1 Ahemvo 6 - AHYERƐLƐ KRONGRON

Solomon si Nyameɛ asɔneyɛɛ sua ne

¹ Yisraelfoɛ fili Misraim aseɛ so bɛwale ne, ye afoɛ bɔ ɔtɔ so ɛyaa nna ne aburawɔtwɛ ne anu, né Solomon anya afoɛ nna wɔ Yisrael bia ne aso. Na bosome Siwe bɔ yeɛ ɔte bosome bɔ ɔtɔ so nyɔ ne anu, Solomon hyɛle ye bo sili AWURADE awuro ne.

² Sua bɔ Nana Solomon si mane AWURADE ne, ye tendenn nu te agyirɛ aburasia, ye tɛtrɛtɛɛ nu te agyirɛ aburanyɔ, yeɛ ye aseɛnwo bɔ ɔkwaadwu ye anwuro ne, ɔte agyirɛ aburasa.

³ Sua ne nyunu abrannaa ne, ye tendenn nu te agyirɛ aburanyɔ, fi ye ti kɔka ye ti, na ye piri nu te agyirɛ buru.

⁴ Sua ne, ye mboma bɔ ɔyɔle nemɔ, bɛ kunu trɛ tra bɛ nyunu.

⁵ Osisili sua fa batale sua ne fasue ne nwo bra yiale, maa ɔfale pumbu bɔ ɔwɔ ye kunu dɔ ne ɔne nekaa krongron ne anwo, na ɔhyehyɛle pumbu mɔ wurawurale nu.

⁶ Sua bɔ ɔbata fasue ne, ye pumbu bɔ ɔwɔ ye bo ne, ye tɛtrɛtɛɛ nu te agyirɛ nnu; bɔ ɔwɔ ye afia ne, ye tɛtrɛtɛɛ nu te agyirɛ nzia, yeɛ bɔ ɔwɔ anwuro ne, ye tɛtrɛtɛɛ nu te agyirɛ nzoo. Ogyinagyinane mbuna fa batale asɔneyɛɛ sua fasue ne anwo. Na osisili pumbu nemɔ fa batale mbuna nemɔ, amaa ɔnate so wandofi fasue nemɔ anu.

⁷ Nyɔboɛ bɔ bɛfa besili sua ne, besele ye wɔ nekaa bɔ bedwa nyɔboɛ ɔ, na ɔnate sɔ ti mmerɛ bɔ besi sua ne, bande bɔsobaka anaa akumaa anaa buralɛ biala nga wɔ nekaa bɔ besili asɔneyɛɛ sua ne.

⁸ Pumbu bɔ ɔwɔ afia ne, ye anoa la sua ne ngwaen. Sɛ ɛ́fo pumbu bɔ ɔwɔ afia ne aso, ɔne bɔ ɔtɔ so nza ne aso a, ɛfa atweleɛ bɔ ɔkondokondo so yeɛ ɛkɔ ɔ.

⁹ Yiti osili sua ne yiele. Ɔfale sida mbuna ne ndaboa yeɛ ɔyɔle ye abuu ne ɔ.

¹⁰ Osili pumbu nemɔ fa batale asɔneyɛɛ sua fasue ne; pumbu biala, fi ye aseɛnwo bɔ ɔkwaadwu ye anwuro, ɔte agyirɛ nnu. Mbuna nemɔ bɔ bɛfa bɛbatale asɔneyɛɛ sua nen, besili pumbu nemɔ bɛbatale sɔ mbuna nemɔ.

¹¹ Na AWURADE lale ye dwirɛ ali hyirele Solomon kyɛ,

¹² “Sua he bɔ yeɛ esi ye, sɛ ɛkɔfa m’ahyɛdeɛ kɔbɔ bra, ná ekoli me nhyehyɛleɛ ne me mmeraa dwirɛ amukoraati so, ná ɛkɔfa kɔbɔ wɔ bra a, ye de ɛbɔ bɔ nhyɛle wɔ baba Dawide ne, ngɔmaa ɔkɔwa nu kɔma wɔ.

¹³ Me ne Yisraelfoɛ kɔtena, na mengɔyakyi me mmenia Yisraelfoɛ bɛ nu.”

¹⁴ Yiti Solomon sili sua ne yiele.

Solomon siesie asɔneyɛɛ sua ne anu

¹⁵ Sua ne, ye kunu terɛ nemɔ, ɔfale sida ndaboa mane ye nwo. Ofi sua ne aseɛnwo bɔ ɔkwaadwu ye abuu ne, ɔfale ndaboa ne bie mane ye kunu. Na ɔfale ɛframmire ndaboa samono aseɛnwo berɛ.

¹⁶ Sua ne akunu dɔ paa, osili pumbu fa yɛle krongron nu krongron ne. Ɔfale sida mane pumbu ne anwo fili aseɛnwo oodwuli abuu ne. Efi pumbu ne anwo bɔ ɛkɔ sua ne bo dɔ paa ne, ɔte agyirɛ aburanyɔ.

¹⁷ Sua ne akunu dɔ, nekaa bɔ efite so koraka né ahɔ krongron nu krongron ne anu ne, ye tendenn nu te agyirɛ aburanna.

¹⁸ Sida bɔ bɛfa bɛmane ye kunu ne, né bali kɔndoa adwii ɔne bakaa nyerɛen adwii bagua so. Ye mukoraa te sida, bɔ né bafa bakata terɛ ne anwo nyɔboɛ biala so ɔ.

