ᒫᑯᓯᐅᑉ ᐊᒡᓚᖏᑦ 5 - Aglait Ijjurnaittut

Jiisusiup Anirnirluktausimajumik Aaqqiksininga

¹ Tavva Jiisusi ilinniaqtingillu tasirjuap Galiliap akianut tikipput, Giraasamiut nunanganut.

² Umiamit niungmat, angummut upaktauvuq iluviqarvingninngaaqtumit taanna anirnirluktausimavuq.

³ Iluvirni iniqaqtuq; kinamulluunniit attungiqtaujunnarunniiqtuq, aqsaaqtuujanulluunniit;

⁴ itigangit aggangillu attungiqtauqattaqsimagaluaqput attungiutinut savirajangnut, aqsaqtujanullu, taakkuali qikturaaqattaqpait, savirajaillu itigangita attungiutingit suraktiqpaglunigit; sanngiluarninganut kinamulluunniit pisimajaujunnarunniiqtuq.

⁵ Ullukkut unnuakullu iluviqtigut pisukatainnaqattaqtuq qaqqani nilliaqattaqpuq, imminik killiaqattarluni ujaqqanut.

⁶ Ungasiktumiilluni Jiisusi takugamiuk; tassumunga ullaksivuq saanganuarami siiqqurluni tuksiarvigivaa;

⁷ qaigalaarluni nipiquqtulluni uqaqpuq, “Uvannut qanuiliuriaqtuqpit Jiisusi, Guutiup Quttingniqpaap Irninga? Guutiup saangani qinuvigivagit, aanniqsiqtailinnga.”

⁸ Taanna taimaak uqaqpuq, Jiisusi uqarmat “Anirnirluk tavvanngat inungmit anigit!”

⁹ Jiisusiup apirivaa, “Kinauvit?” Kiuvuq, “Ligiunimik atiqaqpunga; tavvani amisualuugatta!”

¹⁰ Taassuma ajuinnarluni qinuvigiiliqpaa anirnirluit tamaanngat nunamit aullaqtitauqunagit.

¹¹ Tamaanili nunami qanigijaani kuukkuusitaqaqpuq amisunik, qaqqaup sivinganingani nirinasuktunik;

¹² anirnirluit Jiisusi qinuvigivaat, “Kuukkuusinuaqulauqtigut.”

¹³ Tavva Jiisusiup taimaak piquvait. Anirnirluit inungmit anigamik kuukkuusinut itiqput; kuukkuusit taakkua unuqtualuuvut katillugit 2,000 qanigijaaniipput, pangaliksigamik innaarukkut ijukkaqput tasirmut, imaani ipillutik.

¹⁴ Angutit kuukkuusinik kamajit qimaksivut, uqariaqturlutik inungnut nunalingniittunut piruqsiivingniittunullu. Inuillu qaivut takujaqturlutik qanuiliuqtuqarnirmangaat.

¹⁵ Jiisusimuaramik, angut takuvaat anirnirluktausimalauqtuq, iksivaaliqtuq, annuraaqsimallunilu isumaqatsialiqtuq, inuit kappiasuliqput.

¹⁶ Qaujilauqtut tamatuminga unikkaaqput angut anirnirlungnut ilummiqtausimalauqtumik, kuukkuusiillu qanuililaurmangaata.

¹⁷ Inuit Jiisusimik tavvanngat nunamingnit aullaqujiliqput.

¹⁸ Umiamut ikiliqtillugu, angutiup anirnirluktausimalauqtuup qinuvigivaa, maligumalluni.

¹⁹ Jiisusiulli maliqunngilaa, imaak uqautillugu, “Angirralirit ilannarijarnut, uqautilugit qanutigi Atanirmut piniarviusimanirijarnik, qanutigilu pittiarviunirisimajarnik taassumunga.”

²⁰ Angut qimaruutigami Tikapuliisimut nunamut qulinik iglugasagjualingnik taijaujumut aivuq, unikkaarvigilugit qanuq Jiisusimut piniarviulaurnirminik; tamarmik tusaqtut kamaniammarikput.

Jairuusiup Paninga Arnaullu Jiisusiup Annuraanginnik Aktuqsininga

²¹ Jiisusi umiakkut tasiup akianut utirmingmat, inugasagjuanit avalujauvuq; tasiup sinaaniitillugu suli tikivvigijangani.

