1 Korintofoɛ 15 - AHYERƐLƐ KRONGRON

Kristo wutingyelɛ

¹ Aliɛmaa mɔ, afei mekaye ɛmɔ nzɛmba bɔ nga ngyirele ɛmɔ, bɔ ɛmɔle bɛtole nu, ná ɛmɔ (gyidie) gyi so ne.

² Sɛ ɛmɔsɔ bɔ nga ngyirele ɛmɔ ne anu yé a, ɔnate so ɛmɔkonya daa ngoa; na sɛ wamma ye sɔ de a, né ɛmɔale bali mbaen.

³ Ofikyɛ, edwirɛ bɔ ye nwo hia paa yeɛ nyane ɔ, ná me koso mva mmrɛle ɛmɔ kyɛ, yɛ bɔne ti yeɛ Kristo wuli ɔ, kyɛbɔ Ahyerɛlɛ ne kã ne.

⁴ Besiele ye, na ye ɛlɛsa so odwɔso fili ewue nu, kyɛbɔ Ahyerɛlɛ ne kã ne.

⁵ Ɔyele ye nwo ali hyirele Kefa, na nziɛ ye buru ne nyɔ ne koso benwuni ye.

⁶ Ɛhe asi ye, ɔyele ye nwo ali hyirele agyidifoɛ bɔ bɛbo ɛyaa nnu mmerɛ komapɛ, bɔ bɛ nu pee tɛte ase, ná ebiemɔ koso balela ɔ.

⁷ Ɛhe asi ye, ɔyele ye nwo ali hyirele Yakobo, na afei asomafoɛ ne amukoraa benwuni ye.

⁸ Bɔ ɔpɛ ye bo ɔ, ɔyele ye nwo ali hyirele me koso bɔ nde kyɛ ebie bɔ wandwu oni aworɛ ná wawo ye ɔ.

⁹ Ofikyɛ me yeɛ nde asomafoɛ nemɔ nu kãa paa ɔ; memvata kyɛ bɛfrɛ me somafoɛ, ɔnate kyɛ ndanene Nyameɛ asɔre ne nye.

¹⁰ Nyameɛ adom ti yeɛ nde kyɛ bɔ nde ye, na ye adom bɔ ɔfa lole me ne wanyɛ mbaen. Mayɔ adwuma matra bɛ mukoraa, nakoso nna me mmɔdenbɔlɛ ɔ, na mmom Nyameɛ adom bɔ ɔboka me ne ɔ.

¹¹ Yiti sɛ me ahɔ oo, sɛ bɛ ahɔ oo, nzɛmba komapɛ ne ala yeɛ yɛkã ɔ, yeɛ ɛmɔ koso bele belili ɔ.

Ewutingyelɛ nwo dwirɛ

¹² Na sɛ yɛkã Kristo nwo nzɛmba kyɛ wadwɔso wafi ewue nu a, ɔwale ye sɛ bɔ ɛmɔ nu biemɔ kã kyɛ awufoɛ ewutingyelɛ nne berɛ ɔ?

¹³ Na sɛ awufoɛ ewutingyelɛ nne berɛ de a, nzaade né bandingye Kristo.

¹⁴ Na sɛ bandingye Kristo de a, nzaade yɛ nzɛmbahanɛ ne te mbaen, yeɛ ɛmɔ gyidie koso te mbaen.

¹⁵ Né nzaade yato Nyameɛ soen, ofikyɛ yali Nyameɛ nwo adanzeɛ kyɛ watingye Kristo, wɔ aberɛ bɔ wandingye ye ɔ, sɛ ɔtte nahorɛ kyɛ ewutingyelɛ wɔ berɛ de a.

¹⁶ Ofikyɛ sɛ awufoɛ ndwɔso de a, né nzaade bandingye Kristo.

¹⁷ Na sɛ bandingye Kristo de a, nzaade ɛmɔ gyidie te mbaen, na ɛmɔtɛte ɛmɔ bɔne nu.

¹⁸ Né nzaade Kristo nu agyidifoɛ koso bɔ balela ne bamini.

¹⁹ Na sɛ ngoa he ngome nu yeɛ yɛle anyelasoɛ wɔ Kristo nu de a, né nzaade yɛyɛ anwumvo yɛtra mmenia mukoraa.

Ewutingyelɛ nwo anyelasoɛ

²⁰ Nakoso ɔte nahorɛ kyɛ batingye Kristo bafi ewue nu amaa wayɛ bɛ bɔ balela ne anu bakaa mmaa bɔ oli moa ɔ.

²¹ Na kyɛbɔ ewue nate sona ko so wale ne, sɔ ala yeɛ awufoɛ ewutingyelɛ koso nate sona ko so wawa ɔ.

