1 Aberɛso Dwirɛ 9 - AHYERƐLƐ KRONGRON

Mmenia bɔ befi Babilɔn besa bɛwale ɔ

¹ Bɛhale Yisraelfoɛ amukoraa mmusua mmusua, na bɛhyerɛle bɛ dumaa wɔ Yisrael ahemvo nwomaa ne anu. Ɔnate Yudafoɛ b’asoserɛ ti yeɛ ɔmaa bɛhyele bɛ nnure bɛhɔle Babilɔn ɔ.

² Bɛ bɔ belili moa besa bɛwale bɛ kuro bɛɛtenane b’aseɛ so ne, bɛte Yisraelfoɛ nemɔ bie, yeɛ afei asɔfo, Lewifoɛ yeɛ asɔneyɛɛ sua nu somvoɛ mɔ.

³ Na Yuda boso ama nemɔ, Benyamin boso ama nemɔ, Efraim boso ama nemɔ, yeɛ Manase boso ama nemɔ, bɛ nu biemɔ bɛɛtenane Yerusalem. Bɛ ole:

⁴ Yutae bɔ ye baba ole Amihude, bɔ ye baba ole Omri, bɔ ye baba ole Yimri, bɔ ye baba ole Bani, bɔ ɔte Pɛrɛse bɔ ye baba ole Yuda, ye bosoniɛ ne.

⁵ Na Silonfoɛ nemɔ ɛhe: Asaya bɔ ɔte bamuɛbaa ne ɔne ye mma mmienzua mɔ.

⁶ Sera boso ama mɔ: Yewel ne ye nwo ama; bɛte ɛyaa nzia ne aburahona.

⁷ Benyamin boso ama: Salu bɔ ye baba ole Mesulam, bɔ ye baba ole Hodawia, bɔ ye baba ole Hasenua ne,

⁸ yeɛ Yibinea bɔ ye baba ole Yeroham, Ela bɔ ye baba ole Yusi, bɔ ye baba ole Mikri, yeɛ Mesulam bɔ ye baba ole Sefatia, bɔ ye baba ole Rewel, bɔ ye baba ole Yibinea ne.

⁹ Na bɛ ne bɛ nwo ama kyɛbɔ b’aworɛ ndoatoasoɛ te ne, bɛte ɛyaa ngona aburannu ne nzia. Bɛ mukoraa bɛlela bɛ mmusua noa, kyɛbɔ bɛ nana mɔ sasofoɛ te ɔ.

Asɔfo bɔ besa bɛɛtenane Yerusalem ɔ

¹⁰ Asɔfo nemɔ bɛ nu biemɔ ɛhe: Yedaya, Yehoaribo, Yakin,

¹¹ Asaria bɔ ye baba ole Hilkia, bɔ ye baba ole Mesulam, bɔ ye baba ole Sadoke, bɔ ye baba ole Merayote, bɔ ye baba ole Ahitubo, bɔ ɔte Nyameɛ awuro berɛ so neafoɛ ne,

¹² yeɛ Adaya bɔ ye baba ole Yeroham, bɔ ye baba ole Pasure, bɔ ye baba ole Malkiya, bɔ ye baba ole Maasae, bɔ ye baba ole Adiɛl, bɔ ye baba ole Yahesera, bɔ ye baba ole Mesulam, bɔ ye baba ole Mesilemite, bɔ ye baba ole Yimere ne.

¹³ Bɛne bɛ mmango asɔfo mɔ bɛte apee ko ɛyaa nzoo ne aburasia, bɔ né bɛlela bɛ nana mɔ sasofoɛ nemɔ noa ɔ. Né bɛkora bɛyɔ AWURADE awuro berɛ ɛsɔnenɛ adwuma ne.

Lewifoɛ mmusua mmusua

¹⁴ Lewifoɛ bɔ bɛwale ne, bɛ ɛhe: Semaya bɔ ye baba ole Hasubo, bɔ ye baba ole Asrikam, bɔ ye baba ole Hasabia, bɔ ɔte Merari bosoniɛ ne,

¹⁵ yeɛ Bakebaka, Hɛrese, Galal, Matania bɔ ye baba ole Mika, bɔ ye baba ole Sikri, bɔ ye baba ole Asafe ne;

¹⁶ yeɛ Obadia bɔ ye baba ole Semaya, bɔ ye baba ole Galal, bɔ ye baba ole Yedutun, yeɛ Berekia bɔ ye baba ole Asa, bɔ ye baba ole Ɛlkana, bɔ né ɔte Netofafoɛ nguraa nemɔ anu ne.

¹⁷ Ɛhemɔ yeɛ né bɛte pambim awɛmvoɛ ɔ: Salum, Akubo, Talmon ne Ahiman, na bɛ nwoniɛ Salum yeɛ né ɔla bɛ noa ɔ.

¹⁸ Daa ne, né bɛwɛne nana pambim bɔ ɔwɔ eyia afiteleɛ so ne. Na Lewifoɛ b’asikyeleɛ nemɔ, bɛ yeɛ né bɛwɛne ye pambim nemɔ ɔ.

¹⁹ Salum bɔ ye baba ole Kore, bɔ ye baba ole Ebiasafe, bɔ ye baba ole Kora ne, yeɛ ye nwo ama Korafoɛ bɔ befi ye nana mɔ sasofoɛ nu ne, bɛ yeɛ né bɛyɔ ɛsɔnenɛ adwuma bɛwɛne nekaa krongron berɛ anoa ne, kyɛbɔ bɛ nana mɔ né bɛwɛne AWURADE asikyeleɛ anoa nen.

