1 Petro 2 - AHYERƐLƐ KRONGRON

Ngoa nyɔboɛ ne maen krongron

¹ Yiti ɛ́mɔgyi bɔne yɔleɛ amukoraa, nnakannaka amukoraa, nyaatwomyɛlɛ, ɛpɔen ne nzekure amukoraa bégua.

² Ɛmɔte kyɛ nnɔma bɔ bawo bɛ foforɛ ɔ, yiti ɛ́mɔpena sunzum nu nyɔfonesue bɔ ye nwo te ɔ, amaa ɔnate so ɛmɔanyi nu bahɔ ngoalelɛ nu,

³ mmerɛ bɔ ɛmɔanwu kyɛ Awurade te paa ne.

⁴ Ɛmɔbra ye berɛ, ngoa nyɔboɛ ne, bɔ mmenia apo ye, nakoso Nyameɛ de, waneanea nu waye ye, bɔ odi mu ne;

⁵ na ɛmɔ koso, ɛmɔte kyɛ ngoa nyɔboɛ mɔ, na ɛ́mɔma bɛ́fa ɛmɔ bési sunzum nu sua ma ɛmɔyɛ asɔfokure krongron, amaa ɛmɔafa Yesu Kristo so babɔ sunzum nu afɔleɛ bɔ ɔsɔ Nyameɛ nye ɔ.

⁶ Ofikyɛ ɔwɔ Ahyerɛlɛ ne anu kyɛ: “Tie, méfa ndweasoɛ nyɔboɛ titire bɔ maneanea nu maye ye, ná odi mu ɔ meto Sion, na ebiala bɔ ode ye di ne, ye nyunu ngogua ase.”

⁷ Na ɛmɔ bɔ ɛmɔde ye bedi ne de, odi mu ma ɛmɔ; nakoso bɛ bɔ benne benni ne de, “Nyɔboɛ bɔ suasilɛfoɛ bɛpole ye ne, ye ala yeɛ waayɛ sua ne ndweasoɛ nyɔboɛ titire ɔ;

⁸ yeɛ ɔte sundidua nyɔboɛ ne sundiduatolɛ nyɔbotaen ma bɛ.” Na befi ase, ofikyɛ bɛyɛ edwirɛ ne nwo asoserɛ, kyɛbɔ b’ayieleɛ nhyehyɛleɛ te ne ala.

⁹ Nakoso ɛmɔ de, ɛmɔte mmenia bɔ baneanea nu baye ɛmɔ ɔ, nnehyeɛ asɔfokure, maen krongron, maen bɔ wafa ye wayɛ ye deɛ ɔ, kyɛ ɛmɔɔbɔ bɔ ɔfrɛle ɛmɔ fili awosii nu wale ye kanea bɔ ɔyɛ nwanwa ne anu ne, ye ayɛyelɛ ne dawure.

¹⁰ Daa ne de, né ahaa ɛmɔtte maen, nakoso afei de, ɛmɔte Nyameɛ maen; daa ne de, né onnwuni ɛmɔ anwumvoin, nakoso afei de, wanwu ɛmɔ anwumvoin.

Nyameɛ ngoaa

¹¹ Adɔfo mɔ, mesrɛ ɛmɔ, ɛmɔte ɛwɔfoɛ ne amanvrafoɛ, yiti anwoɔnaen akɔnnɔ bɔ ɔko tia ɛmɔ kra ne, ɛmɔhwe ɛmɔ nwo befi ye nwo.

¹² Ɔwɔ nu kyɛ Amaenmaensofoɛ nemɔ bɛkekã ɛmɔ nwo dwirɛ kyɛ ɛmɔte bɔnefoɛ de, nakoso ɛ́mɔma ɛmɔ bra yɛ sannwuu wɔ bɛ nu, amaa banwu ɛmɔ bra paa ne, ná bahyɛ Nyameɛ animnyam wɔ kyẽa bɔ ɔkɔwa ne.

