1 Korintofoɛ 6 - AHYERƐLƐ KRONGRON

Akristofoɛ ne manzoen hwenɛ

¹ Ɔwale ye sɛ bɔ ɛmɔ nu bie ne oliɛma nya edwirɛ a, ɔkora fa kɔ ewiasefoɛ badwa nyunu na ɔmva ngɔ anwoteefoɛ mɔ nyunu ɔ?

² Ɛmɔnze kyɛ anwoteefoɛ yeɛ bɛbaabua wiase ndɛen hɔ ɔ? Na sɛ ɛmɔbaabua wiase ndɛen a, nzu ati yeɛ ɛmɔngora benziesie edwirɛ mmaa mmaa hemɔ ɔ?

³ Aso ɛmɔnze kyɛ yɛkobua abɔfo mɔ po ndɛen ɔ? Nzaade, nzu ati yeɛ yɛngora nziesie ɛwa asetena nu dwirɛ ɔ?

⁴ Na sɛ asetena nu wɔndwiwɔndwi ba a, nzu ati yeɛ ɛmɔfa bɛkɔ mmenia bɔ asɔre ne mmu bɛ ɔ, bɛ gya so ɔ?

⁵ Meka ɛhe ma ɛmɔfɛre. Aso nworɛniɛ komapɛ po nne ɛmɔ nu bɔ ɔkɔhora kosiesie aliɛmaa ne aliɛmaa b’afia dwirɛ ɔ,

⁶ bɔ yeɛ aliɛmaa fa aliɛmaa kɔ bɛ bɔ benne nni gya so maa bebua bɛ ndɛen ɔ?

⁷ Manzoen bɔ ɛmɔ ne bɛ nwo twe ne kyire kyɛ ɛmɔali ngoguo. Nzu ati yeɛ ɛmɔmma bɛnyɔ ɛmɔ tɛɛ mmom ɔ? Nzu ati yeɛ ɛmɔmma benzisi ɛmɔ mmom ɔ?

⁸ Na mmom ɛmɔpɛ bɛ nwo bedi aminɛ na bɛyɛ asisie, na ɛmɔfa bedi ɛmɔ aliɛma mɔ po.

⁹ Ɛmɔnze kyɛ bɔnefoɛ ngɔhɔ Nyameɛ ahennie ne anu hɔ ɔ? Nnɛma ɛmɔlakalaka bɛ nwo: adwamanbɔlɛfoɛ, bosoensolɛfoɛ, agyaasɛkyelɛfoɛ, mmrasua bɔ bɛ ne mmrasua da, mmienzua bɔ bɛ ne mmienzua da,

¹⁰ awuefoɛ, anyeboroborolɛfoɛ, akɔnomnzafoɛ, nzekurebɔlɛfoɛ ne apoobɔlɛfoɛ ngɔhɔ Nyameɛ ahennie ne anu.

¹¹ Na sɔ yeɛ né ɛmɔ nu biemɔ bɛte ɔ, nakoso ɔnate Awurade Yesu Kristo dumaa ne yɛ Nyameɛ Sunzum ne ati, Nyameɛ abia ɛmɔ, wate ɛmɔ nwo, na wabua ɛmɔ be.

Fa wɔ nipadua hyɛ Nyameɛ animnyam

¹² “Nne nikyee biala nwo ate.” Nakoso nna nikyee biala yeɛ ɔte paa ɔ. “Nne nikyee biala nwo ate.” Nakoso mengɔmaa nikyee fee ngɔfa me ngɔyɛ akoaa.

¹³ “Bɛbɔle aleɛ bɛmane koɛ, yeɛ koɛ wora bɛbɔle ye bɛmane aleɛ.” Nakoso Nyameɛ kɔsɛkye bɛ munyɔ. Nipadua nne berɛ ma adwamanbɔlɛ, na mmom ɔwɔ berɛ ma Awurade, yeɛ Awurade koso wɔ berɛ ma nipadua.

¹⁴ Na Nyameɛ tingyele Awurade, na ɔnate ye tumi ne aso okotingye yɛ koso.

¹⁵ Ɛmɔnze kyɛ ɛmɔ nipadua ne te Kristo akwaa anaa? Aso mva Kristo akwaa ne nyɛ adwamanbɔlɛniɛ akwaa anaa? Nyameɛ pa gua!

¹⁶ Gyamea ɛmɔnze kyɛ sona bɔ ɔkɔfa ye nwo kɔha adwamanbɔlɛniɛ ne, né ɔne ye bayɛ anwoɔnaen ko hɔ ɔ? Ofikyɛ Ahyerɛlɛ ne nwa, “Bɛ munyɔ bɛkɔyɛ anwoɔnaen ko.”

¹⁷ Na sona bɔ ɔfa ye nwo bata Awurade ne, ɔne ye bɛyɛ ko sunzum nu.

¹⁸ Ɛmɔyakyi adwamanbɔlɛ! Bɔne biala bɔ sona yɔ ne nga ye nipadua, nakoso sona bɔ ɔbɔ adwaman ne yɔ bɔne tia ye bɔbɔ ye nipadua.

¹⁹ Anaa ɛmɔnze kyɛ ɛmɔ nipadua ne te Sunzum Krongron bɔ Nyameɛ afa ama ɛmɔ, bɔ ɔwɔ ɛmɔ nu n’asɔneyɛɛ sua ɔ, na ɛmɔ bɔbɔ ɛmɔlle bɛ nwo ɔ?

²⁰ Bɛtɔle ɛmɔ nyɔboɛ serɛ. Yiti ɛ́mɔfa ɛmɔ nipadua bɛhyɛ Nyameɛ animnyam.