1 Petro 1 - AHYERƐLƐ KRONGRON

Ahyebisalɛ

¹ Petro, Yesu Kristo somafoɛ, méfa mebrɛ bɛ bɔ babɔ aya bahɔ Ponto, Galatia, Kapadokia, Asia ne Bitinia,

² bɛ bɔ Baba Nyameɛ waneanea nu waye bɛ fi tetetete, bɔ ɔnate Sunzum Krongron so wate bɛ nwo wama Yesu Kristo nwo sotie ɔne ye mogya nu anwopetenɛ ne: Adom ne asomdwee mmorosoɛ ɔyɛ ɛmɔ deɛ.

Anyelasoɛ bɔ ngoa wɔ nu

³ Animnyam hã Nyameɛ, y’Awurade Yesu Kristo Baba ne, bɔ ɔnate ye anwumvoinnwunɛ mmorosoɛ ti wafa Yesu Kristo awufoɛ nu ewutingyelɛ ne aso wawo yɛ foforɛ maa yanya anyelasoɛ bɔ ngoa wɔ nu,

⁴ maa yanya agyapadeɛ bɔ ɔmborɔ, bɔ ngekalewa nne ye nwo, bɔ ɔmbɛ nu ngɔ, bɔ bafa basie nyameɛso bama ɛmɔ

⁵ bɔ bɛnate gyidie so bɛbɔ ɛmɔ nwo waen wɔ Nyameɛ tumi nu, bɔ ɔkɔ ngoalelɛ bɔ basiesie kyɛ bɛbaala ye ali wɔ mmerɛ bɔ oli nziɛ ne anu ne.

⁶ Na ɛhe nu yeɛ ɛmɔdi ahurusi paa ɔ, ɔwɔ nu kyɛ kekesaala ye de ɔsɛ kyɛ ɛmɔ wora bɔ kãa, ɔnate nzɔhwɛ ahoroɔ ne ati,

⁷ amaa ɔnate so ɛmɔ gyidie ne—bɔ ye nyɔboɛ yɛ se tra sikaa kɔkorɛ, bɔ ɔwɔ nu kyɛ beso bɛnea wɔ see nu po, nakoso ɔsɛkye ne—wakakyi ayɛyelɛ, anidie ne animnyam wɔ Yesu Kristo nwo aliyelɛ ne anu.

⁸ Ye yeɛ ɛmɔnnwuni ye, nakoso ɛmɔkuro ye dwirɛ; ɔwɔ nu kyɛ kekesaala ye de ɛmɔnnwu ye, nakoso ɛmɔde ye bedi, na ɛmɔanya anigye bɔ olle kabea bɔ animnyam wɔ nu ɔ,

⁹ ofikyɛ ɛmɔgu so benya ɛmɔ gyidie ne nwo akatuaa, bɔ ɔte ngoalelɛ ma ɛmɔ kra ɔ.

¹⁰ Na ɔfa ngoalelɛ he anwo de, ngɔmhyɛlɛfoɛ bɔ bɛhyɛle adom bɔ ɔte ɛmɔ deɛ ne nwo ngɔm ne, bɛfeefeele nu, na bɛpɛnzɛpɛnzɛle nu.

¹¹ Bɛbɔle mmɔden kyɛ bekonwu mmerɛ horɛ, anaa mmerɛ ahoroɔ mɔ bɔ Kristo Sunzum bɔ né ɔte bɛ nu ne ɔda ye ali ɔ, mmerɛ bɔ olili moa lili Kristo amaneɛnwunɛ nwo adanzeɛ, ɔne animnyam bɔ ɔtoa so ne.

¹² Na bɛlale ye ali behyirele bɛ kyɛ, nna bɛ bɔbɔ bɛ nwo, na mmom yɛ yeɛ né bɛyɔ ɛsolɛ adwuma ne bɛma yɛ ɔ, wɔ edwirɛ mɔ bɔ kekesaala ye yɛbɔ ye dawure yɛkyire ɛmɔ ne anu, ɔne bɛ bɔ bɛnate Sunzum Krongron bɔ basoma ye fi nyameɛso so bɛɛhane nzɛmba ne behyirele ɛmɔ ne. Na sɔ dwirɛ nemɔ yeɛ abɔfo mɔ po bekuro kyɛ benwu nu ɔ.

