1 Petro 5 - AHYERƐLƐ KRONGRON

Nyameɛ mmoaen kure so nealɛ

¹ Yiti me bɔ nde ɛmɔ aliɛma panyi ɔne Kristo amaneɛnwunɛ nwo danzeniɛ, bɔ ngosa ngonya kyɛfa wɔ animnyam bɔ bɛbaaye ye ali ne anu ne, métu ɛmɔ nu mbanyi nemɔ foɛ kyɛ,

² ɛ́mɔnea Nyameɛ mmoaen kure bɔ owura ɛmɔ sa ne aso, bɔ nna nhyɛsoɛ so ɔ, na mmom kyɛ ɛmɔkofia ɛmɔ kunu bɛkɔnea bɛ so kyɛbɔ Nyameɛ pena ɔ; bɔ nna adifuu ti ɔ, na mmom kyɛ ofi ɛmɔ ahone nu ti ɔ;

³ bɔ ɔnzɛ kyɛ ɛmɔhyɛ bɛ bɔ bewura ɛmɔ sa ne aso, na mmom kyɛ ɛ́mɔyɛ nhwɛsoɛ bɛ́ma mmoaen kure ne ɔ.

⁴ Na sɛ Mmoaenneafoɛ panyi ne ɔye ye nwo ali a, ɛmɔkonya animnyam abotire bɔ ɔnzɛkye koraa ne.

⁵ Sɔ ala yeɛ ɛmɔ bɔ ɛmɔte mmabunu ne koso, ɔsɛ kyɛ ɛmɔbrɛ ɛmɔ nwo ase bewura mbanyi mɔ bo ɔ. Ɛmɔ amukoraa, ɛ́mɔfa anwobrɛaseɛ bɛ́hera, ná ɛ́mɔfa bɛ́so ɛmɔ nwo ngoko ngoko, ofikyɛ Nyameɛ nye sa anwomasoɛfoɛ, na ɔdo anwobrɛaseɛfoɛ.

⁶ Yiti ɛ́mɔbrɛ ɛmɔ nwo ase béwura Nyameɛ tumi asaa ne abo, ná wama ɛmɔ so wɔ mmerɛ bɔ ɔsɛ ɔ nu.

⁷ Ɛ́mɔfa ɛmɔ dadwene amukoraa begua ye so, ofikyɛ ɔdwene ɛmɔ nwo.

⁸ Ɛ́mɔdwo ɛmɔ nwo ase, ɛ́mɔma ɛmɔ nye la berɛ; ofikyɛ ɛmɔ pɔfoɛ abɔnzam odi akɔneaba, opo kyɛ gyata, na ɔpena sona bɔ okonya ye kɔhye ye ɔ.

⁹ Ɛ́mɔgyina pindinn wɔ gyidie nu bɛ́fa bési ye ate, ofikyɛ ɛmɔse kyɛ bafa sɔ amaneɛnwunɛ ne bato ɛmɔ aliɛma mɔ bɔ bɛwɔ ewiase amukoraa ɔ so, kyɛ bɛ koso benwu bie.

¹⁰ Na sɛ ɛmɔnwu amaneɛ wɔ mmerɛ kãa bie beyie a, adom mukoraa Nyameɛ, bɔ wafrɛ yɛ wawa ye animnyam afebɔɔ nu wɔ Kristu Yesu nu ne, okosiesie ɛmɔ maa ɛmɔkoli mu, ɔkɔma ɛmɔkogyina pindinn, ɔkɔma ɛmɔ anwoserɛ ná wama ɛmɔagyina pirim.

¹¹ Ye yeɛ animnyam ne tumi te ye deɛ afebɔɔ ɔ. Amen.

Ngraalilɛ

¹² Silwano bɔ mebu ye kyɛ ɔte aliɛmaa nahorɛniɛ ne, mafa ye so yeɛ mahyerɛ edwirɛ tikaape he mabrɛ ɛmɔ ɔ. Na mefa metu ɛmɔ foɛ ná medi adanzeɛ kyɛ, ɛhe te Nyameɛ nohorɛ adom ne, yiti ɛ́mɔgyina pindinn wɔ nu.

¹³ Asɔre bɔ ɔwɔ Babilɔn, bɔ baneanea nu baye ye kyɛ ɛmɔ ne, obisa ɛmɔ ahye; mma Marko koso obisa ɛmɔ ahye.

¹⁴ Ɛ́mɔyɛ ɛmɔ nwo awaawaatuu wɔ ɔdɔ nu. Asomdwee hã ɛmɔ bɔ ɛmɔwɔ Kristo Yesu nu amukoraa. Amen.