1 Aberɛso Dwirɛ 16 - AHYERƐLƐ KRONGRON

Bɛfa alaka ne besie ɛtena sua nu

¹ Bɛfale Nyameɛ alaka ne beesiele nekaa bɔ basiesie bama ye ne, wɔ ɛtena sua bɔ Dawide si siele berɛ mane ye ne anu. Na Dawide bɔle naen yeralɛ afɔleɛ ne asomdwee afɔleɛ wɔ Nyameɛ nyunu.

² Dawide bɔle naen yeralɛ afɔleɛ ne asomdwee afɔleɛ yiele nen, ɔsrɛle AWURADE saleɛ mane maen ne.

³ Na ɔhyɛle aleɛ mane Yisrael maen ne anu mmienzua ne mmrasua amukoraa. Ebiala nyane paanoo mumua ko, naen porɛ ko ne bobe taterɛ ko.

⁴ Otuli Lewifoɛ nemɔ bie siele berɛ kyɛ bɛsɔne wɔ AWURADE apam alaka ne anyunu, na bɛsrɛ AWURADE Yisrael Nyameɛ saleɛ, na afei bɛla AWURADE ase ná bɛye ye ayɛ.

⁵ Asafe yeɛ né ɔla bɛ noa ɔ. Ye yeɛ ɔbɔ firikyiwa ne ɔ. Sɛ ɔne berɛ a, Sakaria yeɛ ɔwɔ berɛ ɔ, koraka yeɛ ɛhe mɔ lili so ɔ: Yeyiɛl, Semiramote, Yehiel, Matitia, Eliabo, Benaya, Obɛde Edom yeɛ Yeyiɛl, na bɛ yeɛ bɛbɔ adengum ne firikyiwa ne ɔ.

⁶ Né odi kyɛ asɔfo Benaya ne Yahasiɛl behu totorobɛndo daa wɔ Nyameɛ apam alaka ne nyunu.

Dawide asennaa dwein

⁷ Afei sɔ kyẽa ne, edwein bɔ bɛto bɛye AWURADE ayɛ ne, Dawide lili moa ɔfa wurale Asafe ne Asafe mmango Lewifoɛ nemɔ bɛ sa.

⁸ O, ɛ́mɔfa asennaa bɛma AWURADE, ɛ́mɔbɔ ye dumaa bɛsɔne ye, ɛ́mɔhã ye anwanwadeɛ ne behyire maen maen mɔ.

⁹ Ɛ́mɔto ye nwo dwein, ɛ́mɔto ye nwo ayɛyelɛ dwein. Ɛ́mɔbɔ ye anwanwadeɛ amukoraa nwo dawure.

¹⁰ Ɛ́mɔfa ye dumaa krongron ne bɛhoahoa bɛ nwo. Bɛ bɔ bɛpena AWURADE si atee ne, ma bɛ nye gye.

¹¹ Ɛ́mɔpena AWURADE ne ye tumi. Ɛ́mɔpena ye si atee daa biala.

¹² Ɛ́mɔkaye anwanwadeɛ mɔ bɔ wayɔ ne, ye nzɛngyerɛnneɛ mɔ ɔne ye ndɛen bɔ wabua ne.

¹³ O, ye somvoɛ Yisrael boso ama, Yakob boso ama bɔ waneanea nu waye bɛ ɔ.

¹⁴ Ye yeɛ ɔte AWURADE yɛ Nyameɛ ɔ; obua aseɛ ye aso ama amukoraa ndɛen.

¹⁵ Ɛ́mɔkaye ye apam ne daa biala, bɔ ɔte edwirɛ bɔ ɔhyehyɛle mane aworɛ ndoatoasoɛ apee ko ne,

¹⁶ apam bɔ ɔne Abraham bɛyɔle ne, bɔhyɛ bɔ ɔtale ndaen foale so fa mane Yisake ne,

¹⁷ bɔ osili ye pi fa yɛle ahyɛdeɛ mane Yakob ne, bɔ ɔyɛle apam afebɔɔ mane Yisrael ne,

¹⁸ bɔ ɔhane ye nwo dwirɛ kyɛ, “Wɔ yeɛ ngɔfa Kanaan aseɛ ne ngɔma wɔ ɔ, kyɛ wɔ bue deɛ bɔ ɔte w’agyapadeɛ ɔ.”

¹⁹ Mmerɛ bɔ né banzo, bɔ né bemmu bɛ, na bɛte ɛwɔfoɛ mɔ wɔ aseɛ ne aso,

²⁰ bɔ bekyinikyini maen maen mɔ so, bɔ befi ahennie ko anu bɛkɔ maen foforɛ nu ne,

²¹ wamma ebiala andane bɛ nye; na ɔnate bɛ ti ɔhwene ahemvo mɔ so.

²² Ɔhane kyɛ, “Me mmenia bɔ mapopa bɛ ngoo ne, nnɛma ɛ́mɔfa ɛmɔ sa bɛkã bɛ; yeɛ me ngɔmhyɛlɛfoɛ koso, nnɛma ɛmɔyɔ bɛ bɔne biala.”

