1 Aberɛso Dwirɛ 13 - AHYERƐLƐ KRONGRON

Dawide kɔfa apam alaka ne fi Kiriate Yearim

¹ Na Dawide ne koɛhonɛfoɛ apee apee so safohene nemɔ ne ɛyaa ɛyaa so safohene nemɔ, yeɛ mbanyi amukoraa betuli agyina.

² Na Dawide sele Yisrael maen ne amukoraa kyɛ, “Sɛ ɛmɔkuro, ná AWURADE me Nyameɛ pene so a, ye de y’eliɛma mɔ Yisraelfoɛ bɔ bɛwɔ maen ye nekaa biala, asɔfo ne Lewifoɛ bɔ bɛwowɔ nguro bɔ aseɛ bɔ nyɛmmoa didi so la ye nwo ne, ɛ́mɔma yɛto bɛ ngraa, maa bɛɛboka yɛ so.

³ Afei, ɛ́mɔma yɛsa yɛɛfa Nyameɛ alaka ne yɛbra, ofikyɛ Sɔɔlo aberɛ so, yambena ye boso.”

⁴ Maen ne amukoraa bɛpenene so, ofikyɛ edwirɛ ne yɛle bɛ mukoraa fɛ.

⁵ Yiti Yisrael amukoraa, ofi asue Sihɔ bɔ ɔwɔ Misraim ɔkwaadwu Lebo Hamate, Dawide tole ye sa frɛle bɛ kyɛ bɛɛboka ma bɛfa Nyameɛ apam alaka ne béfi Kiriate Yearim bɛbra.

⁶ Na Dawide ne Yisrael amukoraa bɛhɔle Baala bɔ ɔte Yuda kuro bɔ besa bɛfrɛ ye Kiriate Yearim ne, kyɛ AWURADE Nyameɛ bɔ ɔte kɛrubim so ne, ye alaka bɔ ye dumaa la so ne, bɛkwaafa befi dɔ bɛba.

⁷ Bɛfale Nyameɛ alaka ne besiele teaseɛnam monɛ so. Bɛfa befili Abinadabo awuro. Yusa ne Ahio yeɛ né bɛkã teaseɛnam ne ɔ.

⁸ Na Dawide ne Yisrael maen ne amukoraa bɛfale sangoo, awɛen, akasaa, firikyiwa ne totorobɛndo bɛfale b’anwoserɛ mu bɛtole dwein begole abilie.

⁹ Na beedwuli nekaa bɔ bɛboro aburoo wɔ Kidɔn nen, nandwie nemɔ sotili, yiti Yusa tengyɛle ye sa sɔle Nyameɛ alaka ne anu.

¹⁰ AWURADE fɛle Yusa so yaa. Ɔbɔle ye tole ase wɔ berɛ, ofikyɛ ɔtengyɛle ye sa sɔle alaka ne anu; na owu tɔle berɛ ala wɔ Nyameɛ nyunu.

¹¹ Dawide fɛle yaa, ɔnate kyɛ AWURADE fɛle yaa tuale Yusa so kerɛ. Yiti bafrɛ berɛ Pɛrɛse Yusa maa waadwu ɛnɛ ye.

¹² Sɔ kyẽa ne, Dawide surole Nyameɛ, na ɔhane kyɛ, “Ɔkɔyɛ sɛɛ né mahora mafa Nyameɛ alaka ne mahɔ m’awuro?”

¹³ Yiti né Dawide nguro kyɛ ɔfa alaka ne ɔkɔ ye awuro wɔ Dawide kuro ne anu. Mmom Dawide makyele fale alaka ne hɔle Gitiniɛ Obɛde Edom awuro.

¹⁴ Nyameɛ alaka ne lili Obɛde Edom awuro bosome nza, na AWURADE yirale Obɛde Edom ne ye awuro ama mukoraa ne ye nwo nningyein amukoraa.