1 Aberɛso Dwirɛ 20 - AHYERƐLƐ KRONGRON

Yoabo di Raba so ngonim

¹ Bɛhyɛ afoɛ bo bieku nen, mmerɛ bɔ ɔyɛ a ahemvo mɔ bɛkɔ koɛ ne, Yoabo lili ye koɛhonɛfoɛ nyunu maa bɛɛsɛkyele Amonfoɛ maen ne, na betuale Raba kuro ne. Nakoso Dawide de, ɔhale Yerusalem. Yoabo fale koɛ ɔtetale Raba, na olili so ngonim.

² Dawide tuli bɛ hene ne abotire fili ye ti so. Né abotire ne anu nonɛ te esikaa kɔkorɛ kilo aburasa ne nna. Né pɔkoaa wura nu, na bɛfa bewurale Dawide. Osa fale koɛ nu nzesadeɛ pee fili kuro ne anu hɔle.

³ Dawide sesale kuro berɛ ama hɔle, na ɔmaa bɛfale sralaa, kona ne akumaa bɛyɔle adwuma. Sɔ yeɛ Dawide yɔle ye wɔ Amonfoɛ nguro ne amukoraa so ɔ. Afei Dawide ne ye koɛhonɛfoɛ ne amu besa bɛhɔle Yerusalem.

⁴ Ɛhe asi ye, bɛ ne Filistifoɛ hone koɛ wɔ Gɛsɛre. Koɛ ne anu, Husaniɛ Sibekae huni kwabranoa nemɔ bosoniɛ ko bɔ oli Sippae, na Filistifoɛ lili ngoguo.

⁵ Besa bɛ ne Filistifoɛ hone koɛ. Na Yaare awa Ɛlhanan, ohuni Gitiniɛ Goliate oliɛma bienzua Lahemi bɔ ye pealɛɛ ne, ɔte kyɛ mbuna bɔ bɛfa nyamaa bɛsosɔ nu bɛnwo ɛtena ɔ.

⁶ Besa bɛ ne Filistifoɛ hone koɛ wɔ Gate. Né bienzua tendenn guraen bie wɔ Gate. Ye sa ne ye gya mmɛseka nemɔ te nzia nzia, na ye mu kã bɔ nu a, ɔte aburanyɔ ne nna. Ye koso ɔte kwabranoa nemɔ bosoniɛ.

⁷ Ɔpɛle Yisrael poa, na Dawide aliɛma Simei ɔwa Yonatan huni ye.

⁸ Sɔ mmenia nemɔ, bɛte Gate kwabranoa nemɔ bɛ bosofoɛ. Na Dawide ne ye koɛhonɛfoɛ nemɔ huhuni bɛ.