1 Ahemvo 17 - AHYERƐLƐ KRONGRON

Elia hyɛ ngɔm ma esue andɔ

¹ Tisibeniɛ Elia bɔ ofi Tisibe bɔ ɔwɔ Gileade ne, osele Ahabo kyɛ, “AWURADE Yisrael Nyameɛ teasefoɛ bɔ yeɛ ngyi ye nyunu ne, kyɛbɔ ɔte ase ye de, mekã kyɛ, bosue anaa esue ngɔpe ase afoɛ ye mɔ anu, sana mafa me noa dwirɛ mama ye nwo ate koraka.”

² Na AWURADE lale ye dwirɛ ali hyirele Elia kyɛ,

³ “Fi wa fa wɔ nye kyire eyia afiteleɛ, na Kereti bɔnza bɔ ɔwɔ asue Yɔɔdan eyia afiteleɛ so ne, kɔfea berɛ.

⁴ No bɔnza ne anu nzue ne bie, na mahyɛ adene nemɔ kyɛ bɛbrɛ wɔ aleɛ.”

⁵ Yiti Elia sili nu hɔle ɔɔyɔle kyɛbɔ AWURADE dwirɛ ne hyɛle ye ne ala. Kereti bɔnza, bɔ ɔwɔ asue Yɔɔdan eyia afiteleɛ so ne, ɔɔtenane berɛ.

⁶ Na adene nemɔ brɛle ye aleɛ ne naen daa ngyerɛmɔ biala ne nɔsoa biala, na bɔnza ne anu yeɛ né onya nzue no ɔ.

⁷ Nakoso mmerɛ kãa pɛle nu ne, bɔnza ne anu nzue ne wewele, ofikyɛ né esue ndɔ wɔ maen ne anu.

Sarefate braa kunaniɛ ne

⁸ AWURADE lale ye dwirɛ ali hyirele Elia kyɛ,

⁹ “Kɔ Sarefate bɔ ɔwɔ Sidon mbɔtam nu ne kekesaala ye kɔtena dɔ; ofikyɛ mafa ahyɛdeɛ mama braa bie wɔ dɔ kyɛ ɔma wɔ aleɛ.”

¹⁰ Yiti Elia sili nu hɔle Sarefate. Oodwuli kuro berɛ pambim ne anwo ne, né braa kunaniɛ bie obubu eyein wɔ berɛ. Ɔfrɛle braa ne, na osele braa ne kyɛ, “Mesrɛ wɔ, fa kwangoa sa nzue kãa brɛ me maa nno.”

¹¹ Braa ne sili nu bɔ ɔkwaasa nzue ne pɛ, Elia frɛle ye, na osele kyɛ, “Fa aleɛ kãa boka so brɛ me.”

¹² Nakoso braa ne buale kyɛ, “Kyɛ AWURADE wɔ Nyameɛ te ase ye, nnne aleɛ biala wɔ berɛ, sana esam me sa bum ko bɔ ɔwɔ kukue nu, yeɛ ngoo kaaba bie bɔ ɔwɔ towaa nu ɔ. Mebaapena eyein kãa mefa mekɔ awuro mekɔyɛ aleɛ maa me ne mma yɛdi. Sɛ yɛdi yɛyie a, ɛhɔen yeɛ okohu yɛ maa yɛkowu ɔ.”

¹³ Yeɛ Elia sele braa ne kyɛ, “Nnɛsuro, wɔ de kɔyɔ kyɛbɔ ahã ne ala, nakoso di moa fa esam ne bie yɔ taterɛ kãa brɛ me, na afei ayɔ bie ɛne ɛwa ne bali.

¹⁴ Ofikyɛ AWURADE Yisrael Nyameɛ nwa: Kukue ne anu esam ne, ye bo ngotu, yeɛ towaa ne anu ngoo ne, so ngɔte, kɔpem kyẽa bɔ AWURADE kɔma esue kɔtɔ kogua aseɛ so ɔ.”

¹⁵ Ɔɔyɔle kyɛbɔ Elia hane ne ala. Na braa ne, ɔne Elia, ɔne braa ne awuro ama benyane aleɛ belili ngyẽa pee.

¹⁶ Kukue ne anu mɔle ne bo andu, yeɛ towaa ne anu ngoo ne aso ande, kyɛbɔ AWURADE dwirɛ bɔ ɔnate Elia so hane ne, ɔte ne ala.

Elia tingye kunaniɛ ne awa ne fi ewue nu

¹⁷ Ɛhe asi ne, braa ne bɔ ɔte awuro ne mene ne, ɔwa bienzua ne fokyɛle. Anwonyerɛ ne anu yɛle se paa kɔpem kyɛ akwadaa ne wuli ɔ.

¹⁸ Yeɛ braa ne sele Elia kyɛ, “Nyameɛ sona, nzikyɛ dwirɛ yeɛ afa ali me ye? Ɛwale wa kyɛ ɛbaakaye me me bɔne, ná ɛma mma ne wu anaa?”

¹⁹ Nakoso Elia sele braa ne kyɛ, “Fa ɛwa ne ma me.” Elia lele ye fili braa ne asa nu, na ɔfale ye fo hɔle aborɔsaen ne aso nekaa bɔ oosikyele ne, na ɔfale ye tole ye Elia ye bɔbɔ ye bɛen so.

²⁰ Elia teane nu hã hyirele AWURADE kyɛ, “O AWURADE me Nyameɛ, braa bɔ maasikye ye ye, amaa asane ato ye, ɔnate kyɛ ahu ɔwa ye.”

²¹ Na ɔtengyɛle ye nu butuli akwadaa ne aso pɛen nza, na ɔteane nu hã hyirele AWURADE kyɛ, “O AWURADE me Nyameɛ, ma akwadaa ye osa onya ngoa bieku.”

²² AWURADE tiele Elia dwirɛ ne. Ngoa sa wale akwadaa ne anu, na ye nye so tetele ye.

²³ Elia pagyale akwadaa ne fili aborɔsaen ne aso pumbu ne anu dɔ odwu wale ase. Ɔfale akwadaa ne mane oni, na Elia hane kyɛ, “Nea, ɛwa ne anya ngoa.”

²⁴ Yiti braa ne sele Elia kyɛ, “Afei de manwu kyɛ ɛte Nyameɛ sona, na amba AWURADE dwirɛ yeɛ otua wɔ noa ɔ.”