1 Ahemvo 4 - AHYERƐLƐ KRONGRON

Solomon bia nwo mbanyi

¹ Nana Solomon lili Yisrael maen amukoraa so hene.

² Ye bia nwo mbanyi atitire mɔ ɛhe: Né Sadoke awa Asaria te ɔsɔfo.

³ Sisa mma Elihorefo ne Ahiya bɛte ahyerɛlɛfoɛ; Ahilude awa Yehosafate te abakɔsɛm ahyerɛlɛniɛ;

⁴ Yehoada awa Benaya te safohene, Sadoke ne Abiata bɛte asɔfo;

⁵ Natan awa Asaria yeɛ né ɔla mbɔtam mbɔtam mbanyi nemɔ noa ɔ; Natan awa Sabude te ɔsɔfo, yeɛ osa te Nana ye tufohene,

⁶ Ahisare yeɛ né ɔnea ahemvie berɛ ɔ. Na mmenia bɔ bɛhyɛ bɛ maa bɛyɔ Nana adwuma ne, Aboda awa Adoniram yeɛ né ɔnea bɛ so ɔ.

⁷ Yisrael amukoraa, né Solomon le mbanyi buru ne nyɔ bɔ bɛlela mbɔtam mbɔtam nemɔ noa ɔ. Né bedide aleɛ ndɔ bɛbrɛ Nana Solomon ne ye awuro ama. Afoɛ biala, bɛ nu ko biala, ɔye bosome ko ɔfa dé aleɛ ndɔ brɛ Nana Solomon.

⁸ Bɛ dumaa ɛhe: Ben Hure bɔ ɔnea Efraim mmokaa aseɛ ne asɔ

⁹ Ben Dekɛre bɔ ɔnea Makase, Saalebim, Bete Semese ne Elon Bete Hanan so,

¹⁰ Ben Hesede bɔ ɔnea Arubote so, (aseɛ bɔ ɔnea so ne, Soko ne Hefa aseɛ ne amukoraa bɛboka so);

¹¹ Ben Abinadabo bɔ ɔnea Nafate Dɔɔ amukoraati so, (ɔye ole Solomon awa brasua Tafate),

¹² Ahilude awa Baana bɔ ɔnea aseɛ hemɔ aso: Taanake, Megido, Bete Sean amukoraa bɔ opingye Saretan bɔ ɔwɔ Yesreel ngwaen ne, ɔne ofi Bete Sean bɔ ɔkwaadwu Abel Mehola alaa kɔ Yokemeam bue nu dɔ ne;

¹³ Ben Gebɛre bɔ ɔnea Ramote Gileade so (Manase awa Yari nguraa nemɔ bɔ bɛwɔ Gileade ne, ɔne Agɔbo mbɔtam bɔ ɔwɔ Basan ne, bɛboka ye aseɛ ne asɔ bɛte nguro mbiri aburasia. Bato bɛ nwo fasue, na buralɛ brambram bɛ pambim nemɔ asi).

¹⁴ Yido awa Ahinadabo bɔ ɔnea Mahanaim so,

¹⁵ Ahimaase bɔ ɔnea Nafetali so, (ye koso ogyale Solomon awa brasua Basemate);

¹⁶ Husae awa Baana, bɔ ɔnea Asɛ ne Bealote so,

¹⁷ Paruwa awa Yehosafate bɔ ɔnea Yisaka so,

¹⁸ Ela awa Simei bɔ ɔnea Benyamin so,

¹⁹ yeɛ Yuri awa Gebɛre bɔ ɔnea Gileade aseɛ ne aso ne. Berɛ yeɛ né Amori hene Sihon ɔne Ogo hene Baasan bedi hene ɔ. Né panyi ko wora ɔnea Yuda aseɛ so.

Solomon ahennie ne anwonya

²⁰ Né Yudafoɛ ne Yisraelfoɛ bɛ somaa te kyɛ mboanoa anweaa; na né benya bɔ bedi ɔ ne bɔ bɛno ɔ ma bɛ nye gye.

