1 Samuel 1 - AHYERƐLƐ KRONGRON

Hana ne ohu Ɛlkana

¹ Né biaa bie wɔ berɛ bɔ bɛfrɛ ye Ɛlkana. Ofi Ramatim Sofim bɔ ɔwɔ Efraim mmokaa aseɛ ne aso. Ɔse ole Yeroham bɔ ɔse ole Elihu bɔ ɔse ole Tohu bɔ ye koso ɔse ole Efraimniɛ Sufe ne.

² Né ɔye mɔ nyɔ. Ko li Hana, yeɛ ko wora li Penina. Né Penina le mmaa, nakoso Hana de, né olle ba.

³ Afoɛ biala, né Ɛlkana fi ye kuro kɔ Silo kɔsɔne Asafo AWURADE ná ɔbɔ afɔleɛ ma ye wɔ berɛ. Hofini ne Finehase bɔ bɛte Eli mma mmienzua nyɔ ne, né bɛte AWURADE asɔfo wɔ Silo.

⁴ Sɔ kyẽa ne dwu ná Ɛlkana bɔ afɔleɛ a, né ɔyɛ a ɔma ɔye Penina ne ye mma mmienzua ne mmrasua ne amukoraa afɔleɛ nningyein ne bie;

⁵ nakoso Hana de, ɔma ye afɔleɛ nningyein ne mmɔhoɛ nyɔ, ofikyɛ né ɔte ye yɛyerɛ braa, ɔwɔ nu kyɛ né AWURADE amaa wayɛ mmotaen.

⁶ Né Hana ɔhora taa ka ye anyinga paa ma ye wora bɔ, ofikyɛ né AWURADE amaa wayɛ mmotaen.

⁷ Sɔ dwirɛ ne hɔle so afoɛnoa biala; na mmerɛ biala bɔ bɛkɔhɔ AWURADE awuro ne, ɔyɛ a Penina ka ye anyinga. Yiti ɔyɛ a Hana sũ, na onnidi.

⁸ Na ohu Ɛlkana bisale ye kyɛ, “Hana, na esuɛ ye ɛ? Nzu ati yeɛ engodidi ɔ? Nzu ati yeɛ wɔ wora abɔ ye? Aso mendra ngwadaa mmienzua buru memma wɔ?”

Nyameɛ tie Hana mbaeɛ

⁹ Bedidili bɛnone beyiele wɔ Silo nen, Hana dwɔsole [ɔɔfale ye mbaeɛ tole AWURADE nyunu]. Né ɔsɔfo Eli te bia so wɔ AWURADE asɔneyɛɛ sua anoa nu berɛ.

¹⁰ Né Hana wora abɔ paa, na ole esuɛ hahii fale ye mbaeɛ tole AWURADE nyunu.

¹¹ Na Hana hyɛle bɔ kyɛ, “O Asafo AWURADE, sɛ ahaa ɛkɔpɛ wɔ nye kɔnea w’afaneɛ aworabɔlɛ, ná ɛkɔkaye me, ná amma wɔ wora amvi w’afaneɛ, ná mmom ɛma w’afaneɛ baa bienzua a, ye de ngɔfa ye ngɔma wɔ AWURADE mmerɛ amukoraa bɔ ɔte ase ɔ; na dɛmaa biala ngɔtɔ ye ti so.”

¹² Na Hana gu so ɔbɔ mbaeɛ kyire AWURADE nen, Eli neane ye noa haa.

¹³ Né Hana bɔ mbaeɛ wɔ ye ti anu. Né ɔbesebese ye noa, nakoso edwirɛ bɔ ɔka de, ebiala ande. Na ɛhe mane Eli susuli kyɛ wano nzaa wabo.

¹⁴ Yiti Eli sele ye kyɛ, “Kyinzu koraa yeɛ ɛkɔno nzaa kɔbo maa okoodwu ɔ? Yakyi wɔ nzaanonɛ ne!

