ᒫᑯᓯᐅᑉ ᐊᒡᓚᖏᑦ 9 - Aglait Ijjurnaittut

¹ Jiisusiup uqautivait, “Sulijumik uqautivassi, tavvaniittut ilangit tuqunianngilat Guutiup Ataniuvinganik pijunnarniqarluni tikilaunginningani.”

Jiisusiup Asijjiqtaulluni Iniqunaqtitauninga

² Ulluit pingasuujuqtut kinguningagut Jiisusiup Piitturuusi Jaimisilu Juanasilu, ilagillugit qaqqamut puqtujumut majuraqput taakkutuullutik; takunnaaqtillugit Jiisusiup tauttua asijjiqtauvuq,

³ annuraangit qakuqsivigjuarlutik qaumaliqput, qakurniqpaulirlutik tamaani nunami qakuqsititaujunnaqtunit.

⁴ Taakkununga saqqittuqaqpuq Ilaijjamik Muusisimiglu; uqaqatiqalirlutik Jiisusimik.

⁵ Piitturuusi Jiisusimut uqaqpuq, “Raapai, tamaaniinginnaruminaqsingmat; siniktarviliurumaliqpugut pingasunik, ilingnut atausirmik, Muusisimullu atausirmik, Ilaijjamullu atausirmik.”

⁶ Piitturuusi qanuq uqariaksaq nalulilaurami, ilagijangillu kappiasuluaramik.

⁷ Nuvujamut tarrititauvut, tavvanngallu nuvujamit nilliqtuqaqpuq, “Taanna tavva Irnira nagligimmariktara; taanna naalaksiuk.”

⁸ Ilinniaqtit avammut takusaramik kinamigluunniit takunngilat Jiisusi kisimi takuvaat.

⁹ Qaqqamit aqqaqtilirlutik, Jiisusiup iniqtiqpait kinamulluunniit uqaqunagit takuqqaujamingnik, Inuup Irninga tuqungajunit makilaunginningani.

¹⁰ Tamanna naalalauqpaat asimingnut uqausirilaurnagu, immigulli apiqsuutiqaliqput qanuq tukiqarmangaat tuqungajunit makinniq.

¹¹ Tavva apirivaat, “Sungmat piqujanik ilisaijit uqaqattaqpat Ilaijja sivulliuluni tikitsariaqarnirarlugu?”

¹² Jiisusiup uqautivait, “Iilaak Ilaijja sivulliulluni tikitsariilauqpuq iluunnanginnik atuinnaruilluni; qanurli aglait uqaqpat Inuup Irninganik, unuqtunut aanniatitaujumaarninganik narrugijaujumaarninganiglu?

¹³ Uqautivassili taanna Ilaijja tikilauqpuq, inungnullu isumaqsuutaulluni piniarviusimavuq, taimaak aglangni titirausiusimangmat piniarniksanga.”

Jiisusiup Nukappiamik Aaqqiksininga Anirnirlungmut Itiqtausimajumik

¹⁴ Ilinniaqtinut tikiutigamik, takuvut inugasagjuanik avataaniittunik, piqujaniglu ilisaijit uqaqatiqaqput taakkuninga.

¹⁵ Inuit Jiisusimik takugamik quaqsaaqput, tuavirlutik Jiisusimuaqput tunngasuktillugu.

¹⁶ Ilinniaqtini apirivait, “Sunamingukua aivaqatigillusiuk uqaqatigijasi?”

¹⁷ Angut tamaanngat inuit akurnganit nilliqpuq, “Ajuriqtuiji, irnira tamaunngautiqqauvara ilingnuaqullugu, anirnirlungmut najuqtauqattarmat uqarunnaqtitsinngittumik.

¹⁸ Anirnirlungmut pinasuaqtaulituarami nunamut urrutitauqattarmat, qanirmigullu qapualirluni, kigutingit tusaqsauliqattaqput, timingalu sukangajualuuliqattarmat. Tavva ilinniaqtitit uqautiqauvakka taassuminga anirnirlungmik anititsiqullugit, kisianili anititsijunnanngilat.”

¹⁹ Tavva uqautivait, “Inuuqatigiingujusi ukpirniqanngilasi, qanuq sivitutigijumik najuriaqaqpatssi? Qanurlu sivitutigijumik qinuisaarutigijariaqaqpassi? Nukappiaq qaitilauqsiuk.”

²⁰ Tavva nukappiaq taassumunngautivaat. Anirnirluup Jiisusi takutuaramiuk, nukappiaq qiiqsuqtiliqpaa, nunamut urruvuq maniqqami aksakaaqattalirluni, qanirmigullu qapualiqpuq.

²¹ Jiisusiup nukappiap ataatanga apirivaa, “Qanurnguna akuniutigijuq taimaittuuliqtuq?” Ataatangata kiuvaa, “Nutaraunirminit taimailittautilik.

²² Unuqtuisurluni anirnirluup tuqunnasuaqattaqsimajanga ikumamut imaanullu; qanutuinnaq pijunnaruvit, nikagiluta ikajulauqtigut.”

²³ Jiisusiup uqautivaa, “Ivvingaaq pijunnaruvit! Sunatuinarnik ajurnaqtuqanngilaq ukpiruvit.”

²⁴ Tavvainnarli nukappiap ataatanga nillirluni uqaqpuq, “Ukpiqpunga; ukpinnginninnit ikajunnga!”

²⁵ Jiisusi qaujigami inugasagjuat tuavirlutik qaivallialirmata, anirnirluk iniqtiqpaa, uqautillugu, “Anirnirluk tusaanngittutit uqarunnanngittutillu, piquvagit, tavvanngat nukappiamit anigit, tavvungalu itikkannirniarunniirlutit.”

