1 Ahemvo 9 - AHYERƐLƐ KRONGRON

Nyameɛ ye ye nwo ali kyire Solomon bieku

¹ Solomon sili AWURADE awuro ne, ye bɔbɔ ye ahemvie ne ɔne sua amukoraa bɔ né okuro kyɛ osi yiele ne,

² AWURADE yele ye nwo ali hyirele Solomon ye pɛen nyɔ so, kyɛbɔ ɔyele ye nwo ali hyirele ye wɔ Gibeon ne ala.

³ AWURADE sele ye kyɛ, “Mate wɔ mbaeɛ ne wɔ dwirɛ bɔ afa ato me nyunu ne. Sua bɔ asi afa me dumaa ato so afebɔɔ ne, mate ye nwo maa wayɛ krongron. Me nye koli ye si, na ɔkɔla m’ahone nwo daa biala.

⁴ Na wɔ de, sɛ ɛfa ahone bɔ nu te ɔ, ɔne bra bɔ ɔtengyɛ ɔ edi me dwirɛ so kyɛbɔ wɔ baba Dawide lili so ne, ná ɛyɔ kyɛbɔ mahyɛ wɔ ne amukoraa, ná edi m’ahyɛdeɛ ne me nhyehyɛleɛ so a,

⁵ ye de ngɔma w’ahennie bɔ edi ye wɔ Yisrael ne, ye bo kotimu afebɔɔ, kyɛbɔ nhyɛle wɔ baba Dawide bɔ kyɛ, ‘Sona bɔ odi wɔ bia tena Yisrael ahennie bia so ne, ɔngɔbɔ wɔ le’ ne.

⁶ “Nakoso sɛ ɛmɔyakyi me si lilɛ, kyɛ ɛmɔ oo, kyɛ ɛmɔ bosofoɛ oo, ná ɛmɔanni me mmeraa dwirɛ ne m’ahyɛdeɛ bɔ mafa mama ɛmɔ ne aso, ná mmom ɛmɔkɔso nyameɛ foforɛ biemɔ bɛsɔne bɛ a,

⁷ ye de ngɔpɛ Yisraelfoɛ asue ngofi aseɛ bɔ mafa mama bɛ ne aso, na sua bɔ mate ye nwo mafa me dumaa mato so ne, ngɔye me nye ngofi so. Na Yisrael kɔkakyi maen amukoraa bɛ noa nu anyandera ne ngorohoɛ dwirɛ.

⁸ Sua ye kodwiri kogua kɔyɛ kyɛ esire. Na ebiala bɔ ɔkɔpɛ nu wɔ ye nwo ne, ɔkɔyɛ ye nwanwa maa okosobi ye noa kogua so kɔhã kyɛ, “Nzu ati yeɛ AWURADE ayɛ maen ye ɔne awuro ye sɔa ye?”

⁹ Na bekobua kyɛ, ‘AWURADE bɛ Nyameɛ bɔ ɔyele bɛ nana mɔ fili Misraim aseɛ so wale ne, bapo ye baali nyameɛ foforɛ biemɔ asi baso bɛ basɔne bɛ. Ɔnate sɔ ti yeɛ AWURADE ama amaneɛ kandinga ye ato bɛ ye.’ ”

¹⁰ Solomon fale afoɛ aburanyɔ yeɛ osili sua nyɔ hemɔ yiele ɔ: AWURADE awuro ne ɔne ye bɔbɔ ye ahemvie ne.

¹¹ Tiro hene Hiram mane Solomon sida ne ɛframmire ne esikaa kɔkorɛ biala bɔ ohia ɔ. Ye sɔ ti, Solomon fale nguro tue aburanyɔ wɔ Galilea aseɛ so mane ye.

¹² Nakoso Hiram fili Tiro wale onwuni nguro tue bɔ Solomon afa ama ye ne, ye nye angye bɛ nwo.

¹³ Yiti obisale kyɛ, “Nniɛma, na nzikyɛ nguro yeɛ afa ama me ye?” Yiti bafrɛ mbɔtam berɛ Kabul maa waadwu ɛnɛ ye.

¹⁴ Nakoso né Hiram asoma maa bafa esikaa kɔkorɛ kilo apee nna baama Nana Solomon.

