ᒫᑯᓯᐅᑉ ᐊᒡᓚᖏᑦ 6 - Aglait Ijjurnaittut

Jiisusiup Narrugijauninga Naasariitimi

¹ Jiisusi tavvanngat aullarami nunatuqaminuaqpuq; ilinniaqtingita malikpaat.

² Sapatimik ajuriqtuiliqpuq Juutit ukpirnirmut katimavinganni; inuit amisut uqallaktillugu tusaajut tamarmik kamaniaqput, uqarlutik, “Nakimmakua ilitavinialungit qanurnguna silattuqtuviniq? Qanurlu kamanaqtualungnik pinasuaqattaqpa?

³ Qijulirijiunngilaaq Miariup irninga qatanngutingillu Jaimisi, Juusilu, Juutasilu, Saimuunilu najangillu najuqtiginngilavut?” Taimaimmat kamagijumajunniiqpaat.

⁴ Jiisusiup uqautivait, “Nalauttaijuq upigijaunikittuuvuq, nunatuqarmini, ilamini, angirraminilu.”

⁵ Tavvani kamanaqtulijunnanngilaq qanutuinnaq, qanimajulli ilainnangit patimmivait aaqqiktaullutiglu.

⁶ Jiisusi kamaniaqpuq, inuit ukpirusunnginninginnik. Kinguningagut nunalingnuaqpuq tamaani qanigijaaniittunut ajuriqtuilluni.

Jiisusiup Ilinniaqtiminik 12-nik Tilisininga

⁷ Ilinniaqtini 12 qaiquvait, tilillugit marruunaaqtillugit, pijunnarniqtaaqtillugillu anirnirlungnik anititsijunnarnirmik,

⁸ imaak uqautivait, “Sunatuinnarmik naksaqtailigissi ingirratillusi, ajauppialijatuinnarissi; niaquujaginngillusi, ikpiarjulijanngillusi, kiinaujagginngillusilu.

⁹ Itigagusiqsimalusi, annuraamiglu atijaksaggikkanninngillusi.”

¹⁰ Imaak uqautigivait, “Nalliannutuinnaq tunngasuktitaugussi tavvaniigissi iglumi, tavvanngat nunamit aullalaunginnissinnit.

¹¹ Nunalingnut tikigussi inunginnit tunngasuktitaunngikkussi, ilissinniglu naalagumanngippata, qimalirussigik itigasi saniijaqtaksarivasi tamanna nalunaikkutauniarmat naammagijaunnginninginnik.”

¹² Tavva ilinniaqtingit aullaqput ajuriqtuillutik inuit ajurnirmingnit qaqialiqullugit.

¹³ Anirnirlungnik amisunik anititsivut, napaaqtuup paurngangita uqsunginnut qanimajut amisut uqsuqtiqpaglugit aaqqikpait.

Juanasi Paaptitsirijiup Tuqutauninga

¹⁴ Angajuqqaarjualli Iruutasiup tamanna tusaumaliqpaa; Jiisusiup pinasuarninga nanituinnaq tusaumajaulirmat. Ilangit uqaqattarmata, “Juanasi Paaptitsiriji tuqungajunit makisimavuq; taimaimmat pijunnarniqaqpuq kamanaqtunik pinasuarunnarnirmik.”

¹⁵ Ilangilli uqaqput, “Taanna Ilaijjauvuq.” Ilangilli uqarivut, “Nalauttaijuuvuq, taissumanialuk nalauttaijuuvalauqtutitut.”

¹⁶ Tamanna Iruutasiup tusaramiuk uqaqpuq, “Juanasiuvuq Paaptitsiriji, niaquiqtautilauqtara, tuqungajunit makisimaliqpuq.”

¹⁷ Iruutasiup Juanasi tigujauqulauramiuk, qilaksuqtautillugulu tigujausimavingmuaqtautilauqpaa Iruutiasimik pijjutiqarluni, nukangata Pilippuusiup nuliarigaluaqtilluniuk; nuliaqtaarilauramiuk.

¹⁸ Juanasi Paaptitsirijiup Iruutasi uqautiqattalaurmagu, “Ilingnut naammanngilaq nuliaqtaaruvit nukaqpit nulianganik.”

