1 Ahemvo 13 - AHYERƐLƐ KRONGRON

Ngɔmhyɛlɛniɛ bie bɔ Yeroboam kɔkɔ

¹ Ɛlɛho bie, Yeroboam gyi afɔleɛ bokyea ne anwo bɔ ɔyera ɛyɛɛ ne, Nyameɛ sona bie gyinane AWURADE dwirɛ so fili Yuda wale Betel.

² Nyameɛ sona ne teane nu fale AWURADE dwirɛ dwudwo tiale Betel afɔleɛ bokyea ne kyɛ, “Afɔleɛ bokyea, afɔleɛ bokyea, AWURADE nwa nyoo, ‘Bɛkɔwo baa bienzua bie wɔ Dawide awuro ama nu bɔ bɛfrɛ ye Yosia ɔ. Na asɔneyɛɛ so asɔfo mɔ bɔ bɛfa ɛyɛɛ bɛbɔ afɔleɛ wɔ wɔ so ne, wɔ so yeɛ Yosia kɔfa bɛ kɔbɔ afɔleɛ ɔ. Na ɔkɔyera kuro sona mmowue wɔ wɔ so.’ ”

³ Sɔ kyẽa ne ala, ngɔmhyɛlɛniɛ ne hyirele sɛngyerɛnneɛ bie bɔ okosi ɔ. Ɔnwa, “Ɛhe ole sɛngyerɛnneɛ bɔ okyire kyɛ AWURADE yeɛ wadwudwo ɔ: Afɔleɛ bokyea ne, okobubu. Na afei, so nzoen ne koso, okohwie kogua ase.”

⁴ Nana Yeroboam tele edwirɛ bɔ Nyameɛ sona ne hã tiale afɔleɛ bokyea bɔ ɔwɔ Betel nen, Yeroboam tengyɛle ye sa fili afɔleɛ bokyea ne aso sele kyɛ, “Ɛ́mɔhye ye!” Nakoso ye sa bɔ ɔtengyɛle fa hyirele ye so ne, ɔnwenwene bɔ wangora wandwe wanza ɔ.

⁵ Afɔleɛ bokyea ne koso bubuli, na nzoen ne hwie guale ase, kyɛbɔ sɛngyerɛnneɛ bɔ Nyameɛ sona ne ɔnate AWURADE dwirɛ so hane ne, ɔte ne ala.

⁶ Yeɛ Nana Yeroboam sele Nyameɛ sona ne kyɛ, “Srɛ AWURADE wɔ Nyameɛ maa onwu me anwumvoin, ná bɔ mbaeɛ ma me maa me sa ne osa ɔyɛ paa.” Yiti Nyameɛ sona ne srɛle AWURADE mane Nana Yeroboam sa ne yɛle paa, na ɔyɛle kyɛ ye daa ne ala.

⁷ Yeɛ Nana Yeroboam sele Nyameɛ sona ne kyɛ, “Bra maa yɛhɔ awuro kodidi, na ngɔhyɛ wɔ nikye.”

⁸ Nakoso Nyameɛ sona ne buale ye kyɛ, “Sɛ ɛfa w’ahennie ne bue po kyɛ me a, me ne wɔ ngɔhɔ. Afei koso mengodidi yeɛ mengɔno nzue wɔ ɛwa.

⁹ Ofikyɛ AWURADE dwirɛ ahyɛ me kyɛ: nnɛdi hwee, nnɛno nzue, yeɛ atee bɔ ɛnate so hɔle ne, sɛ esa kɔ a, nnɛfa so.”

¹⁰ Yiti ngɔmhyɛlɛniɛ ne fale atee foforɛ so, na wanza wamva atee bɔ ɔnate so hɔle Betel ne aso.

¹¹ Né ngɔmhyɛlɛniɛ biaa aworowaa bie te Betel. Ye mma mmienzua mɔ fale nningyein amukoraa bɔ Nyameɛ sona ne waayɔ ye wɔ Betel sɔ kyẽa ne bɛɛbɔle ye amaneɛ. Na edwirɛ amukoraa bɔ ɔhã hyirele Nana Yeroboam ne koso, bɛhã hyirele bɛ baba.

¹² Bɛ baba bisale bɛ kyɛ, “Atee beni yeɛ ɔfale so hɔle ɔ?” Na atee bɔ Nyameɛ sona bɔ ofi Yuda wale ne ɔfale so hɔle ne, biaa ne mma mmienzua nemɔ hyirele ye.

¹³ Yeɛ ngɔmhyɛlɛniɛ aworowaa ne sele ye mma mmienzua nemɔ kyɛ, “Ɛ́mɔsiesie afunum ko bɛma me.” Yiti besiesiele afunum bɛmane ye, na ɔfo tenane so.

¹⁴ Ɔpole Nyameɛ sona ne aso, na ɔɔtole ye kyɛ ɔte eluii bie abo ɔ. Obisale ye kyɛ, “Nyameɛ sona bɔ ofi Yuda wale ne, aso yeɛ ole wɔ?” Na obuale ye kyɛ, “Yoo, me ɔ.”

¹⁵ Na ngɔmhyɛlɛniɛ aworowaa ne sele ye kyɛ, “Bra maa yɛhɔ awuro ná kodidi.”

¹⁶ Nakoso obuale kyɛ, “Me ne wɔ sá kɔ a, ɔnyɛ yé, yeɛ me ne wɔ ngɔhɔ w’awuro. Me ne wɔ ngoli hwee, yeɛ yɛngɔno nzue wɔ wa.

