1 Samuel 10 - AHYERƐLƐ KRONGRON

Samuel popa Sɔɔlo ngoo

¹ Afei Samuel fale ngoo towaa, otutu guale Sɔɔlo ti so, na ɔtɔle ye nu hane kyɛ, “AWURADE apopa wɔ ngoo wafa wɔ wali ye maen Yisrael so hene. Wɔ yeɛ ɛkɔla AWURADE maen ne noa ɔ, na bɛ pɔfoɛ mɔ bɔ bapɛ bɛ nwo bayia ne, wɔ yeɛ ɛkɔpepɛ kole bɛ kofi bɛ sa nu ɔ. Na bɔ okohyire kyɛ AWURADE afa wɔ wali ye agyapadeɛ so hene ɛhe:

² Ɛnɛ sɛ efi me nwo wa ná ɛkɔ a, ekoyia mmienzua nyɔ wɔ Rahɛl asieleɛ ne anwo, wɔ Selsa, wɔ Benyamin aseɛ so. Na bekose wɔ kyɛ, ‘Afunum mɔ bɔ ɛhɔle bɛ penalɛ ne, banwu bɛ. Afei de, wɔ baba ndwene afunum nemɔ nwo ko, na mmom ɛmɔ nwo adwenedwene yeɛ watɔ ye so ɔ. Na ɔnwa: Yieee, mma ye, mekwaanwu ye ni?’

³ Efi berɛ toa so kɔ wɔ nyunu, ná ekodwu Tabɔ eluii ne anwo a, ekoyia mmienzua nza wɔ berɛ bɔ bɛkwaasɔne Nyameɛ wɔ Betel ɔ. Ko tira mbɔngye mmaa nza, ko tira paanoo mumua nza, yeɛ ko wora otira bobe nzaa ngomvo ko.

⁴ Bekobisa wɔ ahye, na bɛkɔma wɔ paanoo mumua nyɔ bɔ odi kyɛ ede ɔ.

⁵ Na ɛhe asi ne, ekoodwu Gibeate Elohim, wɔ nekaa bɔ Filistifoɛ koɛhonɛfoɛ atenaleɛ wɔ ne. Na sɛ ɛkwaawura kuro ne anu a, ekoyia ngɔmhyɛlɛfoɛ kure bɔ befi asɔneyɛɛ so dɔ bɛ́torotoro bɛ́ba, bɔ adengum, akasaa, aweɛn ne sangoo angorɛ li bɛ nyunu ɔ. Na ekonwu kyɛ bɛ́hyɛ ngɔm ɔ.

⁶ Afei AWURADE Sunzum kɔte kɔpe wɔ so, ɛne bɛ kɔbɔ nu kɔhyɛ ngɔm, na ɔkɔmaa ɛkɔsesã kɔyɛ sona foforɛ.

⁷ Na sɛ sɔ nningyein hemɔ ba nu ma wɔ a, yɔ nikyee biala bɔ ekuro ɔ, ofikyɛ Nyameɛ gyi wɔ si.

⁸ Na ɛhe asi ne, di me nyunu moa kɔ Gilgal, na ngooyia wɔ berɛ ngɔbɔ naen yeralɛ afɔleɛ ne asomdwee afɔleɛ. Tena berɛ nwondɛ ɛlɛsoo, kɔpem kyɛ ngɔɔto wɔ berɛ ná ngohyire wɔ bɔ odi kyɛ ɛyɔ ɔ.”

Sɔɔlo hyɛ ngɔm

⁹ Sɔɔlo kakyili ye nwo kyɛ ofi Samuel nwo berɛ kɔ ne, Nyameɛ sesane Sɔɔlo maa ɔyɛle sona foforɛ; na sɔ nzɛngyerɛnneɛ ne amukoraa wale nu sɔ kyẽa ne ala.

¹⁰ Na befili berɛ beedwuli Gibea nen, ngɔmhyɛlɛfoɛ kure wale beeyiale ye, na Nyameɛ sunzum wale ye so, na ɔhyɛle ye bo ɔne bɛ bɔle nu hyɛle ngɔm.

¹¹ Na mmenia bɔ bɛse ye daa amukoraa nwuni ye kyɛ ɔne ngɔmhyɛlɛfoɛ nemɔ bɛ́hyɛ ngɔm nen, bebisabisale bɛ nwo kyɛ, “Nzikyɛ nikye yeɛ wate wape Kise awa ye aso ye? Sɔɔlo koso boka ngɔmhyɛlɛfoɛ nemɔ so hɔ ɔ?”

