1 Aberɛso Dwirɛ 21 - AHYERƐLƐ KRONGRON

Dawide ka maen ne anu mmenia

¹ Abɔnzam dwɔso tiale Yisrael, na osili Dawide adua maa ɔhale Yisraelfoɛ bɛ somaa.

² Yiti Dawide sele Yoabo ne safohene nemɔ kyɛ, “Ɛmɔɔha Yisraelfoɛ amukoraa, ofi Beɛ Hyeba bɔ ɔkwaadwu Dan, ná ɛ́mɔfa ye nwo amaneɛ bɛɛbɔ me maa nwu bɛ somaa.”

³ Yeɛ Yoabo buale kyɛ, “Nana, me mene, mesrɛ kyɛ AWURADE ɔ́ma mmenia ne bɛ somaa ɔ́yɛ mmɔhoɛ ɛyaa ko. Aso bɛ mukoraa nna wɔ somvoɛ mɔ ɔ? Me mene, na nzu ati yeɛ ekuro kyɛ ɛyɔ sɔ nikyee ye ɔ? Nzu ati yeɛ ɛtwetwe musue brɛ Yisrael ye?”

⁴ Nakoso Nana Dawide tuli Yoabo noa dwirɛ deɛ guale. Yiti Yoabo fili berɛ oohyinihyinini Yisrael amukoraa, na osa wale Yerusalem.

⁵ Mmenia bɔ bɛhale bɛ ne, Yoabo fale bɛ somaa nwo amaneɛ ɔɔbɔle Dawide: Yisrael ɛlɔen bɔ bɛkɔhora bɛkɔhɔ koɛ ne, bɛte apepesrala ko ne apee ɛyaa ko, yeɛ Yuda deɛ wora bɛte apee sɔ alaa ɛyaa nna aburasoo.

⁶ Nakoso Yoabo wanga Lewifoɛ ne Benyaminfoɛ mɔ bie, ofikyɛ né Nana Dawide ahyɛdeɛ ne, ɔyɛ ye ahyi.

Mmeniahalɛ ne nwo asohwenɛ

⁷ Nakoso Nyameɛ nye angye mmeniahalɛ ne anwo, yiti ɔhwene Yisrael so paa.

⁸ Na Dawide fa tole Nyameɛ nyunu kyɛ, “Bɔ mayɔ ye, mayɔ bɔne piri. Nakoso mesrɛ wɔ ala, fa w’akoaa amumuyɛɛ kyɛ ye, ofikyɛ mali ngwaseasɛm paa.”

⁹ Na AWURADE lale ye dwirɛ ali hyirele ngɔmhyɛlɛniɛ Gade, bɔ ɔte Dawide sona bɔ ɔse ase ne kyɛ,

¹⁰ “Kɔhã kyire Dawide kyɛ, ‘AWURADE nwa nyoo: Amaneɛnwunɛ nza yeɛ mefa meto wɔ nyunu ɔ. Nea nu ye ko, na ngɔma sɔ dwirɛ ne kɔto wɔ.’ ”

¹¹ Yiti Gade hɔle Dawide berɛ ɔɔbɔle ye amaneɛ kyɛ, “AWURADE nwa nyoo, ‘Beni yeɛ ekuro ɔ?

¹² Kyɛ ɛhɔen kɔpe wɔ maen nu afoɛ nza, anaakyɛ ɛkɔnwati kofi wɔ pɔfoɛ mɔ bɔ bele ngrandɛ bɛfoa wɔ ɔ bɛ nyunu bosome nza, anaakyɛ AWURADE kɔma anwonyerɛ tɛɛ kɔte kɔpe wɔ maen nu ɛlɛsa bɔ AWURADE abɔfo kohũhũ mmenia wɔ Yisrael maen ne anu amukoraa ɔ.’ Yiti dwene ye nwo, ye nu ko, ná ma nza mva ye nwo mmuayɛɛ ngɔma bɔ ɔsomane me ɔ.”

¹³ Yeɛ Dawide buale Gade kyɛ, “Yieee! Edwirɛ piri paa ato me! AWURADE yeɛ mekuro kyɛ ɔtwe me so ɔ, ofikyɛ ye de, ye anwumvoinnwunɛ te piri paa; nakoso menguro kyɛ kuro sona twe me so ɔ.”

¹⁴ Yiti AWURADE mane anwonyerɛ tɛɛ te pene Yisrael, na mmenia apee aburasoo wuwuli wɔ Yisrael.

¹⁵ Na Nyameɛ somane abɔfo maa ɔhɔle Yerusalem kyɛ ɔɔbɔ kuro ne. Na mmerɛ bɔ abɔfo ne yɛle kyɛ ɔbɔ kuro ne nen, AWURADE neane, na ɔsesane ye adwene wɔ kuro ne bɔlɛ ne anwo, na osele abɔfo bɔ ogu so ɔbɔ kuro ne kyɛ, “Wayɛ yé! Yakyi.” Sɔ mmerɛ ne, né AWURADE abɔfo ne ogyi Yebusiniɛ Ɔnan ye nekaa bɔ bɛboro aburoo ne.

