ᒫᑯᓯᐅᑉ ᐊᒡᓚᖏᑦ 10 - Aglait Ijjurnaittut

Jiisusiup Ajuriqtuininga Katititausimajuk Avillaringningata Miksaanut

¹ Tavvanngat aullarami Juutiap nunanganuaqpuq Kuup Juartaniup akianiittumut, inugasagjuat tavvunga katilirivut; ajuriqtuqpait, piusirivaktamitut.

² Paarisit upakpaat uukturumallugu apirivaat, “Piqujatinni angut nuliaminik avitsillarigunnaqtitauva?”

³ Kiuvait, “Qanuq Muusisiup piquvaasi?”

⁴ Taakkua kiuvaat, “Muusisi pijunnaqtitsilauqpuq angut avitsigutinik titirarluni, nuliaminik avitsijunnaqtitsilluni.”

⁵ Jiisusiup uqautivait, “Muusisi taimaak piqujamik titiralauqpuq uummatisi sitijualuuninga pijjutigillugu.

⁶ Pigiarninganilli sunatuinnait pinnguqtitauliqtillugit, ‘Guutiup angut arnarlu pinnguqtippaak.

⁷ Taimaimmat angutiup ataatani anaananilu qimangniaqpaak nuliani katimaangarumalugu,

⁸ taakkuaglu marruuk timikkut atausiulirniaqpuuk.’ Marruujunniirlutik uvinikkut atausinnguqpuuk.

⁹ Tavva taimaimmat Guutiup katititangik, inuup avititaksarinngilaak.”

¹⁰ Iglumuaramik ilinniaqtit Jiisusimut tamatuminga apiqsuutiqaliqput.

¹¹ Jiisusiup uqautivait, “Angut nuliaminik avitsillariktuq asianik nulianigluni, taanna nuliaminik asinniaqpuq nuliariqaalautanga pijjutigillugu.

¹² Taimaaktauq arnaq uiminik avitsillariktuq asianik uinigluni, taanna uigilauqtaminiktauq asiniarivuq.”

Jiisusiup Nutaqqanik Saimmaqtitsininga

¹³ Inuit nutarakulungnik Jiisusimut aatsivut, patimmijauqullugit taassumunga; ilinniaqtingitali iniqtiqpait.

¹⁴ Jiisusiulli tamanna qaujigamiuk, akauksanngimmariliqpuq, ilinniaqtini uqautivait, “Nutarakuluit uvannut qailit, agvianngillusiuk; taakkua Guutiup Ataniuvinganik piqarmata.

¹⁵ Sulijumik uqautivassi, nalliat Guutiup Ataniuvinganik nutarakuluktitut ilaliuqsinngittuq tavvunga itirnianngilaq.”

¹⁶ Nutarakuluit iqillugit patimmillugillu saimmaqtipait.

Angut Ajuqsanngittuq

¹⁷ Aullaliqtillugu, angummit ullaktumit upaktauvuq saanganut paammaktirluni, Jiisusi apirivaa, “Ajuriqtuiji piujutit, qanuq pinasuaqtuksauvunga, inuusirmik nungusuittumik kingurngujjiqullunga?”

¹⁸ Jiisusiup uqautivaa, “Sungmat piuniraqpinga? Piujuqanngilaq Guutikisimi piujutuuvuq.

¹⁹ Piqujanik qaujimavutit: ‘Inuaqtuksaunngilatit, nuliarijarnik uigijarnigluunniit asinniaqtuksaunngilatit, tigliktuksaunngilatit, pasijaksaruqtitsinasuaqtuksaunngilatit sulinngittumut, uiviirriksijuksaunngilatit, ataatangnik anaanangniglu upigusutsiaqtuksauvutit.’”

²⁰ Taassuma uqautivaa, “Ajuriqtuiji, tamakkua surusiuninnit taimanngat malilauqpakka.”

²¹ Jiisusiup takusarlugu nagligilluniuk uqautivaa, “Atausirmik suli pinngilatit; ailutit piqutingnik niurrutiqariaqturit, kiinaujaqtaatillu ajuqsaqtunut tunirrutigilugit, tavva piksaqatsiarniaqputit qilangmi; atii qailirit, maliglunga.”

²² Taassuma tamanna tusaramiuk kiinarliqpuq, tavvanngat qimaruutiliqpuq qiksaammarigluni; ajuqsanngitturjuangugami.

²³ Jiisusi qiviarluni ilinniaqtini uqautivait, “Ajuqsanngittunut pijarninngittuuniaqpuq Guutiup Ataniuvinganut isiriaksaq!”

²⁴ Ilinniaqtingit tamatuminga tusaramik quaqsaaqput. Jiisusiup uqautivait, “Qiturngakka, ilaak pijarninngittuungmat Guutiup Ataniuvinganut isiriaksaq!

²⁵ Kaamili isirunarniqsaugajaqpuq miqqutiup ijingagut ajuqsanngittuup isirasuarnirigajaqtanganit Guutiup Ataniuvinganut.”

²⁶ Angijurjuamik quaqsaammarikput, uqautillugu, “Kinali tavva piulijaujunnarniaqpa?”

²⁷ Jiisusiup takusarlugit uqautivait, “Tamanna inungnut ajurnaqpuq, Guutimulli ajurnanngilaq; sunalimaat Guutimut ajurnanngimmata.”

²⁸ Piitturuusi uqaqpuq, “Takugit, sunatuinnavut tamarmik qimalauqpavut ilinnik malilirluta.”

