ᒫᑯᓯᐅᑉ ᐊᒡᓚᖏᑦ 16 - Aglait Ijjurnaittut

Jiisusiup Tuqungajunit Makinninga

¹ Sapati anigurmat, Miari Maaktaliini, Miarilu Jaimisiup anaananga, Salumilu niuviqput tipitsiariksautinik, Jiisusiup timinganut minguarutigijumajamingnik.

² Ullaammarikkut pinasuarusiup ullungita sivulliqpaangani, siqiniq nuiliqtillugu iluvirmuaqput.

³ Immingnut uqaqatigiiglutik, “Kinaup ujaragjuaq aksakaqtinniarmagu iluviup paanganit?”

⁴ Takugialiramik, takulauqput ujaragjuaq aksakaqtitaujariiqtuviniq iluvirmit; taanna ujaragjuaq angijummarialuungmat.

⁵ Iluvirmut itiramik, takullutik angummik inuusuktumik iluviup taliqpiani iksivajumik, annuraaqsimajumik qakuqtamik; taakkua quaqsaaqput.

⁶ Taassuma uqautivait, “Quaqsaarasi; Jiisusi Naasariitimiuq kikiaktuqtaulauqtuq qiniqpisiuk. Makisimaliqpuq, tamaaniinngilaq; takuliqsiuk timingata inigilauqtanga.

⁷ Maanna ilinniaqtinginnut uqariaqtulirissi Piitturuusimullu sivunissinni Galiliamuarniaqpuq; taikani takuniaqpasi, taimaak uqautilaurmasi.”

⁸ Arnait tavvanngat anivut ullaksillutik iluvirmit; sajungnirmut kamaniarnirmut tikitaugamik; tamatuminga uqalaunngilat kinamulluunniit, kappiasuliramik.

Tavvunga aglaksimajutuqait isuqalauqtuviniuvut Jiisusiup Miari Maaktaliinimut Saqqinninga

⁹ Jiisusi tuqungajunit makinnami pinasuarusiup ullungita sivulliqpaangani, sivulliqpaamik saqqilauqpuq Miari Maaktaliinimut, taassumunga anirnirlungnik 7-nik anititsivigilauqsimajaminut. Tavva arnait Piitturuusimuaqput ilannarijanginnullu, uqarlutik naittumik uqaujjaujjutigiqqaujamingnik.

¹⁰ Taanna uqariaqtuqpuq Jiisusiup ilagiqattalauqtanginnut, qiksaavigjuaqtunut qiajunullu. Tamatuma kinguningagut, Jiisusi nangminiq tilisilauqpuq ilinniaqtiminik siqiniup nuivianit siqiniup nipivianut tikillutik. Tamatuminga uqausiqarlutik ijiqsimalauqtumik inuusiqarnaqtumik piulijaunirmiglu isuqanngittumut.

¹¹ Taakkuali tusaramik Jiisusiup makisimaninganik takuqqaunirarmagu, ukpinngilat.

Jiisusiup Marruungnut Ilinniaqtiingnut Saqqinninga

¹² Tamatuma kinguningagut Jiisusi saqqikkivuq asianik tauttuqarluni ilinniaqtiingnut marruungnut, taakkuak pisuktillugik nunaup asianut iglugasaqanngittukkut.

¹³ Taakkuak utiramik ilamingnut tamatuminga uqausiqaqpuuk, taakkuali ukpirusunnginnivut.

Jiisusiup Ilinniaqtiminut 11-nut Saqqinninga

¹⁴ Kinguningagut Jiisusi saqqikkivuq ilinniaqtiminut 11-nut niriqatigiiktillugit; Jiisusiup suakpait ukpinngimmata uummatingillu sitijuullutik, ukpirusulaunngimmata Jiisusi uumaliqtillugu takulauqtut uqausinginnik.

¹⁵ Jiisusiup uqautivait, “Ailirissi pinnguqtitausimajunut tamainnut ajuriqtuilusi uqausirnik tusaruminaqtunik.

¹⁶ Nalliat ukpiqtuq paaptitauluni taanna piulijaujumaaqpuq; nallialli ukpinngippat taanna iqqaqtuqtaujumaaqpuq.

¹⁷ Uvannut ukpiqtut nalunaikkutaqarumaaqput makuninga; atira aturlugu anirnirlungnik anititsiqattarumaaqput; uqausirnut nutaanut uqallaqattarumaaqput;

¹⁸ quglugianik tuqunnaqtulingnik tigusijunnarumaaqput, tuqunnaqtumiglu imiraluarutik qanuiliqatarumaanngilat; qanimajut patimmikpagit qanuittunniiqattarumaaqput.”

Jiisusiup Qilaliaqtitauninga

¹⁹ Tavva Ataniq Jiisusi, taakkununga uqallagiirami, qilaliaqtitauvuq, Guutiup taliqpianut ingitsaqturluni.

²⁰ Ilinniaqtit ajuriqtuijaqtuqput namutuinnalimaaq, Ataniup pinasuaqatigivait ajuriqtuiningita suliningit nalunaikkutaqalauqput kamanaqtulinikkut pinasuaqtangitigut.