1 Ahemvo 12 - AHYERƐLƐ KRONGRON

Yisrael mmusua kure ne bie yɛ lɔen

¹ Rehoboam sili nu hɔle Sɛkem, ofikyɛ né Yisrael amukoraa bawa Sɛkem kyɛ bɛbaafa ye besie bia so.

² Nebate awa Yeroboam tele ye sɔ pɛ yeɛ osa fili Misraim wale Yisrael ɔ. (Né ɔtɛ wɔ Misraim, nekaa bɔ ɔnwati fili Solomon nyunu hɔle ne.)

³ Yisraelfoɛ somane maa bɛɛfrɛle Yeroboam, na ɔne Yisrael maen ne amukoraa bɛɛfa bɛtole Rehoboam nyunu kyɛ,

⁴ “Wɔ baba maa yɛyɔle adwuma serɛ paa. Yiti kekesaala ye, wɔ baba anyandim bɔ olili ye wɔ yɛ so ne, ɔne adwuma serɛserɛ bɔ ɔfa tole yɛ so ne, te so na yɛkɔso wɔ.”

⁵ Na Rehoboam buale bɛ kyɛ, “Ɛ́mɔma me ɛlɛsa maa ndwene ye nwo, ná ɛ́mɔsa bɛ́bra me wa beele mmuayɛɛ.” Yiti mmenia ne sili nu besa bɛhɔle.

⁶ Yeɛ mbanyi bɔ bɛ nye afi, bɔ mmerɛ bɔ Nana Rehoboam baba Solomon te ase ne, né betu ye foɛ ne, Rehoboam ne bɛ dwenene edwirɛ ne anwo, na obisale bɛ kyɛ, “Mmenia ye, nzikyɛ mmuayɛɛ yeɛ ɛmɔsusu kyɛ mva mma bɛ ɔ?”

⁷ Bebuale ye kyɛ, “Sɛ ɛnɛ ɛkɔyɛ wɔ nwo akoaa kɔma maen ye ná ɛkɔso bɛ, ná sɛ ɛkɔma bɛ mmuayɛɛ paa a, ye de bɛkɔyɛ wɔ ngoaa afebɔɔ.”

⁸ Nakoso foɛ bɔ mbanyi nemɔ tuli Rehoboam ne, ɔfa tole ahameɛ. Na mmerandeɛ bɔ ɔne bɛ bɔ tipɛen bɔ ɔne bɛ tu nu, bɔ né baayɛ ye foɛtulɛfoɛ ne, ɔne bɛ dwenene edwirɛ ne anwo.

⁹ Obisale bɛ kyɛ, “Mmenia ye, bɔ bafa bato me nyunu kyɛ, ‘Adwuma serɛserɛ bɔ wɔ baba fa tole yɛ so ne, te so’ ne, nzikyɛ mmuayɛɛ yeɛ yɛfa yɛma bɛ ɔ?”

¹⁰ Ye ti pɛen mmerandeɛ bɔ ɔne bɛ tu nu nemɔ buale ye kyɛ, “Mmenia hemɔ bɔ baafa bato wɔ nyunu kyɛ, ‘Wɔ baba maa yɛyɔle adwuma serɛ paa. Yiti kekesaala ye, te so ma yɛ,’ ne, bua bɛ kyɛ, ‘Me sa mmɛseka bɔ oli nziɛ ne po, ɔte piri tra me baba sisia.

¹¹ Me baba maa ɛmɔyɔle adwuma bɔ ɔyɛ se paa ɔ, na me wora, ngɔfa bieku ngɔboka so. Me baba de, ole mbire yeɛ ɔhwene ɛmɔ so ɔ, nakoso me de ngɔfa anyanyangyeleɛ yeɛ ngɔhwe ɛmɔ so ɔ.’ ”

¹² Yiti kyɛbɔ Nana Rehoboam hane kyɛ, ‘Ye ɛlɛsa ne aso, ɛmɔsa bɛbra me wa beele mmuayɛɛ’ ne, ye ɛlɛsa ne aso, Yeroboam ne maen ne amukoraa besa bɛhɔle Rehoboam berɛ.

¹³ Nana Rehoboam dwudwo hyirele maen ne ɛyaa so. Foɛ bɔ mbanyi nemɔ tuli ye ne, ɔfa tole ahameɛ,

¹⁴ na ogyinane mmerandeɛ nemɔ foɛtulɛ so sele bɛ kyɛ, “Me baba maa ɛmɔyɔle adwuma bɔ ɔyɛ se paa ɔ, na me wora, ngɔfa bieku ngɔboka so. Me baba de, ole mbire yeɛ ɔhwene ɛmɔ so ɔ, nakoso me de ngɔfa anyanyangyeleɛ yeɛ ngɔhwe ɛmɔ so ɔ.”

¹⁵ Yiti Nana Rehoboam wanne maen ne dwirɛ ne wando nu, ofikyɛ nningyein bɔ né ɔkɔ so ne, né ofi AWURADE, amaa ɔnate so, AWURADE dwirɛ bɔ ɔnate Silonniɛ Ahiya so hã hyirele Nebate awa Yeroboam ne, wawa nu.

¹⁶ Yisrael amukoraa nwuni kyɛ Nana Rehoboam wanne bɛ dwirɛ ne wando nu, na besele ye kyɛ, “Kyɛfa beni yeɛ yɛle ye wɔ Dawide nu ɔ? Yɛlle agyapadeɛ biala wɔ Yese awa ne anu. Yisrael ee, ebiala ɔhɔ ye awuro oo! Dawide bosoniɛ, koli wɔ mmenia so hene.” Yiti Yisraelfoɛ besili nu bɛhɔle b’awuro.

