1 Petro 3 - AHYERƐLƐ KRONGRON

Huɛ mɔ ne yeɛ mɔ

¹ Yeɛ mɔ, sɔ ala yeɛ ɛ́mɔbrɛ ɛmɔ nwo ase bɛ́ma ɛmɔ bɔbɔ bɛ hu mɔ ɔ; na sɛ ɔba kyɛ bɛ nu biemɔ benne edwirɛ ne benni a, bafa bɛ ye mɔ suban so, bɔ nna bɛ noa dwirɛ ahɔ ɔ basakyera;

² sɛ benwu ɛmɔ brabɔlɛ sannwuu bɔ esurolɛ wɔ nu ne a.

³ Nnɛmɔma ɛmɔ nwo siesielɛ ne ɔyɛ anwoɔnaen nu nikye, bɔ ɔte tirebɔlɛ, sikaa kɔkorɛ mbembenanneɛ, anaa ndena paa heralɛ;

⁴ na mmom ɛ́mɔma ɔyɛ ahone nu nikyee bɔ anyeɛ nnwu ye, sunzum bɔ odwo, ɔbrɛ ye nwo ase, nikyee bɔ ɔmborɔ, bɔ ɔte nikyee nyɔboɛserɛ wɔ Nyameɛ nyunu ɔ.

⁵ Na sɔ atee he aso yeɛ daa tete mmrasua krongron bɔ bɛfale bɛ wora bewurale Nyameɛ nu ne besiesiele bɛ nwo ɔ, na bɛbrɛle bɛ nwo ase bɛmane bɛ bɔbɔ bɛ hu mɔ,

⁶ kyɛbɔ Sara yɛle sotie mane Abraham ná ɔfrɛle ye ye mene ne. Na sɛ ɛmɔyɔ bɔ ɔte paa, ná ɛmɔamma ɛserɛ anzi ɛmɔ ate a, ye de ɛmɔte ye mma mmrasua.

⁷ Huɛ mɔ, ɛmɔ koso, ɛmɔ ne ɛmɔ aye mɔ bɛ́tena ndeaseɛ nu sɔ ala. Ɛ́mɔfa anidie bɛ́ma ɛmɔ aye mɔ, kyɛ bɛte mmenia bɔ bɛyɛ mmerɛ ɔ, kyɛ bɛboka ɛmɔ so yeɛ ɛmɔle kyɛfa wɔ ngoa adom ne anu ɔ; ná nikye fee wanzi ɛmɔ mbaeɛ ate.

Paayɛlɛ nu amaneɛnwunɛ

⁸ Bɔ ɔpɛ ye bo ɔ, ɛmɔ amukoraa ɛ́mɔnya adwene ko, ɛ́mɔnwunwu ɛmɔ nwo anwumvoin, ɛmɔhurohuro ɛmɔ nwo dwirɛ kyɛ aliɛmaa mɔ, ɛ́mɔnya tema bɛ́ma ɛmɔ nwo, na ɛ́mɔdwene anwobrɛaseɛ adwene.

⁹ Nnɛma ɛmɔfa bɔne betua bɔne so, anaa nzoaapepɛlɛ betua nzoaapepɛlɛ so; na mmom ɛ́mɔyirayira; ofikyɛ ɛhe ati yeɛ bɛfrɛle ɛmɔ ɔ, kyɛ ɛmɔɔnya saleɛ.

¹⁰ Ofikyɛ sona biala bɔ okuro ngoa ná ɔpena kyɛ onwu asetena paa nen, nnɛmaa ɔfa ye noa kekã musue dwirɛ, yeɛ nnɛma nnakannaka dwirɛ fite ye noa.

¹¹ Maa ohyi bɔne ná ɔyɔ bɔ ɔte paa ɔ; maa ɔpena asomdwee boso ná oli ye si.

¹² Ofikyɛ Awurade nye wɔ teneneefoɛ so, na ɔyɛ asoɛ ma bɛ mbaeɛ; nakoso bɛ bɔ bɛyɔ bɔne de, Awurade nye sa bɛ.

¹³ Na sɛ ɛmɔfa besie ɛmɔ nye so kyɛ ɛmɔyɔ bɔ ɔte paa a, nwa yeɛ ɔkɔha ɛmɔ ɔ?

¹⁴ Nakoso sɛ tenenee ti ɛmɔnwu amaneɛ a, ɔte saleɛ ma ɛmɔ. Nnɛmɔma bɛ nwo suronyi tɔ ɛmɔ so, yeɛ nnɛmɔma ɛmɔ kunu tete ɛmɔ;

¹⁵ na mmom ɛ́mɔma Awurade Kristo ɔyɛ krongron wɔ ɛmɔ ahone nu. Na mmerɛ biala, ɛ́mɔboaboa ɛmɔ nwo bésie, amaa sɛ ebie bisa ɛmɔ dwirɛ fa anyelasoɛ bɔ ɔwɔ ɛmɔ nu ne nwo a, ɛmɔahora baye ye noa bahyire ye wɔ anwobrɛaseɛ ne anidie nu.

¹⁶ Ɛ́mɔma ɛmɔ tiboa obua ɛmɔ be, amaa sɛ bɛto ɛmɔ soen a, bɛ bɔ bɛkekã ɛmɔ Kristo nu bra paa ne nwo dwirɛ tɛɛ ne, bɛ nyunu agua ase.

¹⁷ Na sɛ Nyameɛ kuro kyɛ ɛmɔnwu bra paa nu amaneɛ a, ye sɔ te paa tra kyɛ ɛmɔkonwu amaneɛ wɔ bɔneyɔlɛ nu ɔ.

¹⁸ Ofikyɛ Kristo koso nwuni bɔne nwo amaneɛ pɛenko; ye bɔ ɔtengyɛ ne, onwuni amaneɛ mane bɛ bɔ bɛndengyɛ ɔ, amaa ɔnate so wafa yɛ wahɔ Nyameɛ berɛ. Behuni ye wɔ anwoɔnaen nu, nakoso bɛfale ye bɛwale ngoa nu wɔ Sunzum nu,

¹⁹ na nu koso yeɛ ɔɔbɔle nzɛmba ne dawure hyirele sunzum mɔ bɔ begua kukunu,

²⁰ bɔ daa tete mmerɛ bɛyɛle asoserɛ, mmerɛ bɔ Nyameɛ nwondɛle aboterɛ nu wɔ Nowa aberɛ so, bɔ né ɔ́bobɔ ɛlɛen alaka ne. Sɔ mmerɛ ne, mmenia kãa bie, bɔ bɛte mmɔtwɛ ɔ yeɛ bɛfale nzue so belele bɛ ngoa ɔ.

²¹ Na sɔ nzue ne sɛso, ye ole asubɔlɛ bɔ ode ɛmɔ koso ɛmɔ ngoa ɛnɛ ne. Ɔtte anwoɔnaen nu fiɛ nwunzinɛ, na mmom ɔte tiboa paa nwo abisadeɛ bɔ yɛfa Yesu Kristo wutingyelɛ ne aso yɛfa yɛto Nyameɛ nyunu ɔ.

²² Ye yeɛ ɔhɔle nyameɛso ne, na ɔte Nyameɛ sa famaa so; na abɔfo mɔ ne anwoserɛ mɔ ne tumi mɔ babrɛ bɛ nwo ase bawura ye bo.