ᒫᑯᓯᐅᑉ ᐊᒡᓚᖏᑦ 11 - Aglait Ijjurnaittut

Jiisusi Jiruusalimmut Isiqtillugu Niqtuqtaummaringninga

¹ Jiruusalimmut tikippallialiqtillugit, nunalit Pitpaigimiut Pitanimiullu qanigijaaniillutik, Qaqqamuaqput Napaaqtulingmut uqsuksaujunnaqtunik paurgaqasuunik, Jiisusiup ilinniaqtiingni marruk tilivaak sivulliuqullugik,

² uqautillugik, “Ikkununga nunalingnualaurissik, tavvunga tikikkussik takuniaqpusik siutiqquqtujuup nurranganik ipiqsimajumik, kinamulluunniit ikimaviulauqsimanngittumik; taanna ipiillugu tamaunga qaijjutiniaqpasik.

³ Apirijaugussigli sungmat taimailiurmangaassik, uqautiniaqpasik, ‘Ataniup aturiaqarmagu utiqtittautiginiaqtanga aturiiruniuk.’”

⁴ Taakkuak ilinniaqtiik nunalingnuaqpuuk, takullutik siutiqquqtujuup nurranganik igluup paangata saniani ipiqsimajumik; taassumingali ipiitsiliqtillugik.

⁵ Tavvaniittunut apirijauvuuk, “Sungmanuna siutiqquqtujuup nurranga ipiippisikkuk?”

⁶ Taakkuak kiuvuuk Jiisusimut uqausiuqujauqqaujunik; taakkuak qanuisarunniiqput kajusituinnaqujilirlutiglu.

⁷ Taanna siutiqquqtujuup nurranga Jiisusimuarutivaak, uligjuamingnik qaanganuaqsillutik, Jiisusi qaanganut ikivuq.

⁸ Unuqtullu uligjuamingnik aqqutimut isivitsivut, ilangilli napaaqtuit avalangajunginnik nakatsillutik tamaunga aqqutimuaqqaivut.

⁹ Inuit Jiisusiup sivuninganiittut, maliktullu qaigalaasivut, “Huusaana! Niqtuqtauli Ataniup atingani tikittuq!

¹⁰ Guutiup saimmarliuk Taivitiup sivulitta angajuqqauvingata tikititauninga, huusaana niqtuqtauli quttingniqpaangujuq!”

¹¹ Jiisusi Jiruusalimmut tikippuq, tuksiarvigjuamut itirluni; iluunnatsianganiglu qimirruaqpuq, unnukpallialirmat, Pitanimuaqpuq ilinniaqtini 12 ilagillugit.

Jiisusiup Napaaqtumik Pigilingnik Pirurviukkanniqujijunniirninga

¹² Qautilluguli, Jiruusalimmut utilirlutik Pitanimit, Jiisusi kaaliqpuq.

¹³ Napaaqtumik pigilingnik paurngaliksamik takugami ungasiktumiitillugu suli, uqaujangit piruqsimatsialiqtunik, upakpaa paurnganik pitaqarmangaat takujaqturlugu, upakkamiuk takuvaa, uqaujaqatuinnaqtuq, paurngaqarviksanga suli naammaksisimanngimmat.

¹⁴ Jiisusi napaaqtumut uqaqpuq, “Ilingnit paurnganik niriviulauqsimaniarunniiqputit.” Ilinniaqtingita tusaqpaat taimaak uqaqtillugu.

Jiisusiup Tuksiarvigjuamuarninga

¹⁵ Jiruusalimmulli tikinnamik, Jiisusi tuksiarvigjuamuaqpuq tavvanilu niuviqtut niurrutiqaqtullu aniuraqtippait, kiinaujaniglu tauqsiijut saangit urrutillugit tuuvinik niurrutilit iksivautangit urrutikkivait.

¹⁶ Sunatuinnamik agjaqsiqujinngilaq tuksiarvigjuakkut.

