1 Ahemvo 18 - AHYERƐLƐ KRONGRON

Elia ne Obadia

¹ Nziɛ ye, afoɛ bɔ ɔtɔ so nza ne anu, AWURADE lale ye dwirɛ ali hyirele Elia kyɛ, “Fa wɔ nwo kohyire Ahabo, na ngɔma esue kɔtɔ kogua aseɛ ye aso.”

² Yiti Elia sili nu hɔle kyɛ ɔkwaafa ye nwo kyire Ahabo. Né ɛhɔen ne noa yɛ se paa wɔ Samaria.

³ Ahabo tole ye sa frɛle Obadia, bɔ né ɔnea ahemvie berɛ ne. (Né Obadia suro AWURADE paa.

⁴ Mmerɛ bɔ Yesebɛl okũkũ AWURADE ngɔmhyɛlɛfoɛ nemɔ ne, Obadia fale ngɔmhyɛlɛfoɛ ɛyaa ko, ɔhyɛle bɛ nu aburannu aburannu, ɔfale bɛ ɔɔfeale nyɔboɛ bɔ wasi sua ɔ nu, na né ɔma bɛ aleɛ ne nzue.)

⁵ Yeɛ Ahabo sele Obadia kyɛ, “Kyini aseɛ ye aso mbombonzue ne bɔnza amukoraati nu. Ebiaa yɛkonya ɛserɛ yɛkɔma mbɔngɔ ne afunum nemɔ bekoli bekonya ngoa, amaa ngaka nemɔ anu bie wanwu.”

⁶ Yiti bɛhyɛle maen ne anu nyɔ kyɛ bɛkwaahyini so: Ahabo hɔle bue ko yeɛ Obadia koso hɔle bue ko.

⁷ Obadia nate atee so bɔ ɔkɔ ne, Elia yiale ye. Obadia nwuni kyɛ Elia ɔ. Obadia kotole fale ye nyunu butuli ase mane ye, na osele ye kyɛ, “Me mene Elia, wɔ ɛhe?”

⁸ Obuale ye kyɛ, “Yoo, me ɔ. Kɔhã kyire wɔ mene kyɛ anwu Elia.”

⁹ Yeɛ Obadia bisale kyɛ, “Bɔne beni yeɛ mayɔ ɔ, bɔ ɛfa w’akoaa wura Ahabo sa maa oku me ye?

¹⁰ Kyɛ AWURADE wɔ Nyameɛ te ase ye, maen biala anaa ahennie biala nne berɛ bɔ yeɛ me mene Ahabo, ɔssomane maa bɛhhɔle so bɛɛpenane wɔ ɔ. Na sɛ berɛ ama kã kyɛ, ‘Ɔnne wa’ a, ɔmaa sɔ maen ne anaa ahennie ne ta ndaen kyɛ bennwuni wɔ.

¹¹ Nakoso kekesaala ye ɛnwa, ‘Kɔhã kyire wɔ mene kyɛ, ‘Manwu Elia.’

¹² Sɛ menya mefi wɔ nwo wa mekɔ pɛ, AWURADE Sunzum kɔfa wɔ kɔhɔ nekaa bie bɔ menze ɔ. Na sɛ mekã mekyire Ahabo maa ɔba, ná sɛ wannwu wɔ a, okohu me, ɔwɔ nu kyɛ w’akoaa, ofi me ngwadaa nu yeɛ masuro AWURADE ɔ.

¹³ Me mene, aso ɛttele bɔ nyɔle ɔ; kyɛ mmerɛ bɔ Yesebɛl okũkũ AWURADE ngɔmhyɛlɛfoɛ ne, mvale AWURADE ngɔmhyɛlɛfoɛ ɛyaa ko mveale aburannu aburannu wɔ nyɔboɛ bɔ wasi sua ɔ nu, ná mmane bɛ aleɛ ne nzue ɔ?

¹⁴ Nakoso afei de ɛnwa, ‘Kɔhã kyire wɔ mene kyɛ anwu Elia.’ Ɔba ye sɔ a, okohu me.”

¹⁵ Elia buale kyɛ, “Asafo AWURADE bɔ yeɛ ngyi ye nyunu ne, kyɛbɔ ɔte ase ye de, kyɛ ɔkɔyɛ biala ɛnɛ ngɔfa me nwo ngoohyire Ahabo.”

¹⁶ Yiti Obadia ɔɔpenane Ahabo ɔbɔle ye amaneɛ, na Ahabo sili nu kyɛ ɔkwaayia Elia.

¹⁷ Ahabo nwuni Elia ne, osele Elia kyɛ, “Nna wɔ ɛhe, wɔ bɔ ɛmma Yisrael nwo ndɔ ye ɔ!”

¹⁸ Elia buale kyɛ, “Nnhale Yisrael biala, na mmom wɔ ɛne wɔ baba abusuafoɛ yeɛ ɛmɔahã Yisrael ɔ. Ofikyɛ ɛmɔabu AWURADE mmeraa dwirɛ so, na ɛmɔaasɔne mmosoen Baal mɔ.