¹⁹ Iruutiasiup Juanasi tuqutaujjutiksaqsiuqattalauqpaa. Kisiani tuqutautittunnalaunngilaa.

²⁰ Iruutasiup Juanasi iliragilaurmagu, qaujimagamiuk nalaaguurmat ijjurnaituulluni, taimaimmat saputisimalauqpaa. Tusaaliraangamiuk quaqsaaqtitaummarikpakkaluarluni uqallaliraangat; naalagianga quviagilluniuk.

²¹ Iruutiasi piviksaqatsialitainnalauqpuq Iruutasiup inuulirviksiurvingani angajuqqaaqutiminik nirititsilirmat gavamaqutingita quvvasingniqpaaqutinginnik, unataqtuksaqutingitalu angajuqqaammaringinnik, Galiliamiunullu aulatsijiujunik.

²² Iruutiasiup paninga tavvunngalaurmat taanisirlunilu saanginni, tamanna Iruutasiup quviagivaa nirijaqtuqtisimajangitalu quviagigivaat; angajuqqaarjuaq niviaqsiamut uqaqpuq, “Sunamik pititaujumaguvit pijumavvigilaunnga sunatuinnatsiamik pijumajarnik tunisiviginiaqpagit.”

²³ Iruutasiup uqautivaa, “Sulitsiaqpunga sunatuinnatsiamik pijumajarnik tunisiviginiaqpagit, angajuqqauvinniittulimaat aviglugik pijumagajaruvigit pitittunnaqpagit.”

²⁴ Niviaqsiaq tavvanngat anivuq, anaanaminut uqariaqturluni, “Sunamigli pijumanialiqtunga?” anaanangata kiuvaa, “Juanasi Paaptitsirijiup niaqunganik.”

²⁵ Niviaqsiaq tuavirluni utiqpuq angajuqqaarjuarmut, pijumajaminik uqaqpuq, “Ilingnut tunisiviujumavunga maanna Juanasi Paaptitsirijiup niaqunganik allirarmiitillugu.”

²⁶ Tamanna angajuqqaarjuap quviasutiginngikkaluarlugu; niviaqsiap pijumajanganik qipilugunnanngilaq uqavigijariiqqaugamiuk nirijaqtuqtisimajangita saanginni.

²⁷ Taimaimmat unataqtuksamik tavvainnaq tilisivuq Juanasiup niaqunganik aigliqullugut. Unataqtuksaq anivuq tigujausimavingmut upagluniuk, Juanasi niaquiqpaa;

²⁸ niaqunga naksaqpaa allirarmi ilisimatillugu, tunillugu niviaqsiarmut; niviaqsiap anaanaminut tunivaa.

²⁹ Juanasiulli ilinniaqtingita tamanna tusaramijjuk, tavvunngaqput timinga aillugu, iluvirriaqturlugu.

Jiisusiup Nirititsininga 5,000-nik

³⁰ Aapuusitalit utiramik Jiisusi kativaat, unikkaarvigillugu pinasuarnirilauqtamingnik tamainnik ajuriqtuinirilauqtamingniglu.

³¹ Jiisusiup uqautivait, “Uvagutuuluta aullalauqta inutuuvigijunnaqtattinnut, taqaiqsikainnarunnarniarassi.” Tavvani inuit amisut qaikataluarninginnut, nirijunnaqsititaulaurunniirmata.

³² Taimaimmat umiakkut aullaliqput taakkutuujumallutik inuqanngittumi.

³³ Inuit amisut takugamik aullaliqtunik kinakkuuninginniglu aullasijut qaujituaramik, nakituinnaq nunalingnit pisusivut nunakkut, tuavirlutik sivuningannilu upagasuaqtanganuaqput.

³⁴ Jiisusili umiamit niugami inungnik unuqtummaringnik takugami, nagligusummariliqpuq taakkuninga, siipititut taimaimmata paiqsijiqanngittutitut. Taimaimmat ajuriqtuliqpait amisunik ajjigiinngittunik.

³⁵ Unnulirmat, ilinniaqtingita upakpaa uqautillugu, “Maanna unnulualirmat, tamaani inuqanngittumiikatta;

³⁶ inuit aullaqtilaukkit, tamaunga qanigijamingnut nunalingnut piruqsiivilingnut nunalingnullu ainiarmata, nangminiq niqiksamingnik niuvirasuarniarmata.”

