ᒫᑯᓯᐅᑉ ᐊᒡᓚᖏᑦ 13 - Aglait Ijjurnaittut

Jiisusiup Uqausiqarninga Tuksiarvigjuap Asiruqtauniksanganik

¹ Tuksiarvigjuarmit anilirmat, ilinniaqtingita ilangatta uqautivaa, “Takugit, ajuriqtuiji, makua ujarait sanamaningit aksualuk takuminaqput, iglutsiavammarialuullunilu!”

² Jiisusiup uqautivaa, “Igluliarisimajut makkua sanamatsiaqtut takuvigit? Ujaraktangit atausirluunniit iniminiittuqarunniirumaaqput, tamarmitsiaq urrutitaujumaarmata.”

Iluangijjutiksat Akiraqtuqtauniillu

³ Qaqqaup qaangani iksivalirmat napaaqtulingmik paurngaqaqtuni uqsuksaqtalingnik tuksiarvigjuap nalilluangani, Piitturuusiup Jaimisiullu Juanasiullu Aanturuullu upakpaat taakkutuullutik.

⁴ Uqarlutik, “Uqautilauqtigut, qanga tamanna taimaittumaaqpa, sunanik nalunaikkutaqarumaaqpa tamatuma nalliutininga?”

⁵ Jiisusiup uqautivait, “Qaujisatsiarissi uiviirrijauqunasi.

⁶ Amisut atinni uvangaunirarlutit tikittumaarmata uqarlutik, ‘Taannauvunga!’ Amisut uiviirrijumaaqpait.

⁷ Unataqtunik tusaalirussi unataqtullu unikkausiuninginnik tusaqtitaugussi, kappiasungniarasi; tamakkua nalliutijariaqarmata, silarjuup naggataa suli nalliutinngilaq.

⁸ Inuuqatigiigjuat unatarumaaqput inuuqatigiigjuanut asimingnut, angajuqqauvit unatarumaaqput angajuqqauvingnut asimingnut; nunami nanituinnaq sajukpillaqattarumaaqpuq, kaangnaqturjuaqaqattarlunilu; tamakkua tavva irnisuktuup ikpingnialirningatut pigiaqpallialiqtut.

⁹ “Ilissi nangminiq qaujisarissi; tigujaujumaaqpusi iqqaqtuivingmut pititaulusi; aanniqsiqtaujumaaqpusi Juutit ukpirnirmut katimavinginni; aataujumaaqpusi aulatsijinut angajuqqaarjuanullu nangiqullusi saanginni uvanga pijjutigilunga, nalunaiqsijunnaqullusi taakkununga.

¹⁰ Uqausit tusaruminaqtut uqausiuqqaariaqaqput inuuqatigiigjuanut tamainnut.

¹¹ Tigujaugutsi iqqaqtuivingmullu aataugussi, isumajaarniarasi sivuningani qanuq uqariaqarniarmangaassi; uqausiqarissili tavvani nalliuttumi uqausiksaqtaaqtitaunirijassinnik, nangminiq uqallanginnassi, anirnirli ijjurnaittuq uqallakpuq.

¹² Inuit tigujautitsijumaaqput qatanngutimingnik tuqutauqullugit, ataataujut taimaittumaarivut qiturngamingnik, qiturngait akiraqtulirumaaqput angajuqqaamingnut tuqutautissilutik.

¹³ Tamainnut uumigijaulirumaaqpusi uvanga pijjutigilunga. Nallialli qinuisaarluni aniguijuq taanna piulijaujumaaqpuq.”

Takuminaitturjuaq Kappianaqtuq

¹⁴ “Takulirussi takuminaitturjuarmik nappaqtaujumik tamaani iniksarinngitangani (atuaqsijuup tukisiliuk qanuq tukiqarmangaat), tavva Juutiamiittut qimaajariaqalirumaaqput qaqqanut.

¹⁵ Igluup qaanganiittuq igluminut aqqariaqarumaanngilaq, sunatuinnarmik naksarumajaminik aiktlirasugluni.

¹⁶ Piruqsiivingmiittuq aiktliriaqarumaanngilaq uligjuaminik.

¹⁷ Kappianaqtualuujumaaqpuq arnanut nutaraksaqaqtunut qiturngalaalingnullu!