¹⁹ Nekaa krongron ne, osili ye wɔ sua ne kunu dɔ paa, kyɛ ɔfa AWURADE apam alaka ne sie dɔ.

²⁰ Nekaa krongron ne akunu, ye tendenn nu te agyirɛ aburanyɔ, ye tɛtrɛtɛɛ nu te agyirɛ aburanyɔ, yeɛ ofi ye aseɛnwo bɔ ɔkwaadwu ye anwuro ne, ɔte agyirɛ aburanyɔ. Ɔfale esikaa kɔkorɛ paa yeɛ ɔborole nu ɔ. Na ɔfale sida lele afɔleɛ bokyea ne anwo bra yiale.

²¹ Solomon fale esikaa kɔkorɛ paa borole sua ne akunu, ɔfale esikaa kɔkorɛ ngɔnzɔngɔnzɔ sinzesinzele nekaa krongron ne anyunu, na ɔfale esikaa kɔkorɛ borole nekaa krongron ne anu.

²² Afei ɔfale esikaa kɔkorɛ borole sua ne amukoraati nu maa sua ne anu yɛle nyemene. Afɔleɛ bokyea bɔ ɔwɔ nekaa krongron berɛ ne po, ɔfale esikaa kɔkorɛ borole ye nwo amukoraa.

²³ Ɔfale olive bakaa sele kɛrubim nyɔ siele nekaa krongron ne anu. Ko biala, ofi ye aseɛnwo bɔ ɔkwaadwu ye anwuro ne, ɔte agyirɛ buru.

²⁴ Kɛrubo ko biala, ye ndaa ko ne tendenn te agyirɛ nnu, yeɛ ye ndaa ko ne koso ye tendenn te agyirɛ nnu. Efi ye ndaa ko ne anoa bɔ ɛkwaahã ye ndaa ko ne koso noa ne, ye tendenn te agyirɛ buru.

²⁵ Kɛrubo ko ne koso, ofi ye aseɛnwo bɔ ɔkwaadwu ye anwuro ne, ɔte agyirɛ buru. Kɛrubim nyɔ nemɔ, bɛte pɛ na bɛ sue koso ɔte ko.

²⁶ Kɛrubo ko ne, ofi ye aseɛnwo bɔ ɔkwaadwu ye anwuro ne, ɔte agyirɛ buru, na sɔ ala yeɛ kɛrubo ko ne koso te ɔ.

²⁷ Ɔfale kɛrubim nemɔ siele sua ne akunu dɔ paa. Kɛrubim nemɔ, né bɛ ndaa nemɔ anu atrɛtrɛ. Ko ndaa ko trɛ kɔka sua ne terɛ ko. Yeɛ ko ne koso, ye ndaa ko trɛ kɔka sua ne terɛ ko ne. Na bɛ ndaa mɔ ngoko bɔ wahã wɔ sua ne afia ne koso, bahã bapem so.

²⁸ Ɔfale esikaa kɔkorɛ borole kɛrubim nemɔ anwo.

²⁹ Sua ne, ye pumbu nu ne ye asa so ne, olili kɛrubim adwii, ayee mmakaa adwii ɔne bakaa nyerɛen adwii guale terɛ nemɔ anwo bra yiale.

³⁰ Sua ne, ye pumbu nu ne ye asa so ne, ɔfale esikaa kɔkorɛ borole ye aseɛnwo berɛ.

³¹ Nekaa krongron berɛ anoa nemɔ, ɔfale olive bakaa yeɛ ɔyɔle ɔ. Sua ne bati so, ɔne ye aponnwaa nemɔ bɛte fasue ne ngyɛmuɛ nnu nu ko.

³² Olive bakaa anoa nyɔ nemɔ, olili kɛrubim adwii, ayee mmakaa adwii ɔne nyerɛen adwii guale bɛ nwo. Ɔfale esikaa kɔkorɛ borole bɛ nwo, na ɔfale esikaa kɔkorɛ ne bie borole kɛrubim ne ayee mmakaa nemɔ anwo.

³³ Afei koso, sua n’anoa nemɔ, b’aponnwaa nemɔ, ɔfale olive bakaa yeɛ ɔyɔle ɔ. Bɛ nu biala le ndweasoɛ nna.

³⁴ Na ɛframmire anoa nyɔ nemɔ, né bɛkora bebu ko bɛto so, yeɛ ko ne koso, bɛkora bebu bɛto so.

³⁵ Olili kɛrubim adwii, ayee mmakaa adwii ɔne nyerɛen adwii guale anoa nemɔ anwo, na ɔfale esikaa kɔkorɛ borole adwii bɔ wali nemɔ anwo pɛpɛɛpɛ.

³⁶ Sua ne, ye pato ne, kyɛbɔ osili pato ne, nyɔboɛ bɔ base ɔ, nza biala, sida taboa ko wura ye afia.

³⁷ Ye afoɛ nna ne anu, bosome bɔ bɛfrɛ ye Siwe nu yeɛ ɔtole AWURADE awuro ne fapem ɔ.

³⁸ Na ye afoɛ buru ne ko ne anu, bosome bɔ ɔtɔ so mmɔtwɛ bɔ bɛfrɛ ye Bul ne anu, beyiele sua ne ɔne ye nwo nningyein amukoraati. Bɛyɔle nikyee biala kyɛbɔ ɔdwenene ye nwo ne ala. Ɔfale afoɛ nzoo yeɛ osili sua ne ɔ.