ᒫᑯᓯᐅᑉ ᐊᒡᓚᖏᑦ 8 - Aglait Ijjurnaittut

Jiisusiup Nirititsininga Inungnik 4,000-nik

¹ Ulluni taikkunani, inugasagjuat katimalirivut, taakkua nirijaksaqanngimmata, ilinniaqtini qaiquvait uqautillugit,

² “Ukua inugasagjuat ilatsugivakka, uvattinniilirmata ullunik pingasunik, niqiksaqaratik;

³ angirraqugukkit sunamik niritinnagit, angirraulirlutik nukiirutiniaqput; ilangit ungasiktumit pisimangmata.”

⁴ Ilinniaqtingita kiuvaat, “Qanuq tamaani sunaqajuittumit ukua inugasait nirijaksaqtaarajaqpaat?”

⁵ Jiisusiup apirivait, “Qatsinik niaquujaqaqpisi?” Taakkua uqaqput, “7-nik.”

⁶ Jiisusiup inugasagjuat nunamut ingiquvait; niaquujait 7 tiguvait, qujalijariiramilu aviglugit ilinniaqtiminut tunivait inugasagjuanut tuniuqqaiqullugit; tavva ilinniaqtingit taimailiuqput.

⁷ Iqalukulungniktauq ununngittunik pitaqarivut; qujalijjutigijariiramigit, ilinniaqtini inungnut tuniuqqaiqugivait.

⁸ Nirivut, naammaksillutik; iviujaniglu 7-nik tataivut taakkua amiakkunginnik agguqsimajunik.

⁹ Inugasagjuat unurniqalauqput 4,000 qanigijaani.

¹⁰ Jiisusiup inuit aullaquliqpait; tavvainnarlu umiamut ikivuq ilinniaqtini ilagillugit, Taalmanuutaup qanigijaanuaqput.

Paarisit Kamanaqtuliqujiningat Jiisusimik

¹¹ Paarisit ilangit Jiisusimuaqput uqaqatigillugu uuktuqpaat, qilangmit nalunaikkutarmik kamanaqtumik saqqititsiqullugu.

¹² Jiisusili angijumik aniqsaumilluni uqautivait, “Sungmat ullumiuliqtuq inuit kamanaqtuliqujivaat? Sulijumik uqautivassi, nalunaikkutarmik ullumiujuq inuit tunisiviunianngilat.”

¹³ Qimakpait tavva, umiamut ikigivuq tasiup akianualirluni.

Paarisit Iruutasiullu Puvallaqqutingit

¹⁴ Ilinniaqtingit niaquujaggiriaksaq puiguqtuviniungmata; atausirmik niaquujamik pisimagaluaqput tavvani umiami.

¹⁵ Qaujimanasuaqullugit uqautivait, “Kamatsiarissi, ujjiqsurlusi Paarisit Iruutasiullu puvallaqqutinginnik.”

¹⁶ Ilinniaqtingit immingnut uqaqatigiiliqput, uqarlutik, “Taimaanguna uqaqtuq niaquujaqannginnittinnut.”

¹⁷ Jiisusiup qaujimagamigit, uqautivait, “Sungmat ilissinnut uqaqatigiikpisi niaquujaqannginnissinnik? Suli qaujimanngilasi uvvalu tukisinngilasi uummatisi sitijualuuvaat?

¹⁸ Ijiqarlusi takujunnanngilasi? Siutiqarlusilu tusarunnanngilasi?

¹⁹ Iqqaumanngilasi niaquujait tallimat aggurakkit inungnut 5,000-nut, qatsinik iviujanik amiakkunik tatailauqpisi?” Taakkua uqautivaat, “12-nik tatailauqpugut.”

²⁰ “Niaquujaniglu 7-nik agguigama inungnut 4,000-nut, qatsinik iviujanik tatailauqpisi amiakkunginnik?” Uqautivaat, “7-nik tatailauqpugut.”

²¹ Uqautivait, “Suli tukisinngilasi?”

Jiisusiup Tautunngittumik Tautuliqtitsininga Pitsaitami

²² Pitsaitamut tikipput, inuit ilangit tavvunngaujjivut tautunngittumik, qinuvigivaat taassuminga aktuqsiqullugu.

²³ Tautunngittuq tasiurlugu nunalit silataanuarutivaa; ijingik nuvamittalaurlugik patimmilaurlugu apirivaa, “Sunatuinnamik takuvit?”

²⁴ Takunasuarami uqaqpuq, “Inungnik takuvunga; kisiani napaaqtuujaaqtut pisukataktut.”

²⁵ Tavva ijingik aktukkanniqpaak; tavva takutsiarasuarami ijingik tautungnirilauqtamitut taututsialiqpuuk, tamainnik.

²⁶ Tavva angirraquliqpaa uqautillugulu, “Nunalingnut tavvunga itiqtailigit.”

Piitturuusiup Jiisusimik Nalunaiqsininga Christuusiuninganik

²⁷ Ilinniaqtini ilagillugit aullaqput, nunalingnut Sisaria Pilipaip qanigijaanut; aqqutaani pisuglutik ilinniaqtini apirivait, “Inuit kinaunasugivaanga?”

²⁸ Taakkua kiuvaat, “Ilangita Juanasi Paaptitsirijiunasugivaatit; ilangitali Ilaijjaunasugivaatit; ilanginnut nalauttaijunut ilagijaunasugijauvutit.”

²⁹ Apirivailli, “Ilissili kinaunasugivisinnga?” Piitturuusiup kiuvaa, “Christuusiuvutit.”

³⁰ Jiisusiup iniqtimarikpait kinatuinnarmut uqaqunagit kinaunirminik.

Jiisusiup Uqausiqarninga Aanniatitauniksaminik Tuqutauniksaminiglu

³¹ Tavva ilinniaqtini ajuriqtuqpait Inuup Irninga aanniatitaujariaqarninganik angijumik, Jutit angajuqqaanginnut narrugijaummarigumaarniminik tunirrusiqtitsijillu angajuqqaanginnut, piqujaniglu ilisaijinut, tuqutaujumaarniminiglu, ulluit pingajuanni makittumaarniminik.

³² Tamatuminga anngigutinagit uqautivait. Piitturuusiup sanirvaqatigillugu iniqtimmariliqpaa.

³³ Ilinniaqtiminut qiviarluni, Piitturuusi suakpaa, uqarluni, “Saataanasi tununnuarit! Isumagijait Guutimit pinngimmat, inungmilli pivuq.”

³⁴ Jiisusi inungnik ilinniaqtiminiglu qaiqujivuq uqautillugit, “Uvannik maligumajuq, imminik isumagijuksaunngilaq sanningajulingminigli iqsugluni uvannik maliktuksauvuq.

³⁵ Nalliat inuusirminik piuliksijumajuq asiujiniaqpuq; nallialli inuusirminik asiujijuq uvannik pijjutiqarluni uqausiillu tusaruminaqtut pijjutigilugit taanna inuusirminik piuliksiniaqpuq.

³⁶ Inuk sunamik pivalliutiqarajaqpaa silarjualimaamik piqaliraluaruni nangminirlu inuusirminik asiujiluni?

³⁷ Sunamik tunisijuksauvaa inuusingata utiqtitaujjutiksanganik?

³⁸ Nalliat uvannik kanngusuutiqaqpat ajuriqtuijjutigijanniglu uvani silarjuarmi Guutiqanngittuni piunngittulijunilu, Inuup Irningata kanngugijumaarivaa, tikiliruni Ataatangata niqturnarnirjuangani aingiliini ijjurnaittut piqatigilugit.”