²² Na kyɛbɔ ɔnate Adam ti mmenia mukoraa nya ewue ne, sɔ ala yeɛ Kristo ti bɛ mukoraa bekonya ngoa ɔ.

²³ Nakoso bekotingye ebiala wɔ ye nnidisoɛ so: Kristo bɔ ɔte bakaa mmaa bɔ oli moa ne, na afei bɛ bɔ bɛte Kristo deɛ wɔ mmerɛ bɔ ɔkɔye ye nwo ali ne, bɛ koso batoa so.

²⁴ Afei yeɛ né ayieleɛ ne awa ɔ, bɔ okoli ahennie ne anwoserɛ ne tumi mukoraa so, ná wafa Ahennie ne wawura Baba Nyameɛ sa.

²⁵ Ofikyɛ ɔsɛ kyɛ odi hene maa okodwu kyɛ ɔkɔfa ye pɔfoɛ mukoraa kɔyɛ ye gya bo ndiasoɛ ɔ.

²⁶ Pɔfoɛ bɔ ɔpɛ ye bo koraa bɔ okoli ye so ngonim ole ewue.

²⁷ Ofikyɛ wafa nningyein mukoraa wayɛ ye gya bo ndiasoɛ. Nakoso sɛ ɔkã kyɛ nningyein mukoraa ayɛ ye gya bo ndiasoɛ a, nu la pefee kyɛ bɔ ɔfale nningyein mukoraa yɛle ye gya bo ndiasoɛ ne de, ɔbboka so.

²⁸ Na sɛ bɛfa nningyein mukoraa bewura ye bo beyie a, afei yeɛ né Baa ne bɔbɔ koso kɔfa ye nwo kowura bɔ ɔfale nningyein mukoraa wurale ye bo ne bo ɔ, ná afei Nyameɛ ali nningyein mukoraa so hene.

²⁹ Nzaade bɛ bɔ begyina awufoɛ gya nu maa bɛbɔ bɛ asu bɛma bɛ ne, nzikyɛ yeɛ bɛpena bekyire ɔ? Na sɛ awufoɛ ndingye de a, nzu ati yeɛ mmenia gyina awufoɛ gya nu maa bɛbɔ bɛ asu ɔ?

³⁰ Sɛ nna sɔ ahɔ a, ahaa nzu ati yeɛ mmerɛ biala yɛha yɛ nwo yɛfa yɛ ngoa yɛto serewa ɔ?

³¹ Mesi ye pi mekyire ɛmɔ, aliɛmaa mɔ, ɔnate kyɛ mefa ɛmɔ mehoahoa me nwo wɔ y’Awurade Yesu Kristo nyunu ne ati, ewue li me mvanvando daa biala.

³² Na sɛ anwoɔnaen nu mvasoɛ ti yeɛ me ne ngekaboa yɛhone Ɛfeso de a, né mvasoɛ beni yeɛ ngonya ɔ? Yiti sɛ awufoɛ ngodwɔso de a, nzaade “ɛmɔma yɛdidi na yɛno, ofikyɛ ɛhema né yawu.”

³³ Nnɛmɔma bɛlakalaka ɛmɔ, na “abiɛngoɛ tɛɛ sɛkye bra paa.”

³⁴ Ɛ́mɔfa adwene paa ná ɛ́mɔyakyi bɔne yɔlɛ, ofikyɛ ɛmɔ nu biemɔ belle Nyameɛ nwo nimdeɛ. Mekã he maa ɛmɔ nyunu gua ase.

Nipadua bɔ batingye ye ɔ

³⁵ Ebie kobisa kyɛ, “Na ɔkɔyɛ sɛɛ né batingye awufoɛ? Na nzikyɛ nipadua yeɛ bɛkɔfa bekodwɔso ɔ?”

³⁶ Kwaseaa! Sɛ edua nikyee a, ongofifi, sana owu koraka.

³⁷ Yeɛ bɔ ekolua ne koso, nna ye ole bakaa ne mumua bɔ okofifi kɔwa ne, na mmom ɔte kyɛ ayuo anaa aburoo bɔ batutu ɔ komapɛ twe.

³⁸ Nakoso Nyameɛ maa onyi yɛ bakaa horɛ kyɛbɔ Nyameɛ kuro ɔ, na edua aburoo a, omvifi ayuo.

³⁹ Anwoɔnaen mukoraa nzɛ. Kuro sona nwonaen ngome, ndɔteboa deɛ ngome, nnomaa deɛ ngome, yeɛ nzue nu naen koso deɛ ngome.

