1 Ahemvo 16 - AHYERƐLƐ KRONGRON

¹ AWURADE lale ye dwirɛ ali fale Baasa nwo hyirele Hanani awa Yehu kyɛ,

² “Mmane wɔ so mvili asefuo nu mvale wɔ nduale me maen Yisrael noa. Nakoso ayɔ bɔ Yeroboam yɔle ne bie, na ama me maen Yisrael bayɔ bɔne, ná bafa bɛ bɔne bawura AWURADE apue.

³ Ye sɔ ne ati, wɔ Baasa, ngonua wɔ ne w’abusuafoɛ bɛ boso, na ngɔma bɔ ɔkɔto w’abusuafoɛ ne kɔyɛ kyɛ Nebate awa Yeroboam abusuafoɛ deɛ ne bie.

⁴ Baasa abusuaniɛ biala bɔ okowu wɔ kuro ne, ngyea koli ye naen. Na bɛ nu biala bɔ okowu wɔ eburo ne, ewienu nnomaa kosuso ye naen koli.”

⁵ Afei Baasa nwo dwirɛ ngaa ne, nningyein bɔ ɔyɔle, ɔne ye ngonim bɔ olili wɔ koɛ nu, amba, bahyerɛ ye wɔ Yisrael ahemvo nwo dwirɛ nwomaa ne anu.

⁶ Baasa toale ye mbanyi mɔ, besiele ye wɔ Tisa, na ɔwa bienzua Ela lili ye bia.

⁷ AWURADE lale ye dwirɛ bɔ ɔfa Baasa ne ye abusuafoɛ nwo ali hyirele ngɔmhyɛlɛniɛ Yehu bɔ ye baba ole Hanani ne. Sɔ dwirɛ ne buale bɛ fɔ ɔnate ɛhemɔ ati: bɔne amukoraa bɔ ɔyɔle ye wɔ AWURADE nyunu, kyɛbɔ Yeroboam ne ye abusua bɛyɔle bɛfa bewurale AWURADE apue maa ɔfɛle yaa ne; yeɛ afei ɔnate kyɛ Baasa nuane Yeroboam abusuafoɛ bɛ bo ne ati.

Ela di Yisrael so hene

⁸ Nana Asa lili Yuda so hene ne, ye afoɛ bɔ ɔtɔ so aburanyɔ ne nzia ne anu, Baasa awa Ela lili Yisrael so hene wɔ Tisa. Ɔtenane bia ne aso afoɛ nyɔ.

⁹ Nakoso Ela somvoɛ Simri, bɔ ɔte safohene bɔ ɔnea teaseɛnam nemɔ bue so ne, ɔbɔle Ela nwo porɛ. Ɛlɛho bie, né Ela wɔ Tisa, bɔ wano nzaa wabo paa wɔ awuro ɔ. Aasa yeɛ né ɔnea Tisa ahemvie berɛ ɔ.

¹⁰ Na Simri bɔ wurale berɛ oohuni Ela. Ohuni ye ne, né Yuda hene Asa wali afoɛ aburanyɔ ne nzoo wɔ bia ne aso. Na Simri fale Ela bia ne lili.

¹¹ Simri fale bia ne lili pɛ, ohuhuni Baasa abusuafoɛ amukoraati. Wanyakyi Baasa abusuaniɛ bienzua anaa ye damvo ko po maa wanya ye ti wannidi nu.

¹² Yiti Simri nuane Baasa abusuafoɛ amukoraa bɛ bo, kyɛbɔ AWURADE dwirɛ bɔ ɔnate ngɔmhyɛlɛniɛ Yehu so hã fa buale Baasa fɔ ne, ɔte ne ala.

¹³ Ɔnate ɛhemɔ ati yeɛ ɛhe sili ɔ: bɔne amukoraa bɔ Baasa yɔle, ɔne bɔne bɔ Baasa awa Ela yɔle, bɔ ɔnate so bɛfa bɛhwene Yisrael maen maa ɔyɔle bɔne, bɔ bɛfale bɛ mmosoensolɛ bewurale AWURADE Yisrael Nyameɛ apue maa ɔfɛle yaa ne.

¹⁴ Afei Ela nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yisrael ahemvo nwo dwirɛ nwomaa ne anu.

Simri di Yisrael so hene

¹⁵ Nana Asa lili Yuda so hene ne, ye afoɛ bɔ ɔtɔ so aburanyɔ ne nzoo ne anu, Simri lili hene wɔ Tisa. Ɔtenane bia ne aso ɛlɛsoo. Sɔ mmerɛ ne anu, né Yisrael koɛhonɛfoɛ baatua Gibeton bɔ ɔte Filistifoɛ kuro ne.

¹⁶ Na koɛhonɛfoɛ bɔ batua kuro ne, bɛtele kyɛ, “Simri ayɛ lɔen, na wahũ Nana Ela.” Yiti sɔ kyẽa ne, Yisraelfoɛ amukoraa bɛbɔle safohene Omri Yisrael so hene wɔ asikyeleɛ ne anu.

¹⁷ Omri ne Yisrael koɛhonɛfoɛ amukoraa befili Gibeton beetuale Tisa.