²¹ Né Solomon di hene wɔ ahennie amukoraa so, fi asue Yufreti kɔka Filistifoɛ aseɛ noa, maa ɔkɔ alaa kodwu Misraim wɛen so. Betuale toɔ bɛmane Solomon, na bɛsole ye mmerɛ bɔ ɔte ase amukoraa.

²² Solomon akɔhoma daa biala te esam paa olonka ɛyaa nza yeɛ ayuosam olonka ɛyaa nzia,

²³ nandwie nyii mbiri buru, nandwie bɔ balɔ ɔ aburanyɔ ne mmoaen ɛyaa ko. Ɛhemɔ koso boka so: dabɔɔ, wanzane, ɛhoɛ ɔne ngokɔ bɔ balɔ ɔ.

²⁴ Ofikyɛ maen maen amukoraa bɔ bɛwɔ asue Yufreti eyia atɔleɛ so, ofi Tifesa bɔ ɔkwaadwu Gasa, ɔne ahemvo amukoraa bɔ bɛwɔ Yufreti eyia atɔleɛ so ne, ye yeɛ né odi bɛ so ɔ; na onyane asomdwee maa ɔpɛle ye nwo bra yiale.

²⁵ Solomon te ase ne, Yuda ne Yisrael maen ne nyane asomdwee; ofi Dan kodwu Beɛ Hyeba, bɛ mukoraati benyane asomdwee bɛtenatenane bɛ bobe boo ne borɔdoma boo mɔ anu.

²⁶ Né Solomon sa le mbɔngɔ sua apee aburanna bɔ ye teaseɛnam mɔ gua nu ɔ, yeɛ pɔngɔhanɛfoɛ apee buru ne nyɔ.

²⁷ Nana Solomon ne mmenia amukoraa bɔ né bɛ ko wura ye sa nu ne, né sɔ mbanyi buru ne nyɔ nemɔ yeɛ bɛbrɛ bɛ aleɛ ɔ. Bɛ nu biala fa ba bosome ko bɔ bahyehyɛ bama ye ɔ nu, na bamma hwee anhia ye.

²⁸ Afei koso, mbɔngɔ ne mbɔngɔ bɔ bɛtwe teaseɛnam nemɔ, né bɛfa ayuo ne ɛserɛ bɛbrɛ bɛ wɔ nekaa bɔ begua ɔ, kyɛbɔ bahyehyɛ bama bɛ nu biala ɔ.

Solomon nworɛ maa ode dumaa

²⁹ Nyameɛ mane Solomon nworɛ ne ndeaseɛ piri paa. Ye ndeaseɛ ne, ɔtrɛ kyɛ mboanoa anweaa,

³⁰ maa ye sɔ ti né Solomon se nworɛ tra eyia afiteleɛfoɛ amukoraa, ɔne Misraim nworɛfoɛ amukoraa.

³¹ Né ɔse nworɛ tra sona biala. Ɔse nworɛ tra Ɛsraniɛ Etan ɔne Maholi mma Heman, Kalkole ne Dareda. Olele dumaa wɔ maen maen bɔ bapɛ ye nwo bayia ne amukoraa nu.

³² Obuli anyandera apee nza, na ɔhyehyɛle edwein apee ko ne nnu.

³³ Mmakaa mɔ, ofi sida bakaa bɔ ɔwɔ Lebanon kodwu sufiɛ bɔ ofifi terɛ nwo ne, obuli anyandera fale bɛ nwo. Obuli bie koso fale ngaka, nnomaa, ngaka bɔ bɛtwe bɛ nwo ase, ɔne nzue nu naen mɔ anwo.

³⁴ Mmenia fili maen maen amukoraa so beetiele Solomon nworɛ dwirɛ ne bie. Aseɛ ye aso ahemvo amukoraa bɔ bɛtele Solomon nworɛ dwirɛ ne, betuli mmenia maa bɛwale ye berɛ.