1 Ahemvo 14 - AHYERƐLƐ KRONGRON

Ahiya hyɛ Yeroboam abusuafoɛ nwo ngɔm

¹ Sɔ mmerɛ ne anu, anwonyerɛ bɔle Yeroboam awa bienzua Abiya.

² Yeɛ Yeroboam sele ɔye kyɛ, “Dwɔso ná sakyera wɔ nwo, amaa bannwu kyɛ me Yeroboam, me ye ole wɔ. Tie, kɔ Silo, na ngɔmhyɛlɛniɛ Ahiya bɔ ɔhã hyirele me kyɛ ngoli maen ye aso hene ne, ɔwɔ dɔ.

³ Fa paanoo buru, taterɛ kãa ɔne woɛ kɔndoa ko na kɔ ye dɔ. Ɔkɔhã nikyee bɔ ɔkɔto akwadaa ne kohyire wɔ.”

⁴ Yeroboam aye ne yɔle sɔ ala: osili nu hɔle Silo na oodwuli Ahiya awuro. Sɔ mmerɛ ne, né Ahiya onnwu nikye. Ɔnate enyinɛ bɔ wanyi ne ati, né ye nye so ayɛ ye musinamusina.

⁵ Na AWURADE sele Ahiya kyɛ, “Tie, Yeroboam aye ne, ɔba wɔ wa ɔbabisa ɔwa ne ati, ofikyɛ anwonyerɛ abɔ akwadaa ne. Edwirɛ sɔa yeɛ kã kyire ye ɔ.” Braa ne hɔle Abiya berɛ ne, ɔyɛle ye nwo kyɛ brasua foforɛ bie ɔ.

⁶ Nakoso odwuli anoa nu berɛ bɔ owura awuro ne anu nen, Ahiya tele ye gya boso, na ɔhane kyɛ, “Yeroboam aye, bra nu. Nzu ati yeɛ ɛyɛ wɔ nwo kyɛ sona foforɛ ahɔ ye? Ofikyɛ Nyameɛ afa edwirɛ piri bie watua me noa kyɛ nga ngyire wɔ.

⁷ Kɔhã kyire Yeroboam kyɛ, ‘AWURADE Yisrael Nyameɛ nwa nyoo: Nneaneane maen ne anu nyele wɔ, mvale wɔ nduale me maen Yisrael noa,

⁸ na nnele ahennie ne mvili Dawide awuro ama sa nu mva mane wɔ. Nakoso ammɔ wɔ bra kyɛ me somvoɛ Dawide bɔ olili me mmeraa dwirɛ so ne. Ɔfale ye adwene amukoraati lili me si, na bɔ ɔtengyɛ wɔ me nye so ɔ angome yeɛ ɔyɔle ɔ.

⁹ Na mmom bɛ bɔ belili wɔ nyunu bebuli maen ne, ali bɔne atra bɛ mukoraa. Ɔnate kyɛ ayɔ nyameɛ foforɛ mɔ afa, agyina amoen afa awura me apue, ná apo me ne ati,

¹⁰ yiti ngɔma musue kɔto Yeroboam abusuafoɛ. Ngohũ Yeroboam bosoniɛ bienzua biala bɔ ɔwɔ Yisrael, kyɛ ɔte kanga anaakyɛ ɔte dehyeɛ, na ngonua Yeroboam abusuafoɛ boso, kyɛbɔ bɛyera fofoɛ maa ɔtɔ nzoen ɔ.

¹¹ Yeroboam abusuaniɛ biala bɔ okowu wɔ kuro ne, ngyea koli ye naen. Na bɛ nu biala bɔ okowu wɔ eburo ne, ewienu nnomaa kosuso ye naen koli, ofikyɛ bɔ AWURADE se hɔ ɛne.’

¹² Yiti dwɔso ná kɔ w’awuro. Sɛ wɔ gya tia kuro berɛ pɛ a, akwadaa ne kowu.

¹³ Yisrael amukoraa bekosu ye ná basie ye. Na Yeroboam awuro ama de, akwadaa ne angome yeɛ bekonya ye fuin bekosie ye ɔ, ofikyɛ Yeroboam abusuafoɛ nu, AWURADE Yisrael Nyameɛ wanwu nikyee bie bɔ ɔsɔ ye nye ɔ wɔ akwadaa ne anu.

¹⁴ Asa koso, AWURADE kɔye sona kɔma ye nwo maa okoli Yisrael so hene, bɔ sɔ sona ne okonua Yeroboam abusuafoɛ bɛ boso ɛnɛ ala ɔ. Wahyɛ ye bo kekesaala ye po!