¹⁸ Simri nwuni kyɛ koɛhonɛfoɛ nemɔ bali kuro ne aso ngonim ne, oowurale ahemvie berɛ abandenden ne anu. Ɔtole ahemvie ne anu see maa ɔyerale ahemvie ne ne ye bɔbɔ maa owuli.

¹⁹ Ɛhe sili, ofikyɛ ɔyɔle bɔne. Ɔyɔle bɔ ɔte bɔne wɔ AWURADE nyunu ɔ. Ɔyɔle bɔne bɔ Yeroboam yɔle ne bie, na bɔne bɔ ɔyɔle ne, ɔfa ɔhwene Yisrael hɔle bɔne nu.

²⁰ Afei Simri nwo dwirɛ ngaa ne, ɛlɔen bɔ ɔyɛle ne, amba, bahyerɛ ye wɔ Yisrael ahemvo nwo dwirɛ nwomaa ne anu.

Omri di Yisrael so hene

²¹ Yisrael maen ne anu hyɛle nyɔ: bɛ bue lili Gyinate awa Tibini si, na besili ye hene, yeɛ bɛ bue koso belili Omri si.

²² Nakoso bɛ bɔ belili Omri si ne, belili Gyinate awa Tibini mmenia nemɔ aso ngonim. Yiti behuni Tibini mane Omri lili hene.

²³ Nana Asa lili Yuda so hene ne, ye afoɛ bɔ ɔtɔ so aburasa ne ko ne anu, Omri lili Yisrael so hene. Ɔtenane bia ne aso afoɛ buru ne nyɔ; afoɛ nzia bɔ oli moa ne, né ɔte Tisa.

Yisrael kyekye ahenguro foforɛ wɔ Samaria

²⁴ Omri tɔle Samaria bokaa ne ɛdwetɛ kilo aburasoo fili Semere berɛ. Ɔkyekyele kuro wɔ bokaa ne aso. Na kuro bɔ ɔkyekyele ne, ɔtole ye dumaa Samaria. Ɔfa tole Semere bɔ né ɔte bokaa ne mene ne.

²⁵ Omri yɔle bɔ ɔte bɔne wɔ AWURADE nyunu ɔ. Ɔyɔle bɔne trale ahemvo bɔ belili ye nyunu moa ne amukoraati.

²⁶ Ofikyɛ ɔyɔle bɔne bɔ Nebate awa Yeroboam yɔle ne amukoraa bie. Bɔne bɔ ɔnate so ɔfa hwene Yisrael maen maa bɛyɔle bɔne, bɔ bɛfale bɛ mmosoensolɛ bewurale AWURADE Yisrael Nyameɛ apue maa ɔfɛle yaa ne, Omri yɔle bie.

²⁷ Afei Omri nwo dwirɛ ngaa ne, nningyein bɔ ɔyɔle, ɔne ngonim bɔ olili ye wɔ koɛ nu, amba, bahyerɛ ye wɔ Yisrael ahemvo nwo dwirɛ nwomaa ne anu.

²⁸ Omri toale ye mbanyi mɔ, besiele ye wɔ Samaria, na ɔwa bienzua Ahabo lili ye bia.

Ahabo di Yisrael so hene

²⁹ Nana Asa lili Yuda so hene ne, ye afoɛ bɔ ɔtɔ so aburasa ne mmɔtwɛ ne anu, Omri awa Ahabo lili Yisrael so hene. Omri awa Ahabo lili Yisrael so hene wɔ Samaria afoɛ aburanyɔ ne nyɔ.

³⁰ Omri awa Ahabo yɔle bɔ ɔte bɔne wɔ AWURADE nyunu ɔ, trale ahemvo bɔ belili ye nyunu moa ne amukoraa.

Ahabo gya Yesebɛl

³¹ Nebate awa Yeroboam bɔne bɔ Ahabo yɔle bie ne, sɔ bɔne ne po saa né ɔte kãa: Ahabo oogyale Sidonfoɛ hene Etebaal ɔwa brasua Yesebɛl, na ɔsole bosoen Baal sɔnene ye.

³² Osili afɔleɛ bokyea mane Baal wɔ Baal awuro bɔ osili ye wɔ Samaria ne anu.

³³ Ahabo sa yɔle bosoen Asera dosii fa penane berɛ. Ahabo yɔle bɔne somaa trale Yisrael ahemvo amukoraa bɔ belili ye nyunu moa ne, na ɔfa wurale AWURADE Yisrael Nyameɛ apue maa ɔfɛle yaa.

³⁴ Ahabo mmerɛ so yeɛ Hiɛl bɔ ofi Betel ne osa kyekyele Yeriko ɔ. Na kyɛbɔ AWURADE dwirɛ bɔ ɔnate Nun awa Yosua so hane ne ɔte ne, Hiɛl ɔ́to kuro ne fapem ne, ye bamuɛbaa bɔ bɛfrɛ ye Abiram fili ye sa, yeɛ ótuatua ye pambim nemɔ ne, ye kasiɛ bɔ bɛfrɛ ye Segubo koso fili ye sa.