¹² Na biaa bie bɔ ofi kuro berɛ ala buale kyɛ, “Na nwa yeɛ ɔla bɛ noa ɔ?” Yiti ɔɔyɛle mbanyi mɔ dwirɛ bie bɔ ɔla berɛ kyɛ, “Sɔɔlo koso boka ngɔmhyɛlɛfoɛ nemɔ so hɔ ɔ?”

¹³ Na ngɔmhyɛlɛ ne fili ye nye so nen, ɔhɔle asɔneyɛɛ so berɛ.

¹⁴ Na Sɔɔlo baba aliɛma bienzua bisale ye ne somvoɛ ne kyɛ, “Nisua yeɛ ɛmɔhɔle ɔ?” Na obuale kyɛ, “Yɛhɔle afunum nemɔ penalɛ. Na yɛpenane bɛ dee bɔ yannwu bɛ ne, yɛhɔle Samuel berɛ.”

¹⁵ Yeɛ Sɔɔlo baba aliɛma bienzua ne sele kyɛ, “Edwirɛ bɔ Samuel ha hyirele ɛmɔ ne, ka kyire me.”

¹⁶ Na Sɔɔlo buale ye baba aliɛma bienzua ne kyɛ, “Osele yɛ pefee kyɛ banwu afunum nemɔ.” Nakoso ahennie ne nwo dwirɛ bɔ Samuel ha hyirele Sɔɔlo ne de, wammɔ so wangyire ye.

Bɛfale Sɔɔlo besili hene

¹⁷ Samuel tole asaa frɛle Yisrael maen ne maa bɛwale AWURADE nyunu wɔ Misepa,

¹⁸ na osele bɛ kyɛ, “AWURADE Yisrael Nyameɛ nwa nyoo, ‘Me yeɛ nyele Yisrael mvili Misraim ɔ. Mbepɛ nnele ɛmɔ mvili Misraimfoɛ sa nu, ɔne ahennie amukoraa bɔ né bɛhyɛ ɛmɔ so ne sa nu.’

¹⁹ Nakoso ɛnɛ de, ɛmɔapo ɛmɔ Nyameɛ bɔ ode ɛmɔ fi ɛmɔ amaneɛ mukoraa ne ɛmɔ anwokyere mukoraa nu ne, na ɛmɔaha bahyire ye kyɛ, ‘Daabi, si hene ma yɛ.’ Ye sɔ ne ati, ɛmɔbra beegyina AWURADE nyunu abusua kure abusua kure ne mmusua mmusua.”

²⁰ Afei Samuel mane Yisrael mmusua kure amukoraa beegyinane anyunu berɛ, na beguale serewa maa ɔyele Benyamin abusua kure ne.

²¹ Benyamin abusua kure ne, ɔmane nu mmusua mmusua ne beegyinane anyunu berɛ. Na beguale serewa maa ɔyele Matri abusua ne. Ɔmane Matri abusua nu ama beegyinane anyunu berɛ, na serewagualɛ ne yele Kise awa Sɔɔlo. Nakoso bɛpenane Sɔɔlo ne, bannwu ye.

²² Yiti besa bebisale AWURADE kyɛ, “Sɔ sona ne, aso wamma wa bie anaa?” Na AWURADE buale kyɛ, “Ɛ́mɔnea, waafea nningyein bɔ baboaboa ye noa ne anu.”

²³ Na bele amirika bɛɛfale ye bɛwale. Oogyinane mmenia ne anu nen, né ɔne sona biala gyi berɛ a, ɔwale tra ye.

²⁴ Na Samuel sele mmenia ne amukoraa kyɛ, “Ɛhe yeɛ AWURADE aneanea nu waye ye ɔ. Ebiala nne maen ye anu bɔ ɔte kyɛ ye ɔ.” Na mmenia ne amukoraa bɔ lele so kyɛ, “Nana, wɔ ngoa so oo!”

²⁵ Samuel hane ahennie ne nwo nhyehyɛleɛ ne mmeraa hyirele maen ne. Ɔhyerɛle ye wɔ nwomaa nu, na ɔfale nwomaa ne tole AWURADE nyunu. Afei Samuel mane mmenia ne amukoraa betuli apo besa bɛhɔle b’awuro.

²⁶ Sɔɔlo koso hɔle ye awuro wɔ Gibea, na koɛhonɛfoɛ biemɔ bɔ Nyameɛ kanyane bɛ ɔ yeɛ bɛfale ye bɛhɔle ɔ.

²⁷ Nakoso hohwifoɛ biemɔ sele kyɛ, “Ɔkɔyɛ sɛɛ né akoaa he ahora ale yɛ?” Yiti bebuli ye animtia, na bamva akyɛdeɛ biala bammrɛ ye. Nakoso Sɔɔlo andɛ bɛ so.