¹⁹ Afei, ma Yisrael amukoraati bɛbɔ dwaa beyia me wɔ Kamɛl bokaa so. Baal ahɔmeɛ ɛyaa nna ne aburannu nemɔ, bɛ ne bosoen Asera ahɔmeɛ ɛyaa nna nemɔ, bɔ Yesebɛl yeɛ ɔma bɛ aleɛ ne, maa bɛbra berɛ bie.”

Elia di ahɔmeɛ nemɔ so ngonim

²⁰ Ahabo somane mmenia maa bɛhɔle Yisraelfoɛ amukoraa berɛ, na ɔmane ahɔmeɛ nemɔ beeyiale wɔ Kamɛl bokaa so.

²¹ Yeɛ Elia wale mmenia ne amukoraa nwo berɛ, na obisale kyɛ, “Ɛmɔ adwene kɔyɛ ndaa ndaa maa okoodwu kyinzu? Sɛ AWURADE yeɛ ɔte Nyameɛ a, ye de ɛmɔso ye. Nakoso sɛ Baal ahɔ de a, ye de ye yeɛ ɛmɔso ye ɔ.” Na maen ne amma ye mmuayɛɛ.

²² Yeɛ Elia sele maen ne kyɛ, “AWURADE ngɔmhyɛlɛfoɛ ne, me ngome twe yeɛ mahã ɔ; nakoso Baal ahɔmeɛ nemɔ de, bɛte ɛyaa nna aburannu.

²³ Ɛ́mɔma yɛ nandwie nyii nyɔ: ɛ́mɔma ahɔmeɛ nemɔ bɛye nu ko, ná bɛpepɛ ye ahuronzi ahuronzi begua eyein ne aso. Nakoso nnɛmaa bɛfa see bɛsɔ nu. Nandwie nyii ko bɔ waha ne, me koso ngɔpepɛ nu ahuronzi ahuronzi ngogua eyein ne aso, nakoso mengɔfa see mengɔsɔ nu.

²⁴ Ɛ́mɔsu bɛ́frɛ ɛmɔ nyameɛ ne, na me koso ngosu ngɔfrɛ AWURADE. Bɛ nu horɛ bɔ ɔkɔmaa see kɔyera afɔleɛ ne nen, ye yeɛ ɔte Nyameɛ amba ɔ.” Na maen ne amukoraa hane kyɛ, “Yɛde yɛto nu.”

²⁵ Yeɛ Elia sele Baal ahɔmeɛ nemɔ kyɛ, “Ɔnate kyɛ ɛmɔsone ne ati, ɛ́mɔli moa bɛnea nu bɛye nandwie nyii ko bɛpepɛ ye ahuronzi ahuronzi. Afei ɛmɔsu bɛfrɛ ɛmɔ nyameɛ ne, nakoso nnɛma ɛmɔfa see bɛsɔ afɔleɛ ne anu.”

²⁶ Yiti bɛyele nandwie nyii ne ko, behuni ye bɛpepɛle nu ahuronzi ahuronzi, na besu bɛfrɛle Baal fi ngyerɛmɔ maa oodwuli eyiagyina. Bɛteateane nu kyɛ, “O Baal, tie yɛ e!” Nakoso ebiala andɛ bɛ so, bannya mmuayɛɛ biala. Na afɔleɛ bokyea bɔ basi ne, behuruhuru bego bɛfale ye nwo.

²⁷ Odwuli eyiagyina ne, Elia hane bɛ ayinga kyɛ, “Ɛ́mɔtea nu serɛ! Ɔte nyameɛ. Bekye ɔdwene nikyee bie anwo, anaakyɛ ebiaa wahɔ bondua anaa wahɔ atee, anaakyɛ walafe bɔ odi kyɛ betingye ye ɔ.”

²⁸ Bɛteateane nu serɛserɛ, na kyɛbɔ né bɛsɔne bɛ nyameɛ a bɛyɔ ne, bɛfale ngrandɛ ne pealɛɛ bɛpepɛle bɛ nwonaen kɔpem kyɛ mogya guale bɛ takaa ɔ.

²⁹ Eyiagyina pɛle nu ne, bɛhɔle so belili ahɔen alaa kɔpem kyɛ mmerɛ bɔ odi kyɛ bɛbɔ aburoo afɔleɛ ne dwuli ɔ. Nakoso ebiala andɛ bɛ so, bannya mmuayɛɛ biala, yeɛ ebiala anye bɛ noa.

³⁰ Yeɛ Elia sele maen ne amukoraa kyɛ, “Ɛ́mɔpingye me nwo wa.” Na mmenia ne amukoraa bepingyele ye nwo berɛ. AWURADE afɔleɛ bokyea bɔ babubu ye ne, Elia lili moa sili.

