nemɔ dwuli Sɔɔlo kuro Gibea, na bɛfale edwirɛ ne nwo amaneɛ bɛbɔle berɛ ama nen, mmenia ne amukoraa bɛsɔle awuyebɔlɛ nu.

⁵ Sɔ mmerɛ ne, né Sɔɔlo ɔ́ka nandwie mɔ ofi eburo ba kuro, na obisale kyɛ, “Nzikyɛ dwirɛ yeɛ wato mmenia ye mɔ bɔ besu ye?” Na bɛfale Yabesefoɛ amaneɛ ne bɛbɔle ye.

⁶ Na mmerɛ bɔ Sɔɔlo tele sɔ dwirɛ nen, Nyameɛ sunzum kanyane ye, na ɔfɛle yaa hahii.

⁷ Ɔhyele nandwie nyii nyɔ bɔ bafa kɔnnua basosɔ bɛ babɔ nu ɔ, ɔpepɛle bɛ nu ahuronzi ahuronzi, na ɔfa somane ɛbɔfoɛ maa bɛhɔle Yisrael aseɛ so amukoraa beesele kyɛ, “Sona biala bɔ wanni Sɔɔlo ne Samuel si wangɔ koɛ ne, sɔ ala yeɛ bɛkɔpepɛ ye nandwie mɔ nu ɔ.” Afei AWURADE nwo suronyi tɔle maen ne aso, na mmenia ne amukoraa bɛbɔle nu befite bɛwale.

⁸ Na Sɔɔlo hale bɛ wɔ Beseke nen, né bɛ bɔ befi Yisrael ne bɛte apee ɛyaa nza, yeɛ bɛ bɔ befi Yuda ne koso bɛte apee aburasa.

⁹ Na besele ɛbɔfoɛ mɔ bɔ bɛwale ne kyɛ, “Ɛmɔhɔ beese Yabese Gileadefoɛ kyɛ, ‘Ɛhema, kyɛ odwu eyiagyina ne, né ɛmɔanya defoɛ.’ ” Na ɛbɔfoɛ nemɔ fale amaneɛ bɛɛbɔle Yabesefoɛ nen, ɔyɛle bɛ fɛ.

¹⁰ Na Yabesefoɛ sele Amonfoɛ kyɛ, “Ɛhema yɛkɔɔfa yɛ nwo yɛkowura ɛmɔ sa, na ɛmɔkɔhora kɔfa bɔ ɛmɔkuro biala bɛkɔyɛ yɛ.”

¹¹ Aleɛ hyene ne, Sɔɔlo hyɛle ye lɔen ne anu kure nza. Na alebahyene, bɛhɔle Amonfoɛ asikyeleɛ ne anu, na behuhuni Amonfoɛ toonn maa oodwuli eyia ketee. Bɛ bɔ benyane bɛ ti bedidili nu ne, bɛbɔle aya, bɔ mmenia nyɔ po banga neka horɛ ɔ.

¹² Afei Yisraelfoɛ bisale Samuel kyɛ, “Nwa mɔ yeɛ bɛhane kyɛ, ‘Aso Sɔɔlo yeɛ ɔbaali yɛ so hene anaa’ ne? Ɛ́mɔfa bɛ bɛbra ma yɛhu bɛ!”

¹³ Nakoso Sɔɔlo buale kyɛ, “Yɛngohu sona biala ɛnɛ kyẽa ye, ofikyɛ ɛnɛ te kyẽa bɔ AWURADE apepɛ ale Yisrael ɔ.”

¹⁴ Na Samuel sele mmenia ne kyɛ, “Ɛmɔbra ma yɛhɔ Gilgal yɛɛbɔ ɛhene ne ohomoo bieku wɔ berɛ.”

¹⁵ Yiti mmenia ne amukoraati hɔle Gilgal, na bɛbɔle Sɔɔlo ohomoo besili ye hene wɔ AWURADE nyunu wɔ Gilgal. Bɛbɔle asomdwee afɔleɛ berɛ wɔ AWURADE nyunu, na Sɔɔlo ne Yisraelfoɛ amukoraati nye gyele paa wɔ berɛ.