¹⁶ Dawide mane ye ti so, na onwuni AWURADE abɔfo ne kyɛ ogyi nyameɛso ne aseɛ b’afia, bɔ watengyɛ ye ngrandɛ wɔ Yerusalem so ɔ. Na Dawide ne ye mbanyi mɔ bɔ baherahera ɛsɛen tena ɔ, bɛfale bɛ nyunu bebutubutuli berɛ.

¹⁷ Yeɛ Dawide sele Nyameɛ kyɛ, “Me yeɛ nhyɛle mmeraa kyɛ bɛha mmenia ne ɔ. Bɔne ne, me yeɛ mayɔ ɔ, yeɛ mvomsoɛ ne, me yeɛ mayɔ ɔ. Na mmenia hemɔ bɔ menea bɛ so ye de, nzikyɛ yeɛ bayɔ ɔ? Ao AWURADE me Nyameɛ, mesrɛ wɔ ala, ma wɔ yaafɛlɛ ne ɔbra mene me baba abusuafoɛ so, na nnɛma wɔ mmenia benwu amaneɛ!”

Dawide bɔ ye bɔne nwo afɔleɛ

¹⁸ Afei AWURADE abɔfo fale ahyɛdeɛ mane Gade kyɛ oose Dawide kyɛ, “Yebusiniɛ Ɔnan ye nekaa bɔ bɛboro aburoo ne, fo kɔ berɛ kosi afɔleɛ bokyea ma AWURADE.”

¹⁹ Yiti AWURADE noa dwirɛ bɔ Gade hã hyirele Dawide ne, Dawide lili so ɔfo hɔle berɛ.

²⁰ Ɔnan pɛnene ye nye, na onwuni abɔfo ne. Ye mma mmienzua nna nemɔ bɛɛfeale, nakoso Ɔnan de, ɔhɔle so ɔborole ye aburoo ne.

²¹ Dawide pingyele Ɔnan nen, Ɔnan tole ye nye, na onwuni Dawide. Ɔnan fili nekaa bɔ ɔboro aburoo ne ooyiale Dawide, na ɔkotole berɛ fale ye nyunu butuli ase wɔ Dawide nyunu.

²² Dawide sele Ɔnan kyɛ, “Nekaa bɔ bɛboro aburoo ne, fa ma me maa nzi afɔleɛ bokyea wɔ berɛ mma AWURADE, amaa ɔnate so waye ɛhawo ne wafi maen ne aso. Maa ndɔ ye kyɛbɔ ye nyɔboɛ te ne ala.”

²³ Yeɛ Ɔnan buale Dawide kyɛ, “Nana, me mene, fa aseɛ ne, ná yɔ bɔ ekuro biala wɔ so. Nandwie mɔ bɔ ɛkɔfa kɔbɔ naen yeralɛ afɔleɛ ɛhe, ndaboa bɔ bɛboro so aburoo bɔ ɛkɔfa kɔsɔ see ɛhe, yeɛ aburoo bɔ ɛkɔfa kɔbɔ aburoo afɔleɛ ɛhe. Mefa ye mukoraa mema wɔ.”

²⁴ Nakoso Nana Dawide buale Ɔnan kyɛ, “Daabi, ngɔtɔ. Ngotua ye kerɛ, kyɛbɔ bɛ nyɔboɛ te ɔ. Nikyee bɔ ɔte wɔ deɛ ne, mengɔfa mengɔma AWURADE; yeɛ mengɔbɔ naen yeralɛ afɔleɛ wɔ aberɛ bɔ mandua ye nwo kerɛ ɔ.”

²⁵ Yiti nekaa bɔ bɛboro aburoo ne, Dawide tɔle ye esikaa kɔkorɛ kilo nzoo fili Ɔnan berɛ.

²⁶ Dawide sili afɔleɛ bokyea mane AWURADE wɔ berɛ, na ɔbobɔle naen yeralɛ afɔleɛ ne asomdwee afɔleɛ. Dawide bɔle mbaeɛ hyirele AWURADE. Otiele ye mbaeɛ ne, na ɔmane see fili nyameɛso ɔɔyerale Dawide naen yeralɛ afɔleɛ ne wɔ afɔleɛ bokyea ne aso.

²⁷ Afei AWURADE fale ahyɛdeɛ mane abɔfo ne, na ɔfale ye ngrandɛ ne wurale ye bɔha nu.

²⁸ Sɔ mmerɛ ne, Dawide nwuni kyɛ AWURADE atie ye mbaeɛ wɔ Yebusiniɛ Ɔnan ye nekaa bɔ bɛboro aburoo nen, ɔbɔle ye afɔleɛ mɔ wɔ berɛ.

²⁹ Ofikyɛ AWURADE nyianu sua bɔ Mose sili wɔ ɛserɛ ne aso ne, ɔne naen yeralɛ afɔleɛ bokyea ne, sɔ mmerɛ ne, né bɛwɔ Gibeon asɔneyɛɛ ne aso.

³⁰ Nakoso Dawide wangora wangɔ berɛ wangɔammisa Nyameɛ noa dwirɛ, ofikyɛ né osuro AWURADE abɔfo ngrandɛ ne.