1 Korintofoɛ 14 - AHYERƐLƐ KRONGRON

Ngɔmhyɛlɛ ne edwudwolɛ ahoroɔ

¹ Ɛ́mɔma ɔdɔ yɛ ɛmɔ botaeɛ, ná ɛ́mɔma ɛmɔ nye boro bɛpena sunzum akyɛdeɛ, ye titire, kyɛ ɛmɔkɔhyɛ ngɔm ɔ.

² Ɔnate kyɛ sona bɔ ɔkã edwudwolɛ bɔ ebie nde ye bo ne, ondwudwo ngyire mmenia, na mmom odwudwo kyire Nyameɛ, ofikyɛ ebiala nde ye dwirɛ ne bo; nakoso Sunzum ne nate ye so kã mvealeɛ nu dwirɛ.

³ Nakoso sona bɔ ɔhyɛ ngɔm de, mmenia ngɔsoɛ, foɛtulɛ ne aworakyekyerɛ ti yeɛ ɔyɔ sɔ ɔ.

⁴ Sona bɔ ɔkã edwudwolɛ bɔ ebie nde ye bo nen, ɔyɔ sɔ ma ye bɔbɔ ye ngɔsoɛ; nakoso bɔ ɔhyɛ ngɔm ne de, ɔyɔ sɔ ma asɔre ne ngɔsoɛ.

⁵ Mekuro kyɛ ahaa ɛmɔ amukoraa bɛkã edwudwolɛ ahoroɔ, nakoso bɔ mekuro paa ole kyɛ ɛmɔkɔhyɛ ngɔm ɔ. Ofikyɛ sona bɔ ɔhyɛ ngɔm ne, ɔyɔ sɔ fa ngɔsoɛ brɛ asɔre ne tra bɔ ɔkã edwudwolɛ ahoroɔ ɔ; sana bekyire edwirɛ ne bo koraka né asɔre ne anya ngɔsoɛ.

⁶ Yiti aliɛmaa mɔ, sɛ meba ɛmɔ berɛ ná mekã edwudwolɛ ahoroɔ a, mvasoɛ beni yeɛ ɛmɔkonya bekofi me nwo ɔ? Sana mefa nyekyire anaa nimdeɛ anaa ngɔmhyɛlɛ anaa ngyerɛkyerɛ so yeɛ medwudwo mekyire ɛmɔ ɔ.

⁷ Sɔ ala yeɛ nningyein bɔ belle ngoa te kyɛ awɛen anaa sangoo te ɔ. Kyɛbɔ sona bɔ bɛ a besi bɛgyegye ne, sɛ nu anna berɛ yé a, ɔkɔyɛ sɛɛ né ebie ahora anwu edwein horɛ bɔ sona ne fa bɔ ɔ?

⁸ Na sɛ behu totorobɛndo ná nu anna berɛ yé a, nwa yeɛ okosiesie ye nwo kɔhɔ koɛ ɔ?

⁹ Sɔ ala yeɛ ɛmɔ koso sɛ ɛmɔkã edwudwolɛ bɔ ebie nde ye bo a, ebiala ngɔte bɔ ɛmɔkã ne bo ɔ. Ɔte kyɛ ɛmɔdwudwo bekyire mvrama ɔ.

¹⁰ Nahorɛ nu, dwudwolɛ ahoroɔ pee yeɛ ɔwɔ ewiase ɔ, na bɛ nu biala nne berɛ bɔ olle ndeaseɛ ɔ.

¹¹ Yiti sɛ mende dwudwolɛ bie bo a, sona bɔ ɔkã sɔ dwudwolɛ ne bu me pɔtɔniɛ, yeɛ me koso mebu ye pɔtɔniɛ.

¹² Na ɛmɔ koso, ɔnate kyɛ ɛmɔpere bɛpena Sunzum n’akyɛdeɛ ne ati, odi kyɛ ɛmɔma bɛ nye boro bɛpena akyɛdeɛ bɔ ɔkɔma asɔre ne ngɔsoɛ ɔ.

¹³ Yiti sona bɔ ɔkã edwudwolɛ bɔ ebie nde ye bo ne, maa ɔbɔ mbaeɛ kyɛ ɔkɔhora kohyire ye bo ɔ.

¹⁴ Ofikyɛ sɛ mebɔ mbaeɛ wɔ edwudwolɛ bɔ ebie nde ye bo nu a, me sunzum yeɛ ɔbɔ mbaeɛ ne ɔ, nakoso m’adwene de, ɔnyɔ ye nwo hwee.

¹⁵ Yiti ngɔyɛ ye sɛ? Ngɔfa sunzum ne ngɔbɔ mbaeɛ, ná mafa m’adwene koso mabɔ mbaeɛ. Ngɔfa sunzum ne ngɔto dwein ná mafa m’adwene koso mato dwein.

¹⁶ Na sɛ ɛbɔ asennaa mbaeɛ wɔ sunzum nu a, ɔkɔyɛ sɛɛ né ebie bɔ ɔnde ye bo ɔ wasuro w’asennaa mbaeɛ ne aso “Amen”, wɔ aberɛ bɔ ɔnze bɔ ɛkã ɔ?

¹⁷ Na sɛ w’asennaa mbaeɛ ne te paa sɛɛ ala po a, ɔngora mma sona foforɛ ngɔsoɛ.

¹⁸ Meda me Nyameɛ ase kyɛ mekã dwudwolɛ ahoroɔ metra ɛmɔ amukoraa ɔ.

¹⁹ Nakoso asɔre sua nu de, mekuro kyɛ ngɔfa m’adwene ngɔhã edwirɛ nnu bɔ ɔkɔyɛ ngyerɛkyerɛ kɔma ebiemɔ tra kyɛ ngɔhã edwirɛ apee buru edwudwolɛ bɔ ebie nde ye bo nu.

