ᒫᑯᓯᐅᑉ ᐊᒡᓚᖏᑦ 15 - Aglait Ijjurnaittut

Jiisusiup Saanngajauninga Pailaatuusiup Saangani

¹ Ullaangulirmat, tunirrusiqtitsijit angajuqqaangit katimaqatiqaliqput Juutit angajuqqaanginnik piqujaniglu ilisaijinik, iqqaqtuijilimaaniglu. Jiisusi qilaksuqpaat, aullarutillugu, Pailaatuusimut aittuutigivaat.

² Pailaatuusiup Jiisusi apirivaa, “Juutit angajuqqaarjuarivaatit?” Jiisusiup kiuvaa, “Tavva uqariiqputit.”

³ Tunirrusiqtitsijit angajuqqaangita Jiisusi pasinasuaqpaat sunatuinnarnut ajjigiinngittunut.

⁴ Pailaatuusiup tavva apirikkanniqpaa, “Kiujjutiksaqanngilatit qanutuinnaq amisunik pasijaunasungnirnut?”

⁵ Jiisusi suli kiunngilaq, tavva Pailaatuusi angijumik kamaniaqpuq.

Jiisusiup Tuqutaksannguqtitauninga

⁶ Qaangiqtauvik nalliutijaraangat, Pailaatuusi piusiqaqpakpuq tigujausimajut ilangannik anititsivagluni, inuit anititaukujangannik.

⁷ Taissumani tigujausimajuqalauqpuq Parapaasimik atilingmik taanna tigujaulauqtuq inungmik tuqutsilaurmat pijaarillutik pirajaktualuutillugit.

⁸ Inugasagjualli Pailaatuusimuarlutik apirilauqput pijumajamingnik piusirisuunganik atuqtitaujumallutik.

⁹ Tavva Pailaatuusiup uqautivait, “Juutit angajuqqaarjuangannik aullaqtitsiquvisinnga?”

¹⁰ Qaujimatsiaraluarluni tunirrusiqtitsijit angajuqqaangit Pailaatuusimuarujjilaurmata Jiisusimik saanngajatuujumanirmut.

¹¹ Tunirrusiqtitsijit angajuqqaangit inugasagjuanik isummiqtuilauqput Parapaasimik pijumangaaqullugit taanna anititaungaaqullugu.

¹² Pailaatuusi inungnut uqakkannirivuq, “Qanurli uvannut piniarviuquvisiuk Juutit angajuqqaarjuangannik taijasi?”

¹³ Inuit qaigalaarliqput, “Kikiaktuqtauli!”

¹⁴ Pailaatuusiup apirivait, “Sungmat, qanuq piunngittumik pisimangmat?” Inuit nipiqquqtusigiakkannirlutik qaigalaaliqput, “Kikiaktuqtauli!”

¹⁵ Pailaatuusi, inugasagjuanik naammagijaujumagami, Parapaasi anitippaa tigujausimavingmit; Jiisusi tiigaqtuqtauqulaurlugu, aittuutigivaa kikiaktuqtauqullugu.

Unataqtuksait Jiisusi Mitautigivaat

¹⁶ Tavva unataqtuksait Jiisusi aulatsijiup iglurjuangata aniirvinganuarutivaat, unataqtuksalimaallu ilagijatik tavvunga qaiquvait.

¹⁷ Jiisusi uligjuamik aupallariktumik atitippaat; niaquutiksanganiglu kakillautilingnik pirraivut, Jiisusiup niaquanut ilivaat.

¹⁸ Nilliutiqattaliqpaat: “Niqtuqtauli Juutit angajuqqaarjuangat!”

¹⁹ Niaquagut qijungmut sullulingmut anauqattapaat, tivvuluglugu, saanganut siiqquqput, ukuvigillugu.

²⁰ Mitautigijariiramijjuk, uligjuaq aupallariktuq piiqpaat annuraanginnik nangmininginnik atitikkivaat. Tasiuqpaat tavvanngat kikiakturiaqtulirlugu.

Jiisusiup Kikiaktuqtauninga

²¹ Aqqutaani katisivut, nunalingnut tikiliqtumik, unataqtuksaillu isumasiunngitsiarlugu agjaqsitippaat Jiisusiup sanningajuliksanganik; taanna Saimuunimik atiqaqpuq Sairinimiutaq, Aliksaanturiup Ruupasiullu ataatanga.

²² Jiisusi qaqqamuarutivaat Guulgaatamut, taassuma qaqqaup atinga tukilik, “Niaquviniq.”

²³ Tavvani imiqtitaunasuaqpuq uainimik ilaqaqtumik muuramik; Jiisusiulli imirumanngilaa.

²⁴ Kikiakturiiramijjuk, annuraangit, nalausaarutimut pinnguarutigillugit pitaaqtugarivait.

²⁵ Ullaakut 9-muaqtillugu, Jiisusi kikiaktuqtaulauqpuq.

