1 Ahemvo 21 - AHYERƐLƐ KRONGRON

Ahabo ku Nabɔto fa ye bobe boo

¹ Né biaa bie li Nabɔto bɔ ofi Yesreel. Né ole bobe boo wɔ Yesreel. Eboo ne wɔ Samaria hene Ahabo ye ahemvie ne anwo berɛ.

² Na Ahabo sele Nabɔto kyɛ, “Fa wɔ bobe boo ne ma me, maa mva nyɛ me mmakaammaa boo, ofikyɛ opingye m’awuro ne. Ngɔma wɔ bobe boo bɔ ɔyɛ nyemene tra ye ɔ ngosi ye gya nu. Na sɛ ekuro koso a, ngotua ye kerɛ ngɔma wɔ esikaa nu.”

³ Nakoso Nabɔto buale Ahabo kyɛ, “AWURADE pa gua kyɛ ngɔfa me nana mɔ agyapadeɛ ngɔma wɔ ɔ.”

⁴ Na ɔnate edwirɛ bɔ Yesreelniɛ Nabɔto hã hyirele Ahabo ne ati, Ahabo le ɛyaa ne aworabɔlɛ hɔle awuro. Ofikyɛ Nabɔto nwa, “Mengɔfa me nana mɔ agyapadeɛ mengɔma wɔ.” Ahabo ɔɔlale ye mba so, ɔfale ye nye hyirele terɛ, na wannidi.

⁵ Ɔye Yesebɛl wale ye berɛ oobisale ye kyɛ, “Nzu ati yeɛ aboto bɔ engodidi ye?”

⁶ Ahabo buale ye kyɛ, “Ofikyɛ nga ngyirele Yesreelniɛ Nabɔto kyɛ, ‘Fa wɔ bobe boo ne ma ndɔ, anaa sɛ ekuro po a, ngɔma wɔ bobe boo foforɛ maa ɛkɔfa kosi ye gya nu.’ Nakoso obuale me kyɛ, ‘Mengɔfa me bobe boo ne mengɔma wɔ.’ ”

⁷ Yeɛ ɔye Yesebɛl sele ye kyɛ, “Aso nna wɔ yeɛ edi Yisrael so ɔ? Dwɔso ná didi, ná ma wɔ wora kyekye. Ngole Yesreelniɛ Nabɔto bobe boo ne ngɔma wɔ.”

⁸ Yiti Yesebɛl fale Ahabo dumaa hyerɛle ngrataa, na ɔfale Ahabo nzɔanoɛ sosɔle bɛ noa. Ɔsomane maa bɛfale ngrataa ne bɛɛmane mbanyi ne atitire bɔ bɛ ne Nabɔto bɛte kuro berɛ ne.

⁹ Edwirɛ bɔ ɔhyerɛle wɔ ngrataa ne anu ɛhe, “Ɛ́mɔfa bɛto dwaa kyɛ odi kyɛ ebiala yɔ akɔngyere, ná ɛ́mɔma Nabɔto ɔtena atitire bia so wɔ dwaa bɔ bɛkɔbɔ ne abo.

¹⁰ Ɛ́mɔma mmienzua asanzafoɛ nyɔ bɛtena ye nyunu ndendeneɛ so, ná ɛ́mɔma bɛ́bɔ ye kwaadu kyɛ, ‘Ahã musue dwirɛ atia Nyameɛ ne Nana Ahabo.’ Na afei ɛ́mɔfa ye befite bɛɛboro ye nyɔboɛ behũ ye.”

¹¹ Nabɔto kuro berɛ ama, kuro berɛ mbanyi ne atitire nemɔ, belili ngraa bɔ Yesebɛl tole bɛ ne aso pɛpɛɛpɛ. Kyɛbɔ ɔhyerɛle ye wɔ ngrataa bɔ ɔfa brɛle bɛ ne anu ne,

¹² bɛfa bɛtole dwaa kyɛ odi kyɛ ebiala ɔyɔ akɔngyere. Bɛmane Nabɔto tenane atitire bia so wɔ dwaa bɔ bɛbɔle ne abo.

¹³ Asanzafoɛ nyɔ nemɔ wale bɛɛtenane Nabɔto nyunu ndendeneɛ so. Na asanzafoɛ nemɔ bɔle Nabɔto kwaadu wɔ dwaa ne anu kyɛ, “Nabɔto ahã musue dwirɛ watia Nyameɛ ne Nana Ahabo.” Yiti ɛlɔen ne fale Nabɔto bɛhɔle kuro ne tiwaa bɛɛborole ye nyɔboɛ behuni ye.

