1 Korintofoɛ 16 - AHYERƐLƐ KRONGRON

Yerusalem ehiafoɛ hia ndoboa

¹ Ɔfa ndoboa bɔ bedide bɛkɔma anwoteefoɛ nwo nen, nhyehyɛleɛ bɔ mayɛ mama Galatia asɔre nemɔ ala yeɛ ɛmɔ koso ɛmɔli so ɔ.

² Dapɛn biala nu kyẽa bɔ oli moa ne, ɛmɔ nu biala ɔ́fa bɔ Nyameɛ afa alo ye ne bie osie, amaa sɛ meba a, ye nwo anhia kyɛ ɛmɔkɔkekã bɛ sa ase ɔ.

³ Sɛ meba a, mmenia bɔ ɛmɔkɔye bɛ kɔma bɛ adanzeɛ krataa ne, ngɔsoma bɛ maa bɛkɔfa ɛmɔ akyɛdeɛ ne bɛkɔhɔ Yerusalem.

⁴ Na sɛ ohia kyɛ me ne bɛ kɔ a, me ne bɛ yɛkɔhɔ.

Pɔɔlo ateetulɛ nwo nhyehyɛleɛ

⁵ Ngɔfa Makedonia koraa né mawa ɛmɔ berɛ, ofikyɛ mayɛ m’adwene kyɛ ngɔfa Makedonia.

⁶ Ebiaa ngɔhyɛ ɛmɔ anwo berɛ kãa, anaa ngoli prakasua ne ɛmɔ berɛ, na afei nziɛ ye ɛmɔaboka me bagua me ate maa mahɔ nekaa bɔ mekɔ ɔ.

⁷ Menguro kyɛ me nye bɔ ɛmɔ so ala a, né masa mahɔ ɔ, na mmom me nye la so kyɛ sɛ Awurade ma ate a, ngɔhyɛ ɛmɔ nwo berɛ kãa.

⁸ Nakoso ngɔtena Ɛfeso wa maa okoodwu Pɛntekɔso.

⁹ Atee piri bie bɔ ngɔfa so ngɔyɔ adwuma, bɔ ye nwo kɔwa mvasoɛ abukye ama me wɔ wa, nakoso me pɔfoɛ sone.

¹⁰ Sɛ Timoteo ba a, ɛ́mɔnea kyɛ ɔnne ɛmɔ ngɔtena wɔ ahunudetelɛ nu ɔ, ɔnate kyɛ ɔyɔ Awurade adwuma kyɛbɔ meyɔ ne ala.

¹¹ Nnɛma ebiala bu ye animtia, na mmom ɛmɔgua ye ate asomdwee nu ma osa bra me wa, ofikyɛ menea ye ne aliɛmaa nemɔ ate.

¹² Ɔfa aliɛmaa Apolo nwo de, mahyɛ ye nguraen pee kyɛ ɔne aliɛmaa nemɔ bɛɛpasa ɛmɔ nwo, nakoso onnya ɔyyɛle ye adwene kyɛ ɔkɔwa kekesaala ye; na sɛ atee ba nu a, ɔkɔwa.

Ahyebisalɛ ne ngraa

¹³ Ɛmɔwɛne, ɛmɔgyina pindinn wɔ gyidie nu, ɛ́mɔma ɛmɔ ahone yɛ se, ná ɛ́mɔmia ɛmɔ nye.

¹⁴ Ɛ́mɔfa ɔdɔ bɛyɔ ɛmɔ nningyein mukoraa.

¹⁵ Aliɛmaa mɔ, ɛmɔse Setefana ne ye abusuafoɛ nwo dwirɛ; bɛ yeɛ belili moa bɛyɛle agyidifoɛ wɔ Akaia ɔ, na batu bɛ nwo basie berɛ bama anwoteefoɛ solɛ.

¹⁶ Yiti ɛ́mɔbrɛ ɛmɔ nwo ase bɛma sɔ mmenia ne, ɔne ebiala bɔ ɔne yɛ di sɔ dwumadie ne ɔ.

¹⁷ Ɔyɛ me fɛ kyɛ Setefana ne Fotunato ne Akaiko bawa ɔ, ofikyɛ baasi ɛmɔ gya nu;

¹⁸ na bama m’ahone atɔ me kunu kyɛbɔ ɛmɔ deɛ tɔlɛ ɛmɔ kunu ne. Yiti ɛ́mɔnea mmenia bɔ bɛte sɔ ne yé.

¹⁹ Asɔre mɔ bɔ bɛwɔ Asia ne, bebisa ɛmɔ ahye. Akwila ne Prisika ne asɔremma bɔ beyia b’awuro ne koso bebisa ɛmɔ paa.

²⁰ Aliɛmaa nemɔ amu bebisa ɛmɔ. Ɛmɔfa awaawaatuu krongron bɛtotɔ ɛmɔ nwo nu.

²¹ Me bɔbɔ, Pɔɔlo, me sa noa ahyerɛlɛ yeɛ mefa mebisa ɛmɔ ahye ɔ.

²² Sɛ ebie nguro Awurade Yesu Kristo dwirɛ a, musue to ye! Y’Awurade bra! (Maranata).

²³ Yɛ Awurade Yesu Kristo adom ne ɛmɔ bɛtena.

²⁴ Me dɔ ne ɛmɔ tena wɔ Kristo Yesu nu. Amen.