Brabɔlɛ bɔ ye nwo te ɔ

¹³ Yiti ɛ́mɔsiesie ɛmɔ adwene ma osi pi, ɛ́mɔma ɛmɔ nye la berɛ, ná ɛ́mɔma ɛmɔ anyelasoɛ amukoraa ówura adom bɔ Yesu Kristo kɔfa kɔbrɛ ɛmɔ wɔ ye nwo aliyelɛ ne anu.

¹⁴ Ɛ́mɔyɛ kyɛ ngwadaa bɔ bɛ so yɛ mmerɛ ɔ, na akɔnnɔ bra bɔ daa ne né ɛmɔnze ti ɛmɔbɔle ne, nnɛma ɛmɔsa bekodi ye si.

¹⁵ Na mmom, kyɛbɔ bɔ ɔfrɛle ɛmɔ ne ɔte krongron ne, sɔ ala yeɛ ɛmɔ koso ɛ́mɔyɛ krongron wɔ ɛmɔ brabɔlɛ amukoraa nu ɔ.

¹⁶ Ɔnate kyɛ, bahyerɛ kyɛ, “Ɛ́mɔyɛ krongron, ofikyɛ me, nde krongron.”

¹⁷ Na sɛ ɛmɔfrɛ bɔ ɔnnea sona nyunu yeɛ obua ndɛen kyɛbɔ ebiala nnwumaa te ɔ kyɛ Baba a, ye de ɔsɛ kyɛ ɛmɔfa esuronyi bɛbɔ ɛmɔ bra wɔ mmerɛ bɔ ɛmɔaayɛ amanvrafoɛ ɔ.

¹⁸ Ofikyɛ ɛmɔse kyɛ, bra fiɛ bɔ ɛmɔ nana mɔ fa yakyili ɛmɔ ne, nna nningyein bɔ bɛporɔ te kyɛ ɛdwetɛ anaa sikaa kɔkorɛ yeɛ bɛfa bɛyɛle ɛmɔ ti nyɔboɛ bɛpɔle ɛmɔ befili nu ɔ,

¹⁹ na mmom Kristo bɔ ɔte kyɛ boaen ba bɔ ollili nnɛen bɔ ngekalewa biala nne ye nwo ne, ye mogya bɔ odi mu ne yeɛ bɛfa bɛpɔle ɛmɔ ɔ.

²⁰ Ye yeɛ bɛyele ye besiele berɛ koraka yeɛ bɛbaabɔ wiase ɔ, nakoso ɔnate ɛmɔ ti yeɛ bala ye ali bahyire wɔ mmerɛ bɔ oli nziɛ ye anu ɔ.

²¹ Na ɔnate ye so yeɛ ɛmɔde Nyameɛ bɔ otingyele ye fili awufoɛ nu ná ɔhyɛle ye animnyam ne bedi ɔ, amaa ɔnate so ɛmɔanya gyidie ne anyelasoɛ wɔ Nyameɛ nu.

²² Asoɛmmerɛlɛ bɔ ɛmɔayɛ bama nahorɛ ne ne ati, wamaa ɛmɔate ɛmɔ kra nwo, na ɛhe amaa ɛmɔahurohuro ɛmɔ nwo dwirɛ wɔ nahorɛ nu, yiti ɔsɛ kyɛ ɛmɔfi ɛmɔ ahone nu bekurokuro ɛmɔ nwo dwirɛ.

²³ Banwo ɛmɔ bamvi nikyee bɔ ɔporɔ ɔ nu, na mmom befili bɔ ɔmborɔ ɔ nu, bɔ bɛnate Nyameɛ dwirɛ bɔ ngoa wɔ nu ná otimu berɛ daa ne aso yeɛ bawo ɛmɔ foforɛ ɔ.

²⁴ Ofikyɛ “Anwoɔnaen amukoraa te kyɛ ndire, na sona animnyam amukoraa te kyɛ ndire bɔ wabɔ nyerɛen ɔ. Ndire kese, na ye nyerɛen poro gua;

²⁵ nakoso Awurade dwirɛ de, otimu berɛ afebɔɔ.” Na edwirɛ he ole nzɛmba bɔ babɔ ye dawure bahyire ɛmɔ ne.