1 Korintofoɛ 7 - AHYERƐLƐ KRONGRON

Agyaa nwo dwirɛ

¹ Afei, ɔfa nningyein bɔ ɛmɔhyerɛle bɛbrɛle me nemɔ nwo de, ahaa ɔte paa kyɛ bienzua mva ye nwo nga brasua ɔ.

² Nakoso adwamanbɔlɛ nwo nzɔhwɛ ti, ɔsɛ kyɛ bienzua biala nya ye bɔbɔ ɔye, na brasua biala nya ye bɔbɔ ohu.

³ Ɔsɛ kyɛ huɛ ne yɔ bɔ ɔfata ɔ ma ɔye, na yeɛ ne koso yɔ sɔ ala ma ohu.

⁴ Ɔnate kyɛ yeɛ ne de, olle ye bɔbɔ ye nipadua so tumi, nakoso ohu le so tumi. Sɔ ala yeɛ huɛ ne koso olle ye bɔbɔ ye nipadua so tumi ɔ, nakoso ɔye le so tumi.

⁵ Nnɛma ɛmɔtua ɛmɔ nwo nnaa, sana ɛmɔ munyɔ ɛmɔapene so kyɛ ɛmɔtu mmerɛ kãa bie besie berɛ ma mbaeɛbɔlɛ; na ɛhe asi ye, ɛmɔasa bayia nu bieku, ná abɔnzam amva ɛmɔ anwohyɛsoɛ nu mmerɛyɛlɛ so wanzo ɛmɔ wannea.

⁶ Bɔ mekã ye, ɔtte kyɛ mmeraa yeɛ mehyɛ mema ɛmɔ ɔ, na mmom ɔte atee yeɛ mekyire ɛmɔ ɔ.

⁷ Ɔhale me ngome a, ahaa mmenia amukoraa bɛte kyɛ me, nakoso ebiala le ye ti anwo adom akyɛdeɛ bɔ Nyameɛ afa ama ye ɔ; asora ebiala deɛ.

⁸ Afei mekã mekyire asigyafoɛ ne akunafoɛ kyɛ, ahaa ɔte paa kyɛ bɛkɔhɔ so bɛkɔtena anwokwa nu kyɛbɔ nde ye.

⁹ Nakoso sɛ bɛngɔhora bɛngɔhyɛ bɛ nwo so de a, maa begya bie. Ofikyɛ ɔte paa kyɛ ekogya bie tra kyɛ wɔ nwo kɔhyere wɔ ɔ.

Agyaayiralɛ nwo dwirɛ

¹⁰ Na bɛ bɔ bagya bie ne de, bɔ mekã ye, nna me mmeraa ɔ, na mmom Awurade deɛ ɔ. Nnɛma brasua yira ohu.

¹¹ Nakoso sɛ braa ne yira a, ye ngome ɔtena anwokwa, anaakyɛ ɔne ohu besiesie b’afia na besa bɛbɔ nu. Huɛ koso, nnɛmaa oyira ɔye.

¹² Na ɛmɔ ngaa ne de, me yeɛ mekã ɔ, na nna Awurade ɔ: sɛ gyidiniɛ bienzua agya wiaseniɛ ná sɛ braa ne pene so kyɛ ɔne ye kɔtena a, nnɛma biaa ne yira ye.

¹³ Yeɛ sɛ gyidiniɛ brasua agya wiaseniɛ ná sɛ biaa ne pene so kyɛ ɔne ye kɔtena a, nnɛma braa ne yira ye.

¹⁴ Ofikyɛ wiaseniɛ huɛ ne, ɔnate ɔye so yeɛ ye nwo te ɔ; sɔ ala koso yeɛ wiaseniɛ yeɛ ne, ɔnate ohu so yeɛ ye nwo te ɔ. Na sɛ wamma ye sɔ de a, ahaa ɛmɔ mma mɔ nwo kogua fiɛ, nakoso kyɛbɔ ɔte ye de, bɛ nwo te wɔ Nyameɛ nyunu.

¹⁵ Nakoso sɛ wiaseniɛ ne kuro kyɛ oyira a, atee wɔ berɛ. Na sɛ ɔba ye sɔ a, mmeraa ngyekye gyidiniɛ bienzua anaa brasua ne, ofikyɛ Nyameɛ afrɛ yɛ kyɛ yɛtena asomdwee nu.

¹⁶ Gyidiniɛ braa, sɛ ɔnate wɔ so yeɛ bekole ehu ngoa a, aso ɛse? Wɔ gyidiniɛ biaa koso, sɛ ɔnate wɔ so yeɛ bekole ɛye ngoa a, aso ɛse?

Ma tebea bɔ ɛwɔ nu sɔ wɔ nye

¹⁷ Kyɛbɔ né ebiala si te bɔ Nyameɛ frɛle ye ne, ma sɔ sona ne ɔhɔ so bɔ ye bra kyɛbɔ Awurade ahyire ye ɔ. Nhyehyɛleɛ he yeɛ mayɔ mama asɔre biala ɔ.

¹⁸ Sɛ né ebie apɛ ye bienzua koraka yeɛ Nyameɛ frɛle ye a, nnɛmaa ɔha ye nwo kyɛ ɔkɔkakyi ye ɔ. Yeɛ sɛ né ebie ɔppɛle ye bienzua koraka yeɛ Nyameɛ frɛle ye a, nnɛmaa ɔha ye nwo kyɛ ɔkɔpɛ ɔ.

¹⁹ Ofikyɛ bapɛ wɔ bienzua oo, bɛppɛle wɔ bienzua oo, onhia; na mmom Nyameɛ mmeraa ne aso lilɛ yeɛ ohia ɔ.