¹⁵ “AWURADE kɔwoso Yisrael ahennie, kyɛbɔ nzue woso elemmire ɔ. Aseɛ paa he bɔ ɔfa mane bɛ nana mɔ ne, ɔkɔpɛ bɛ asue kofi so, na ɔkɔbɔ bɛ aya maa bɛkɔhɔ asue Yufreti asi, ofikyɛ bagyinagyina bosoen Asera dosii mɔ bafa bawura AWURADE apue maa wafɛ yaa.

¹⁶ Ɔnate Yeroboam bɔne bɔ wayɔ bɔ wahwe Yisrael maen maa bayɔ bie ne ati, AWURADE kɔye ye sa kofi Yisrael bo.”

¹⁷ Yeɛ Yeroboam aye ne dwɔso sili nu hɔle, na oodwuli Tisa. Ye gya tiale ye awuro ne anoa nu berɛ pɛ yeɛ akwadaa ne wuli ɔ.

¹⁸ Yisrael amukoraa besiele ye besuni ye, kyɛbɔ AWURADE dwirɛ bɔ ɔnate ye somvoɛ ngɔmhyɛlɛniɛ Ahiya so hane ne, ɔte ne ala.

Yeroboam wue

¹⁹ Afei Yeroboam nwo dwirɛ ngaa ne, kyɛbɔ osi hone koɛ ɔne kyɛbɔ osi buli maen ne, amba, bahyerɛ ye wɔ Yisrael ahemvo nwo dwirɛ nwomaa ne anu.

²⁰ Yeroboam lili bia afoɛ aburanyɔ ne nyɔ. Ɔtoale ye mbanyi mɔ, na ɔwa bienzua Nadabo lili ye bia.

Rehoboam di Yuda so hene

²¹ Solomon awa Rehoboam lili Yuda so hene. Rehoboam lili bia ne, né wali afoɛ aburanna ne ko, na ɔtenane bia ne aso afoɛ buru ne nzoo wɔ Yerusalem, kuro bɔ AWURADE waneanea Yisrael mmusua kure amukoraa nu waye wafa ye dumaa wato so ne anu. Oni ole Amonniɛ bie bɔ bɛfrɛ ye Naama.

²² Na Yuda yɔle bɔ ɔte bɔne wɔ AWURADE nyunu ɔ. Bɛ bɔne bɔ bɛyɔle ne, ɔtra bɔne amukoraa bɔ bɛ nana mɔ yɔle ɔ, na bɛmane AWURADE hwene bɛ nwo nungunɛ.

²³ Ofikyɛ besa besisili asɔneyɛɛ mɔ, bosoen bonima mɔ ne bosoen Asera dosii mɔ bɛmane bɛ nwo wɔ bokaa biala so, ɔne bakaa monɛ biala abo.

²⁴ Né asɔneyɛɛ so gyanderafoɛ mmienzua koso wɔ maen ne anu. Maen maen mɔ bɔ AWURADE foane bɛ fili Yisraelfoɛ nyunu ne, b’amumuyɛɛ ne amukoraa, Yudafoɛ yɔle bie.

²⁵ Nana Rehoboam lili bia ne, ye afoɛ nnu ne anu, Misraim hene Sisake fale koɛ ɔɔtoale Yerusalem.

²⁶ Ɔsesale AWURADE awuro berɛ nningyein amukoraa ɔne ahemvie berɛ nningyein amukoraa hɔle. Afei koso esikaa kɔkorɛ akokyɛm bɔ Solomon yɔle ne amukoraa, ɔsesa hɔle.

²⁷ Yiti nziɛ ye, Nana Rehoboam yɔle kɔɔbere akokyɛm mɔ fa sili bɛ gya nu, na ɔfa wurale awɛmvoɛ mbanyi bɔ ne bɛwɛne ahemvie berɛ anoa nemɔ sa.

²⁸ Mmerɛ biala, sɛ né Nana Rehoboam ɔkɔ AWURADE awuro berɛ a, awɛmvoɛ nemɔ bɛye akokyɛm nemɔ befite, ná basa bafa bagua akodeɛ sua ne anu.

²⁹ Afei Rehoboam nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yuda ahemvo nwo dwirɛ nwomaa ne anu.

³⁰ Na Rehoboam ne Yeroboam bɛhɔle so bɛhone koɛ mmerɛ pee.

³¹ Rehoboam toale ye mbanyi mɔ, na besiele ye wɔ nekaa bɔ besiele ye mbanyi mɔ ɔ, wɔ Dawide kuro ne anu. Oni ole Amonniɛ bie bɔ bɛfrɛ ye Naama. Na Rehoboam wa bienzua Abiyam lili Rehoboam bia.