¹³ Ɔnate Awurade ti, ɛ́mɔbrɛ ɛmɔ nwo ase bɛ́ma tumililɛ amukoraa: kyɛ ɛhene berembɔn ne ahɔ oo,

¹⁴ anaa amrado mɔ bɔ ɔsoma bɛ maa bɛkɔtwe nzɛmmɔnefoɛ so, ná bɛkamvo bɛ bɔ bɛyɔ bɔ ɔte paa ahɔ oo.

¹⁵ Ofikyɛ bɔ Nyameɛ kuro kyɛ ɛmɔyɔ ɛhe: kyɛ ɛmɔkɔfa ɛmɔ bra paa ne bɛkɔhã ngwaseafoɛ noa bɛkɔto nu ɔ.

¹⁶ Ɛ́mɔbɔ ɛmɔ bra kyɛ fawɔnwodifoɛ, nakoso nnɛma ɛmɔfa ɛmɔ fawɔnwodi ne bɛkatakata ɛmɔ nyunu bɛyɔ bɔ ɔte bɔne ɔ; na mmom ɛ́mɔbɔ ɛmɔ bra kyɛ Nyameɛ ngoaa.

¹⁷ Ɛ́mɔfa anidie bɛ́ma mmenia amukoraa! Ɛ́mɔhurohuro aliɛmaa mɔ agyidifoɛ dwirɛ! Ɛ́mɔsuro Nyameɛ! Ɛ́mɔfa anidie bɛ́ma ɛhene ne!

Kristo amaneɛnwunɛ te nhwɛsoɛ

¹⁸ Ngoaa mɔ, ɛ́mɔfa esuronyi amukoraa bɛbrɛ ɛmɔ nwo ase bɛ́ma ɛmɔ mene mɔ. Nna meneɛ mɔ bɔ bɛte paa ná bedwo angome, na mmom meneɛ atianuserɛfoɛ koso bɛboka so.

¹⁹ Ofikyɛ ɛhe te animnyam, kyɛ wɔ tiboa se Nyameɛ ti, emia wɔ nye edi aworabɔlɛ enwu amaneɛ bɔ ɔmvata ɔ.

²⁰ Na sɛ ɛmɔyɔ bɔ ɔtte mayee, ná bɛbo ɛmɔ wɔ ye nwo a, nzikyɛ animnyam yeɛ ɛmɔnya ɔ? Nakoso sɛ ɛmɔyɔ bɔ ɔte paa, ná ɛmɔmia ɛmɔ nye benwu ye nwo amaneɛ a, ɔsɔ anyeɛ wɔ Nyameɛ nyunu.

²¹ Na ɛhe ati yeɛ bɛfrɛle ɛmɔ ɔ, ofikyɛ ɔnate yɛ ti Kristo koso nwuni amaneɛ, na ɔfa yɛle nhwɛsoɛ mane yɛ, kyɛ ɛmɔ koso ɛ́mɔtu ye agyirɛ ne bie.

²² Ye de, wanyɔ bɔne, biala, yeɛ ngondombo dwirɛ biala amvi ye noa.

²³ Bɛpepɛle ye nzoaa nen, wangakyi wamma bɛ; mmerɛ bɔ né onwu amaneɛ nen, wannwunanwuna; na mmom ɔfale ye nwo wurale bɔ obua ndɛen turoloo ne sa.

²⁴ Ye bɔbɔ yeɛ ɔsoale yɛ bɔne wɔ ye nipadua nu hɔle bakaa ne aso ɔ, kyɛ, sɛ yawu yafi bɔne nu de a, ɔsɛ kyɛ yɛtena ase yɛma tenenee. Na ye nwo beabealɛ ne yeɛ wafa wasa ɛmɔ anwonyerɛ ɔ.

²⁵ Ofikyɛ, ahaa né ɛmɔte kyɛ mmoaen bɔ bamini ɔ, nakoso kekesaala ye de, ɛmɔasa bawa ɛmɔ kra so Neafoɛ ne Wɛmvoɛ ne berɛ.