²³ Aseɛ so ama amukoraa, ɛ́mɔto dwein bɛye AWURADE ayɛ. Ɛ́mɔhã ye ngoalelɛ nwo dwirɛ daa biala.

²⁴ Ɛ́mɔbɔ ye animnyam ne nwo dawure wɔ maen maen mɔ so. Ɛ́mɔbɔ ye anwanwadeɛ nwo dawure wɔ maen maen amukoraa so.

²⁵ Ofikyɛ AWURADE te piri, na ɔfata ayɛyelɛ piri paa; odi kyɛ sona suro ye tra nyameɛ biala.

²⁶ Ofikyɛ maen maen mɔ, bɛ nyameɛ nemɔ, bɛte mmosoen, nakoso AWURADE de, ye yeɛ ɔbɔle anwuro ɔ.

²⁷ Anidie ne animnyam apɛ ye nwo ayia, tumi ne anigye wɔ ye asɔneyɛɛ sua nu.

²⁸ Maen maen mɔ nu mmusua mɔ, ɛmɔhã, ɛmɔhã kyɛ animnyam ne tumi te AWURADE deɛ.

²⁹ Ɛ́mɔfa animnyam bɔ ɔfata AWURADE dumaa ɔ bɛma ye, ɛ́mɔfa afɔleɛ bɛbra ye nyunu, ɛ́mɔsɔne AWURADE wɔ animnyam krongron nu.

³⁰ Aseɛ so ama amukoraa, ɛ́mɔsuro AWURADE. Wiase timu berɛ pindinn, ye bo ngotutu le.

³¹ Nyameɛso, ma wɔ nye gye, aseɛ koso, di ahurusi, ná bɛhã ye wɔ maen maen nemɔ aso kyɛ, “AWURADE di hene!”

³² Ɛpo ne nu nningyein amukoraa, ɛ́mɔyɛ dede; eburo ne eburo nningyein amukoraa, ɛ́mɔma ɛmɔ nye gye.

³³ Yeɛ eburo mmakaa bele anigye bɛkɔto dwein, wɔ AWURADE nyunu, ofikyɛ ɔba babua aseɛ so ama ndɛen.

³⁴ Ao, ɛmɔla AWURADE ase, ofikyɛ ɔte paa, na ye ɔdɔ bɔ onni ngasi ne, ɔwɔ berɛ afebɔɔ.

³⁵ Afei koso, ɛ́mɔhã kyɛ, “Yɛ ngoalelɛ Nyameɛ, pepɛ de yɛ, boaboa yɛ noa, ná pepɛ de yɛ fi maen maen mɔ sa nu, amaa ɔnate so yafa asennaa yama wɔ dumaa krongron ne, ná yali ahurusi yaye wɔ ayɛ.

³⁶ AWURADE Yisrael Nyameɛ ne, animnyam hã ye fi tete oodwu afebɔɔ!” Yeɛ mmenia ne amukoraa besele kyɛ, “Amen!” Na bɛyele AWURADE ayɛ.

Bɛsɔne AWURADE wɔ Yerusalem ne Gibeon

³⁷ Dawide yɛle nhyehyɛleɛ mane Asafe ne ye mmango Lewifoɛ, kyɛ bɛhɔ AWURADE apam alaka ne anyunu bɛɛsɔne wɔ alaka ne anyunu daa, kyɛbɔ odi kyɛ bɛyɔ ye daa biala ɔ.

³⁸ Ɔmane Obɛde Edom ne ye abusuafoɛ aburasia ne mmɔtwɛ ne bɛbokale bɛ so. Né Yedutun awa Obɛde Edom ne Hosa yeɛ odi kyɛ bɛyɛ pambim awɛmvoɛ ɔ.

³⁹ Dawide mane Sadoke ne ye mmango asɔfo nemɔ bɛtenane AWURADE nyianu sua ne anyunu wɔ asɔneyɛɛ bɔ ɔwɔ Gibeon ne aso,

⁴⁰ kyɛ bɛbɔ naen yeralɛ afɔleɛ bɛma AWURADE daa biala, ngyerɛmɔ ne nɔsoa, wɔ naen yeralɛ afɔleɛ bokyea ne aso, kyɛbɔ edwirɛ amukoraa bɔ AWURADE fa mane Yisrael, bɔ wamaa bahyerɛ ye wɔ ye mmeraa ne anu ne, ɔte ne ala.

⁴¹ Heman ne Yedutun, yeɛ bɛ bɔ bahyɛ da baye bɛ kyɛ bɛye AWURADE ayɛ, wɔ ye ɔdɔ bɔ onni ngasi bɔ ɔwɔ berɛ daa ne ati ne, né bɛboka bɛ so.

⁴² Edwein bɔ bɛto ne, né Heman ne Yedutun yeɛ bɛbɔ totorobɛndo ne firikyiwa ne ɔ. Afei né besa bɛbɔ sangoo bɛto edwein krongron ne. Na Yedutun mma mmienzua nemɔ, bɛyele bɛ kyɛ bɛyɛ pambim awɛmvoɛ.

⁴³ Afei mmenia ne amukoraa bɛhɔle b’awuro, na Dawide hɔle ye awuro oyirayirale ye awuro ama.