1 Korintofoɛ 12 - AHYERƐLƐ KRONGRON

Sunzum Krongron akyɛdeɛ nemɔ

¹ Aliɛmaa mɔ, ɔfa sunzum nu akyɛdeɛ nemɔ nwo de, membena kyɛ mefa nikyee biala mesie ɛmɔ.

² Ɛmɔse kyɛ mmerɛ bɔ né ɛmɔte wiasefoɛ nen, ɛmɔmaa bɛlakalakale ɛmɔ maa ɛmɔhyinini mmosoen emumu mɔ so.

³ Yiti mepena kyɛ ɛmɔnwu ye kyɛ, ebiala bɔ Nyameɛ Sunzum fa ye so dwudwo ne ngora nga kyɛ, “Musue ha Yesu!” Yeɛ ebiala koso ngora nga kyɛ, “Yesu te Awurade,” sana Sunzum Krongron ne te ye nu.

⁴ Adom akyɛdeɛ gua ahoroɔ, nakoso Sunzum komapɛ ne ala yeɛ ɔfa ma ɔ.

⁵ Ɛsolɛ nnwumaa gua ahoroɔ, nakoso ofi Awurade komapɛ ne ala berɛ.

⁶ Dwumadie koso gua ahoroɔ, nakoso Nyameɛ komapɛ ne ala yeɛ ɔfa yɛ mukoraa so odi dwumaa ne ɔ.

⁷ Nakoso yɛ mukoraa yɛ ngɔsoɛ ti, Sunzum ne ɔye ye nwo ali wɔ yɛ nu biala nu.

⁸ Sunzum ne ma sona ko kã nworɛ dwirɛ, né Sunzum komapɛ ne ala abukye sona foforɛ adwene nu ama ye nimdeɛ.

⁹ Ye komapɛ ne ala ɔma ebie gyidie, né wasa walo ebie koso wama ye anwonyerɛsalɛ tumi.

¹⁰ Sunzum ne ma sona ko anwanwadeɛyɔlɛ tumi, né wama sona foforɛ koso ngɔmhyɛlɛ tumi. Ɔma ebie anyeɛ bɔ ɔfa nwu sunzum ahoroɔ nu nzonzoleɛ ɔ; ɔma ebie edwudwolɛ ahoroɔ tumi, né wama ebie koso tumi bɔ ɔfa kyire edwudwolɛ ahoroɔ bo ɔ.

¹¹ Sunzum komapɛ ne ala yeɛ ɔyɔ ɛhemɔ amukoraa ɔ, na ɔma ebiala akyɛdeɛ kyɛbɔ ye bɔbɔ okuro ɔ.

Nipadua akwaa gua ahoroɔ

¹² Kyɛbɔ nipadua ne te ko, nakoso ole akwaa ahoroɔ; ná ɔwɔ nu kyɛ akwaa nemɔ sone de, nakoso bɛbɔ nu bɛyɛ nipadua ko ne, sɔ ala yeɛ Kristo te ɔ.

¹³ Ofikyɛ yɛ mukoraa: Yudafoɛ oo, Helafoɛ oo, ngoaa oo, nnehyeɛ oo, Sunzum komapɛ ne ala yeɛ bɛfa bɛbɔle yɛ asu maa yɛɛyɛle nipadua ko ɔ, na Sunzum komapɛ ne ala yeɛ wahwie wagua yɛ mukoraa yɛ so ɔ.

¹⁴ Nipadua n’akwaa ɔtte ko, na mmom bɛsone.

¹⁵ Sɛ agyirɛ kã kyɛ, “Me de, nnde asaa, yiti mmmoka nipadua ne aso” a, ɛhe ngyire kyɛ ɔbboka nipadua ne aso.

¹⁶ Na sɛ asoɛ kã kyɛ, “Me de, nnde anyeɛ, yiti mmmoka nipadua ne aso” a, ɛhe ngyire kyɛ ɔbboka nipadua ne aso.

