ᒫᑯᓯᐅᑉ ᐊᒡᓚᖏᑦ 4 - Aglait Ijjurnaittut

Ajjiujuq Kanngaqsuijuq

¹ Kinguningagut Galiliap tasirjuangata saniani ajuriqtuilirivuq. Inugiakturjuat avataani unuluarninginnut umiamuaqpuq, tavvani iksivaliqpuq umiami imaaniittumi, inugiakturjuallu tasiup sinaaniipput.

² Ajjiujuni aturluni amisunik ajuriqtuqpait; imaak uqarvigillugit:

³ “Naalagissi! Angutitaqalauqpuq kanngaqsuijaqtuqtumik piruqsiaksanik.

⁴ Kanngaqsuitillugu, ilangit piruqsiaksait aqqummut katakput, tingmiat tamaunngaramik pukuliqpait.

⁵ Ilangilli katakput ujaralaanut ijjukittumut, ijjukittumiinamik piruqsiaksait pirukauqtuqput.

⁶ Siqiniq nuingmat pirulisaaqtut uutauvut siqinirmut; piruqtut amaakiluaramik akuniunngittuq paniqput.

⁷ Ilangilli piruqsiaksait katakput uqpiit kakillarnaqtulit akurngannut, kakillarnaqtut piruramik piruqtut ipitippait, pirurviujunniiqtlutik.

⁸ Ilangit piruqsiaksait katakput ijjuqatsiaqtumut, taakkua pirupalialiramik, ilangit pirurviullutik 30-nik, ilangillu 60-nik, ilangillu 100-nik.”

⁹ Uqarivuq, “Tusaajunik siutilit tusarlit.”

Ajjiujut Taakkua Uqausirijaujjutingit

¹⁰ Inutuulirmat, ilangit uqallaktillugu tusaaqqaujut Jiisusimuaqput ilinniaqtingit 12 ilagillugit, apirillutik ajjiujumik taassuminga tukisinaqsititsiqullugu.

¹¹ Kiuvait, “Ilissi nalunaqtumik qaujititauvusi Guutiup Ataniuvinganik, asisili Guutiup Ataniuvingata silataaniittut tusaqtitauvut ajjiujutigut;

¹² taima, ‘Ijimingnut takugaluarlutik, ilitaqsiqunagit, Siutimingnullu tusaagaluarlutik, tukisiqunagit; Taimainngikkutik Guutimut saagiarajarmata, Taassuma isumagijunnairvigigajarmagit ajurninginnit.’”

Jiisusiup Tukisinaqsititsininga Kanngaqsuijuup Ajjiutitauninganik

¹³ Jiisusiup uqautivait, “Tamatuminga ajjiujumik tukisinngilasi? Qanurli tavva ajjiujunik naliannituinnaq tukisijunnarniaqpisi?

¹⁴ Kanngaqsuiji kanngaqsuivuq Guutiup uqausinginnik.

¹⁵ Inuit ilangit piruqsiaksatitut aqqutimut kanngaqsuutigijaujutitut taimaipput, uqausirnik tusarmata, Saataanasiup tavva upattautigivait uqausit taakkununga kanngaqsuutigijaujut piijaqpait.

¹⁶ Ilangit inuit piruqsiaksatitut ujaralaanut nunakittumut kanngaqsuutigijaujutitut taimaipput, uqausirnik tusaramik, tavvainnaq ilaliurivut quviasuglutik;

¹⁷ uqausit amaaqtaannginnamik, kajusiniqaqput sivikittumik; uqumaittut akiraqtuqtauniillu pigialirmata uqausit pijjutigillugit, tavvainnaq sapilikautigivut.

¹⁸ Ilangit inuit piruqsiaksatitut uqpingnut kakillarnaqtulingnut kanngaqsuutigijaujutitut taimaipput; taakkuanguvut uqausirnik tusaqtut,

¹⁹ Inuusiup tamatuma isumajaarnarninganut, ajuqsanngittumanirmullu, asinginnullu pijumavigjuarnirnut tikivviuliramik uqausit ipititauvut tamakkununga, pirurviujunnaqsinatik.

²⁰ Ilangilli inuit piruqsiaksatitut ijjuqatsiaqtumut kanngaqsuutigijaujutitut taimaipput; taakkuanguvut uqausirnik tusaramik ilaliurijut pirurviulirlutik, ilangit 30-nik, ilangillu 60-nik, ilangillu 100-nik.”