²⁹ Jiisusi uqaqpuq, “Sulijumik uqautivssi, nalliat igluminik qimaijuq, uvvalu qatanngutiminik, uvvalu najaminik, anaanaminik ataataminigluunniit, qiturngaminigluunniit, nunaminigluunniit, uvanga pillunga uqausillu tusaruminaqtut pijjutigilugit,

³⁰ taanna anginiqsanik pikkannirniaqpuq tamaani inuutillugu 100-iqtulluaqtunik, iglunik, qatanngutiniglu, najangniglu, anaananiglu, qiturnganiglu, nunaniglu, akiraqtuqtaunirmiglu piqasiujjiluni, pijumaaqtumilu inuusirmik nungusuittumik pijumaaqpuq.

³¹ Unuqtut sivulliit kingulliujumaaqput, kingullillu sivulliujumaarlutik.”

Jiisusiup Tuqutauniksaminik Uqausiqarningata Pingajuat

³² Jiruusalimmut aqqutingagut pisulirivut, Jiisusi ilinniaqtit sivuninganniippuq; ilinniaqtit quaqsaaqsimavut, inuit ilinniaqtingita kinguningani maliktut kappiasulirlutik. Ilinniaqtini 12 aqqummit sanirvaktillugit, uqautivait qanuiliurviulaarnirminik.

³³ Uqautillugit, “Takugit, tappaunga Jiruusalimmut ailiqpugut; Inuup Irninga tunijaujumaaqpuq tunirrusiqtitsijit angajuqqaanginnut, piqujaniglu ilisaijinut, taakkua tuqutaksannguqtittumaaqpaat, Juutiunngittunut tunilugu;

³⁴ taakkua mitautigijumaaqpaat, tivvuluglugu, tiigaqturlugu, tuqullugulu; ulluilli pingajuanni makilaaqpuq.”

Jaimisiup Juanasiullu Qinuningak

³⁵ Tavva Jaimisiup Juanasiullu Sipitiup irningikta Jiisusi upakpaak, uqautillugu, “Ajuriqtuiji, ilingnut pititaujumavuguk sunatuinnarmik qinuarijattinnik.”

³⁶ Jiisusiup uqautivaak, “Sumik uvannut piniarviujumagassik?”

³⁷ Taakkuak uqautivaa, “Ilingnut iksivajunnaqtitaulaarumavuguk, aippaa taliqpingni aippaalu saumingni, Ataniuvingni niqturnaqturjuami.”

³⁸ Jiisusiup uqautivaak, “Qinuarijassingnik qaujimanngilasik. Imiutimik imirniaqtannik imirunnaraluaqpisik? Uvvalu paaptitaujjutiginiaqtannut paaptitaujunnaraluaqpisik?”

³⁹ Taakkuak kiuva, “Taimaak pijunnaqpuguk.” Uqautivaak, “Imiutimik imiriaqaqtannik imirniaraluaqpusik; paaptitaujjutiginiaqtannullu paaptitaujunnarniaraluaqpusik;

⁴⁰ kisianili taliqpinni sauminniluunniit iksivajuksanik aaqqiijunnanngilanga, atuinnaruqtausimajulli kisimi tavvani iksivajumaarmata.”

⁴¹ Ilinniaqtit qulit tamatuminga tusaramik, Jaimisimik Juanasimiglu akauksarunniiqput.

⁴² Jiisusiup imminut qaiqullugit uqautivait, “Qaujimavusi angajuqqaangujut Juutiunngittuni inuqutimingnut pijunnarniqarmata, angajuqqaangit pijunnarnirjuaqarlutik inuqutiminut.

⁴³ Taakkuatitut akunnassinni piniarniqaqtuksaunngilasi; nallisi angajuqqaangujumajuq taanna ilissinnik pijitsiqtuksauvuq,

⁴⁴ nallisi akunnassinni sivulliqpaujumajuq taanna tamainnut pijikataarijaujuksauvuq.

⁴⁵ Aglaat Inuup Irninga tikisimanngimmat pijitsiqtaujaqturluni pijitsiriaqtuqpurli, inuusirminiglu tunisilluni amisut akiliijjujjaujjutiksanginnut.”

Jiisusiup Paaqtimiusimik Tautuliqtitsininga

⁴⁶ Pisulirmigamik Jirikuumut tikipput; tavvanngat aullalirmata inugiakturjuat ilagillugit, tautunngittuq aqqutiup saniani iksivavuq kiinaujamik qinuji, Paartimiusimik atilik, Timiusiup irninga.

⁴⁷ Taanna tusarami Jiisusi Naasariitimiumik aqqusaaliqtumik, qaigalaaliqpuq uqarluni, “Jiisusi! Taivitiup irninga, nikaginnga!”

⁴⁸ Unuqtunut iniqtiqtauvuq, nipiqaqunagu; taannali qaigalaariakkannituinnaqpuq nipiqquqtugiakkannirluni, “Taivitiup irninga, nikaginnga!”

⁴⁹ Jiisusi nuqqarluni uqaqpuq, “Qaiqujaulaurli.” Tavva tautunngittuq qaiquliqpaat uqautillugu, “Quviasulirit; nikuvillutit, taassuma qaiqulirmatit.”

⁵⁰ Uligjuani igillugu nikuvikauqtuqpuq Jiisusimuarluni.

⁵¹ Jiisusiup uqautivaa, “Uvannuut qanuiliurviujumavit?” Tautunngittuup uqautivaa, “Ajuriqtuiji, tautulikannirumavunga.”

⁵² Jiisusiup uqautivaa, “Aulalirit, ukpirnivit aaqqikpaatit.” Tavvainnarlu takujunnaqsivuq malilirlugulu.