¹⁵ Kyɛbɔ Nana Solomon hyɛle mmenia maa bɛyɔle suasilɛ adwuma ne, ye nwo edwirɛ ɛhe: sua nemɔ ole AWURADE awuro ne, ye bɔbɔ ye ahemvie ne, sua bɔ bɛfrɛ ye Milo ne, ɔne Yerusalem fasue ne, Hasɔ, Megido yeɛ Gɛsɛre.

¹⁶ (Sɔ mmerɛ ne, né Misraim hene Faro waali Gɛsɛre so ngonim. Ɔyerale kuro ne, ohuhuni Kaananfoɛ bɔ né bɛte kuro berɛ ne, na ɔfale kuro ne hyɛle ɔwa brasua bɔ ɔte Solomon aye ne kyɛ ye atɔmvorɛ akyɛdeɛ ɛne.

¹⁷ Yiti Solomon sa kyekyele Gɛsɛre). Solomon kyekyele nguro hemɔ koso: Bete Horon ngwaen,

¹⁸ Baalate, Tamar bɔ ɔwɔ ɛserɛ so wɔ maen ne anu ne,

¹⁹ yeɛ afei nguro amukoraa bɔ Solomon ɔmaa bɛfa aleɛ besie nu ne, nguro bɔ ye teaseɛnam mɔ wɔ so ne, nguro bɔ ye pɔngɔhanɛfoɛ tete so ne, ɔne sua biala bɔ Solomon kuro kyɛ osi wɔ Yerusalem, Lebanon, ɔne aseɛ amukoraa bɔ né odi so hene ne.

²⁰ Amorifoɛ, Hitifoɛ, Perisifoɛ, Hiwifoɛ ne Yebusifoɛ ngaa bɔ bɛhale ne, bɔ nna Yisraelfoɛ ahɔ ɔ ne,

²¹ bɛ boso ama bɔ né bɛtɛ wɔ aseɛ ne aso, bɔ Yisraelfoɛ bangora bannua bɛ boso bɔkɔɔ ne, Solomon hyɛle bɛ maa bɛyɔle adwuma, na batoa so bayɔ maa waadwu ɛnɛ.

²² Nakoso Yisraelfoɛ de, Solomon amva bɛ nu biala wanyɛ kanga. Né bɛte koɛhonɛfoɛ, ye mbanyi, ye safohene mɔ, ye gyasehene mɔ yeɛ ye teaseɛnamhanɛfoɛ ne mbɔngɔhanɛfoɛ mɔ.

²³ Mbanyi hemɔ yeɛ né bɛnea Solomon adwuma ne aso ɔ: bɛte mmenia ɛyaa nnu ne aburannu bɔ bɛnea adwumayɔlɛfoɛ nemɔ aso ɔ.

²⁴ Nakoso Faro awa brasua ne, otu fili Dawide kuro ne anu hɔle ye bɔbɔ ye awuro bɔ Solomon si mane ye ne anu. Afei Solomon sili sua bɔ bɛfrɛ ye Milo ne.

²⁵ Afoɛ biala, né Solomon bɔ naen yeralɛ afɔleɛ ne asomdwee afɔleɛ pɛen nza wɔ afɔleɛ bokyea bɔ osi mane AWURADE ne aso. Asa koso né ɔyera ɛyɛɛ wɔ AWURADE nyunu. Yiti osili asɔneyɛɛ sua ne yiele.

Solomon dwaalilɛ nwo dwirɛ

²⁶ Esion Gebɛre bɔ opingye Elote bɔ ɔla Ɛpo Kɔkorɛ noa wɔ Edom aseɛ so ne, Nana Solomon maa besele ɛlɛen pee wɔ berɛ.

²⁷ Hiram somvoɛ mɔ bɔ bɛte ɛlɛenhanɛfoɛ paa ne, ɔsomane bɛ maa bɛɛbokale Solomon somvoɛ nemɔ aso bɛhane ɛlɛen nemɔ.

²⁸ Bɛhane ɛlɛen nemɔ bɛhɔle Ofire bɛɛtɔle esikaa kɔkorɛ kilo apee buru ne nna bɛbrɛle Nana Solomon.