1 Petro 4 - AHYERƐLƐ KRONGRON

Brabɔlɛ foforɛ

¹ Na kyɛbɔ ɔnate yɛ ti yeɛ Kristo nwuni amaneɛ wɔ anwoɔnaen nu ne, ɛmɔ koso, ɔsɛ kyɛ ɛmɔnya sɔ adwene ne ná ɛmɔmia ɛmɔ nye; ofikyɛ ebiala bɔ wanwu anwoɔnaen nu amaneɛ ne, wayakyi bɔne yɔlɛ;

² na anwoɔnaen nu asetena mmerɛ bɔ waha ne, ɔndena ase mma sona akɔnnɔ ko, na mmom ɔtena ase ma Nyameɛ apɛdeɛ.

³ Yɛbɔle yɛ bra kyɛ Amaenmaensofoɛ wɔ y’asetena mmerɛ bɔ wapɛ nu ne anu, na yɛbɔle yɛ bra wɔ ahohwibra, akɔnnɔ, nzaabolɛ, bɔne nu anigye, asanzabra, yeɛ bosoensolɛ bɔ ɔte akyiwadeɛ ɔ nu.

⁴ Na ɔyɛ bɛ nwanwa kyɛ afei de, ɛmɔmva ɛmɔ nwo bɛmmɔ bɛ wɔ sɔ bra fiɛ basabasa ne anu ɔ, yiti bɛkekã ɛmɔ nwo dwirɛ tɛɛ.

⁵ Nakoso bekobu ye nwo ngondaa bekohyire bɔ wasiesie ye nwo kyɛ ɔbaabua ateasefoɛ ne awufoɛ ndɛen ne.

⁶ Na ɛhe ati yeɛ bɛhane nzɛmba ne behyirele awufoɛ mɔ po ɔ, amaa ɔnate so babua bɛ ndɛen kyɛ mmenia bɔ bɛwɔ anwoɔnaen nu ɔ, ná batena ase wɔ sunzum nu kyɛ Nyameɛ.

⁷ Nakoso nningyein amukoraa ayieleɛ apingye; yiti ɛ́mɔnya adwene paa ná ɛ́mɔma ɛmɔ nye la berɛ ma mbaeɛbɔlɛ.

⁸ Bɔ ɔtra so ɔ, ɛmɔhurohuro ɛmɔ nwo dwirɛ nahorɛ nu, ofikyɛ ɔdɔ kata bɔne pee so.

⁹ Ɛ́mɔte ɛmɔ nyunu bɛso ɛmɔ nwo ɛmɔ nwo wɔfoɛ.

¹⁰ Na kyɛbɔ ɛmɔ nu biala wanya adom akyɛdeɛ ne, ɛ́mɔfa bɛ́so ɛmɔ nwo ɛmɔ nwo, kyɛ Nyameɛ adom ahoroɔ ne nwo neafoɛ paa mɔ.

¹¹ Sɛ ebie dwudwo a, maa ɔhã ye kyɛ Nyameɛ noa dwirɛ ɔ; sɛ ebie ɔyɔ ɛsolɛ adwuma a, maa ɔfa anwoserɛ bɔ Nyameɛ afa ama ye ne ɔso; amaa ɔnate so bafa Yesu Kristo so bahyɛ Nyameɛ animnyam wɔ nningyein amukoraa nu. Ye yeɛ animnyam ne tumi te ye deɛ daa daa ɔ. Amen.

Kristofoɛ amaneɛnwunɛ

¹² Aliɛmaa mɔ, amaneɛ yeayea bɔ ɔtoto ɛmɔ bɔ bɛfa beso ɛmɔ bɛnea ne, nnɛmɔma ɔyɛ ɛmɔ nwanwa, kyɛ ebiaa ɔte nikyee foforɛ bie yeɛ ɔtoto ɛmɔ ɔ.

¹³ Na mmom, ɛ́mɔma ɔyɛ ɛmɔ fɛ kyɛ ɛmɔnwu Kristo amaneɛ ne bie ɔ, amaa sɛ bɛye ye animnyam ne ali a, ɛmɔ koso ɛmɔali ahurusi ná ɛmɔ nye agye.

¹⁴ Na sɛ ɔnate Kristo dumaa ti bɛbɔ ɛmɔ alapaa a, ɔte saleɛ ma ɛmɔ; ofikyɛ animnyam sunzum, Nyameɛ sunzum ne, ɔwɔ ɛmɔ so.

¹⁵ Nakoso nnɛmɔma ɛmɔ nu bie yɛ wudiniɛ anaa awueniɛ anaa bɔnefoɛ anaa ɔyɛ ebie dwirɛ nwo nwondononwondono ná onwu ye nwo amaneɛ.

¹⁶ Nakoso sɛ ebie te Kristoniɛ ti, ná onwu amaneɛ a, nnɛmaa ɔyɛ ye nya; na mmom maa ɔhyɛ Nyameɛ animnyam kyɛ sɔ dumaa ne la ye so ɔ.

¹⁷ Ofikyɛ mmerɛ ne adwu kyɛ ndɛenbualɛ hyɛ ye bo wɔ Nyameɛ awuro ɔ. Na sɛ bɛfa yɛ bɛhyɛ ye bo a, nzaade bɛ bɔ bɛyɛ Nyameɛ nzɛmba ne nwo asoserɛ ne de, okoyie bɛ sɛ?

¹⁸ Na sɛ ɔyɛ se kyɛ bekole sona bɔ ɔtengyɛ ngoa a, né nzaade sona bɔ onzuro Nyameɛ, yeɛ bɔnefoɛ begyi ye sɛ?

¹⁹ Yiti bɛ bɔ ɔnate Nyameɛ apɛdeɛ ti benwu amaneɛ ne, maa bɛfa bɛ kra bewura Ɛdangama bɔ ɔte nahorɛniɛ ne sa, ná bɛhɔ so bɛyɔ bɔ ɔte paa ɔ.