ᒫᑯᓯᐅᑉ ᐊᒡᓚᖏᑦ 2 - Aglait Ijjurnaittut

Jiisusiup Angummik Nukiqanngittumik Aaqqiksininga

¹ Ulluit tamakkua kingurngagut Jiisusi utiqpuq Kapiirniamut, uqausiukatalirivuq angirrarninganik.

² Inuit amisut tavvunngaqput iniksairujjillutik, ukkuangataluunniit silataa iniksaqarunniiqpuq; Jiisusi ajuriqtuiliqpuq taakkununga.

³ Angutit sitamat tavvunngaqput, agjaqsillutik angummik nukiqanngittumik Jiisusimuaqullugu.

⁴ Inuqaluarninganut Jiisusimuaqtittunnanginnamijjuk, igluup qaangagut angmaqpaat, Jiisusiup najuqtangata qulaagut; igluup qulanga angmariiramijjuk, angut nuqiqanngittuq ningitippaat nalavingminiitillugu.

⁵ Jiisusiup angutit takugamigit ukpirniqallariktut, angut nukiqanngittuq uqautivaa, “Irniik ajurnitit isumagijaujunniiqput.”

⁶ Piqujanik ilisaijit ilangit tavvani iksivaqataujut, ilumigut isumaliqput,

⁷ “Sungmanuna taimaak uqaliriva? Tamanna Guutimik uqarnirluutiqarniuvuq! Guuti taannatuatsiaq ajurnirnik isumagijunnaiqsijunnaqpuq.”

⁸ Tavvainnaq Jiisusiup, anirnirmigut qaujigamigik sunamik isumangmangaata, uqautivait, “Sungmat tamatuminga apiqsuutiqaqpisi?

⁹ Nalliannik uqarluni ajurnanginniqsauvaa uumunga nukiqanngittumut, ‘Ajurnitit isumagijunnaiqtauvut,’ uvvalu uqarluni, ‘Makillutit, nallangavit tigullugu, pisulirit?’

¹⁰ Qaujiniarassi Inuup Irninga pijunnarniqarmat tamaani nunami ajurnirnik isumagijunnaiqsijunnarmat,” taassumunga nukiqanngittumut uqaqpuq,

¹¹ “Uqautivagit, makittit, nallangavit tigulugu angirralirit.”

¹² Taanna makippuq, tavvainnaq nallangavini tigulluniuk tavvanngat anivuq takunnaqtillugit; taakkua tamarmik kamaniammarikput Guuti niqturlugu, uqaqput, “Taimaittumik takulauqsimanngimmarikpugut!”

Jiisusiup Qaiqujininga Livaimik

¹³ Jiisusi amma anigivuq Galiliap tasingata sinaanut; inugiakturjuat avataaniliqput, ajuriqtuliqpait.

¹⁴ Pisugluni, takulirivuq Livaimik Aulpiasiup irninganik taaksiijaivingmi pinasuarvingmini iksivajumik, Jiisusiup uqautivaa, “Malinnga.” Taanna makinnami Jiisusi maliliqpaa.

¹⁵ Kinguningagut Jiisusi niriqatauliqpuq taassuma Livaip iglungani, Ruumamiut kiinaujaiqtitsijiqutingit amisut ajuqtulijullu iksivaqataugivut Jiisusimut ilinniaqtinginnullu; amisut malilaurmata.

¹⁶ Piqujanik ilisaijit Paarisiujut, takugamik niriqatiqarninganik ajuqtulijunik Ruumamiullu kiinaujaiqtitsijinginnik, ilinniaqtinginnut uqaqput, “Sungmanuna niriqatiqaqpa Ruumamiut kiinaujaiqtitsijinginnik ajuqtulijuniglu?”

¹⁷ Jiisusiup tusaramigit, uqautivait, “Qanuinngittut aanniasiuqtiqariaqanngilat, qanimajulli kisimi; iluaqtunik qaiqujijaqtuqsimanngilanga, ajuqtulijunigli.”

Nirittailinirmik Jiisusiup Apirijauninga

¹⁸ Taissumani Juanasi Paaptitirijiup maliktingit Paarisillu nirittaililauqput; inuit Jiisusimuarlutik apirivaat, “Sungmanikkua Juanasi Paaptitirijiup ilinniaqtingit Paarisillu ilinniaqtingit nirittailivakpaat? Ilinniaqtitit nirittaililauqsimatinnagit?”

¹⁹ Jiisusiup uqautivait, “Katititaujuqaqtillugu nirijaqtuqujausimajut nirittailisuunguvaat uiksaq tavvaniitillugu? Qaujimavusi uiksaq tavvaniitillugu, nirittailijunnanngittut.

²⁰ Ulluit nalliutijumaaqput, uiksamik aqsaaqtauvingat, tavva nirittaililirumaaqput.

²¹ “Annuraatuqarmik ilasijuqaqpanngilaq nutaamik iqijattumik; annuraatuqaq iqijattumik ilajauguni, nutaunngittuq alikturajarmagu, annuraatuqarlu anginiqsamik angmajuqalirajaqpuq.

²² Uainimik nutaamik uainiqautituqarmut amirmut kuvisijuqaqpanngilaq; nutaap uainiqautituqaq amiq qaaqtituinnarniarmagu, uainilu tamaungatuinnaq kuvigajaqpuq, uainiqautituqarlu; taimaimmat uaini nutaaq kuvijaujariaqaqpuq uainiqautimut nutaamut.”

Saapatimik Apiqqusiqarniq

²³ Taissumani Jiisusi Sapatiutillugu pisulauqpuq niaquujaksaqtalikkut; ilinniaqtingit pisuglutik niaquujaksait nuvunginnik tigusiqattaqput.

²⁴ Paarisit Jiisusimut uqaqput, “Takugit, ilinniaqtitit piqujattinnik maligunniiqput Sapatimi taimailiuqtillugit!”

²⁵ Jiisusiup uqautivait, “Atuaqsilauqsimanngilasi Taivitiup piniarnirilauqsimajanganik, niqiksaqarunniiramik kaalirlutik, nangminiq ilagijangillu?

²⁶ Taiviti Guutiup iglunganualauqpuq, nirilluni niaquujanik Guutimut tunirrutigijausimajunik, Apaiata tunirrusiqtitsijinut angajuqqaangutillugu, piqujait maliglugit niaquujait tunirrusiqtitsijinut kisiani nirijaujariaqaqtillugit, Taivitili nirilauqpuq ilaminut aglaat tunisilluni.”

²⁷ Jiisusi uqaqpuq, “Sapati aaqqiktausimavuq inuk pijjutigillugu; inugli aaqqiktausimanngilaq Sapati pillugu;

²⁸ Inuup Irninga Ataniungmat aglaat Sapatimut.”