¹⁷ Nakoso Yisraelfoɛ bɔ né bɛte Yuda nguro nemɔ aso ne de, Rehoboam lili bɛ so hene.

¹⁸ Adoram bɔ né ɔnea mmenia bɔ bɛhyɛ bɛ maa bɛyɔ adwuma ne aso ne, Nana Rehoboam somane ye maen ne berɛ. Nakoso Yisraelfoɛ amukoraa bɛborole ye nyɔboɛ behuni ye. Na Nana Rehoboam le amirika ɔfole ye teaseɛnam ɔnwati hɔle Yerusalem.

¹⁹ Yiti Yisrael ayɛ Dawide awuro ama nwo lɔen maa waadwu ɛnɛ.

Yeroboam di Yisrael so hene

²⁰ Yisrael amukoraa tele kyɛ Yeroboam asa awa ne, bɛsomane maa bɛɛfrɛle ye bɛwale dwaa bɔ babɔ ne abo. Na bɛfale ye besili Yisrael amukoraa so hene. Dawide ahennie bia ne, ebiala wanne wando nu, sana Yuda abusua kure ngome.

²¹ Rehoboam oodwuli Yerusalem ne, ɔboaboale koɛhonɛfoɛ bɔ bɛse ko paa ɔ apee ɛyaa ko aburawɔtwɛ noa fili Yuda awuro ama amukoraa ne Benyamin abusua kure nu, kyɛ ɔfa koɛ kɔtoa Yisrael maen ná osa ode ahennie ne fa wura ye bɔbɔ Rehoboam bɔ ɔte Solomon awa ne ye sa.

²² Nakoso Nyameɛ fale ye noa dwirɛ somane Nyameɛ sona Semaya kyɛ,

²³ “Ka kyire Yuda hene Rehoboam bɔ ɔte Solomon awa ne, ɔne Yuda ne Benyamin awuro ama mukoraa, ɔne maen ne anu ama ngaa ne kyɛ,

²⁴ ‘AWURADE nwa nyoo: Nnɛma ɛmɔkɔfa koɛ bɛtoa ɛmɔ aliɛma mɔ Yisraelfoɛ. Ebiala ɔhɔ ye awuro, ofikyɛ bɔ wasi ne, me yeɛ mamaa wasi ɔ.’ ” Yiti betiele AWURADE dwirɛ ne, na besa bɛhɔle b’awuro, kyɛbɔ AWURADE nate ye dwirɛ so ɔhyɛle bɛ ne ala.

Yeroboam yɔ esikaa kɔkorɛ amoen

²⁵ Sɛkem bɔ ɔwɔ Efraim mmokaa aseɛ ne aso ne, Yeroboam tole fasue fale ye nwo tenane berɛ. Ofili berɛ yeɛ ɔɔtole fasue fale Penuel nwo ɔ.

²⁶ Yeɛ Yeroboam susuli ye nwo kyɛ, “Annea a, né ahennie ne wasa waali Dawide ye awuro ama bɛ berɛ.

²⁷ AWURADE awuro bɔ ɔwɔ Yerusalem ne, sɛ maen ye toa so bɛkɔ nu bɛkɔbɔ afɔleɛ a, b’adwene kɔkakyi maa bekosa bekooli bɛ mene Yuda hene Rehoboam si. Ɔba ye sɔ a, bekohu me ná basa baaso Yuda hene Rehoboam.”

²⁸ Yiti Nana Yeroboam fale adwene, na ɔfale esikaa kɔkorɛ yɔle nandwie mmaa nyɔ. Osele maen ne kyɛ, “Ɛmɔahɔ Yerusalem bie a, ɔte paa. Yisrael ee, ɛmɔ nyameɛ mɔ bɔ bɛyele ɛmɔ befili Misraim aseɛ so bɛwale ne, bɛ ɛhe.”

²⁹ Ogyinane ko wɔ Betel, yeɛ ogyinane ko koso wɔ Dan.

³⁰ Na ɛhe ɔɔkakyili bɔne mane maen ne, ofikyɛ mmenia hɔle ko bɔ ɔwɔ Betel ne aso bɛsɔnene, yeɛ bɛhɔle ko bɔ ɔwɔ Dan ne koso aso bɛɛsɔnene.

³¹ Yeroboam sisili sua wɔ asɔneyɛɛ nemɔ aso, na ɔneane maen ne anu yeyele kwahweabaa biemɔ bɔ nna Lewifoɛ ahɔ ɔ hyɛle bɛ sɔfo.

³² Aluolue bɔ né bedi ye wɔ Yuda wɔ bosome mmɔtwɛ ne anu, ye kyẽa bɔ ɔtɔ so buru ne nnu ne, Yeroboam hyehyɛle sɔ aluolue ne bie. Na ɔbobɔle afɔleɛ wɔ afɔleɛ bokyea so. Sɔ ala yeɛ ɔyɔle ye wɔ Betel ɔ, na ɔbɔle afɔleɛ mane nandwie mmaa bɔ wayɔ nemɔ. Na asɔneyɛɛ sua bɔ osisili ne, bɛ sɔfo nemɔ, ɔmaa bɛtenane Betel.

³³ Bosome mmɔtwɛ bɔ ɔte bosome bɔ wali ye bɔbɔ ye ti piri waye wasie berɛ ne, ye kyẽa bɔ ɔtɔ so buru ne nnu ne, sɛ odwu a, né ɔkɔ afɔleɛ bokyea bɔ wasi wasie Betel ne aso. Ɔhyehyɛle aluolue mane Yisrael maen, na né ɔfo kɔ afɔleɛ bokyea ne aso ɔkɔyera ɛyɛɛ.