³¹ Elia sesale nyɔboɛ buru ne nyɔ, kyɛbɔ Yakob bɔ AWURADE hã hyirele ye kyɛ, ‘Bɛkɔfrɛ wɔ Yisrael’ ne, ye mma mmienzua mɔ mmusua kure ne, bɛ somaa te ɔ.

³² Ɔfale nyɔboɛ nemɔ sili afɔleɛ bokyea wɔ AWURADE dumaa nu. Yeɛ ɔpɛle ɛkã fale afɔleɛ bokyea ne anwo bra yiale. Ɛka ne, ye piri kora fa aburoo kɔyɛ olonka nza.

³³ Afei ɔhyehyɛle eyein ne guale afɔleɛ bokyea ne aso, ɔpepɛle nandwie nyii ne anu ahuronzi ahuronzi fa guale eyein ne aso. Na ɔhane kyɛ, “Ɛ́mɔsa nzue bua nna behwie begua naen yeralɛ afɔleɛ ne ɔne eyein ne aso.”

³⁴ Afei ɔhane kyɛ, “Ɛ́mɔyɔ sɔ bieku,” na behwiele nzue beguale so bieku. Elia sa hane kyɛ, “Ɛ́mɔyɔ ye bɔ ɔtɔ so pɛen nza ɔ.” Na behwiele nzue beguale so ye pɛen nza so,

³⁵ maa ɔnate so nzue ne bu fale afɔleɛ bokyea ne anwo amukoraa yili kumaa ne.

³⁶ Mmerɛ bɔ bɛfa bɛbɔ aburoo afɔleɛ ne dwuli ne, ngɔmhyɛlɛniɛ Elia pingyele berɛ, na osele kyɛ, “Ao AWURADE, Abraham, Yisake ne Yisrael Nyameɛ, ɛnɛ maa benwu ye kyɛ wɔ yeɛ ɛte Nyameɛ wɔ Yisrael ɔ, na nde wɔ somvoɛ, na wɔ noa dwirɛ so yeɛ ngyi bɔ mayɔ ɛhe amukoraati ye.

³⁷ Ao AWURADE, tie me, amaa ɔnate so maen he anwu kyɛ, ao AWURADE, ɛte Nyameɛ, na wɔ yeɛ ɛma b’adwene kakyi ba wɔ berɛ ɔ.”

³⁸ Afei AWURADE see ne fili anwuro ɔɔyerale naen yeralɛ afɔleɛ ne, eyein ne, nyɔboɛ nemɔ ne berɛ nnɛterɛ ne, na ɔwewele nzue bɔ ogyi ɛkã ne anu ne.

³⁹ Mmenia ne amukoraa benwuni ye ne, bɛfale bɛ nyunu bebutubutuli ase, na besele kyɛ, “AWURADE te Nyameɛ amba; AWURADE te Nyameɛ amba.”

⁴⁰ Elia sele bɛ kyɛ, “Ɛ́mɔhye Baal ahɔmeɛ nemɔ. Nnɛmɔma bɛ nu ko po nwati.” Yeɛ bɛhyele bɛ, na Elia fale bɛ wale Kison bɔnza ne anwo oohuhuni bɛ wɔ berɛ.

Esue sa tɔ wɔ Yisrael

⁴¹ Afei Elia sele Ahabo kyɛ, “Kɔ didi na no nzue, ofikyɛ mete esue kandinga bɔ ɔbaatɔ ɔ nga.”

⁴² Yiti Ahabo hɔle oodidili na ɔnone nzue. Nakoso Elia de, ɔfo hɔle Kamɛl bokaa ne ti afia. Berɛ, Elia bɔle ye nu ase, na ɔfale ye ti wurale ye sɔ nu.

⁴³ Osele ye somvoɛ ne kyɛ, “Kɔ ná kɔto wɔ nye nea ɛpo ne aso dɔ.” Ɔɔtole ye nye neane na ɔhane kyɛ, “Mennwu hwee.” Yeɛ Elia nwa, “Sa kɔ sɔ alaa pɛen nzoo.”

⁴⁴ Ye pɛen nzoo ne aso, somvoɛ ne hane kyɛ, “Menwu munungum bie bɔ ye piri te kyɛ bɛ sa bondohuma kyɛ ofi ɛpo ne anu ofite ba ɔ.” Yeɛ Elia hane kyɛ, “Kɔhã kyire Ahabo kyɛ, ‘Fo wɔ teaseɛnam torotoro kɔ, ná esue ne anzi wɔ ate.’ ”

⁴⁵ Wangyɛ biala, esue ne munane mane ewienu yɛle kusuu, mvrama tuli, na esue tɔle kandinga paa. Ahabo tenane teaseɛnam ne aso hɔle Yesreel.

⁴⁶ Nakoso né AWURADE tumi gyi Elia si. Elia bɔle ye abɔsoɛ tuli amirika lili Ahabo teaseɛnam ne anyunu alaa oodwuli Yesreel.