1 Korintofoɛ 9 - AHYERƐLƐ KRONGRON

Asomvoɛ adwuma nwo dwirɛ

¹ Me bɔbɔ nnne me nwo hɔ ɔ? Aso nnde somafoɛ anaa? Nnwuni y’Awurade Yesu Kristo hɔ ɔ? Nna me sa noa adwuma wɔ Awurade nu ole ɛmɔ hɔ ɔ?

² Sɛ nnde somafoɛ mma ebiemɔ a, ɛmɔ de, nde somafoɛ ma ɛmɔ, ofikyɛ ɛmɔte me somafoɛyɛlɛ nzɔanoɛ wɔ Awurade nu.

³ Sɔa yeɛ meye me noa mekyire bɛ bɔ bɛfeefee me bra nu ne ɔ:

⁴ Aso yɛlle ye nwo ate kyɛ yɛdidi ná yɛno anaa?

⁵ Aso yɛlle ye nwo ate kyɛ yɛne aliɛmaa brasua bɔ ɔte yɛ ye tu atee, kyɛbɔ asomafoɛ ngaa nemɔ ne Awurade aliɛma mɔ ne Kefa bɛyɔ ne?

⁶ Anaakyɛ me ne Banaba de, yɛ ngome twe yeɛ onni kyɛ yɛyakyi kyɛ yɛyɔ adwuma yɛnea yɛ nwo ɔ?

⁷ Nwa yeɛ ɔkɔ koɛ ná ye bɔbɔ yeɛ otua ye nwo kerɛ ɔ? Nwa yeɛ ɔyɔ mmakaammaa boo bɔ onni ye mma ne bie ɔ? Anaakyɛ nwa yeɛ ɔnea nandwie so ná ɔnno bɛ nyɔfonesue ne bie ɔ?

⁸ Aso kuro sona tumi so yeɛ ngyi bɔ mekã he ɔ, anaakyɛ mmeraa ne koso nga sɔ?

⁹ Na bahyerɛ ye Mose mmeraa ne anu kyɛ, “Sɛ nandwie boro aburoo a, nnɛkyekye ye noa.” Aso nandwie yeɛ ye nwo hia Nyameɛ ɔ?

¹⁰ Anaakyɛ nna yɛ ti yeɛ ɔmaa ɔhane sɔ ɔ? Ɔte nahorɛ kyɛ yɛ ti yeɛ bahyerɛ kyɛ, odi kyɛ sona bɔ ofundam aseɛ ne fundam ye anyelasoɛ nu, na bɔ ɔboro aburoo ne koso boro ye anyelasoɛ nu kyɛ okonya nu bie ɔ.

¹¹ Yalua sunzum nu mmaa wɔ ɛmɔ nu, na sɛ ɛmɔboka yɛ wɔ anwoɔnaen nu nningyein nu a, aso né ɛmɔayɔ bɔ ɔtra so anaa?

¹² Sɛ ebiemɔ le atee bɛkora benya nningyein befi ɛmɔ berɛ a, né yɛ de yɛlle ye nwo ate kyɛ yɛnya bɔ ɔtra sɔ anaa? Nakoso yɛ de, yamva sɔ atee ne aso; na mmom yɛmiane yɛ nye yɛpenene nikyee biala so, kyɛbɔ ɔkɔyɛ na yanzi Kristo nzɛmba ne nwo atee ɔ.

¹³ Aso ɛmɔnze, kyɛ bɛ bɔ bɛyɔ nningyein krongron nemɔ nwo adwuma ne, benya bɛ noa aleɛ befi asɔneyɛɛ sua ne anu ɔ? Yeɛ bɛ bɔ bɛso wɔ afɔleɛ bokyea ne anwo ne, benya afɔleɛbɔlɛ nningyein ne bie ɔ?

¹⁴ Sɔ ala yeɛ Awurade ahyehyɛ kyɛ bɛ bɔ bɛkã nzɛmba ne, bekodidi nzɛmba ne nwo ɔ.