¹⁴ Na bɛfale ngraa bɛɛmane Yesebɛl kyɛ, “Baboro Nabɔto nyɔboɛ bahu ye.”

¹⁵ Yesebɛl tele kyɛ baboro Nabɔto nyɔboɛ bahu ye pɛ, osele Ahabo kyɛ, “Yesreelniɛ Nabɔto ye bobe boo, bɔ wambene wandɔne ye wamma wɔ ne, kɔ na kɔfa ofikyɛ Nabɔto ɔtte aseɛ wawu.”

¹⁶ Ahabo tele kyɛ Yesreelniɛ Nabɔto wawu pɛ, osili nu kyɛ ɔkɔ Nabɔto bobe boo ne anu ɔkɔfa yɛ ye deɛ.

Elia hyɛ Ahabo asohwenɛ nwo ngɔm

¹⁷ Yeɛ AWURADE lale ye dwirɛ ali hyirele Tisibeniɛ Elia kyɛ,

¹⁸ “Kɔ ná koyia Yisrael hene Ahabo, bɔ odi bia wɔ Samaria ne. Kekesaala ye, ɔwɔ Nabɔto bobe boo bɔ waafa wayɛ deɛ ne anu.

¹⁹ Se ye kyɛ, “AWURADE nwa, ‘Ali awue yeɛ asa afa agyapadeɛ ɔ?’ Ka kyire ye kyɛ, ‘AWURADE nwa: Nekaa bɔ ngyea bɛtafele Nabɔto mogya ne, berɛ ala yeɛ ngyea kɔtafe wɔ koso wɔ mogya deɛ ɔ.’ ”

²⁰ Ahabo bisale Elia kyɛ, “Eh me pɔfoɛ, bɔ mayɔ ye, ama me bo ala so?” Na Elia buale kyɛ, “Yoo, mama wɔ bo ala so. Atu wɔ nwo asie berɛ kyɛ ɛkɔyɔ bɔ ɔte bɔne wɔ AWURADE nyunu ɔ. Ye sɔ ti,

²¹ AWURADE nwa, ‘Ngɔmaa ekonwu amaneɛ, ngonua wɔ boso ama bɛ boso, na ngohũ bienzua biala ngofi Ahabo abusua nu wɔ Yisrael, kyɛ dehyeɛ oo, kyɛ kanganiɛ oo.

²² Na ngɔma w’awuro kɔyɛ kyɛ Nebate awa Yeroboam deɛ, ɔne Ahiya awa Baasa deɛ, ofikyɛ awura me apue maa mafɛ yaa, na ahwe Yisrael ahɔ bɔne nu.

²³ Bɔ AWURADE ahã afa Yesebɛl koso nwo ɛhe, ‘Ngyea koli Yesebɛl naen wɔ Yesreel fasue ne anwo.’

²⁴ Ahabo abusuaniɛ biala bɔ okowu wɔ kuro ne, ngyea koli ye naen. Na bɛ nu biala bɔ okowu wɔ eburo ne, ewienu nnomaa kosuso ye naen koli.”

²⁵ (Nahorɛ nu, ebiala nne berɛ bɔ otuli ye nwo siele berɛ yɔle bɔ ɔte bɔne wɔ AWURADE nyunu ɔ te kyɛ Ahabo, na ɔye Yesebɛl yeɛ né osi ye adua maa ɔyɔ bɔne ɔ.

²⁶ Olili mmosoen si yɔle akyiwadeɛ, kyɛ Amorifoɛ bɔ AWURADE foane bɛ fili Yisraelfoɛ nyunu nemɔ ala.)

²⁷ Ahabo tele sɔ dwirɛ ne nen, osunzuale ye bɔbɔ ye ndaadeɛ nu, na ɔherale ɛsɛen tena. Ɔyɔle akɔngyere, ɛsɛen tena yeɛ ɔfa gurɔle ye nwo ɔ, na olili aworabɔlɛ.

²⁸ Yeɛ AWURADE lale ye dwirɛ ali hyirele Tisibeniɛ Elia kyɛ,

²⁹ “Anwu kyɛbɔ Ahabo wasi wabrɛ ye nwo ase wɔ me nyunu ɔ? Ɔnate kyɛ wabrɛ ye nwo ase wɔ me nyunu ne ati, mengɔma sɔ amaneɛ ne ngɔto ye mmerɛ bɔ ɔte ase ɔ; na mmom amaneɛ ne kɔwa Ahabo abusuafoɛ so wɔ ɔwa bɔ okoli ye bia ne ye aberɛ so.”