²⁰ Ebiala hɔ so tena tebea bɔ né ɔwɔ nu koraka yeɛ Nyameɛ baafrɛ ye ne anu.

²¹ Bɛfrɛle wɔ ne, sɛ né ɛte akoaa a, nnɛmaa ɔha wɔ. Nakoso sɛ ɛkɔhora konya wɔ fawɔnwodi de a, pere kyɛ ekonya ye ɔ.

²² Ofikyɛ ebiala bɔ né ɔte akoaa koraka yeɛ Awurade frɛle ye ne, wayɛ Awurade dehyeɛ. Sɔ ala yeɛ ebiala bɔ né ɔte dehyeɛ koraka yeɛ bɛfrɛle ye ne, wayɛ Kristo akoaa ɔ.

²³ Bɛtɔle ɛmɔ nyɔboɛ serɛ, yiti nnɛma ɛmɔyɛ kuro sona ngoaa.

²⁴ Yiti aliɛmaa mɔ, tebea biala bɔ bɛfrɛle ebiala nu ne, nu ala yeɛ ɔne Nyameɛ bɛtena ɔ.

Agyaa nwo foɛtulɛ

²⁵ Afei, ɔfa mmabunu nwo ne de, nnyane ahyɛdeɛ biala mmvili Awurade berɛ, nakoso mekyire m’adwene kyɛ ebie bɔ Awurade anwu ye anwumvoin ti ɔ́kã nahorɛ ɔ.

²⁶ Sɛ menea kekesaala ye anwokyere ye a, mesusu kyɛ ahaa ɔte paa ma sona biala kyɛ ɔkɔtena tebea bɔ ɔwɔ nu ye ala nu.

²⁷ Sɛ egya braa a, nnɛyɛ w’adwene kyɛ ekoyira ye. Sɛ eggya bie koso a, nnɛyɛ w’adwene kyɛ ekogya bie ɔ.

²⁸ Nakoso sɛ egya braa de a, ɛyyɔle bɔne, yeɛ sɛ ababunu koso gya biaa a, ɔyyɔle bɔne. Asetena nu dwirɛ fa asodie bɔ nu yɛ no ɔ to awarefoɛ so, na ɛhe yeɛ ahaa mekuro kyɛ ɔpa ɛmɔ ti ɔ.

²⁹ Aliɛmaa mɔ, mekyire kyɛ, mmerɛ bɔ waha ne te tika, yiti ofi ɛnɛ bɔ ɔkɔ ɔ, bɛ bɔ begya braa ne, odi kyɛ bɛbɔ bɛ bra kyɛ beggya bie ɔ;

³⁰ bɛ bɔ besũ ne, odi kyɛ bɛbɔ bɛ bra kyɛ benzũ ɔ; bɛ bɔ bɛ nye agye ne, odi kyɛ bɛbɔ bɛ bra kyɛ bɛ nye ɔggyele ɔ; bɛ bɔ bɛtɔ nningyein ne, odi kyɛ bɛbɔ bɛ bra kyɛ belle huu ɔ;

³¹ na bɛ bɔ bedi wiase nningyein si ne, odi kyɛ bɛbɔ bɛ bra kyɛ sɔ nningyein nemɔ nwo nhia ɔ. Ofikyɛ, ewiase bɔ ɔwɔ berɛ kekesaala ye ne ɔpɛ nu kɔ.

³² Menguro kyɛ dadwene biala kɔha ɛmɔ ɔ. Bienzua sigyaniɛ dwene Awurade adwuma nwo, kyɛbɔ ɔkɔsɔ Awurade nye ɔ.

³³ Nakoso bienzua bɔ ogya braa de, ɔdwenedwene wiase nningyein nwo, kyɛbɔ ɔkɔsɔ ɔye nye ɔ, na ɔma ye adwene yɛ ndaa ndaa.

³⁴ Brasua sigyaniɛ anaa ababunu dwenedwene Awurade adwuma nwo, kyɛbɔ ɔkɔyɛ krongron wɔ nipadua ne sunzum nu ɔ; nakoso brasua bɔ ogya biaa de, ɔdwenedwene wiase nningyein nwo, kyɛbɔ ɔkɔyɛ kɔsɔ ohu nye ɔ.

³⁵ Ɛmɔ ngɔsoɛ ti yeɛ ɔmaa mekã he ɔ, mengã menhyɛ ɛmɔ so; na mmom mepena kyɛ ɛmɔyɔ bɔ ɔte paa ɔ, na ɛmɔfa ɛmɔ nwo amukoraa bɛso Awurade.

³⁶ Sɛ ebie bɔ asiwa ná asiwa ne so agyaa, ná sɛ biaa ne ngora nhyɛ ye nwo so wɔ ye asiwa ne anwo a, maa begya bɛ nwo, kyɛbɔ biaa ne pena ne ala. Ɔtte bɔne.

³⁷ Nakoso sɛ bienzua bie si ye adwene pi, bɔ ebie nhyɛ ye, na ɔkora hyɛ ye nwo so kyɛ onnya oggyale ye asiwa ne a, né wabɔ mmɔden.

³⁸ Yiti bɔ ogya ye asiwa ne, wabɔ mmɔden, nakoso bɔ wangya braa ne wabɔ mmɔden watra so.

³⁹ Sɛ brasua ahu te ase a, ɔngora nne ohu ndete nu; nakoso sɛ ohu ne wu de a, né ɔne ye batete nu, na ɔkora gya bienzua biala bɔ okuro ɔ, wɔ Awurade nu ngome.

⁴⁰ Sɛ ɔtena berɛ anwokwa na wangya biaa ko a, ɔte paa ma ye. Ɛhe te me bɔbɔ me nzusuleɛ, na mede medi kyɛ Nyameɛ Sunzum boka me so.