Naniruaq Qattaujaup Ataaniittuq

²¹ Jiisusiup uqautivait, “Naniruarmik itiqsijuqasuunguvaa ilillugu qattaujaup ataanut, uvvalu sinigviup ataanut naniruap ininganuaqtaugajanngilaq?

²² Ijiqtausimajuq saqqititaujumaaqpuq ijirviqanngittumut; anngiarijaujuq saqqititaujumaaqpuq qaumajumut.

²³ Tusaajunik siutilik, tusarli.”

²⁴ Uqautivait, “Tusaqtassinnik ikpigusutsiarissi; asissinnut iqqaqtuinisi maliglugu Guutimut iqqaqtuqtaujumaarivusi, aglaat qaujisaqtaummaringniqsaulusi.

²⁵ Piqaqtuq tunisiviukkannirniaqpuq; piqanngitturli aqsaaqtauniaqpuq mikijumigluunniit piqaraluaqpat.”

Ajjiujuq Piruqsiaksaup Piruqpallianinga

²⁶ Uqarivuq, “Guutiup Ataniuvinga imaittuujaaqpuq angut piruqsiaksait kanngaqsuutiksanganik kanngaqsuijuq piruqsiiviqutimini.

²⁷ Unnuangulirmat siniliqpuq makillunilu ullaakkut, piruqsiaksait kanngaqsuutigisimajangit nuiliqput pirulirlutik, taanna qaujimanngilaq qanuq pingmangaata.

²⁸ Nunarjuap tamatuma nangminiq niritimmagit piruqtillunigillu, piruqtut pirurviuliqput, sivullirmik pirusigamik nuiliqput, kinguningagut niaquqtaasivut, kingulliqpaamik niaqungit piruqsiaksaqaliqput.

²⁹ Piruqtut piruriitsiarmata, angutiup nakatiliqpait nakatirijjutiminut, piruqtunik katiqsuivik nalliutingmat.”

Ajjiujuq Piruqsiap Kanngaqsuutiksaqtanga

³⁰ Uqarivuq, “Qanurli Guutiup Ataniuvinga ajjiqarnirarunnaqpavut sunamiglu ajjiujumik aturunnaqpita?

³¹ Imaittuujaqpuq; angut piruqsiaksaup kanngaqsuutiksaqtanganik masitartimik tigusigami nunamut kanngaqsuutigivaa, taanna nunarjuarmi piruqsiaksanit mikinniqpauvuq;

³² kinguningagut taanna kanngaqsuutaugami piruqpalliasivuq piruqtulimaanit anginiqpaulirluni, avalangajungit angiglirmata, tingmiat tavvani ulluqarunnaliqput tarraliningani.”

³³ Inungnik ajuriqtuivuq ajjiujunik aturluni, ajjiujut taakkua asinginnik amisunik ajuriqtuijjutiqarivuq, uqallagvigivait tukisijunnaqtanngitigut.

³⁴ Ajjiujut asiagut uqallagviginngilait, ilinniaqtini ilatuariliraangamigit, uqausiriqqaujaminik ajjiujunik tamainnik nalunaiqsivigiqattaqpait.

Jiisusiup Ikullaqtitsininga Anurimik

³⁵ Ullumi tavvani unnungmat, ilinniaqtini uqautivait, “Tasiup akianualauqta.”

³⁶ Inugiakturjuat qimaglugit, ilinniaqtingit umiamuaqput Jiisusiup iksivavigijanganut. Umianguqatingittauq malikkivut.

³⁷ Anurirjuarmut tikitauvut, malliliqtualuungmat umiaq qalliraqtaqtaulirmat, immakpallialirluni.

³⁸ Jiisusi umiap aquani sinikpuq, akisiqsimalluni; ilinniaqtingita tupaarlugu uqautivaat, “Ajuriqtuiji qanuiksanngilatit tuqutuinnaraluarutta?”

³⁹ Tupagami anuri iniqtiqpaa, imarmut uqaqpuq, “Ikullarlutit nuqqarit!” Anuri ikullaqpuq, imaq ikulliammarilirluni.

⁴⁰ Ilinniaqtini uqautivait, “Sungmat kappiasukpisi? Suli ukpirniqanngilasi?”

⁴¹ Taakkua kamavut angijumik, immingnut uqaqattautillutik, “Qanuittuugamiuna, anuriup imaullu naalagunnaqtanga!”