1 Korintofoɛ 5 - AHYERƐLƐ KRONGRON

Adwamanbɔlɛ wɔ asɔre ne anu

¹ Baahã ye susu amba kyɛ ɛmɔ nu biemɔ bɔ adwaman, bɔ ye sɛso nne ewiasefoɛ po nu ɔ, ofikyɛ ebie fa ye baba aye.

² Nakoso ɛmɔhoahoa bɛ nwo! Ɛmɔ wora mmom yeɛ ɔsɛ kyɛ ɔbɔ ɔ, ná ɛmɔye sona bɔ wabɔ sɔ musue ne befi ɛmɔ nu.

³ Anwoɔnaen nu de, nna me ne ɛmɔ yeɛ yɛwɔ dɔ ɔ, nakoso me ne ɛmɔ yɛwɔ dɔ wɔ sunzum nu, na mabua sona bɔ wabɔ sɔ musue ne ndɛen dada te kyɛ me ne ɛmɔ yɛwɔ dɔ ne ala.

⁴ Sɛ me sunzum ne ɛmɔ beyia nu wɔ y’Awurade Yesu Kristo dumaa nu, na y’Awurade Yesu Kristo tumi boka so a,

⁵ odi kyɛ ɛmɔye sɔ sona ne bewura Abɔnzam sa maa ɔsɛkye ye nwoɔnaen ne, amaa ye sunzum anya daa ngoa wɔ Awurade Yesu kyẽa ne.

⁶ Ɔnzɛ kyɛ ɛmɔhoahoa ɛmɔ nwo. Ɛmɔnze kyɛ mɔle harewaa kãa bie yeɛ ɔfra mɔle torɛ ne amukoraa nu maa ɔkeka ɔ.

⁷ Yiti ɛ́mɔye mɔle harewaa daa ne befi ɛmɔ nu amaa ɛmɔayɛ mɔle torɛ foforɛ, kyɛbɔ ɛmɔte kabrɛdi ne ala. Ofikyɛ bafa Kristo bɔ ɔte y’Abɔtra boaen ne babɔ afɔleɛ bama yɛ.

⁸ Yiti nnɛmɔma yɛfa mɔle harewaa daa ne, bɔ ɔte bɔne ne amumuyɛɛ yɛdi aluolue ne, na mmom ɛ́mɔma yɛfa mɔle kabrɛdi bɔ ɔte adwene bɔ nu te ɔne nahorɛlilɛ ne yeɛ yɛli ɔ.

⁹ Krataa bɔ ngyerɛle ɛmɔ ne anu, ngane kyɛ nnɛma ɛmɔ ne adwamanbɔlɛfoɛ besã.

¹⁰ Mangyire kyɛ ewiasefoɛ bɔ bɛbɔ adwaman anaa bɛte anyeboroborolɛfoɛ, anaa awuefoɛ, anaa bɛ bɔ bɛso bosoensolɛfoɛ ofikyɛ ɔba ye sɔ de a, né odi kyɛ ɛmɔtu befi wiase wa.

¹¹ Na afei bɔ mekyerɛ mebrɛ ɛmɔ ole kyɛ, nnɛma ɛmɔ ne ebiala bɔ ɔfrɛ ye nwo aliɛmaa bɔ ɔbɔ adwaman, anaa ɔte anyeboroborolɛ, anaa ɔte bosoensolɛniɛ, anaa ɔte tuture, anaa akɔnomnzaniɛ anaa awueniɛ besã, nnɛma ɛmɔ ne ye to asaa bedidi po.

¹² Aso ɔte m’adwuma kyɛ mebua bɛ bɔ bɛnne yɛ fekue ye anu koso ndɛen ɔ? Aso nna bɛ bɔ bɛboka ɛmɔ so yeɛ ɛmɔbua bɛ ndɛen ɔ?

¹³ Na Nyameɛ yeɛ okobua bɛ bɔ bɛnne ɛmɔ fekue ne anu ndɛen ɔ. Yiti ɛmɔfoa amumuyɛɛniɛ ne béfi ɛmɔ nu.