1 Ahemvo 15 - AHYERƐLƐ KRONGRON

Abiyam di Yuda so hene

¹ Nebate awa Nana Yeroboam lili bia ne, ye afoɛ bɔ ɔtɔ so buru ne mmɔtwɛ ne anu, Abiyam lili Yuda so hene.

² Olili bia ne afoɛ nza wɔ Yerusalem. Oni ole Abisalom awa Maaka.

³ Ye baba Rehoboam bɔ olili ye bia ne, ye bɔne bɔ ɔyɔle ne, ye koso ɔyɔle ye mukoraati bie. Wamvi ye ahone nu wanni nahorɛ wamma AWURADE ye Nyameɛ kyɛbɔ ye nana Dawide de olili nahorɛ ne.

⁴ Nakoso ɔnate Dawide ti, AWURADE ye Nyameɛ mane Abiyam nyane koliagyaa wɔ Yerusalem. AWURADE mane ye bɔbɔ ɔwa bienzua lili ye bia na ɔmane Yerusalem kuro ne gyinane,

⁵ ofikyɛ Dawide yɔle bɔ ɔtengyɛ wɔ AWURADE nyunu ɔ, na mmerɛ bɔ Dawide te ase ne amukoraa, sɛ ɛfa Hitiniɛ Yuria dwirɛ ne to ahameɛ a, mmeraa biala bɔ AWURADE hyɛle ne, olili so.

⁶ Koɛ bɔ ɔɔtɔle Rehoboam ne Yeroboam b’afia ne, ɔtoale so wɔ mmerɛ bɔ Abiyam te ase ne amukoraa.

⁷ Afei Abiyam nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yuda ahemvo nwo dwirɛ nwomaa ne anu. Koɛ lale Abiyam ne Yeroboam bosofoɛ b’afia.

⁸ Abiyam toale ye mbanyi mɔ, na besiele ye wɔ Dawide kuro. Na ɔwa bienzua Asa lili ye bia.

Asa di Yuda so hene

⁹ Nana Yeroboam lili Yisrael bia ne, ye afoɛ bɔ ɔtɔ so aburanyɔ ne anu, Asa lili Yuda so hene.

¹⁰ Olili bia afoɛ aburanna ne ko wɔ Yerusalem. Ye nana brasua ole Abisalom awa Maaka.

¹¹ Asa yɔle bɔ ɔtengyɛ wɔ AWURADE nyunu ɔ kyɛbɔ ye Nana Dawide yɔle ne ala.

¹² Asa pɛle asɔneyɛɛ so gyanderafoɛ mmienzua nemɔ asue fili maen ne anu, na mmosoen bɔ ye nana mɔ gyinane ne, ogyili bɛ mukoraa guale.

¹³ Osa tuli ye nana brasua Maaka fili ɛhemmaa bia ne aso, ofikyɛ né Maaka wagyina Asera bosoen dosii bɔ ɔte akyiwadeɛ ɔ. Asa bubuli bosoen ne guale, na ɔyerale ye wɔ Kidron bɔnza ne anu.

¹⁴ Nakoso asɔneyɛɛ nemɔ de, wanzɛkye bɛ. Na mmom Asa fili ye ahone nu lili nahorɛ mane AWURADE mmerɛ bɔ né ɔte ngoa nu amukoraa.

¹⁵ Ye baba aboadeɛ afɔleɛ ne ye bɔbɔ ye aboadeɛ afɔleɛ, bɔ bɛte ɛdwetɛ, esikaa kɔkorɛ ne ngukue nemɔ, ɔfa wale AWURADE awuro.

Asa ne Ben Hadade bɛyɛ apam betia Yisrael

¹⁶ Koɛ tɔle Asa ne Yisrael hene Baasa b’afia mmerɛ bɔ bɛte ase amukoraa.

¹⁷ Yisrael hene Baasa fale koɛ ɔɔtoale Yuda maen. Ɔtole fasue fale Rama nwo kyɛ ɔngɔma sona biala ngofi Yuda hene Asa berɛ ngofite, yeɛ ɔngɔma ebiala koso ngɔhɔ ye berɛ.

¹⁸ Afei ɛdwetɛ ne esikaa kɔkorɛ amukoraa bɔ né wahã AWURADE awuro fotoɛ ɔne ahemvie fotoɛ ne anu ne, Nana Asa sesale, na ɔfa somane ye somvoɛ mɔ. Ɔmaa bɛɛfa bɛmane Nana Ben Hadade bɔ né ɔte Damasko, bɔ ye baba ole Tabrimon bɔ ye baba ole Sirianiɛ Hesion ne. Asa tole Ben Hadade ngraa kyɛ,

¹⁹ “Maa me ne wɔ yɛyɛ apam, kyɛbɔ me baba ne wɔ baba bɛyɛle apam ne. Mefa ɛdwetɛ ne esikaa kɔkorɛ akyɛdeɛ mebrɛ wɔ. Yiti kɔ ná kɔpɛ apam bɔ ɛne Yisrael hene Baasa bayɛ ne anu, amaa ɔnate so wayakyi koɛ bɔ ɔfa taataa me ne.”

