1 Aberɛso Dwirɛ 18 - AHYERƐLƐ KRONGRON

Dawide di ngonim wɔ koɛ ahoroɔ nu

¹ Nziɛ ye, Dawide fale koɛ ɔɔtoale Filistifoɛ, na ɔbrɛle bɛ ase. Olele Gate ne ye nwo nguraa fili Filistifoɛ sa nu.

² Dawide fale koɛ ɔɔtoale Moabo koso lili bɛ so ngonim, na Moabofoɛ bɛɛyɛle ye ngoaa betuale ɛtoɔ bɛmane ye.

³ Soba hene Hadadesa koso, Dawide fale koɛ ɔɔtoale ye lili ye so ngonim alaa oodwuli Hamate, wɔ mmerɛ bɔ né ɔkwaaho trɛ ye ahennie ne anu wɔ asue Yufreti noa ɔ.

⁴ Dawide hyele Hadadesa teaseɛnam mɔ apee ko, pɔngɔhanɛfoɛ apee nzoo, ɔne koɛhonɛfoɛ bɔ bɛnate ase ɔ apee aburanyɔ. Mbɔngɔ amukoraa bɔ teaseɛnam sosɔ bɛ ne, Dawide pepɛle bɛ gya si ndii nu, nakoso ɔyakyili mbɔngɔ ne ɛyaa ko.

⁵ Na Siriafoɛ bɔ bɛwɔ Damasko ne, bɛwale kyɛ bɛbaaboka Soba hene Hadadesa nen, Dawide huni Siriafoɛ nemɔ anu apee aburanyɔ ne nyɔ.

⁶ Afei Dawide ɔɔkyekyele asikyeleɛ mɔ wɔ Damasko bɔ ɔwɔ Siria, na ɔmane ye koɛhonɛfoɛ bɛɛtenane dɔ. Na Siriafoɛ bɛɛyɛle Dawide ngoaa bɔ né betua ɛtoɔ bɛma ye ɔ. Na AWURADE bɔle Dawide nwo waen wɔ nekaa biala bɔ ɔhɔle ɔ.

⁷ Esikaa kɔkorɛ akokyɛm bɔ né Hadadesa mbanyi mɔ betiratira ne, Dawide lele bɛ sa nu fa wale Yerusalem.

⁸ Dawide sesale kɔɔbere pee fili Hadadesa nguro Tebehate ne Kune so. Sɔ kɔɔbere ne yeɛ Solomon fa yɔle asɔneyɛɛ sua nu berɛ kɔɔbere nzim ne kɔɔbere bonima ne kɔɔbere nningyein nemɔ ɔ.

⁹ Na mmerɛ bɔ Hamate hene Tuyu tele kyɛ Dawide ali Soba hene Hadadesa koɛhonɛfoɛ amukoraa so ngonim ne,

¹⁰ Tuyu somane ɔwa bienzua Hadoram wɔ Nana Dawide berɛ maa oobisale ye ahye yɛle ye mmo, kyɛ wali Hadadesa so ngonim ɔ, ofikyɛ né Hadadesa ne Tuyu bɛtaa bɛko koɛ. Hadoram ɔkɔ Dawide berɛ ne, ɔfale mbembenanneɛ bɔ bafa esikaa kɔkorɛ, ɛdwetɛ ne kɔɔbere bayɔ ɔ yeɛ ɔhɔle ɔ.

¹¹ Ɛdwetɛ ne esikaa kɔkorɛ bɔ Nana Dawide sesa fili maen maen amukoraa so: Edom, Moabo, Amonfoɛ, Filistifoɛ ne Amalɛke berɛ ne, ɔfale sɔ nningyein nemɔ bokale so, na otu siele berɛ mane AWURADE sɔnenɛ.

¹² Seruya awa Abisae huhuni Edomfoɛ apee buru ne mmɔtwɛ wɔ Ngyee Bɔnza ne anu.

¹³ Ɔkyekyele asikyeleɛ wɔ Edom mane ye koɛhonɛfoɛ bɛtenane berɛ, na Edomfoɛ amukoraa bɛɛyɛle Dawide ngoaa. Na AWURADE bɔle Dawide nwo waen wɔ nekaa biala bɔ ɔhɔle ɔ.

¹⁴ Yiti Dawide lili Yisrael amukoraa so hene; na ole nahorɛlilɛ ne pɛpɛɛpɛyɛlɛ yeɛ olili ye mmenia amukoraa so ɔ.

¹⁵ Né Seruya awa Yoabo ɔte koɛhonɛfoɛ nemɔ so safohene; né Ahilude awa Yehosafate ɔte maen ne anu abakɔsɛm ahyerɛlɛniɛ;

¹⁶ né Ahitubo awa Sadoke ne Abiata awa Ahimɛlɛke bɛte asɔfo, yeɛ né Sawesa te ahemvie berɛ ahyerɛlɛniɛ.

¹⁷ Né Yehoada awa Benaya ɔte Keretifoɛ ne Peletifoɛ so safohene; yeɛ né ye mma mmienzua nemɔ bɛte ye ahemvie berɛ mbanyi.