²² Jairuusi, Juutit ukpirnirmut katimavingita angajuqqaangitta ilangat, tikippuq; Jiisusi takugamiuk, itiganginnut siiqqurluni ukuvuq.

²³ Qinuvigivaa, uqarluni, “Panikuluga aksualuk qanimalluni tuqutuinnariaqalirmat. Qailutit patimmijaqtulauruk, aaqqikkuni inuuniarmat.”

²⁴ Jiisusiup maliliqpaa. Inugiakturjuallu malikput aglaat ninniuqtilirlugu avatilimaanganit.

²⁵ Tavvani arnaqtaqaqpuq akunialuk aunaanginnaqtumik arraagunik 12-nik.

²⁶ Akuni aksururutigisimavaa aaqqiktaunasuaraluarluni aanniasiuqtimmaringnut, arnaup piqutilimaani nungulauqpait, aaqqiktauvalliananili piujunniiqpalliatuinnaqpuq.

²⁷ Jiisusi unikkausiutillugu tusaqsimaliramiuk, inugasagjuatigut kinguninganit maliglugu annuraanga aktuqpaa.

²⁸ Isumalirami, “Annuraangilluunniit akturunnarukkit, aaqqiktauniaqpunga.”

²⁹ Tavvainnaq aunaarninga nuqqaqpuq; imminik ilumigut ikpingniqpuq aaqqiktaunirminik qanuijjutiminik.

³⁰ Jiisusi qaujivuq pijunnarniq imminit aningmat, tavvainnaq utimut qiviaqpuq inugasagjuanut, uqarluni, “Kia annuraakka akturmagit?”

³¹ Ilinniaqtingita uqautivaat, “Takuvutit inugasagjuat ninniuqtimmatit avatilimaarnit, sungma uqaqpit, kia aktuqpaanga?”

³² Suqusiranili qiniqpuq kinamut aktuqtaungmangaarmi.

³³ Arnaq qaujigami aaqqiktaunirminik upagutisivuq, sajugluni ilirasungnirmut saanganut ukulluni, uqautivaa qanuinnilimaaminik.

³⁴ Jiisusiup uqautivaa, “Panik ukpirnivit aaqqikpaatit; isumajaanngillutit qimaruutilirit, aaqqiktaugavit qanuijjutigijarnit.”

³⁵ Suli uqallaktillugu, uqariaqtuqtumik qaijuqaqpuq Jairuusiup iglunganinngaaqtumik uqarluni, “Paniit tuquvuq. Sungmat suli ajuriqtuiji qaitinnasuaqpiuk?”

³⁶ Jiisusi uqausirijanginnik kamanani, Jairuusi uqautivaa, “Isumaalunngillutit, ukpituinnarit.”

³⁷ Tavva kinakkutuinnarnik maliqujijunniiqpuq Piitturuusi Jaimisikkuglu Juanasikkuk nukariik maliqujatuarivait.

³⁸ Jairuusiup iglunganut tikinnamik, tavvani takuvuq uimajaaqtunik, tusaallunilu nipiqqutullutik qiajunik.

³⁹ Jiisusi tavvunga itirami, uqautivait, “Sungmat uimajaaqpisi qiallusilu? Una niviaqsiaq tuqunganngilaq sinituinnaqpuq.”

⁴⁰ Taakkua Jiisusimik sulijuqsanginirmut mitautiqaliqput. Iluunnalimaatik anitippait, niviaqsiap ataatanga anaanangalu ilinniaqtinilu pingasut itirunnaqtitatuarivait, tavvunga niviaqsiap najuqtanganut itiqput.

⁴¹ Niviaqsiaq aggangitigut tigullugu uqautivaa, “Talita kuumai” imaak tukilik, “Niviaqsiakuluk, uqauppagit makittit.”

⁴² Tavvainnaq niviaqsiaq makippuq pisukatalirluni; taanna arraaguqaqpuq 12-nik, taakkua tavvainnaq kamaniarnirmut tikitauliqput.

⁴³ Iniqtimmarikpait tamatuminga inuit qaujititauqunagit, uqautillugillu niviaqsiaq nirititauqullugu.