²⁶ Anirnirluk nillialiqpuq, nukappiaq qiiqsuqtilaurlugu, tavvanngat anivuq, nukappiaq tuqungajuujaaliqpuq; tamarmiglu uqaliqput, “Tuquvuq.”

²⁷ Jiisusiulli nukappiaq aggangitigut tiguvaa ikajurlugu makitippaa, nikuvilluni.

²⁸ Iglumut itiqsimalirmat, ilinniaqtingita inutuuqatigillugu apirivaat, “Sungmat anitittunnanngilavut?”

²⁹ Jiisusiup uqautivait, “Taimaittut anirnirluit tuksiarnirmutkisiani anititaujunnaqput.”

Jiisusiup Tuquniksaminik Uqausiqakkannirninga

³⁰ Jiisusi ilinniaqtingillu tavvanngat aullaramik Galilia aqqusaaqpaat. Jiisusi nalliannigluunniit qaujimaqujinngilaq naniinnirminik;

³¹ ilinniaqtini ajuriqtuqpait, uqautillugit, “Inuup Irninga pijautitaujumaaqpuq inungnut, taakkua tuquttumaaqpaat; tuqungalaurluni, ulluit pingasut aniguqpata makittumaarivuq.”

³² Ilinniaqtingilli tukisinngilat uqausirijanginnik, apirijariaksarlu Jiisusimik ilirasuglutik.

Kina Anginiqpauva?

³³ Kapiirniamut tikipput; iglumut itiqsimaliramik Jiisusiup ilinniaqtini apirivait, “Qanuq uqaqatigiiqqauvisi tamaunngaliqtilluta?”

³⁴ Ilinniaqtingilli kiujunnanngilat; tamaani aqqutimingni pisuglutik uqaqatigiiqqaugamik nallitik anginiqpaungmangaat,

³⁵ Jiisusi inginnami ilinniaqtini 12 qaiquvait; uqautillugit, “Nalliat sivulliqpaujumajuq, taanna imminik kingulliqpautittuksauvuq, tamainnullu pijigijauluni.”

³⁶ Surusikulungmik tigusivuq, ilinniaqtingita saanganuaqtippaa; iqilluniuk uqautivait,

³⁷ “Nalliat taimaittumik surusikulungmik tunngasuktitsijuq atinni taanna uvannik tunngasuktitsivuq; uvanniglu tunngasuktitsijuq, uvannituaq tunngasuktitsinngilaq tilijinnigli tunngasuktitsigivuq.”

Nalliat Uvattinnik Akiraqtunngittuq Ilagivavut

³⁸ Juanasiup uqautivaa, “Ajuriqtuiji, angummik takulauqpugut anirnirlungnik anititsiqattaqtumik atirnik, iniqtilauqpavulli nuqqaqullugu, uvattinnut ilagijaunngimmat.”

³⁹ Jiisusi uqaqpuq, “Taanna nuqqaqtitaksarinngilasi; nalliat kamanaqtulinirmik pinasuaqtuq atinnik aturluni, uvannik piunngittumik kinguningagut uqausiqaliqpanngimmat.

⁴⁰ Uvattinnik akiraqtunngittuup ilagivaatigut.

⁴¹ Sulijumik uqautivassi, nalliannut imiqtitaugussi Christuusiup atinganik pigujjinissinnut, taanna imiqtitsijuq asiujinianngimmarikpuq akiliqtauniksaminik.”

Ajuqtulinirmut Pijumisaaqtauniq

⁴² “Nalliat nutarakuluit ilangannik uvannut ukpiqtumik ajuqtulititsijuq, taanna akauniqsaugajaqpuq niaquujaksanik siqallititsijjutiup ujaraalugnganik qungasingagut qilaksiviuluni imavingmut igitaukpat.

⁴³ Aggakpit ajuqtulitippatit, nakakkit; ilingnut akauniqsaugajarmat inuusirmut itirlutit igluanik aggaqanngillutit, igluktut aggaqarlutit igitaugajarnirnit saataanasiqarvingmut, ikumarjuarmut qamisuittumut. [

⁴⁴ Tavvani quglugiaq taakkuninga nirijuq tuqunianngilaq, ikumalu uutitsijuq qaminniarani.]

⁴⁵ itigakpillu ajuqtulitippatit, nakakkit; ilingnut akauniqsaugajarmat inuusirmut itirlutit igluanik itigaqanngillutit igluktut itigaqaraluaruvit igitaugajarnirnit saataanasiqarvingmut. [

⁴⁶ Tavvani quglugiaq taakkuninga nirijuq tuqunianngilaq, ikumalu uutitsijuq qaminniarani.]

⁴⁷ ijivit ajuqtulitippatit, taanna piiruk; ilingnut akauniqsaugajarmat Guutiup Ataniuvinganut itiruvit ijituaqarlutit igluktut ijiqarlutit igitaugajarnirnit saataanasiqarvingmut.

⁴⁸ Tavvani quglugiaq taakkuninga nirijuq tuqunianngilaq, ikumalu uutitsijuq qaminniarani.

⁴⁹ “Tamarmik salummaqsaqtauniaqput ikumamut. Tunirrutiksaup salummaqsaqtauvangningatut tariurmut.

⁵⁰ “Tariuq piuvuq: Kisianili tariungujuniiqpat, qanurli tariunguqtitaukkannirajaqpa? Tariuliktittut piqannariigissi ilissinnut, saimanaqtumiglu inuulusi ilissinnut atunit.”