¹⁵ Nakoso Hana buale kyɛ, “Nna sɔ ɔ, me mene, nde brasua bɔ me wora abɔ paa ɔ. Nnnone bobe nzaa anaa nzaa serɛ biala, na mmom m’aworabɔlɛ dwirɛ yeɛ méfa méto AWURADE nyunu ɔ.

¹⁶ Nnɛbu w’afaneɛ kyɛ nde brasua sanzaniɛ bie, ofikyɛ edwirɛ yealɛ ne aworabɔlɛ bɔ wato me yeɛ mabɔ ye nwo mbaeɛ maa waadwu bekye ye.”

¹⁷ Yeɛ Eli sele kyɛ, “Fa asomdwee kɔ, na abisadeɛ bɔ afa ato Yisrael Nyameɛ nyunu ne, mesrɛ kyɛ ɔ́yɔ ma wɔ.”

¹⁸ Na Hana sele kyɛ, “Mesrɛ wɔ, w’adaworoma, do w’afaneɛ sɔ ala.” Afei Hana fili berɛ hɔle, odidili, na aworabɔlɛ andira ye ko.

Samuel aworɛ

¹⁹ Aleɛ hyene ne, bedwɔsole ngyerɛmɔ tutuutu bɛsɔnene AWURADE, na afei besa bɛhɔle bɛ kuro Rama. Ɛlkana ne ɔye Hana bɛlale, na AWURADE kayele Hana.

²⁰ Hana nwonzɛle, na mmerɛ ne sone ne, ɔwole baa bienzua, na ɔtole ye dumaa Samuel, ofikyɛ ɔhane kyɛ, “Nzrɛle ye mvili AWURADE berɛ.”

²¹ Ɛlkana ne ye awuro ama mukoraati bɛhɔle Silo kyɛ ɔkwaabɔ afoɛnoa afɔleɛ ne ma AWURADE ná otua ye aboadeɛ.

²² Nakoso Hana de wangɔ bie, na ɔha hyirele ohu kyɛ, “Sɛ akwadaa ne pɛ nyɔfone a, ngɔfa ye ngɔɔma AWURADE, na ɔkɔtena dɔ mmerɛ biala.”

²³ Na ohu Ɛlkana buale ye kyɛ, “Bɔ asusu ye nwo ne, yɔ sɔ ala. Nwondɛ maa oodwu mmerɛ bɔ ɛkɔpɛ ye nyɔfone koraka; na mesrɛ kyɛ AWURADE noa dwirɛ ɔ́bra nu.” Yiti Hana tenane awuro mane ɔwa ne nyɔfone kɔpem kyɛ ɔpɛle ye nyɔfone ɔ.

²⁴ Ɔpɛle akwadaa ne nyɔfone nen, ɔne ye bɛhɔle AWURADE awuro wɔ Silo, ɔwɔ nu kyɛ né akwadaa ne onnyini. Ɔfale ɛhemɔ koso bokale so: nandwie nyii bɔ wali afoɛ nza ɔ, esam graa ko, yeɛ bobe nzaa kɔndoa ko.

²⁵ Afei behuni nandwie nyii ne, na bɛfale akwadaa ne bɛbrɛle Eli.

²⁶ Na Hana sele kyɛ, “Me mene, w’adaworoma, me ole braa bɔ ogyinane wɔ nwo wa bɔle mbaeɛ hyirele AWURADE ne.

²⁷ Akwadaa he yeɛ mmɔle mbaeɛ nzrɛle ne, na AWURADE ayɔ m’abisadeɛ bɔ mva ndole ye nyunu ne wama me.

²⁸ Yiti me koso, mafa ye mahyɛ AWURADE. Na mmerɛ amukoraa bɔ ɔte ase ne, mafa ye mama AWURADE.” Na bɛsɔnene AWURADE wɔ berɛ.