¹⁷ Ofikyɛ AWURADE dwirɛ bɔ ɔhã hyirele me ole kyɛ, Nnɛdi hwee, yeɛ nnɛno nzue wɔ dɔ, na atee bɔ ɛnate so hɔle ne, sɛ esa kɔ a, nnɛfa so.”

¹⁸ Yeɛ ngɔmhyɛlɛniɛ aworowaa ne sele ye kyɛ, “Me koso nde ngɔmhyɛlɛniɛ kyɛ wɔ ala. Na abɔfo nate AWURADE dwirɛ so wahã wahyire me kyɛ, ‘Kɔhã kyire ye maa osa ye si ɔbra w’awuro wa oodidi na ɔno nzue.’ ” Nakoso né ngɔmhyɛlɛniɛ aworowaa ne ɔlakalaka ye.

¹⁹ Na Nyameɛ sona ne sale ye si ɔne ye bɛhɔle ye awuro oodidili ɔnone nzue.

²⁰ Bɛte poen nwo bɔ bedidi ne, AWURADE lale ye dwirɛ ali hyirele ngɔmhyɛlɛniɛ aworowaa bɔ ɔmaa osale ye si wale ne,

²¹ na ɔfa tole Nyameɛ sona bɔ ofi Yuda wale ne nyunu kyɛ, “AWURADE nwa nyoo: Ɔnate kyɛ ahwi afa AWURADE dwirɛ so, ná anni AWURADE wɔ Nyameɛ mmeraa dwirɛ bɔ ɔhyɛle wɔ ne aso,

²² na mmom asa wɔ si awa aadidi ano nzue wɔ nekaa bɔ ɔhane ye nwo dwirɛ hyirele wɔ kyɛ, ‘Nnɛdidi yeɛ nnɛno nzue’ ne ati, bengonya wɔ fuin bengosie ye wɔ wɔ nana mɔ asieleɛ so.”

²³ Nyameɛ sona ne didili none nzue yiele ne, besiesiele ngɔmhyɛlɛniɛ aworowaa bɔ ɔmaa osale ye si ne ye afunum ko bɛmane ye.

²⁴ Na ɔnate atee so ɔkɔ ne, gyata bie yiale ye atunu ohuni ye. Gyata ne gyili ye fuin ne tole atee ne anu. Afunum ne gyinane ye fuin ne anwo berɛ na gyata ne koso gyinane ye fuin ne anwo berɛ.

²⁵ Mmenia bɔ bɛpɛle nu berɛ ne, benwuni efuin bɔ ɔla atee ne anu, bɔ gyata ne gyi ye nwo berɛ ne. Na bɛɛbɔle edwirɛ ne anwo amaneɛ wɔ kuro bɔ ngɔmhyɛlɛniɛ aworowaa ne te so ne aso.

²⁶ Ngɔmhyɛlɛniɛ aworowaa bɔ ɔmaa Nyameɛ sona sale ye si fili atee ne aso dɔ wale ne, ɔtele edwirɛ ne, na ɔhane kyɛ, “Nyameɛ sona bɔ ohwi fale AWURADE dwirɛ so ne ɔ. Ye sɔ ti, yeɛ AWURADE afa ye awura gyata sa maa watete ye nu wahũ ye ɔ, kyɛbɔ AWURADE dwirɛ bɔ ɔhã hyirele ye ne te ne ala.”

²⁷ Na osele ye mma mmienzua nemɔ kyɛ, “Ɛ́mɔsiesie afunum bɛma me.” Yiti besiesiele afunum ko,

²⁸ na ɔhɔ onwuni kyɛ efuin ne la atee ne anu, bɔ afunum ne ɔne gyata ne begyigyi ye nwo berɛ ɔ. Né gyata ne ollili fuin ne, yeɛ né ohhuni afunum ne koso.

²⁹ Ngɔmhyɛlɛniɛ aworowaa ne tamone Nyameɛ sona ne fuin ne tole afunum ne aso, na ɔfa sale ye si wale ye bɔbɔ ye kuro berɛ kyɛ ɔbaasũ ye ná osie ye.

³⁰ Ngɔmhyɛlɛniɛ aworowaa ne, osiele efuin ne wɔ ye bɔbɔ ye asieleɛ kumaa (bɔ wapɛ wato berɛ ɔ) nu, na besuni ye kyɛ, “Aliɛmaa, yaakɔ oo!”

³¹ Osiele ye yiele ne, osele ye mma mmienzua nemɔ kyɛ, “Sɛ mewu a, asieleɛ bɔ masie Nyameɛ sona ne wɔ nu ne, nu yeɛ ɛ́mɔsie me ɔ. Ɛ́mɔfa me mmowue begua ye deɛ ne anwo.

³² Ofikyɛ edwirɛ bɔ ɔnate AWURADE dwirɛ so hã tiale afɔleɛ bokyea bɔ ɔwɔ Betel ne, ɔne Samaria nguro nu asɔneyɛɛ so amukoraati ne, ɔkɔwa nu amba.”

³³ Nakoso edwirɛ bɔ osili ye asi po, Yeroboam wanzakyera ye adwene wamvi ye bɔne nwo, na mmom ɔneaneane maen ne amukoraati nu hyɛle mmenia kwahweabaa sɔfo bieku bɔ bɛkɔyɔ asɔneyɛɛ nemɔ aso adwuma ɔ. Ebiala bɔ okuro kyɛ ɔyɛ sɔfo ne, ɔhyɛle ye sɔfo maa ɔyɔle asɔneyɛɛ nemɔ aso adwuma.

³⁴ Sɔ nikyee bɔ Yeroboam yɔle ne, ɔɔyɛle bɔne tɔle ye abusuafoɛ so, maa ɔnate so bɛ boso nuane fili aseɛ ye aso.