²⁰ Daa ne, né Eleasa awa Finehase yeɛ ɔla bɛ noa ɔ, na AWURADE gyinane ye si.

²¹ Ɛtena sua atenaleɛ anoa ne, Meselemia awa Sakaria yeɛ né ɔwɛne ɔ.

²² Sɔ mmenia nemɔ bɔ bɛneaneane nu bɛyele bɛ kyɛ bɛwɛne anoa ne, bɛ mukoraa bɛte ɛyaa nyɔ ne buru ne nyɔ. Begyinane bɛ mmusua mmusua so yeɛ bɛhale bɛ wɔ bɛ nguraa mɔ nu ɔ. Dawide, yeɛ Samuel bɔ ɔte Nyameɛ sona bɔ ɔse ase ne, bɛfale sɔ adwuma bɔ ohia nahorɛlilɛ ne bewurale sɔ mmenia nemɔ sa.

²³ Yiti AWURADE awuro bɔ yeɛ ɔte ɛtena sua ne, ye anoa nemɔ, bɛ ne bɛ boso ama mɔ yeɛ né bɛte ye nwo awɛmvoɛ ɔ.

²⁴ Sua ne, ye terɛ nna ne: eyia afiteleɛ, eyia atɔleɛ, sorɔ ne ngwaen, né pambim awɛmvoɛ nemɔ yeɛ bɛwɛne ɔ.

²⁵ Na ɛlɛsoo biala, bɛ nwo ama nemɔ bɔ bɛwowɔ nguraa nu ne, né odi kyɛ bɛbaboka bɛ wɔ adwuma ne yɔlɛ nu.

²⁶ Pambim wɛmvoɛ titire nna nemɔ, né bɛte Lewifoɛ, na bɛ yeɛ né bɛnea pumbu nemɔ ne AWURADE awuro fotoɛ nemɔ aso ɔ.

²⁷ Né bɛda bɛpɛ Nyameɛ awuro ne anwo bɛbra beyia, ofikyɛ né ɔte b’adwuma kyɛ bɛwɛne sua ne ɔ. Afei, né ɔte b’adwuma kyɛ bɛnea bebukyebukye ye anoa nemɔ ngyerɛmɔ biala ɔ.

²⁸ Né bɛ nu biemɔ adwuma ole kyɛ bɛnea ndalie bɔ bɛfa bɛyɔ ɛsɔnenɛ adwuma nemɔ aso. Ofikyɛ né sɛ bɛyeye ndalie nemɔ befite, anaa sɛ bɛsesa bekosie koso a, odi kyɛ bɛka.

²⁹ Berɛ bia ne poen nemɔ, ndalie krongron nemɔ amukoraa, esam paa ne, nzaa ne, ngoo ne, ayirefona ne nningyein fonafona nemɔ, so nealɛ ne, bɛfa bewurale sɔ mmenia nemɔ anu bie bɛ sa.

³⁰ Né asɔfo nemɔ anu bie koso yeɛ bɛfrafra nningyein fonafona ne ɔ.

³¹ Kora bosoniɛ Matitia bɔ ɔte Lewiniɛ, bɔ ɔte Salum bamuɛbaa ne, ye yeɛ né ɔto taterɛ taataa ne ɔ.

³² Na paanoo bɔ né besiesie ye folii begua poen ne aso afofikyẽa biala ne, bɛ mmusuafoɛ Kohatefoɛ nemɔ bie yeɛ né owura bɛ sa ɔ.

³³ Lewifoɛ bɔ bɛlela bɛ nana mɔ sasofoɛ noa bɔ ne bɛte edweintolɛfoɛ ne, né bɛtete asɔneyɛɛ sua pumbu nemɔ anu. Né bɛmma bɛnyɔ adwuma biala, ofikyɛ né bɛyɔ sɔ adwuma ne eyia ne kɔngɔen.

³⁴ Lewifoɛ bɛ nana mɔ sasofoɛ nemɔ, sɔ mmenia nemɔ yeɛ né bɛlela bɛ noa ɔ, kyɛbɔ b’aworɛ ndoatoasoɛ te ɔ. Né sɔ mbanyi nemɔ bɛte Yerusalem.

Nana Sɔɔlo abusuafoɛ

³⁵ Yeyil bɔ ɔwa ole Gibeon ne, né ɔte Gibeon, na ɔye dumaa li Maaka.

³⁶ Yeyil mma mɔ ɛhe: Abedon te bamuɛbaa, yeɛ afei Sure, Kise, Baal, Nɛɛ, Nadabo,

³⁷ Gedɔ, Ahio, Sakaria ne Miklote.

³⁸ Miklote wole Simeam; na sɔ mmenia nemɔ, bɛ ne bɛ nwo ama bɛtenane bepingye bɛ mmusuafoɛ ngaa nemɔ wɔ Yerusalem.

³⁹ Nɛɛ wole Kise; Kise wole Sɔɔlo; Sɔɔlo wole Yonatan, Malkisua, Abinadabo yeɛ Esibaal.

⁴⁰ Yonatan wole Meribaal; yeɛ Meribaal wole Mika.

⁴¹ Mika mma mmienzua mɔ ole Piton, Mɛlɛke, Tarea ne Ahase.

⁴² Ahase wole Yara; Yara wole Alemete, Asimawete ne Simri, na Simri wole Mosa.

⁴³ Mosa wole Binea; Binea wole Refaya; Refaya wole Eleasa, na Eleasa wole Asel.

⁴⁴ Asel wole mmaa mmienzua nzia, na bɛ dumaa mɔ ɛhe: Asrikam, Bokeru, Yismael, Searia, Obadia yeɛ Hanan. Asel mma mmienzua mɔ ɛne.