³⁷ Jiisusiulli kiuvait, “Ilissi nirijaksaqtaatiliqsiuk.” Ilinniaqtingit uqaqput, “Niaquujaqtaariaqtuquvitigut kiinaujanik 200-nik siulvirinik aturluta, nirititsijjutiginiaqtattinnik?”

³⁸ Uqautivait, “Qatsinik niaquujaqaqpisi? Atii takujaqtulaurissi,” takujaqturamik uqautivaat, “Niaquujaqtaqaqpuq tallimanik iqaluktaqarlunilu marruungnik.”

³⁹ Tavva Jiisusiup ilinniaqtini tilivait, inuit immigut katinngaurlutik iqsivaqatigiiqullugit nunami iviksugalingmi.

⁴⁰ Tavva iksivaaliqput katinngaurlutik, ilangit 100-ullutik, ilangillu 50-ullutik.

⁴¹ Niaquujait tallimat tiguvait iqaluuglu marruuk, qilangmut aarlurluni, Guuti qujagivaa, niaquujait agguqpait, ilinniaqtiminut tunillugit inungnut tuniuqqautigijauqullugit; iqaluuglu marruuk agguqpaak tamainnut.

⁴² Tamarmik nirivut kaagunniirlutik.

⁴³ Ilinniaqtingit 12-nik iviujarnik tataivut, agguqsimajunik amiakkugijaujunik niaquujanik iqalungniglu.

⁴⁴ Angutit nirilauqtut unurniqalauqput 5,000-nik.

Jiisusiup Pisungninga Imaup Qaangagut

⁴⁵ Pijariituaramik Jiisusiup ilinniaqtini umiamut ikiquliqpait, aullaqullugit sivulliulutik Pitsaitamuaqullugit, tasiup akianiittumut; Jiisusili nangminiq inugasagjuanik angirraqujiliqpuq.

⁴⁶ Inuit aullaqtittariiramigit, qaqqamut majuaqpuq tuksiariaqturluni.

⁴⁷ Unnuktillugu, umiaq tasiup qitinganiiliqpuq, Jiisusili inutuuvuq nunami.

⁴⁸ Takullunilu ilinniaqtiminik aksururlutik aggumut ipunnasuaqtunik, anurimut agguraramik; ullaannguliqtillugu siqinngujaq sitamannguqtillugu upaliqpait, imaup qaangagut pisugluni. Umiat saniqqunniaqtuujaliqtlugit.

⁴⁹ Ilinniaqtingit takugami imaup qaangagut pisuktumik inuunngittualumik takunasugillutik, qaigalaaliqput;

⁵⁰ takugamijjuk, angijumik quaqsaangaliqput. Tavvainnaq uqautivait, “Quaqsaanganasi, uvangauvunga; iqsinasi.”

⁵¹ Umiamut ikingmat ikimaqatigilirlugit anuri ikullaqpuq. Ilinniaqtingit kamavigjualiqput,

⁵² nirititsilaurninganik tukisivaallirutiqalaurninginnamik, uummatingit sitilualaurmata.

Jiisusiup Qanimajunik Aaqqiksininga Ginisariitimi Nunami

⁵³ Tasiq ikaaramijjuk, nunalingnut tikipput Ginisaritimut, umiatik pitukpaat.

⁵⁴ Umiamit niungmata, Jiisusi tavvainnaq ilitarijauvuq.

⁵⁵ Tuavirlutik tusaqtitsijaqtutput nunalingnik qanigijamingniittunik, inuit tusatuaramik Jiisusiup naniinninganik qanimajuqutimingnik taassumunngaujjivut nalavinginniitillugit.

⁵⁶ Namutuinnaq tikittaraangat; nunalingnut, iglugasangnullu, piruqsiiviqaqtunullu, inuit qanimajuqutimingnik aqqutit aqqusaagallariuninginnut aititsiqattaqput, qanimajuqutingit Jiisusiup annuraangita sininganigluunniit aktuqsijunnaqullugit; aktuqsijulimaat Jiisusiup annuraanganik aaqqiktauvut.