¹⁵ Nakoso mmmisale ɛmɔ asɛdeɛ he nwo hwee; yeɛ mengyerɛ krataa he memmrɛ ɛmɔ kyɛ ɛmɔyɔ sɔ asɛdeɛ ne bɛma me. Ofikyɛ, kyɛ ebie kɔma me nwo hoahoalɛ kɔyɛ mbaen de, nzaade maa nwu.

¹⁶ Na sɛ mekã nzɛmba ne a, né ongyire kyɛ mva nhoahoa me nwo, ɔnate kyɛ ɔte adwuma bɔ odi kyɛ meyɔ ɔ. Na sɛ mangã nzɛmba ne a, me yaakɔ!

¹⁷ Sɛ me bɔbɔ me pɛ yeɛ mefa mekã nzɛmba ne a, ye po mefata akatuaa, nakoso sɛ nna me bɔbɔ me pɛ yeɛ mefa mekã hɔ a, nzaade bɔ bafa bawura me sa ne ala yeɛ meyɔ ne.

¹⁸ Yiti akatuaa beni yeɛ menya ɔ? M’akatuaa ole kyɛ ngɔhã Kristo nzɛmba ne bɔ memmisa ebie dɔ hwee ɔ, ná afei asɛdeɛ bɔ odi kyɛ bɛyɔ bɛma me wɔ nzɛmba ne anwo koso memmisa ɔ.

¹⁹ Ɔwɔ nu kyɛ ebiala nni me so de, nakoso mayɛ me nwo akoaa mama mmenia mukoraa, amaa ɔnate so me sa ahã mmenia pee.

²⁰ Nyɛle me nwo Yudaniɛ mane Yudafoɛ amaa me sa ahã Yudafoɛ. Ɔwɔ nu kyɛ nnwura mmeraa bo de, nakoso nyɛle me nwo kyɛ nwura mmeraa bo mane bɛ bɔ bewura mmeraa bo ne, amaa me sa ahã bɛ bɔ bewura mmeraa bo ne.

²¹ Nyɛle me nwo kyɛ nne mmeraa bo mane bɛ bɔ bɛnne mmeraa bo ne. Nna kyɛ ebiaa menni Nyameɛ mmeraa so hɔ ɔ, na mmom nwura Kristo mmeraa bo, amaa me sa ahã bɛ bɔ bɛnne mmeraa bo ne.

²² Nyɛle me nwo kyɛ meyɛ mmerɛ wɔ gyidie nu mane bɛ bɔ bɛyɛ mmerɛ wɔ gyidie nu ne, amaa me sa ahã bɛ bɔ bɛyɛ mmerɛ wɔ gyidie nu ne. Mayɛ mmenia mukoraa bɛ sona, kyɛbɔ ɔkɔyɛ ná atee biala aso, mama bɛ nu biemɔ banya daa ngoa ɔ.

²³ Nzɛmba ne ati yeɛ meyɔ ɛhe amukoraa ɔ, amaa me koso manya nu saleɛ ne bie.

²⁴ Ɛmɔnze kyɛ amirikatulɛfoɛ betu amirika a, ebiala pere kyɛ okoli ngonim ɔ, nakoso bɛ nu ko yeɛ onya ngonim abasobɔdeɛ ne ɔ? Yiti ɔsɛ kyɛ ɛmɔtu amirika ne kyɛ ɛmɔkonya abasobɔdeɛ ne ɔ.

²⁵ Ebiala bɔ otu amirika pere ngonim ne, ɔhyɛ ye nwo so wɔ nikyee biala nu. Bɛyɔ sɔ ná banya abotire abasobɔdeɛ bɔ ɔsɛkye ɔ, nakoso yɛ de, yɛnya abotire abasobɔdeɛ bɔ ɔnzɛkye ɔ.

²⁶ Yiti me de, mendu amirika asunzumabo, yeɛ mendo me twɔleɛ kyɛ ebie bɔ ɔto ye deɛ gua mvrama nu ɔ.

²⁷ Na mmom mehyɛ me nipadua ne anyeborolɛ maa odi yealɛ, ama nzɛmba bɔ mekã mekyire amanvoɛ ye, me bɔbɔ mambɛ me nwo manhwere nu saleɛ.