¹⁷ Na sɛ nipadua ne amu te anyeɛ a, ahaa ɔkɔyɛ sɛɛ né wate dwirɛ? Yeɛ sɛ nipadua ne amu te asoɛ a, ahaa ɔkɔyɛ sɛɛ né wafofã nikye?

¹⁸ Na nekaa bɔ Nyameɛ kuro biala yeɛ ɔfale nipadua akwaa biala tuale ɔ.

¹⁹ Na sɛ ye mukoraa te akwaa komapɛ a, ahaa nipadua ne wɔ ni?

²⁰ Ɔte nahorɛ kyɛ nipadua n’akwaa sone de, nakoso nipadua ne te komapɛ.

²¹ Yiti anyeɛ ngora nga ngyire asaa kyɛ, “Wɔ nwo nhia me.” Yeɛ tire wora ɔngora nga ngyire agyirɛ kyɛ, “Ɛmɔ nwo nhia me.”

²² Na mmom nipadua n’akwaa bɔ yɛ de yɛdwene kyɛ bɛyɛ mmerɛ ne, sɛ bɛnne nu a, yɛyɔ hwee a ɔnyɛ yee.

²³ Yeɛ nipadua n’akwaa bɔ yɛsusu kyɛ bɛmvata anidie somaa nen, bɛ po yeɛ yɛma bɛ anidie pee ɔ, na yɛsiesie nipadua n’akwaa bɔ bɛwɔ mvealeɛ nu ne yé.

²⁴ Ofikyɛ y’akwaa bɔ bɛnne mvealeɛ nu ne nhia sɔ nziesie ne. Nakoso kyɛbɔ Nyameɛ wasi wahyehyɛ nipadua nen, akwaa bɔ yɛmmu ye ne po yeɛ wama ye anidie pee ɔ,

²⁵ amaa mbakyembakyemuɛ amma nipadua ne anu, na mmom akwaa biala nwo ahia ama obiɛngo.

²⁶ Sɛ akwaa ko nwo kã a, ɔkã bɛ mukoraa. Yeɛ sɛ bɛhyɛ akwaa ko animnyam a, ɔyɛ ye ne akwaa ngaa ne amu fɛ.

²⁷ Ɛmɔte Kristo nipadua ne, na ɛmɔ nu ko biala te ye akwaa ne bie.

²⁸ Na Nyameɛ atu ebiemɔ asie berɛ wɔ asɔre ne anu. Bɔ oli moa ɔ: kyɛ asomafoɛ, bɔ ɔtoa berɛ ɔ, kyɛ ngɔmhyɛlɛfoɛ, bɔ ɔtɔ nza, kyɛ akyerɛkyerɛfoɛ; yeɛ afei bɛ bɔ bɛyɔ anwanwadeɛ, bɛ bɔ bele anwonyerɛsalɛ akyɛdeɛ, bokafoɛ, asɔre mbanyi, yeɛ bɛ bɔ bɛkã edwudwolɛ ahoroɔ.

²⁹ Aso bɛ mukoraa yeɛ bɛte asomafoɛ ɔ? Bɛ mukoraa yeɛ bɛte ngɔmhyɛlɛfoɛ ɔ? Bɛ mukoraa yeɛ bɛte akyerɛkyerɛfoɛ ɔ? Bɛ mukoraa yeɛ bɛyɔ anwanwadeɛ ɔ?

³⁰ Bɛ mukoraa yeɛ bele anwonyerɛsalɛ akyɛdeɛ ɔ? Bɛ mukoraa yeɛ bɛkã edwudwolɛ ahoroɔ ɔ? Bɛ mukoraa yeɛ bekyire edwudwolɛ ahoroɔ bo ɔ?

³¹ Ɛ́mɔfa bɛ nye besie akyɛdeɛ bɔ bɛ nwo hia paa nemɔ aso. Afei ɛ́mɔma ngyire ɛmɔ atee paa paa ne.