⁴⁰ Anwuro abɔdeɛ wɔ berɛ, yeɛ aseɛ so abɔdeɛ koso wɔ berɛ, nakoso asora anwuro abɔdeɛ animnyam, yeɛ asora aseɛ so abɔdeɛ animnyam.

⁴¹ Eyia animnyam ngome, yeɛ ɛsraen animnyam koso ngome. Nzramaa mɔ koso b’animnyam gua ahoroɔ, ofikyɛ asora nzramaa biala ne ye animnyam.

⁴² Sɔ ala yeɛ awufoɛ ewutingyelɛ ne koso te ɔ. Bɔ bedua ne porɔ, na bɔ betingye ye ne de, ɔmborɔ.

⁴³ Bedua ye animguaseɛ nu, na betingye ye animnyam nu. Bedua a, né ɔyɛ mmerɛ, na betingye ye tumi nu.

⁴⁴ Bedua ye anwoɔnaen nu, na betingye ye a, ɔte sunzum nu nipadua. Anwoɔnaen nu nipadua wɔ berɛ, yeɛ sunzum nu nipadua koso wɔ berɛ.

⁴⁵ Ofikyɛ bahyerɛ kyɛ, “Adam bɔ oli moa ne ɔɔyɛle ɛkra teasefoɛ;” na Adam bɔ oli nziɛ ne ɔɔyɛle sunzum bɔ ɔma ngoa ɔ.

⁴⁶ Nna bɔ ɔte sunzum ne yeɛ oli moa ɔ, na mmom anwoɔnaen deɛ ne ba koraa né sunzum deɛ ne awa.

⁴⁷ Bele nnɛterɛ yeɛ bɛbɔle sona bɔ oli moa ne ɔ, ofi nnɛterɛ nu. Sona bɔ ɔtɔ so nyɔ ne ole Awurade bɔ ofi nyameɛso ne.

⁴⁸ Kyɛbɔ (Adam) bɔ ofi nnɛterɛ nu ne te ne, sɔ ala yeɛ bɛ bɔ bɛfale nnɛterɛ bɛbɔle bɛ ne bɛte ɔ; na kyɛbɔ nyameɛsoniɛ ne te ne, sɔ ala yeɛ bɛ bɔ bɛte nyameɛso deɛ ne bɛte ɔ.

⁴⁹ Na kyɛbɔ yanya bɔ ofi nnɛterɛ nu ne sona sue nen, sɔ ala yeɛ yɛkonya bɔ ofi nyameɛso ne sue ɔ.

⁵⁰ Aliɛmaa mɔ, bɔ mekyire ole kyɛ, anwoɔnaen ne mogya ngɔhora ngonya Nyameɛ ahennie ne anu kyɛfa, yeɛ bɔ ɔporɔ ne koso ngonya bɔ ɔmborɔ ne anu kyɛfa.

⁵¹ Ɛmɔtie, mekã mvealeɛ nu dwirɛ mekyire ɛmɔ; yɛ mukoraa yɛngɔlela, na yɛkɔkakyi.

⁵² Na mvum nu, kyɛ ɛbɔ wɔ nye perɛ ne, totorobɛndo bɔ ɔpɛ ye bo ne kohu. Ofikyɛ bekohu totorobɛndo ne, na bekotingye awufoɛ bɛkɔhɔ tebea bɔ bɛmborɔ ɔ nu, na yɛ de yɛkɔkakyi.

⁵³ Na odi kyɛ (nipadua he) bɔ ɔporɔ ne fa (nipadua) bɔ ɔmborɔ ne wura, na nipadua he bɔ owu ne afa nipadua bɔ onwu ne wawura.

⁵⁴ Yiti sɛ nipadua he bɔ ɔporɔ ne fa nipadua bɔ ɔmborɔ ne wura, na nipadua he bɔ owu ne fa nipadua bɔ onwu ne wura a, afei yeɛ né bɔ bahyerɛ ne awa nu kyɛ, “Basɛkye ewue bali ye so ngonim bɔkɔɔ!

⁵⁵ Wɔ, ewue, wɔ noa borɔ wɔ ni? Wɔ, ewue, wɔ ngonim wɔ ni?”

⁵⁶ Ewue noa borɔ ole bɔne, na bɔne koso tumi ole mmeraa ne.

⁵⁷ Nakoso yɛda Nyameɛ bɔ ɔnate y’Awurade Yesu Kristo so maa yɛdi ngonim ne ase.

⁵⁸ Yiti nniɛma mɔ, ɛmɔgyina pindinn, nnɛma ɛmɔhimhim, na daa biala ɛmɔhɔ so bɛyɔ Awurade adwuma, ofikyɛ ɛmɔse kyɛ ɛmɔ fɛɛ wɔ Awurade adwuma nu ngɔyɛ mbaen.