²⁶ Pasiksirutimingnik nalunaiqsinasuarlutik titiraqsimajuqalauqpuq imaak: “Juutit angajuqqaarjuangat.”

²⁷ Unataqtuksait kikiaktuilaurivut angutiingnik marruungnik pirajaangnik, aippaa taliqpianut aippaalu saumianut. [

²⁸ Taimailiuqtillugit Guutiup uqausingit nalautsilauqput imailijut, “Piunngittulijunut ilaliujjauvuq.”]

²⁹ Inuit sanningajuliup saniaguuqtut, niaqurmingnik iliqitamaarlutik uqaqput, “Takugit! Tuksiarvigjuarmik siqumitsinialauqtutit sanangmilugu ullunik pingasunik,

³⁰ atii ilingnik piulilirit, sanningajulingmit aqqarlutit!”

³¹ Tunirrusiqtitsijittauq angajuqqaangit piqujaniglu ilisaijit Jiisusimik mitautiqarivut immingnut uqaqatautillutik, “Asiminik piuliksilauqpuq; imminigli piulijunnanngilaq.

³² Atii Misaia, Isarialimiut angajuqqaarjuangat, maanna sanningajulingmit aqqarli, takuluta ukpilirniaratta.” Kikiaktuqtauqatigisimajanngiktattauq Jiisusi mitautigigivaak.

Jiisusiup Tuquninga

³³ Ulluq qitiraliqtillugu, nunalimaaq taaqturjuarmut tikitaulauqpuq ikarrat pingasut naallugit.

³⁴ Siqinngujaq 3-muaqtillugu Jiisusi nipiquqtulluni qaigalaaqpuq, “Ilui, Ilui, laama sapaqtaani? (Eloi, Eloi, lema sabachthani?)” Imaak tukilik, “Guutiga, Guutiga, suuq qimakpinga?”

³⁵ Inuit ilangit tavvaniittut tusaramijjuk uqaqput, “Takugit, Ilaijjamik qaiqujiliqpuq.”

³⁶ Ilangat tavvaniittuq ullaksivuq, Jiisusiup saanganuarluni puvaujarmik uainimik itsaktiqsimajumik tigusivuq, qijukutaamut sullulingmut ililluniuk Jiisusiup qaninganuaqpaa uqarluni, “Atii, takunnaliqta Ilaijja qainiarmangaat taassuminga aqqaqtitsigiaqturluni.”

³⁷ Jiisusi nipiqquqtulluni nilliqpuq, anirnangirluni.

³⁸ Tuksiarvigjuarmiittuq taalutarjuaq alikpuq marruulilluni, qulaanit ataanut tikillugu.

³⁹ Unataqtuksait angajuqqaangat sanningajuliup saangani nangiqtuq, takugami Jiisusiup tuqulirluni qanuinninganik. Uqaqpuq, “Sulijumik angut taanna Guutiup Irnirivaa!”

⁴⁰ Arnait tavvaniilaurivut sanningajuliup ungasigijangani takunnaaqtut, ukua, Miari Maaktaliini, Miari Jaimisiup nukaqsiup Juusiullu anaananga, Salumilu.

⁴¹ Taakkua Jiisusimik malilauqtut Galiliamiitillugu suli pijitsiraqpaglugu; arnaillu asingit amisut Jiisusimik malilaurmijut Jiruusalimmuaqtillugu tavvaniilaurivut.

Jiisusiup Iluviqtauninga

⁴² Unnuliqtillugu ulluq taanna upalungaijarviungmat, qaukpat Sapatiunialirmat,

⁴³ Juusipi Arimatiamiuq tikippuq, taanna pijunnatsiarninganut upigijautsiaqtuq ilagijaujuq iqqaqtuijiuvaktunut, taanna niriungniqarivuq Guutiup Ataniuvinganik, taanna sivuuranani Pailaatuusimualauqpuq, qinuvigillugu Jiisusiup timinganik.

⁴⁴ Pailaatuusi tusarami Jiisusiup tuqujariirninganik quaqsaaqpuq; unataqtuksait angajuqqaangannik qaiqujilluni apirillugu, Jiisusi tuqujariirmangaat.

⁴⁵ Unataqtuksait angajuqqaangatta uqausirijanginnik tusarami tuqunirarmagu, Pailaatuusiup Jiisusiup timinga Juusipimut pijauquliqpaa.

⁴⁶ Juusipi qallunaaqtamik immutiksamik naksarami, Jiisusiup timinga sanningajulingmit aqqaqtillugu immusiqpaa, iluviksamuarlugu taanna iluviksa qaiqtukut iluliuqtausimajuq; iluviup paanga ujaragjuarmik aksakaatitsilluni matuvaa.

⁴⁷ Miari Maaktaliinili, Miarilu Juusiup anaananga takunnaaqpuuk Jiisusiup timinga namut ilijaungmangaat.