¹⁷ Inuit ajuriqtuqpait uqautillugit, “Guutiup uqausinginni titiraqsimangmat, ‘Igluqutiga taijaujariaqaqpuq tuksiariaqturvingmik inuuqatigiigjuanut tamainnut.’ Ilissili tigliktinut inigijautiliqpasi!”

¹⁸ Tunirrusiqtitsijit angajuqqaangit piqujaniglu ilisaijit tamatuminga tusaramik pijjutiksaqsiuliqput tuqutsijumallutik; kisianili kappiagivaat, inugasagjuat ajuriqtuutigijanginnik kamaniaqattarmata.

¹⁹ Unnulirmalli tavvanngat iglugasangnit aullaqput.

Napaaqtumik Pigilingnik Paurngalingmik Ilinniarutiqarniq

²⁰ Qautillugu ullaakkut saniqquliramijjuk napaaqtuq pigilingnik paurngaliksaq takuvaat, panimmariliqtuq aglaat amaaminut.

²¹ Piitturuusi iqqaumagami qanuililaurmangaat Jiisusi taassumunga napaaqtumut, uqautivaa, “Raapai, takugit! Napaaqtuq pigilingnik paurngaliksaq pirurviuniarunniirniralauqtait panirniqpuq.”

²² Jiisusiup kiuvait, “Guutimut ukpirissi.

²³ Sulijumik uqautivassi, nalliat qaqqamut uumunga uqaqpat, tavvanngat qangattarit tariurmullu kataglutik, uummatimigut qulangilluni, ukpirlunilu uqausirijami taimainniarninganik, tavva taimailirniaqpuq.

²⁴ Taimaimmat uqautivassi, tuksiarussi sunatuinnarmik pijumajaqarlusi, ukpirissi pijumajasi pigassiuk, tavva tunisiviuniaqpusi.

²⁵ Nangirlusili tuksiarussi, isumagijunnairviqarissi inuuqatissi akauksanngigjutiksaqarussi; Ataatassinnuttauq qilangmiittumut isumagijunnairviuqullusi ajuqtulinissinnit. [

²⁶ Inuuqatissinnik isumagijunnairviqanianngikkussi Ataatasittauq qilangmiittuup isumagijunnairviginianginnivaasi ajuqtulinisinit.]”

Jiisusiup Pijunnaqtitauninganut Apiqquti

²⁷ Jiruusalimmut utikkannirivut. Tuksiarvigjuakkut pisuliqtillugu, tunirrusiqtitsijit angajuqqaangit piqujaniglu ilisaijit, angajuqqaallu upakpaat.

²⁸ Apirillugu, “Nakit pijunnarniqaqtitaullutit tamakkuninga pinasuarunnaqpit? Kialu tamatuminga pijunnarnirmik tunisivigisimavaatit?”

²⁹ Jiisusiup uqautivait, “Apirijumagivunga ilissinnik apiqsuutigijannik; kiujunnarussinnga, tavva nakit pijunnarniqaqtitaullunga tamakkuninga pinasuaqattarmangaarma uqautiniaqpassi.

³⁰ Uqautilauqsinnga, Juanasiup paaptijjutinga Guutimit piva, uvvalu inungnit?”

³¹ Taakkuali immingnut uqaqatigiiliqput, “Uqarutta, ‘Guutimit pivuq,’ tavva uqautiniaqpaatigut, ‘Sungmalli Juanasi ukpirilaunngippisiuk?’

³² Uqaruttali, ‘Inungnit pinirarlugu—’” inungnik sivuuravut, inulimaat Juanasimik nalauttaijullariusuriksimata.

³³ Taimaimmat Jiisusi kiuvaat, “Nakit pingmangaat qaujimanngilavut.” Tavva Jiisusiup uqautivait, “Uvangattauq uqautiniannginnivassi, nakit pijunnarniqaqtitaullunga pinasuaqattarmangaarma.”