ᒫᑯᓯᐅᑉ ᐊᒡᓚᖏᑦ 7 - Aglait Ijjurnaittut

Jiisusiup Ajuriqtuininga Inuit Sivulivininginnik

¹ Tavva Paarisit kativvigimajjuk piqujaniglu ilisaijit ilangit Jiruusalimminngaaqsimajut.

² Takugamik ilinniaqtingita ilangit niringmata aggangmingnik uasaqsimanatik.

³ Paarisit, Juutilimaallu, nirivanngimmata aggangmingnik uasalauratik kisiani uasalaurlutik sivuliviningita ajuriqtuusinginnik maliglutik;

⁴ niuvirvingniittuviniugutiglu immingnik uasalaunngillutik nirisituinnaqpanngimmata; asinginnik amisunik piusiqarivut sivulirmingnit ajuriqtuqtaujjutigisimajamingnik, uasaqsijariaqarlutik tiituutinik, niqiliurutinik, savirajangniglu puugutaujingajunik.

⁵ Taimaimmat Paarisit piqujaniglu ilisaijit apirivaat, “Sungmanukua ilinniaqtitit malinngilat sivulitta piusinginnik, aggangmingnik salummaisimanatik niringmata?”

⁶ Jiisusiup kiuvait, “Aisaiasi nalauttailluni uqausiqalauqpuq takkurmuuqtunik ilissinnik, titiraqsimangmat, ‘Ukua inuit qanirmingnut niqtuqpaanga, Uummatingitali ungasigivaanga;

⁷ Sulinatik tuksiarvigivaanga, Ajuriqtuijjutiqaramik inuit aqqiktavininginnik ukpirnirmut tunngaviuniraqtamingnik.’

⁸ “Guutiup piqujangit qimakpasi, inuit iliqqusituinnangit naalangaarlugit.”

⁹ Uqautikkanniqpait, “Silatuaqisimajumik malinngijjutiksaqaqpakpusi Guutiup piqujanginnik, nangminiq piusisi naalaktautingaarumallugit.

¹⁰ Muusisi uqalaurmat, ‘Ataatait anaanaillu upigitsiakkik, nalliallu ataataminik anaanaminiglu uqarnirluutilik taanna tuqutaujuksauvuq.’

¹¹ Ilissili uqaqpusi, ‘Inuk sunatuinnarmik ataataminut anaanaminullu ikajurutigijunnaqtaminik pitaqarluni, uqaqpat, kuuqpan’ (imaak tukiqaqtuq, unali Guutimut tunijaksaq),

¹² taanna tavva ataataminut anaanaminullu ikajurunniiqtiqattaqpasi.

¹³ Tavva taimailiurlusi piusisi malingaarlugit Guutiup uqausinginnik aturunniiqtitsivakpusi. Ammattauq asinginnik amisunik taimailiuqpakpusi.”

Inungmik Salumajunniiqtitsijut

¹⁴ Tavva Jiisusi inugiakturjuanik qaiqujikkanniqpuq, uqautillugit, “Tamassi naalaksinnga, tukisilusilu:

¹⁵ inuup silataanit pijuq inuup iluanik salumajunniiqtitsijunnanngilaq; inuulli iluanit anijut tamakkua inungmik piujunniiqtitsivut. [

¹⁶ Tusaajunik siutilik atii tusarli.]”

¹⁷ Jiisusi iglumut itirmat, inuit qimaglugit, ilinniaqtingita apiqsuqpaat ajjiujut tukinginnik tukisinaqsititsiqullugu.

¹⁸ Uqautivait, “Ilissittauq tukisijunnanngilasi? Inuup silataanit pijuq inuup iluanik piujunniiqtitsijunnanngilaq,

¹⁹ upinnarani inuup isumanganuannginnami, aqiarunganuaqpulli, anilirillutik piusirmitut.” Tamatuminga Jiisusi nalunaiqsivuq niqit nirijauttailijariaqannginninginnik.

²⁰ Uqarivuq, “Inuulli iluaninngaaqtut kisimi inungmik piujunniititsivaktutuvuq.

²¹ Inuup iluaninngaaqtut, inuup uummatinganit, piunngittut anivakput, nuliarumanit, tigligumanit, tuqutsijumanit, asinniarnit,

²² pijumavigjuarnit, piunngittulinit, sagluqitsijumanit, kanngunaqtuliqatiqarnit, mingnigujjinit, Guutimik mitautiqarnit, piujurinit, silaittuunit,

²³ tamakkua tamajja tamarmik piunngittut inuup iluanit anijut inungmik piujunniiqtitsivaktutuuvut.”

Arnaup Sairupinisiamiutaup Ukpirninga

²⁴ Tavvanngat aullarami iglugasait Tairiup Saituniullu qanigijaanuaqpuq. Iglumut itirami, qaujimajaujumanngilaq tavvaniinnirminik; kisianili ijiqsimajunnalaunngilaq.

²⁵ Arnaq paniqaqtuq anirnirlungmik ilummiqtausimajumik, tusarami, itiqpuq itiganginnut paammagluni.

²⁶ Arnaq Guriikiuvuq, Sairupiniisiamit pisimajuq Siriamiittumi. Arnaq qinuliqpuq anirnirluk paningminit anititauqullugu.

²⁷ Jiisusiup uqautivaa, “Sivullirmik qiturngait nirititauqqaariaqaqput, naammanngimmat qiturngait niriniaqtanginnik aqsaarlugit qimminullu igillugit.”

²⁸ Arnaup kiuvaa, “Ataniq sulivutit; kisianili qimmit saap ataanit katagarnikunik nirivakput, qiturngait katagaqtanginnik.”

²⁹ Arnaq uqautivaa, “Tamanna kiggusirijait pillugu iglungnut angirralirit; anirnirluk paningnit anisimalirmat.”

³⁰ Arnaq angirraqpuq, panini takuvaa iglirmi nalajuq, anirnirluk taassumangat anisimaliqtuq.

Jiisusiup Tusaanngittumik Tusaaliqtitsininga

³¹ Tavva nunaup Tairiup qanigijanganit aullaqpuq, Saituni aqqusaarlugu tasirjuamuaqput Galiliap miksaaniittumut, nunalit Tikapuliisit qulinik iglugasagjualingnik taijaujut nunanganut.

³² Aatsiviuvuq tusaanani uqarunnanngittumik; Jiisusi qinuvigivaat patimmisiqullugu taassuminga.

³³ Inugasagjuanit qimaruutitillugu inutuuqatigiliqpaa, aggani siutinganuaqpait, aggangminut tivualaurluni, uqanga aktuqpaa;

³⁴ qilangmut aarluqpuq, aniqsaumilluni, angummut uqaqpuq, “Ipapata,” imaak tukilik, “Angmarit.”

³⁵ Siutingik tavvainnaq tusaajunnaliqpuuk, uqangata uqarunnanngijjutinga piiqpuq, uqarunnasialirluni.

³⁶ Jiisusiup inuit iniqtiqpait kinatuinnamut uqausiqaqunagit; iniqtiraluarmagit katsungaillutik uqausiqalikkannituinnaqput.

³⁷ Tamatuminga tusaqtut kamammarikput uqarunnaqtangita ungataanut, uqarlutik, “Qanualunginna sunatuinnarnik ajunngilaq; aglaat tusaanngittut tusaliqtippait uqarunnanngittullu uqarunnaqsitittlugit.”