²⁰ Ben Hadade lele Nana Asa dwirɛ ne tole nu, na ɔsomane ye safohene mɔ maa bɛɛho belili Yisrael nguro hemɔ aso ngonim: Yiyon, Dan, Abel Bete Maaka, Kinerote amukoraa, ɔne Nafetali aseɛ amukoraa.

²¹ Baasa tele bɔ wasi ne pɛ, ɔyakyili etualɛ bɔ watua Rama kuro ne, na ɔɔtenane Tisa.

²² Yeɛ Nana Asa maa bɛbɔle dawure wɔ Yuda amukoraati kyɛ ebiala ɔɔyɔ maen adwuma, na ebiala wanye ye nwo wamvi nu. Nyɔboɛ ne ndaboa bɔ né Baasa wafa watua Rama kuro ne, bɛsesa bɛhɔle, na Nana Asa fa kyekyele nguro hemɔ: Geba bɔ ɔwɔ Benyamin, yeɛ Misepa.

²³ Afei Asa nwo dwirɛ ngaa amukoraa, ngonim bɔ olili wɔ koɛ nu amukoraa, bɔ ɔyɔle amukoraa, ɔne nguro bɔ ɔkyekyele, amba, bahyerɛ ye wɔ Yuda ahemvo nwo dwirɛ nwomaa ne anu. Nakoso Asa yɛle aworowaa ne, anwonyerɛ bie yɛle ye gya.

²⁴ Asa toale ye mbanyi mɔ, na besiele ye wɔ nekaa bɔ besiele ye mbanyi mɔ ɔ, wɔ ye nana Dawide kuro. Ɔwa bienzua Yehosafate lili ye bia.

Nadabo di Yisrael so hene

²⁵ Nana Asa lili Yuda so hene ne, ye afoɛ bɔ ɔtɔ so nyɔ ne anu, Yeroboam awa Nadabo lili Yisrael so hene. Olili Yisrael so hene afoɛ nyɔ.

²⁶ Ɔyɔle bɔ ɔte bɔne wɔ AWURADE nyunu ɔ. Nikyee bɔ ye baba yɔle, ɔne bɔne bɔ ɔyɔle ɔfa hwene Yisrael hɔle bɔne nu ne, ye koso ɔyɔle bie.

²⁷ Yisakaniɛ Ahiya ɔwa Baasa bɔle Nadabo nwo porɛ, na Baasa huni ye wɔ Gibeton bɔ né ɔte Filistifoɛ kuro ne aso, ofikyɛ né Nadabo ne Yisrael koɛhonɛfoɛ amukoraa baatua Gibeton.

²⁸ Yiti Nana Asa lili Yuda so hene ne, ye afoɛ bɔ ɔtɔ so nza ne anu, Baasa huni Nadabo fale ye bia lili.

²⁹ Baasa lili bia ne pɛ, ohuhuni Yeroboam abusuafoɛ amukoraa. Wanyakyi Yeroboam abusuaniɛ ko po maa wanya ye ti wannidi nu, kɔpem kyɛ ohuhuni bɛ mukoraa ɔ, kyɛbɔ AWURADE dwirɛ bɔ ɔnate ye somvoɛ Silonniɛ Ahiya so hane ne, ɔte ne ala.

³⁰ Ɔyɔle sɔ, ɔnate Yeroboam bɔne bɔ ɔyɔle, ɔne bɔne bɔ ɔhwene Yisrael hɔle nu, ɔne ɛyaa bɔ owurale AWURADE Yisrael Nyameɛ apue maa ɔfɛle ne ati.

³¹ Afei Nadabo nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yisrael ahemvo bɛ nwo dwirɛ nwomaa ne anu.

³² Koɛ tɔle Asa ne Yisrael hene Baasa b’afia mmerɛ bɔ bɛte ase amukoraa.

Baasa di Yisrael so hene

³³ Nana Asa lili Yuda so hene ne, ye afoɛ nza ne anu, Ahiya awa Baasa lili Yisrael amukoraa so hene wɔ Tisa. Ɔtenane bia ne aso afoɛ aburanyɔ ne nna.

³⁴ Ɔyɔle bɔ ɔte bɔne wɔ AWURADE nyunu ɔ. Nikyee bɔ Yeroboam yɔle, ɔne bɔne bɔ ɔyɔle ɔfa hwene Yisrael hɔle bɔne nu ne, ye koso ɔyɔle bie.