²⁰ Aliɛmaa mɔ, nnɛma ɛmɔdwene kyɛ ngwadaa, bɔne nu de, ɛ́mɔyɛ kyɛ nnɔma na mmom adwene nu ɛ́mɔyɛ mbanyi.

²¹ Bahyerɛ ye mmeraa ne anu kyɛ, “Ngɔfa mmenia bɔ bɛkã edwudwolɛ foforɛ ne amanvrafoɛ mɔ dwudwolɛ so yeɛ ngodwudwo ngohyire mmenia hemɔ ɔ; nakoso po bengotie me dwirɛ, Awurade noa dwirɛ ɛne.”

²² Yiti edwudwolɛ ahoroɔ de, ɔtte sɛngyerɛnneɛ mma agyidifoɛ, na mmom ɔte sɛngyerɛnneɛ ma bɛ bɔ benne nni ɔ; yeɛ ngɔmhyɛlɛ wora ɔtte bɛ bɔ benne benni deɛ, na mmom ɔte agyidifoɛ deɛ.

²³ Na sɛ asɔremma ne amu beyia neka horɛ, na bɛ mukoraa bɛkã edwudwolɛ ahoroɔ, na sɛ ebiemɔ mbaen anaa bɛ bɔ benne benni ba berɛ a, aso bɛngɔhã kyɛ ɛmɔabobɔ laen?

²⁴ Nakoso sɛ ɛmɔ amukoraa ɛmɔhyɛ ngɔm, ná sɛ ebie bɔ onne nni anaa ebie mbaen ba berɛ a, edwirɛ bɔ ɔkɔte ne amu kobua ye ndɛen na wapusu ye.

²⁵ Ye ti anu mvealeɛ nu dwirɛ kɔla ali, ɔkɔfa ye nyunu kobutu berɛ kɔsɔne Nyameɛ, ná wahã kyɛ Nyameɛ wɔ ɛmɔ nu amba.

Asɔre nu sɔnenɛ nwo nhyehyɛleɛ

²⁶ Aliɛmaa mɔ, mekyire sɛɛ koraa? Sɛ ɛmɔyia nu a, ebie le edwein to, ebie le ngyerɛkyerɛ kyire, ebie le edwudwolɛ ahoroɔ kã, ebie le nyekyire, ebie le edwudwolɛ ahoroɔ nwo ngyerɛaseɛ. Ɛmɔma ebiala yɔ ye deɛ bɔ ɔma ngɔsoɛ ɔ.

²⁷ Sɛ ebie kã edwudwolɛ bɔ ebie nde ye bo a, maa bɛyɛ mmenia nyɔ, anaakyɛ wabo so koraa ne, mmenia nza, na bɛha ye ngoko ngoko, na sona ko hyire ye bo.

²⁸ Na sɛ sona biala nne berɛ bɔ okyire ye bo de a, ye de maa omua ye noa wɔ asɔre ne anu, na ɔne ye ngome ne ye Nyameɛ beli ngitahoɛ.

²⁹ Na ngɔmhyɛlɛfoɛ ne de, ma mmenia nyɔ anaa nza bedwudwo, na bɛ ngaa ne bua edwirɛ ne nwo ndɛen.

³⁰ Na sɛ ebie wɔ berɛ ná onya nyekyire a, ye de ma bɔ ogu so odwudwo ne yakyi dwudwolɛ.

³¹ Ofikyɛ ɛmɔ amukoraa ɛmɔkɔhora bɛkɔhyɛ ngɔm ngoko ngoko, ná ɛmɔ amukoraa ɛmɔanya nu nikyeesualɛ ne aworakyekyerɛ.

³² Ngɔmhyɛlɛfoɛ sunzum mɔ wura ngɔmhyɛfoɛ nemɔ abo.

³³ Ofikyɛ Nyameɛ de, ɔtte basabasayɔlɛ Nyameɛ, na mmom ɔte asomdwee Nyameɛ. Na kyɛbɔ bɛyɔ ye anwoteefoɛ asɔre mukoraa nu ne,

³⁴ ɛ́mɔma ɛmɔ mmrasua mɔ bemua bɛ noa wɔ asɔre mɔ nu. Ofikyɛ belle ye nwo ate kyɛ bedwudwo ɔ, na mmom bɛbrɛ bɛ nwo ase kyɛbɔ mmeraa ne kã ne.

³⁵ Sɛ bɛpena edwirɛ bie anu betie a, maa bebisa bɛ hu mɔ wɔ awuro; ofikyɛ ɔte animguaseɛ ma brasua kyɛ okodwudwo asɔre sua nu ɔ.

³⁶ Nzu ati ɔ! Ɛmɔ dɔ yeɛ Nyameɛ dwirɛ ne fi wale hɔ ɔ, anaakyɛ ɛmɔ ngome bɛ dɔ yeɛ wadwu ɔ?

³⁷ Sɛ ebie bu ye nwo kyɛ ɔte ngɔmhyɛlɛniɛ anaakyɛ ole sunzum nu akyɛdeɛ a, maa ɔte ye bo kyɛ bɔ mekyerɛ mebrɛ ɛmɔ ye te Awurade ahyɛdeɛ.

³⁸ Nakoso sɛ ebie nne ɛhe ndo nu a, (Nyameɛ) koso nne ye ndo nu.

³⁹ Yiti aliɛmaa mɔ, ɛmɔma ɛmɔ nye boro ngɔmhyɛlɛ nwo, yeɛ nnɛmaa ɛmɔsi edwudwolɛ ahoroɔ hanɛ nwo ate.

⁴⁰ Na ɛ́mɔfa atee paa so bɛ́yɔ nikyee biala pɛpɛɛpɛ.