¹⁸ Tuksiarissi qimaaviksasi ukiumi nalliutiqunagu.

¹⁹ Ulluit taakkua kappianaqtut naliqarumaanngimmata silarjuap pigiarninganit Guutiup pinnguqtitsilaurninganit maannamut tikillugu, kinguningagut taimaak kappianaqtigijumik pitaqarumaanngilaq.

²⁰ Ataniup ulluit naigligiarnianngippagit, inulimaat piulijaujuqarajanngilat; niruaqsimajanili pijjutigillugit, ulluit taakkua naigligiaqsimavait.

²¹ “Nalliannut uqaujjauguvit, ‘Takugit, una tavva Christuusi!’ Uvvalu, ‘Takugit, Christuusi taika!’ Ukpiriniarasigik.

²² Christuusiuniraqtut sulinngittut, nalauttaijuuniraqtullu sulinngittut saqqirumaarmata nalunaikkutarnik saqqititsijumaaqput kamanaqtulinirniglu, tammaqtissilutik, aglaat niruaqtausimajut ajurnanngippata tammaqtinnasuarlugit.

²³ Qaujisatsiarissi; tamakkuninga tamainnik uqautivassi suli tamakkua nalliutiqqaaqtinnagit.”

Inuup Irningata Tikinninga

²⁴ “Ulluit taakkua kappianaqtut kingurngattigut, siqiniq taaqsijumaaqpuq, taqqirlu qaumajunniirumaaqpuq,

²⁵ ulluriallu qilangmit katagarumaaqput, qilangmi pijunnarnit aulatitaujumaaqput.

²⁶ Tavva Inuup Irninga takujumaaqpaat nuvujatigut aqqaqtuq pijunnarnirjuaqarluni niqturnarnirjuaqarlunilu.

²⁷ Taassuma aingilit tilijumaaqpait, katiqsuiqullugit niruaqsimajanginnik nunarjuap anuraarvigivaktanginnit sitamanit, nunarjuap isuanit qilaup isuanut.”

Napaaqtumit Pigilingnik Paurngalingmit Ilinniarutiksaq

²⁸ “Napaaqtuup pigilingnik paurngaliup ajuriqturlisi ilinniarutiksassinnik: avalangajungit uummarutsiaraangamik pirurviuliqpakput uqaujaqalirlutiglu, tavva qaujivakpusi aujaujariaktlilirmat.

²⁹ Taimaaktauq, tamakkua uqausirijakka takulirutsigik pivallialiqtut, tavva qaujimaniaqpusi qanittuulirmat isiqtarvingmiilirlunilu.

³⁰ sulijumik uqautivassi, maanna inuujut nungulauqqaaqtinnagit tamakkua tamarmik nalliutijumaaqput.

³¹ Qilaglu nunalu nungujumaaqpuuk, uqausikkali nungujumaanngilat.”

Nalliannut Qaujimajaunngilaq Ulluq Ikarrarluunniit

³² “Ullup tamatuma nalliunninga ikarrarluunniit nalliannut qaujimajaunngilaq, aingilit aglaat qilangmiittut, Irniulluunniit qaujimannginnivaa, Ataataup kisimi qaujimavaa.

³³ Qaujimanasuatsiarissi, qaujisatsiarlusi; qanga nalliutijumaarmangaa qaujimanngginnassiuk.

³⁴ Angutitut aullaqtutut taimaittumaaqpuq, angirraminik qimailirami pijiminik kamajiutitsijutut, taakkua atunit pinasuariaqaqtanginnik uqautitsiaqpait, ukkuamik qaujisaqtiuniaqtuq qaujisatsiaquvaa.

³⁵ Taimaimmat qaujisatsiarissi, igluup angajuqqaangata tikivviginiaqtanga qaujimannginnassiuk, unnukkut tikituinnariaqarmat, uvvalu unnualluakkut tikituinnariaqarluni, uvvalu qaummaliqtillugu angutiviap nillirvingani, uvvalu ullaannguqtillugu.

³⁶ Tavvainnaq tikikallakpat siniktillusi tikitauqunasi.

³⁷ Ilissinnut uqausirijara tamainnut uqaqpara: iqqumattiarissi.”